ಕ್ಷಯರೋಗ ಈಗಲೂ ಗಂಭೀರ ಆರೋಗ್ಯ ಬೆದರಿಕೆ

ಜಗತ್ತಿನ ಹೆಚ್ಚಿನ ಭಾಗಗಳಲ್ಲಿ, ಪ್ರಮುಖ ಸಾರ್ವಜನಿಕ ಆರೋಗ್ಯ ಸಮಸ್ಯೆಯಾಗಿ ಕ್ಷಯರೋಗವು ಮರುಪ್ರವೇಶಿಸಿದೆ. ಹೆಚ್ಚಿನ ಪ್ರಕರಣಗಳಲ್ಲಿ, ಎಚ್‌ಐವಿ/ಏಡ್ಸ್ ಹೊಂದಿದವರನ್ನು ಇದು ಬಾಧಿಸುತ್ತಿದೆ. ಒಂದು ಕಾಲದಲ್ಲಿ ಕ್ಷಯರೋಗವನ್ನು ‘‘ಬಿಳಿ ಪ್ಲೇಗ್’’ ಎಂಬುದಾಗಿ ಕರೆಯಲಾಗುತ್ತಿತ್ತು. ಈ ರೋಗವು ಸಾಂಕ್ರಾಮಿಕವಾಗಿದ್ದು ಮೂಗು ಅಥವಾ ಬಾಯಿಯ ಹನಿಗಳ ಮೂಲಕ ಹರಡುತ್ತದೆ. ಕ್ಷಯರೋಗ ಇರುವ ವ್ಯಕ್ತಿಯೋರ್ವ ಕೆಮ್ಮಿದಾಗ, ಮಾತನಾಡಿದಾಗ ಅಥವಾ ಸೀನಿದಾಗ ಈ ಹನಿಗಳು ಗಾಳಿಯಲ್ಲಿ ತೇಲಿಕೊಂಡು ಹೋಗುತ್ತವೆ. ಹೆಚ್ಚಿನ ಅಭಿವೃದ್ಧಿಶೀಲ ದೇಶಗಳಲ್ಲಿ, ಎಚ್‌ಐವಿ/ಏಡ್ಸ್‌ನ ಅನುಪಸ್ಥಿತಿಯ ಹೊರತಾಗಿಯೂ ಕ್ಷಯರೋಗವು ಗಂಭೀರ ಆರೋಗ್ಯ ಬೆದರಿಕೆಯಾಗಿಯೇ ಮುಂದುವರಿಯಲಿದೆ. ಯಾಕೆಂದರೆ, ನೈರ್ಮಲ್ಯದ ಕೊರತೆ, ಬಡತನ ಮತ್ತು ಹೆಚ್ಚಿನ ಅನಕ್ಷರತೆಯಿಂದಾಗಿ ಈ ದೇಶಗಳಲ್ಲಿ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆಯು ಸವಾಲಾಗಿಯೇ ಮುಂದುವರಿಯಲಿದೆ.

ವಯಸ್ಸಿನೊಂದಿಗೆ ಕ್ಷಯರೋಗ ಸಾಧ್ಯತೆಯೂ ಹೆಚ್ಚಳ

ಕ್ಷಯರೋಗ ತಗಲುವ ಸಾಧ್ಯತೆಯು ವಯಸ್ಸಿನೊಂದಿಗೆ ಹೆಚ್ಚುತ್ತದೆ. ಪ್ರಕರಣಗಳು 15-59 ವರ್ಷ ವಯೋಗುಂಪಿನವರಿಗಿಂತ (ಪ್ರತೀ ಲಕ್ಷಕ್ಕೆ 237)

60 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯೋಗುಂಪಿನವರಲ್ಲಿ (ಪ್ರತೀ ಲಕ್ಷಕ್ಕೆ 567) ಎರಡು ಪಟ್ಟಿಗಿಂತಲೂ ಅಧಿಕ ಹಾಗೂ 15 ಮತ್ತು ಅದಕ್ಕಿಂತ ಕೆಳಗಿನ ವರ್ಷದ ಮಕ್ಕಳ ಗುಂಪಿಗಿಂತ (ಪ್ರತೀ ಲಕ್ಷಕ್ಕೆ 33) 17 ಪಟ್ಟು ಅಧಿಕ.

ನಗರ ಪ್ರದೇಶಗಳಿಗೆ ಹೋಲಿಸಿದರೆ (ಪ್ರತೀ ಲಕ್ಷಕ್ಕೆ 179) ಗ್ರಾಮೀಣ ಪ್ರದೇಶಗಳಲ್ಲಿ (ಪ್ರತೀ ಲಕ್ಷಕ್ಕೆ 242) ಕ್ಷಯರೋಗ ಪ್ರಮಾಣ ಅಧಿಕ.

ಜನದಟ್ಟಣೆ ಹೆಚ್ಚಿದಂತೆ ಕ್ಷಯರೋಗ ಪ್ರಮಾಣವೂ ಹೆಚ್ಚುತ್ತದೆ. ಕೋಣೆ ಯೊಂದರಲ್ಲಿ ಮಲಗುವ ಜನರ ಸಂಖ್ಯೆ ಮೂರಕ್ಕಿಂತ ಕಡಿಮೆಯಿರುವ ಕುಟುಂಬ ಗಳಲ್ಲಿ ಕ್ಷಯರೋಗ ಕಾಣಿಸಿಕೊಳ್ಳುವ ಪ್ರಮಾಣ ಪ್ರತೀ ಲಕ್ಷಕ್ಕೆ 220 ಇದ್ದರೆ, ಕೋಣೆಯೊಂದರಲ್ಲಿ ಮಲಗುವ ಜನರ ಸಂಖ್ಯೆ 7 ಅಥವಾ ಅದಕ್ಕಿಂತ ಹೆಚ್ಚಿರುವ ಕುಟುಂಬಗಳಲ್ಲಿ ಕ್ಷಯರೋಗ ಕಾಣಿಸಿಕೊಳ್ಳುವ ಪ್ರಮಾಣ ಪ್ರತೀ ಲಕ್ಷಕ್ಕೆ 258 ಆಗಿದೆ.

ಕುಟುಂಬಗಳು ಅಡುಗೆ ಮಾಡಲು ಬಳಸುವ ಇಂಧನವನ್ನು ಅವಲಂಬಿಸಿ ಕ್ಷಯರೋಗಿಗಳ ಪ್ರಮಾಣದಲ್ಲಿ ಭಾರೀ ಏರಿಳಿತ ದಾಖಲಾಗಿದೆ. ವಿದ್ಯುತ್, ಎಲ್‌ಪಿಜಿ, ನೈಸರ್ಗಿಕ ಅನಿಲ ಅಥವಾ ಬಯೋಗ್ಯಾಸ್ ಬಳಸುವ ಕುಟುಂಬಗಳ ಸದಸ್ಯರಲ್ಲಿ ಕ್ಷಯರೋಗ ಕಾಣಿಸಿಕೊಳ್ಳುವ ಪ್ರಮಾಣ ಪ್ರತೀ ಲಕ್ಷಕ್ಕೆ 179 ಆಗಿದ್ದರೆ, ಹುಲ್ಲು ಅಥವಾ ಗಿಡಗಂಟಿಗಳನ್ನು ಉರುವಲು ಆಗಿ ಬಳಸುವ ಕುಟುಂಬಗಳ ಸದಸ್ಯರಲ್ಲಿ ಕ್ಷಯರೋಗ ಕಾಣಿಸಿಕೊಳ್ಳುವ ಪ್ರಮಾಣ ಪ್ರತೀ ಲಕ್ಷಕ್ಕೆ 490 ಆಗಿದೆ.

ರಾಜ್ಯಗಳ ಪೈಕಿ, ಪಂಜಾಬ್ (ಪ್ರತೀ ಲಕ್ಷಕ್ಕೆ 24) ಕ್ಷಯರೋಗಿಗಳ ಸಂಖ್ಯೆ ಕನಿಷ್ಠವಾಗಿದ್ದರೆ, ಸಿಕ್ಕಿಂನಲ್ಲಿ (ಪ್ರತೀ ಲಕ್ಷಕ್ಕೆ 634) ಗರಿಷ್ಠವಾಗಿದೆ. ಈ ಸಂಖ್ಯೆಯು ಮೇಘಾಲಯದಲ್ಲಿ ಪ್ರತೀ ಲಕ್ಷಕ್ಕೆ 626 ಆಗಿದ್ದರೆ, ಮಿರೆರಾಮ್‌ನಲ್ಲಿ ಪ್ರತೀ ಲಕ್ಷಕ್ಕೆ 624 ಮತ್ತು ನಾಗಾಲ್ಯಾಂಡ್‌ನಲ್ಲಿ ಪ್ರತೀ ಲಕ್ಷಕ್ಕೆ 616 ಆಗಿದೆ. ಅದೇ ವೇಳೆ, ಕಡಿಮೆ ಕ್ಷಯರೋಗಿಗಳು ಇರುವ ರಾಜ್ಯಗಳ ಸಾಲಿನಲ್ಲಿ ಹರ್ಯಾಣ (ಪ್ರತೀ ಲಕ್ಷಕ್ಕೆ 105) ಮತ್ತು ಛತ್ತೀಸ್‌ಗಡ (ಪ್ರತೀ ಲಕ್ಷಕ್ಕೆ 112)ಗಳು ಬರುತ್ತವೆ.

ಲಕ್ಷ ಜನರಲ್ಲಿ 222 ಮಂದಿಗೆ ಕ್ಷಯ

ಭಾರತದಲ್ಲಿ ಪ್ರತೀ ಒಂದು ಲಕ್ಷ ಜನರ ಪೈಕಿ 222 ಮಂದಿ ಕ್ಷಯರೋಗಕ್ಕೆ ಒಳಗಾಗಿದ್ದು ಚಿಕಿತ್ಸೆ ಪಡೆದಿದ್ದಾರೆ ಎಂದು ರಾಷ್ಟ್ರೀಯ ಕುಟುಂಬ ಆರೋಗ್ಯ ಸಮೀಕ್ಷೆ 2019-21 (ಎನ್‌ಎಫ್‌ಎಚ್‌ಎಸ್-5) ತಿಳಿಸಿದೆ. ಮಹಿಳೆಯರಿಗಿಂತ (ಪ್ರತೀ ಲಕ್ಷ ಮಂದಿಗೆ 162) ಪುರುಷರಲ್ಲಿ (ಪ್ರತೀ ಲಕ್ಷ ಮಂದಿಯಲ್ಲಿ 283) ಕ್ಷಯರೋಗದ ಪ್ರಮಾಣ ಹೆಚ್ಚು. ವರದಿಯಾಗಿರುವ ಕ್ಷಯರೋಗ ಪ್ರಕರಣಗಳ ಪೈಕಿ ಶೇ. 97 ಮಂದಿ ವೈದ್ಯಕೀಯ ಚಿಕಿತ್ಸೆಯನ್ನು ಪಡೆದಿದ್ದಾರೆ.

ಪ್ರಕರಣಗಳ ಸಂಖ್ಯೆಯಲ್ಲಿ ಇಳಿಕೆ

2015-16 ಮತ್ತು 2019-21ರ ನಡುವಿನ ಅವಧಿಯಲ್ಲಿ ಚಿಕಿತ್ಸೆ ಪಡೆದಿರುವ ಕ್ಷಯರೋಗಿಗಳ ಒಟ್ಟಾರೆ ಸಂಖ್ಯೆಯಲ್ಲಿ ಇಳಿಕೆ ಕಂಡುಬಂದಿದೆ. 2015-16ರಲ್ಲಿ ಈ ಸಂಖ್ಯೆ ಪ್ರತೀ ಲಕ್ಷಕ್ಕೆ 305 ಇದ್ದರೆ, 2019-21ರಲ್ಲಿ ಅದು ಪ್ರತೀ ಲಕ್ಷಕ್ಕೆ 222 ಆಗಿದೆ. ಇದೇ ಅವಧಿಯಲ್ಲಿ ಪುರುಷ ಕ್ಷಯ ರೋಗಿಗಳ ಪ್ರಮಾಣ ಪ್ರತೀ ಲಕ್ಷಕ್ಕೆ 389 ಇದ್ದದ್ದು, 2019-21ರಲ್ಲಿ ಪ್ರತೀ ಲಕ್ಷಕ್ಕೆ 283ಕ್ಕೆ ಇಳಿದಿದೆ. ಹಾಗೂ ಮಹಿಳಾ ಕ್ಷಯ ರೋಗಿಗಳ ಪ್ರಮಾಣ ಪ್ರತೀ ಲಕ್ಷಕ್ಕೆ 220 ಇದ್ದದ್ದು, 2019-21ರಲ್ಲಿ ಪ್ರತೀ ಲಕ್ಷಕ್ಕೆ 162 ಆಗಿದೆ.