ವರ್ಷಗಳಿಂದಲೂ ಪತಿಯಿಂದ ಥಳಿಸಲ್ಪಟ್ಟಿದ್ದ ಭಾರತೀಯ ಮಹಿಳೆಯ ಆತ್ಮಹತ್ಯೆ: ಅಮೆರಿಕದಲ್ಲಿ ತೀವ್ರ ಆಕ್ರೋಶ

ಹೊಸದಿಲ್ಲಿ,ಆ.6: ಪುತ್ರಿಯರಿಗೆ ಮಾತ್ರ ಜನ್ಮ ನೀಡಿದ್ದಕ್ಕಾಗಿ ವರ್ಷಗಳಿಂದಲೂ ಪತಿ ನೀಡುತ್ತಿದ್ದ ಹಿಂಸೆಯಿಂದ ಬೇಸತ್ತಿದ್ದ ಭಾರತೀಯ ಮೂಲದ ಮಹಿಳೆ ಆತ್ಮಹತ್ಯೆಗೆ ಶರಣಾಗಿದ್ದಾಳೆ. ಆತ್ಮಹತ್ಯೆಗೆ ಮುನ್ನ ಆಕೆ ಇನ್ಸ್ಟಾಗ್ರಾಮ್ನಲ್ಲಿ ಹಂಚಿಕೊಂಡಿದ್ದ ವೀಡಿಯೊ ವೈರಲ್ ಆಗಿದ್ದು,ಅಮೆರಿಕದಲ್ಲಿ ತೀವ್ರ ಆಕ್ರೋಶವನ್ನು ಸೃಷ್ಟಿಸಿದೆ.

ಹರೆಯದ ಮಂದೀಪ್ ಕೌರ್ ವರ್ಷಗಳಿಂದ ಪ್ರತಿದಿನವೂ ಪತಿಯಿಂದ ಥಳಿತಗಳನ್ನು ತಾಳಲಾಗದೇ ನ್ಯೂಯಾರ್ಕ್ನಲ್ಲಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ವೀಡಿಯೊದಲ್ಲಿ ಕೌರ್ ಆತ್ಮಹತ್ಯೆ ಮಾಡಿಕೊಳ್ಳುವ ಮುನ್ನ ತನ್ನ ಮೇಲಿನ ಕೌಟುಂಬಿಕ ಹಿಂಸಾಚಾರವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟಿದ್ದಾರೆ.

‌

ವರ್ಷಗಳಿಂದಲೂ ನಿಂದನೆ ಮತ್ತು ಹಿಂಸೆಯನ್ನು ಸಹಿಸಿಕೊಂಡಿದ್ದೆ,ಆದರೆ ಇನ್ನು ಮುಂದೆ ಅದು ತನ್ನಿಂದ ಸಾಧ್ಯವಿಲ್ಲ ಎಂದು ಬಿಕ್ಕಿ ಬಿಕ್ಕಿ ಅಳುತ್ತಿದ್ದ ಕೌರ್ ವೀಡಿಯೊದಲ್ಲಿ ಹೇಳಿದ್ದಾರೆ. ಅವರ ಪತಿ ರಣಜೋಧಬೀರ್ ಸಿಂಗ್ ಸಂಧು ಟ್ರಕ್ ಚಾಲಕನಾಗಿದ್ದಾನೆ.

‘ನಾನು ಅತ್ಯಂತ ದಯನೀಯ ಸ್ಥಿತಿಯಲ್ಲಿದ್ದೇನೆ. ನಾನು ನನ್ನಿಂದ ಸಾಧ್ಯವಾದಷ್ಟು ಸಹಿಸಿಕೊಂಡಿದ್ದೆ,ಅದರೆ ದಿನವೂ ಹೊಡೆತಗಳನ್ನು ಸಹಿಸಲು ಇನ್ನು ಸಾಧ್ಯವಾಗುತ್ತಿಲ್ಲ. ಒಂದಲ್ಲೊಂದು ದಿನ ಆತ ಬದಲಾಗುತ್ತಾನೆ ಎಂಬ ಆಸೆಯಿಂದ ಎಂಟು ವರ್ಷಗಳಿಂದಲೂ ಆತ ನೀಡುತ್ತಿದ್ದ ಹಿಂಸೆಯನ್ನು ಸಹಿಸಿಕೊಂಡಿದ್ದೆ’ ಎಂದು ಕೌರ್ ವೀಡಿಯೊದಲ್ಲಿ ಹೇಳಿದ್ದಾರೆ. ಕೌರ್ ನಾಲ್ಕು ಮತ್ತು ಎರಡರ ಹರೆಯದ ಇಬ್ಬರು ಪುತ್ರಿಯರನ್ನು ಬಿಟ್ಟು ಮರಳದ ಲೋಕಕ್ಕೆ ತೆರಳಿದ್ದಾರೆ.

ಉತ್ತರ ಪ್ರದೇಶದ ಬಿಜ್ನೋರ್ ಜಿಲ್ಲೆಯ ನಿವಾಸಿಗಳಾದ ಸಂಧು ಮತ್ತು ಕೌರ್ 2015ರಲ್ಲಿ ಮದುವೆಯಾದ ಬಳಿಕ ಅಮೆರಿಕಕ್ಕೆ ವಲಸೆ ಹೋಗಿದ್ದರು.

ವೀಡಿಯೊದಲ್ಲಿ ಪಂಜಾಬಿಯಲ್ಲಿ ಮಾತನಾಡಿರುವ ಕೌರ್,ತಾನು ಆತ್ಮಹತ್ಯೆ ಮಾಡಿಕೊಳ್ಳುವಂತೆ ಪತಿ,ಅತ್ತೆ ಮತ್ತು ಮಾವ ಬಲಾತ್ಕರಿಸುತ್ತಿದ್ದಾರೆ. ತಾನು ಗಂಡು ಮಗುವನ್ನು ಹೆರಲಿಲ್ಲ ಎಂಬ ಕಾರಣಕ್ಕೆ ಪತಿ ತನ್ನನ್ನು ದ್ವೇಷಿಸುತ್ತಿದ್ದ ಎಂದು ನೋವು ತೋಡಿಕೊಂಡಿದ್ದಾರೆ. ‘ಅಪ್ಪಾ,ನಾನು ಸಾಯುತ್ತಿದ್ದೇನೆ.ದಯವಿಟ್ಟು ನನ್ನನ್ನು ಕ್ಷಮಿಸಿ ’ಎಂದು ಕೌರ್ ವೀಡಿಯೊದಲ್ಲಿ ತಂದೆ ಜಸ್ಪಾಲ್ ಸಿಂಗ್ರನ್ನು ಕೋರಿಕೊಂಡಿದ್ದಾರೆ.

ಸಿಂಗ್ ಉತ್ತರ ಪ್ರದೇಶ ಪೊಲೀಸರಲ್ಲಿ ಸಂಧು ವಿರುದ್ಧ ಆತ್ಮಹತ್ಯೆಗೆ ಕುಮ್ಮಕ್ಕು ನೀಡಿದ ಆರೋಪದಲ್ಲಿ ಪ್ರಕರಣವನ್ನು ದಾಖಲಿಸಿದ್ದಾರೆ. ನ್ಯೂಯಾರ್ಕ್ನಲ್ಲಿ ತನ್ನ ಬಂಧುಗಳು ಪೊಲೀಸ್ ಪ್ರಕರಣವನ್ನು ಅನುಸರಿಸುತ್ತಿದ್ದಾರೆ ಎಂದು ಅವರು ತಿಳಿಸಿದರು. ‘ನಮ್ಮ ಮೊಮ್ಮಕ್ಕಳ ಸುರಕ್ಷತೆಯನ್ನು ನಾವೀಗ ಬಯಸುತ್ತಿದ್ದೇವೆ. ಅವರಿನ್ನೂ ತಮ್ಮ ತಂದೆಯ ಬಳಿಯಲ್ಲಿದ್ದಾರೆ ’ಎಂದರು.

ತಮ್ಮ ಪುತ್ರಿಯ ಶೋಷಣೆ ಒಂದಲ್ಲೊಂದು ದಿನ ನಿಲ್ಲುತ್ತದೆ ಎಂದು ಆಶಿಸಿದ್ದೆವು ಎಂದು ಹೇಳಿದ ಸಿಂಗ್,‘ನಾವು ಒಮ್ಮೆ ಹಸ್ತಕ್ಷೇಪ ಮಾಡಿದ್ದೆವು,ಸಂಧು ಪತ್ನಿಯನ್ನು ಥಳಿಸುತ್ತಿದ್ದ ವೀಡಿಯೊದೊಂದಿಗೆ ನ್ಯೂಯಾರ್ಕ್ ಪೊಲೀಸರ ಬಳಿಗೂ ಹೋಗಿದ್ದೆವು. ಆದರೆ ಆತ ತಪ್ಪಾಗಿದೆ,ತನ್ನನ್ನು ಉಳಿಸು ಎಂದು ನನ್ನ ಮಗಳಲ್ಲಿ ಬೇಡಿಕೊಂಡಿದ್ದ. ಅವಳ ಇಚ್ಛೆಯ ಮೇರೆಗೆ ನಾವು ಅದಕ್ಕೆ ಹೆಚ್ಚು ಒತ್ತು ನೀಡಿರಲಿಲ್ಲ ’ ಎಂದರು.

ಕೌರ್ ಮೃತದೇಹವನ್ನು ಭಾರತಕ್ಕೆ ತರಲು ನೆರವಾಗುವಂತೆ ಸಿಂಗ್ ಕುಟುಂಬವು ಸರಕಾರವನ್ನು ಕೋರಿಕೊಂಡಿದೆ. ಸಂಧು ತನ್ನ ಪತ್ನಿಯನ್ನು ಥಳಿಸುತ್ತಿರುವ ಹಲವಾರು ವೀಡಿಯೊಗಳು ವೈರಲ್ ಆಗಿವೆ. ಒಂದು ವೀಡಿಯೊದಲ್ಲಿ ಮಕ್ಕಳು,ಅಪ್ಪಾ,ಅಮ್ಮನನ್ನು ಹೊಡೆಯಬೇಡಿ ’ಎಂದು ಆಕ್ರಂದನ ಮಾಡುತ್ತಿರುವುದು ಸ್ಪಷ್ಟವಾಗಿ ಕೇಳಿಸುತ್ತಿದೆ.

ತನ್ನ ಪತಿ ವಿವಾಹಬಾಹಿರ ಸಂಬಂಧಗಳನ್ನು ಹೊಂದಿದ್ದಾನೆ ಎಂದೂ ವೀಡಿಯೊದಲ್ಲಿ ಆರೋಪಿಸಿರುವ ಕೌರ್,ಆತನ ಕುಟುಂಬ ಈ ಬಗ್ಗೆ ಮಾತನಾಡುತ್ತಿಲ್ಲ,ಅವರು ಹಿಂಸಾಚಾರವನ್ನು ಉತ್ತೇಜಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ. ಸಿಖ್ ಸಮುದಾಯವನ್ನು ಮುಖ್ಯವಾಗಿಟ್ಟುಕೊಂಡು ಲೈಂಗಿಕ ಮತ್ತು ಕೌಟುಂಬಿಕ ಹಿಂಸೆಯ ಸಂತ್ರಸ್ತರಿಗಾಗಿ ಕಾರ್ಯ ನಿರ್ವಹಿಸುತ್ತಿರುವ ದಿ ಕೌರ್ ಮೂವ್ಮೆಂಟ್ ಇನ್ಸ್ಟಾಗ್ರಾಮ್ನಲ್ಲಿ ವೀಡಿಯೊಗಳನ್ನು ಶೇರ್ ಮಾಡಿಕೊಂಡಿದೆ.

There are collosal problems in our family & social structure which we conveniently ignore or deny to accept. #DomesticViolence against women is one such serious problem. Suicide by Mandeep Kaur a NRI Punjabi woman is a wake up call to accept the problem and fix it accordingly. pic.twitter.com/F8WpkiLCZY

— Gurshamshir Singh (@gurshamshir) August 5, 2022