ಮಂಗಳೂರು: ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜಿಗೆ ಎನ್‌ಬಿಎ ಮಾನ್ಯತೆ
ಮಂಗಳೂರು, ಸೆ. 21: ಮಂಗಳೂರು ವಾಮಂಜೂರಿನ ಸಂತ ಜೋಸೆಫ್ ಎಂಜಿನಿಯರಿಂಗ್ ಕಾಲೇಜಿನ (ಎಸ್‌ಜೆಇಸಿ) ನಾಲ್ಕು ಎಂಜಿನಿಯರಿಂಗ್ ವಿಭಾಗಗಳಿಗೆ ಹೊಸದಿಲ್ಲಿಯ ಪ್ರತಿಷ್ಠಿತ ನ್ಯಾಷನಲ್ ಬೋರ್ಡ್‌ಆಫ್ ಅಕ್ರಿಡಿಟೇಶನ್ (ಎನ್‌ಬಿಎ), 2022ರ ಜುಲೈನಿಂದ 2025ರ ಜೂನ್‌ವರೆಗೆ ಮೂರು ವರ್ಷಗಳ ಕಾಲ ಮರು-ಮಾನ್ಯತೆಯನ್ನು ನೀಡಿದೆ ಎಂದು ಕಾಲೇಜಿನ ಪ್ರಾಂಶುಪಾಲ ಡಾ. ರಿಯೋ ಡಿಸೋಜಾ ಹೇಳಿದರು.
ಕಾಲೇಜಿನಲ್ಲಿಂದು ಸುದ್ದಿಗೋಷ್ಠಿಯಲ್ಲಿ ಈ ಮಾಹಿತಿ ನೀಡಿದ ಅವರು, ಎನ್‌ಬಿಎ ತಂಡ ಜುಲೈ ತಿಂಗಳಿನಲ್ಲಿ ನಮ್ಮ ಕಾಲೇಜಿಗೆ ಭೇಟಿ ನೀಡಿತ್ತು. ಇಂಜಿನಿಯರಿಂಗ್ ವಿಭಾಗಗಳಾದ ಕಂಪ್ಯೂಟರ್ ಸೈನ್ಸ್, ಮೆಕ್ಯಾನಿಕಲ್, ಎಲೆಕ್ಟ್ರಿಕಲ್ ಮತ್ತು ಎಲೆಕ್ಟ್ರಾನಿಕ್ಸ್, ಎಲೆಕ್ಟ್ರಾನಿಕ್ಸ್ ಮತ್ತು ಕಮ್ಯುನಿಕೇಷನ್ ವಿಭಾಗಗಳನ್ನು ಈ ತಂಡ ಮೌಲ್ಯಮಾಪನ ಮಾಡಿದೆ. ಕಾಲೇಜಿನಲ್ಲಿ ಅಳವಡಿಸಿಕೊಂಡಿರುವ ವ್ಯವಸ್ಥೆಗಳನ್ನು ಈ ತಂಡ ಶ್ಲಾಘಿಸಿದೆ ಎಂದರು.
ಕಾಲೇಜಿನ ಸಿವಿಲ್ ಎಂಜಿನಿಯರಿಂಗ್ ವಿಭಾಗ ಮತ್ತು ಎಂಬಿಎ ವಿಭಾಗಗಳು ಮೂರು ಶೈಕ್ಷಣಿಕ ವರ್ಷಗಳವರೆಗೆ 2021 ರಲ್ಲಿ ಮಾನ್ಯತೆ ಪಡೆದಿತ್ತು. ಫೆಬ್ರವರಿ 2026 ರವರೆಗೆ ಐದು ವರ್ಷಗಳ ಕಾಲ ಕಾಲೇಜು ರಾಷ್ಟ್ರೀಯ ಮೌಲ್ಯಮಾಪನ ಮತ್ತು ಮಾನ್ಯತೆ ಮಂಡಳಿಯಿಂದ (ನ್ಯಾಕ್)ನಿಂದ ಎ+ ಗ್ರೇಡ್ ಪಡೆದಿದೆ. 4 ಪಾಯಿಂಟ್ ಸ್ಕೇಲ್‌ನಲ್ಲಿ 3.39 ಅಂಕ ಹೊಂದಿದೆ ಎಂದು ತಿಳಿಸಿದರು.
ಸಂತ ಜೋಸೆಫ್ ಎಂಜಿನಿಯರಿಂಗ್ ಕಾಲೇಜು ಬೆಳಗಾವಿಯ ವಿಶ್ವೇಶ್ವರಯ್ಯ ತಾಂತ್ರಿಕ ವಿ.ವಿ. (ವಿಟಿಯು) ಯಡಿಯಲ್ಲಿ ಸ್ವಾಯತ್ತ ಸಂಸ್ಥೆಯಾಗಿದೆ ಮತ್ತು ಅಖಿಲ ಭಾರತ ತಾಂತ್ರಿಕ ಶಿಕ್ಷಣ ಮಂಡಳಿ (ಎಐಸಿಟಿಇ) ಹೊಸದಿಲ್ಲಿಯಿಂದ ಗುರುತಿಸಲ್ಪಟ್ಟಿದೆ. ಕಾಲೇಜಿಗೆ 2021-22 ಶೈಕ್ಷಣಿಕ ವರ್ಷದಿಂದ ಹೊಸ ಸ್ವಾಯತ್ತ ಸ್ಥಾನಮಾನ ನೀಡಲಾಗಿದೆ. ಕ್ಯಾಂಪಸ್‌ನಲ್ಲಿ 2500 ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಕಲಿಯುತ್ತಿದ್ದಾರೆ ಎಂದರು.
ಸೆ.23-25: ಅಂತಾರಾಷ್ಟ್ರೀಯ ಸಮ್ಮೇಳನ
ಸಿವಿಲ್ ಎಂಜಿನಿಯರಿಂಗ್‌ನಲ್ಲಿನ ಪ್ರಸ್ತುತ ಬೆಳವಣಿಗೆಗಳ ಕುರಿತು ವೈವಿಧ್ಯಮಯ ವಿಷಯಗಳನ್ನು ಅನ್ವೇಷಿಸಲು, ಸಂತ ಜೋಸೆಫ್ ಎಂಜಿನಿಯರಿಂಗ್ ಕಾಲೇಜಿನ ಸಿವಿಲ್ ಎಂಜಿನಿಯರಿಂಗ್ ವಿಭಾಗದ ವತಿಯಿಂದ ಸೆ.23 ರಿಂದ 25ರವರೆಗೆ ‘ನೋವೆಲ್ ಸಸ್ಟೆ ನೇಬಲ್ ಕಾನ್ಸೆಪ್ಟ್ ಆ್ಯಂಡ್ ಟೆಕ್ನೋಲಜೀಸ್ ಇನ್ ಸಿವಿಲ್ ಎಂಜಿನಿಯರಿಂಗ್’ ಎಂಬ ವಿಷಯದಲ್ಲಿ ಅಂತಾರಾಷ್ಟ್ರೀಯ ಸಮ್ಮೇಳನ ಆಯೋಜಿಸಿದೆ. ದೇಶ ಮತ್ತು ವಿದೇಶದ 12 ಹೆಸರಾಂತ ಮುಖ್ಯ ಸಂಶೋಧಕರು ಭಾಗವಹಿಸಲಿದ್ದಾರೆ. ಪ್ರಸ್ತುತ 90 ಪ್ರಬಂಧಗಳ ಸಾರಾಂಶಗಳನ್ನು ಸ್ವೀಕರಿಸಲಾಗಿದೆ ಮತ್ತು ಅದರಲ್ಲಿ ಸುಮಾರು 50 ಲೇಖನಗಳನ್ನು ಪ್ರಸ್ತುತಿಗಾಗಿ ಆಯ್ಕೆ ಮಾಡಲಾಗಿದೆ ಎಂದರು.
ಮೆಲೋಡಿಯಮ್ ಸ್ಟುಡಿಯೋ ಆರಂಭ
ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ನೂತನವಾಗಿ ‘ಮೆಲೋಡಿಯಮ್’ ಸ್ಟುಡಿಯೋ ಸೌಲಭ್ಯವನ್ನು ಆರಂಭಗೊಂಡಿದೆ. ಅತ್ಯಾಧುನಿಕ ಆಡಿಯೊ ರೆಕಾಡಿರ್ಂಗ್ ಸೌಲಭ್ಯ ಕಲ್ಪಿಸಲಾಗಿದೆ. ಕಲೆ, ಸಂಗೀತ ಮತ್ತು ಆಡಿಯೊ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ಸ್ಥಳೀಯ ಪ್ರತಿಭೆಗಳ ಪ್ರೋತ್ಸಾಹಿಸಲು ಸಹಕಾರಿಯಾಗಲಿದೆ. 970 ಚದರ ಅಡಿಯಲ್ಲಿ ಸ್ಟುಡಿಯೋ ಇದ್ದು, 470 ಚದರ ಅಡಿ ಮತ್ತು 230 ಚದರ ಅಡಿಗಳ ಎರಡು ವಿಶಾಲವಾದ ಧ್ವನಿಮುದ್ರಣ ಕೊಠಡಿ ಹೊಂದಿದೆ. ಈ ಅತ್ಯಾಧುನಿಕ ಸೌಲಭ್ಯ ಬಯಸುವವರಿಗೆ ಕಾಲೇಜು ಸೇವೆ ನೀಡಲಿದೆ. ಚೆನ್ನೈನ ಎ.ಆರ್.ರೆಹಮಾನ್ ಅವರ ಕೆಎಂ ಕಾಲೇಜ್‌ಆಫ್ ಮ್ಯೂಸಿಕ್ ಆ್ಯಂಡ್ ಟೆಕ್ನಾಲಜಿಯ ಹಳೆ ವಿದ್ಯಾರ್ಥಿ ಮೆಲ್ರಾಯ್ ಫುರ್ಟಾಡೊ ಅವರು ಕನ್ಸಲ್ಟೆಂಟ್ ಸೌಂಡ್ ಎಂಜಿನಿಯರ್ ಆಗಿ ಇಲ್ಲಿ ಸೇವೆ ಸಲ್ಲಿಸಲಿದ್ದಾರೆ ಎಂದು ಡಾ. ರಿಯೋ ಡಿಸೋಜಾ ಹೇಳಿದರು.
ಪತ್ರಿಕಾಗೋಷ್ಠಿಯಲ್ಲಿ ನಿರ್ದೇಶಕ ವಂ. ವಿಲ್ಫ್ರೆಡ್ ಪ್ರಕಾಶ್ ಡಿಸೋಜಾ, ಉಪ ನಿರ್ದೇಶಕ ವಂ. ಆಲ್ವಿನ್ ರಿಚರ್ಡ್ ಡಿಸೋಜಾ, ಮಾನವ ಸಂಪನ್ಮೂಲ ವ್ಯವಸ್ಥಾಪಕ ರಾಕೇಶ್ ಲೋಬೋ, ಐಕ್ಯೂಎಸಿ ಸಂಯೋಜಕ ಡಾ. ಶ್ರೀರಂಗ ಭಟ್, ತಂತ್ರ ಮತ್ತು ಯೋಜನೆ ಮುಖ್ಯಸ್ಥ ಡಾ. ಬಿನು ಕೆ.ಜಿ. ಮತ್ತು ಸಿವಿಲ್ ಎಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಡಾ. ಯಜ್ಞೇಶ್ವರನ್ ಬಿ. ಉಪಸ್ಥಿತರಿದ್ದರು.
