2021ರಲ್ಲಿ ವಶಪಡಿಸಿಕೊಳ್ಳಲಾದ ನಕಲಿ ನೋಟುಗಳ ಪೈಕಿ 60%ದಷ್ಟು 2000ರೂ.ಯ ನೋಟುಗಳು: NCRB ವರದಿ

ಹೊಸದಿಲ್ಲಿ: 2021ರಲ್ಲಿ ವಶಪಡಿಸಿಕೊಂಡ ಎಲ್ಲಾ ನಕಲಿ ಹಣದಲ್ಲಿ ಸುಮಾರು 60% ₹ 2,000 ಮುಖಬೆಲೆಯದ್ದಾಗಿದೆ ಎಂದು ರಾಷ್ಟ್ರೀಯ ಅಪರಾಧ ದಾಖಲೆಗಳ ಬ್ಯೂರೋ (NCRB) ಸಂಗ್ರಹಿಸಿದ ಕ್ರೈಮ್ ಇನ್ ಇಂಡಿಯಾ 2021 ವರದಿ ಬಹಿರಂಗಪಡಿಸಿದೆ.

2021ರಲ್ಲಿ ವಶಪಡಿಸಿಕೊಂಡ ಒಟ್ಟು ₹20.39 ಕೋಟಿ ನಕಲಿ ಭಾರತೀಯ ಕರೆನ್ಸಿ ನೋಟುಗಳಲ್ಲಿ ₹12.18 ಕೋಟಿ ₹2,000 ಮುಖಬೆಲೆಯದ್ದಾಗಿದೆ.

2016ರಲ್ಲಿ ಹಳೆಯ ₹ 500 ಮತ್ತು ₹ 1,000 ನೋಟುಗಳನ್ನು ಸರ್ಕಾರ ರದ್ದುಗೊಳಿಸಿದ ನಂತರ ₹ 2,000 ಮತ್ತು ₹ 500 ಹೊಸ ನೋಟುಗಳನ್ನು ಪರಿಚಯಿಸಲಾಯಿತು. ನಕಲಿ ಭಾರತೀಯ ಕರೆನ್ಸಿ ನೋಟುಗಳ (ಎಫ್‌ಐಸಿಎನ್) ಚಲಾವಣೆಯನ್ನು ತಡೆಯುವುದು 2016 ರ ನೋಟು ಅಮಾನ್ಯೀಕರಣದ ಪ್ರಾಥಮಿಕ ಉದ್ದೇಶಗಳಲ್ಲಿ ಒಂದಾಗಿದೆ ಎಂದು ಸರ್ಕಾರ ಹೇಳಿತ್ತು.

ಇದೀಗ ಎನ್‌ಸಿಆರ್‌ಬಿ ಅಂಕಿಅಂಶಗಳು 2016 ರ ನಂತರ ನಕಲಿ ಹಣವನ್ನು ವಶಪಡಿಸಿಕೊಳ್ಳುವ ಸಂಖ್ಯೆಯಲ್ಲಿ ಹೆಚ್ಚಳವಾಗಿದೆ ಎಂದು ತೋರಿಸಿದೆ.

2016 ರಲ್ಲಿ ₹ 15.92 ಕೋಟಿ ಮೌಲ್ಯದ ನಕಲಿ ಕರೆನ್ಸಿ ವಶಪಡಿಸಿಕೊಂಡರೆ, 2017, 2018, 2019, 2020 ಮತ್ತು 2021 ರಲ್ಲಿ ₹ 28.10 ಕೋಟಿ, ₹ 17.95 ಕೋಟಿ, ₹ 25.39 ಕೋಟಿ, ₹ 92.139 ಕೋಟಿ ಮತ್ತು ₹ 20.39 ಕೋಟಿ ವಶಪಡಿಸಲಾಗಿತ್ತು. 2015ರಲ್ಲಿ ನೋಟು ಅಮಾನ್ಯೀಕರಣಕ್ಕೂ ಮುನ್ನ ₹15.48 ಕೋಟಿ ನಕಲಿ ಕರೆನ್ಸಿ ವಶಪಡಿಸಿಕೊಳ್ಳಲಾಗಿತ್ತು.

ನಕಲಿ ಹಣ

ಪುಣೆಯ ಮನೆಯಿಂದ ವಶಪಡಿಸಿಕೊಂಡ “ಚಿಲ್ಡ್ರನ್ ಬ್ಯಾಂಕ್ ಆಫ್ ಇಂಡಿಯಾ” ದಿಂದ ನೀಡಲಾದ ನಕಲಿ ಹಣವನ್ನು ವಶಪಡಿಸಿಕೊಂಡ ಕಾರಣ 2020 ರ ಮೊತ್ತದಲ್ಲಿ ಭಾರಿ ಹೆಚ್ಚಳವಾಗಿತ್ತು. ಜೂನ್ 10, 2020 ರಂದು, ಪೊಲೀಸರು ₹82.8 ಕೋಟಿ ಮೌಲ್ಯದ ನಕಲಿ ನೋಟುಗಳನ್ನು ವಶಪಡಿಸಿಕೊಂಡಿದ್ದರು. ಅದರಲ್ಲಿ ಸುಮಾರು ₹43 ಕೋಟಿ ₹2,000 ಮುಖಬೆಲೆಯದ್ದಾಗಿತ್ತು.

ಈ ಪ್ರಕರಣಕ್ಕೆ ಸಂಬಂಧಿಸಿ ಸೇನಾ ಅಧಿಕಾರಿ ಸೇರಿದಂತೆ ಆರು ಜನರನ್ನು ಬಂಧಿಸಲಾಗಿತ್ತು. ಆರೋಪಿಗಳು ಡಾಲರ್ ಬಿಲ್‌ಗಳನ್ನು ರೂಪಾಯಿಗೆ ವಿನಿಮಯ ಮಾಡಿಕೊಳ್ಳುವಾಗ ನಕಲಿ ಹಣವನ್ನು ಸೇರ್ಪಡೆಗೊಳಿಸಿ ಗ್ರಾಹಕರನ್ನು ವಂಚಿಸುತ್ತಿದ್ದರು ಎಂದು ಪೊಲೀಸರು ಪತ್ತೆಹಚ್ಚಿದ್ದರು.

₹ 500 ಮುಖಬೆಲೆಯ ₹ 6.6 ಕೋಟಿ ಮತ್ತು ₹ 200 ಮುಖಬೆಲೆಯ ₹ 45 ಲಕ್ಷ ಮೌಲ್ಯದ ನಕಲಿ ಹಣವೂ ಪತ್ತೆಯಾಗಿದೆ ಎಂದು 2021 ರ ವರದಿ ಹೇಳುತ್ತದೆ.

ಪಾಕಿಸ್ತಾನದ ಐಎಸ್‌ಐ ಉತ್ತಮ ಗುಣಮಟ್ಟದ ನಕಲಿ ಭಾರತೀಯ ಕರೆನ್ಸಿ ನೋಟುಗಳನ್ನು ಮುದ್ರಿಸಿ ಭಾರತೀಯ ಮಾರುಕಟ್ಟೆಗೆ ರವಾನಿಸುತ್ತಿದೆ ಎಂದು ಭಾರತ ಈ ಹಿಂದೆ ಆರೋಪಿಸಿತ್ತು.

ತಮಿಳುನಾಡಿನಲ್ಲಿ (₹ 5 ಕೋಟಿ) ಅತಿ ಹೆಚ್ಚು ನಕಲಿ ₹ 2,000 ನೋಟುಗಳನ್ನು ವಶಪಡಿಸಿಕೊಳ್ಳಲಾಗಿದೆ, ನಂತರದ ಸ್ಥಾನದಲ್ಲಿ ಕೇರಳ (₹ 1.8 ಕೋಟಿ) ಮತ್ತು ಆಂಧ್ರಪ್ರದೇಶ (₹ 1 ಕೋಟಿ) ರಾಜ್ಯಗಳು ಇವೆ ಎಂದು ವರದಿ ತಿಳಿಸಿದೆ.

ಭಯೋತ್ಪಾದನೆಗೆ ಧನಸಹಾಯ ಮತ್ತು ನಕಲಿ ಕರೆನ್ಸಿ ಪ್ರಕರಣಗಳ ಕುರಿತು ತನಿಖೆ ನಡೆಸಲು ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ಯಲ್ಲಿ ಗೃಹ ವ್ಯವಹಾರಗಳ ಸಚಿವಾಲಯವು ಈ ಹಿಂದೆ ಭಯೋತ್ಪಾದಕ ನಿಧಿ ಮತ್ತು ನಕಲಿ ಕರೆನ್ಸಿ ಸೆಲ್ ಅನ್ನು ರಚಿಸಿತ್ತು. ರಾಜ್ಯಗಳು ಮತ್ತು ಕೇಂದ್ರದ ನಡುವೆ ಭದ್ರತಾ ಏಜೆನ್ಸಿಗಳೊಂದಿಗೆ ಗುಪ್ತಚರ ಮತ್ತು ಮಾಹಿತಿಯನ್ನು ಹಂಚಿಕೊಳ್ಳಲು ಸರ್ಕಾರವು FICN ಸಮನ್ವಯ ಗುಂಪನ್ನು ಸಹ ಸ್ಥಾಪಿಸಿದೆ.