ಮಕ್ಕಳಿಂದಲೇ ವಂಚನೆಗೊಳಗಾದ ಮೊಂತಿನ್ ಡಿಸಿಲ್ವಗೆ ನ್ಯಾಯ ನೀಡಿದ ಮಂಗಳೂರು ಡಿಸಿ ನೇತೃತ್ವದ ಹಿರಿಯ ನಾಗರಿಕರ ನ್ಯಾಯ ಮಂಡಳಿ

ಉಡುಪಿ, ಅ.3: ಆಸ್ತಿಗಾಗಿ ಜಗಳವಾಡುತಿದ್ದ ತನ್ನದೇ ಮಕ್ಕಳಿಂದ ವಂಚನೆಗೊಳಗಾಗಿ ತುತ್ತು ಊಟಕ್ಕೂ ಪರದಾಡುತಿದ್ದ, ಇತರರ ಮುಂದೆ ಕೈಚಾಚುವ ಪರಿಸ್ಥಿತಿ ಎದುರಿಸಿದ್ದ ದಕ್ಷಿಣ ಕನ್ನಡ ಜಿಲ್ಲೆಯ 86ರ ವಯೋವೃದ್ಧೆ ಮೊಂತಿನ್ ಡಿಸಿಲ್ವ ಅವರಿಗೆ ಕೊನೆಗೂ ಮಂಗಳೂರಿನ ಹಿರಿಯ ನಾಗರಿಕರ ಮೇಲ್ಮನವಿ ನ್ಯಾಯ ಮಂಡಳಿ ಪರಿಪೂರ್ಣವಾದ ನ್ಯಾಯ ನೀಡಿದೆ.

ಸಂತ್ರಸ್ಥೆ ಮೊಂತಿನ್ ಅವರು ತನ್ನ ಮಕ್ಕಳಿಗೆ ನೀಡಿದ್ದ ಆಸ್ತಿಗೆ ಸಂಬಂಧಿಸಿದ ವಿಭಾಗ ಪತ್ರ (ಪಾರ್ಟಿಶನ್ ಡೀಡ್) ಹಾಗೂ ಹಕ್ಕು ಖುಲಾಸೆ (ರಿಲೀಸ್ ಡೀಡ್) ಪತ್ರಗಳನ್ನು ರದ್ದುಗೊಳಿಸಿರುವ ನ್ಯಾಯಮಂಡಳಿ, ಗಂಡನಿಂದ ತನಗೆ ಬಂದ ಸಂಪೂರ್ಣ ಆಸ್ತಿಯ ಹಕ್ಕನ್ನು ಮಕ್ಕಳಿಂದ ತಾಯಿಗೆ ವರ್ಗಾಯಿಸಿ ಆದೇಶ ಹೊರಡಿಸಿದೆ ಎಂದು ಸಂತ್ರಸ್ಥೆಯ ಪರವಾಗಿ ಸತತವಾಗಿ ಹೋರಾಡಿ ಕೊನೆಗೂ ನ್ಯಾಯ ದೊರಕಿಸಿಕೊಟ್ಟ ಉಡುಪಿಯ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ.ರವೀಂದ್ರನಾಥ ಶಾನ್‌ಭಾಗ್ ಇಂದಿಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ವಯೋವೃದ್ಧೆ ಮೊಂತಿನಮ್ಮ ಕಲ್ಲಮುಂಡ್ಕೂರು ಗ್ರಾಮದ ದಿ. ಬ್ಯಾಪ್ಟಿಸ್ಟ್ ಡಿಸಿಲ್ವರ ವಿಧವೆ. ಬ್ಯಾಪಿಸ್ಟ್ ದಂಪತಿಗಳು ಸ್ವತಹ ದುಡಿದು ಗಳಿಸಿ ಹಣದಿಂದ ಮಕ್ಕಳಿಗೆಲ್ಲ ಶಿಕ್ಷಣ ನೀಡಿ, ಮದುವೆ ಮಾಡಿಸಿ ಜಮೀನು ಖರೀದಿಸಿದ್ದರು.

2006ರಲ್ಲಿ ನಿಧನರಾದ ಬ್ಯಾಪ್ಟಿಸ್ಟ್ ಡಿಸಿಲ್ವ 6.25 ಎಕ್ರೆ ಜಮೀನು ಹಾಗೂ ಮನೆಯನ್ನು ಕುಟುಂಬಕ್ಕಾಗಿ ಬಿಟ್ಟು ಹೋಗಿದ್ದರು. ಸಂಪೂರ್ಣ ಆಸ್ತಿ ಮತ್ತು ಮನೆ ದಂಪತಿಗಳು ಸ್ವಂತ ದುಡಿಮೆಯಿಂದ ಮಾಡಿರುವುದರಿಂದ ಇದರಲ್ಲಿ ಮಕ್ಕಳಿಗೆ ಯಾವುದೇ ಹಕ್ಕಿರಲಿಲ್ಲ ಎಂದು ಅವರು ತಿಳಿಸಿದರು.

ತಂದೆ ತೀರಿಕೊಂಡ ಬಳಿಕ ಕುಟುಂಬದ ಆಸ್ತಿಯಲ್ಲಿ ಪಾಲು ನೀಡಬೇಕೆಂದು ಪ್ರತಿದಿನವೂ ಒತ್ತಾಯಿಸುತಿದ್ದ ಮಕ್ಕಳ ಬೇಡಿಕೆಗೆ ಮಣಿದ ಮೊಂತಿನಮ್ಮ ಕೊನೆಗೆ ಪರಸ್ಪರ ಒಪ್ಪಿಗೆಯ ಮೂಲಕ ಜಮೀನನ್ನು ಪಾಲು ಮಾಡಿಕೊಳ್ಳುವಂತೆ ಮಕ್ಕಳಿಗೆ ಸೂಚಿಸಿದರು.

2009ರಲ್ಲಿ ಕುಟುಂಬದ ಎಲ್ಲಾ ಮಕ್ಕಳೂ ಸೇರಿ ವಿಭಾಗ ಪತ್ರವೊಂದರ ಮೂಲಕ ವಿವಿಧ ಸರ್ವೆ ನಂಬ್ರಗಳಲ್ಲಿದ್ದ ಜಮೀನುಗಳನ್ನೆಲ್ಲಾ ವಿಂಗಡಿಸಿ ಅವರವರ ಪಾಲಿಗೆ ಬಂದ ಆಸ್ತಿಯನ್ನು ತಂತಮ್ಮ ಹೆಸರಿಗೆ ವರ್ಗಾಯಿಸಿಕೊಂಡು ಹಕ್ಕುಪತ್ರಗಳನ್ನು ಮಾಡಿಕೊಂಡರು. ತಾಯಿಯ ಪಾಲಿಗೆ ಬಂದ ಹಳೆ ಮನೆ ಹಾಗೂ 2.25 ಎಕರೆ ಜಮೀನಿನ್ನು ವಿಂಗಡಿಸಿಟ್ಟರೂ, ಜಮೀನಿನ ಹಕ್ಕುಪತ್ರಗಳಲ್ಲಿ ಮೊಂತಿನಮ್ಮರ ಹೆಸರು ದಾಖಲಾಗಲೇ ಇಲ್ಲ ಎಂದು ಡಾ.ಶಾನ್‌ಭಾಗ್ ತಿಳಿಸಿದರು.

ತಾಯಿ ಮೊಂತಿನಮ್ಮರ ಪಾಲಿಗೆ ಬಂದ ಜಮೀನುಗಳಿಗೆ ‘ಎಲ್ಲಾ ಮಕ್ಕಳೂ ಜಂಟಿಯಾಗಿ ಹಕ್ಕುದಾರರು’ ಎಂದು ವಿಭಾಗ ಪತ್ರದಲ್ಲಿ ದಾಖಲಿಸಿ ಹಕ್ಕುಪತ್ರ ಗಳಲ್ಲಿ ಮಕ್ಕಳ ಹೆಸರು ಮಾತ್ರ ಸೇರ್ಪಡೆಗೊಂಡವು. ಅಕ್ಷರ ಜ್ಞಾನವಿಲ್ಲದ ಮೊಂತಿನಮ್ಮಗೆ ಮಕ್ಕಳು ಮಾಡಿದ ವಂಚನೆ ತಿಳಿಯಲೇ ಇಲ್ಲ ಎಂದರು.

2014ರಲ್ಲಿ ವೃದ್ಧಾಪ್ಯದಲ್ಲಿ ತಾಯಿಯನ್ನು ನೋಡಿಕೊಳ್ಳುವ ಜವಾಬ್ದಾರಿ ವಹಿಸಿಕೊಂಡ ಮಗಳೊಬ್ಬಳ ಹೆಸರಿಗೆ ತಾಯಿ ಪಾಲಿಗೆ ಬಂದಿದ್ದ ಮೂರು ಸರ್ವೆ ನಂಬ್ರದ ಜಮೀನುಗಳನ್ನು ವರ್ಗಾಯಿಸಿದರು. ಆಗಲೂ ಮೊಂತಿನಮ್ಮರಿಗೆ ಮಕ್ಕಳ ಕಿತಾಪತಿ ತಿಳಿಯದೇ ಅವರು ಹೇಳಿದ ದಾಖಲೆಗಳಿಗೆ ಸಹಿ ಹಾಕಿಕೊಟ್ಟರು. ಕೊನೆಗೆ ಜವಾಬ್ದಾರಿ ಹೊತ್ತ ಮಗಳೂ ಇವರ ದಿನದ ಖರ್ಚಿಗೆ ಹಣ ನೀಡದೇ ಹೋದಾಗ, ತನ್ನ ಪಾಲಿನ ಜಮೀನನ್ನು ಮಾರಲು ಮೊಂತಿನಮ್ಮ ಮುಂದಾದಾಗ, ತನ್ನ ವೈಯಕ್ತಿಕ ಹೆಸರಿನಲ್ಲಿ ಯಾವುದೇ ಆಸ್ತಿಯೂ ಉಳಿದಿಲ್ಲ ಎಂಬ ಆಘಾತಕಾರಿ ವಿಷಯ ಅವರಿಗೆ ಗೊತ್ತಾಯಿತು. ಸ್ವಂತ  ಮಕ್ಕಳು ಮಾಡಿದ  ನಯವಂಚಕತನವೂ ಅರಿವಿಗೆ ಬಂತು ಎಂದರು.

ತನಗೆ ಬದುಕಲು ಉಳಿತಾಯವಾಗಲೀ, ಬೇರಾವ ಆದಾಯವಾಗಲಿ ಇಲ್ಲದೇ ಇದ್ದುದರಿಂದ ತನ್ನ ಪಾಲಿನ ಆಸ್ತಿಯನ್ನು ತನಗೆ ಹಿಂದಿರುಗಿಸಬೇಕೆಂದು ಮಂಗಳೂರಿನ ಹಿರಿಯ ನಾಗರಿಕರ ಸಹಾಯವಾಣಿ ಕೇಂದ್ರಕ್ಕೆ ಮೊಂತಿನಮ್ಮ ಮನವಿ ಸಲ್ಲಿಸಿದರು. ಪಾಂಡೇಶ್ವರ ಪೊಲೀಸ್ ಠಾಣೆಗೂ ದೂರು ನೀಡಿದರು. 2018ರ ಮೇ ತಿಂಗಳಲ್ಲಿ ಪೊಲೀಸರು ಹಾಗೂ ಸಹಾಯವಾಣಿ ಕೇಂದ್ರ ಕರೆದ ಸಭೆಯಲ್ಲಿ ಭಾಗವಹಿಸಿದ ಮಕ್ಕಳು ತಾವು ಮಾಡಿದ ಅನ್ಯಾಯವನ್ನು ಒಪ್ಪಿಕೊಂಡು, ಆರು ತಿಂಗಳೊಳಗೆ ಆಕೆಯ ಪಾಲಿನ ಆಸ್ತಿಯನ್ನು ಆಕೆಗೆ ಹಿಂದಿರುಗಿಸಿ, ಅವರ ಹೆಸರಿನಲ್ಲಿಯೇ ಹಕ್ಕುಪತ್ರ ಮಾಡಿಸಿಕೊಂಡುವುದಾಗಿ ಲಿಖಿತವಾಗಿ ಒಪ್ಪಿಕೊಂಡರು.

ಆರು ತಿಂಗಳ ಕಳೆದರೂ ಮಕ್ಕಳು ಆಸ್ತಿಯನ್ನು ಹಿಂದಿರುಗಿಸದಿದ್ದಾಗ, ಮೊಂತಿನಮ್ಮ ಉಡುಪಿಯ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಟಾನದ ಸಹಕಾರದಿಂದ ಮಂಗಳೂರಿನ ಹಿರಿಯ ನಾಗರಿಕರ ನ್ಯಾಯ ಮಂಡಳಿಗೆ ದೂರು ಸಲ್ಲಿಸಿದರು. ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯ ಮಂಡಳಿ 2019ರ ಮಾ.5ರಂದು ಆದೇಶ ಹೊರಡಿಸಿ ಮಕ್ಕಳೆಲ್ಲಾ ಸೇರಿ ಪ್ರತಿ ತಿಂಗಳು ತಾಯಿಗೆ ತಲಾ 2000ರೂ. ಕೊಡುವಂತೆ ಆದೇಶಿಸಿತು.

ನ್ಯಾಯ ಮಂಡಳಿ ಆದೇಶ ನೀಡಿದ ಆರು ತಿಂಗಳ ಬಳಿಕವೂ  ಯಾವ ಮಕ್ಕಳೂ ನಿಯಮಿತವಾಗಿ ಹಣ ನೀಡದೇ ಇದ್ದಾಗ ಮೊಂತಿನಮ್ಮ ಮತ್ತೆ ನ್ಯಾಯ ಮಂಡಳಿಗೆ ದೂರು ನೀಡಿದರು. ಅದೇ ವರ್ಷದ ಅ.14ರಂದು ಮಂಡಳಿ ಮಂಗಳೂರಿನ ಪೊಲೀಸ್ ಆಯುಕ್ತರಿಗೆ ಪತ್ರ ಬರೆದು ತನ್ನ ಆದೇಶ ಅಮಲ್ಜಾರಿಗೆ ಸೂಚಿಸಿತು. ನಂತರ ಎರಡು ವರ್ಷ ಕಳೆದರೂ ನ್ಯಾಯ ಮಂಡಳಿಯ ಆದೇಶ ವನ್ನು ಜಾರಿಗೊಳಿಸಲು ಪೊಲೀಸ್ ಹಾಗೂ ಕಂದಾಯ ಇಲಾಖೆಗಳಿಗೆ ಸಾಧ್ಯವಾಗಲಿಲ್ಲ.

ಈ ನಡುವೆ ಮೊಂತಿನಮ್ಮರ ಮೂವರು ಮಕ್ಕಳು ನ್ಯಾಯಮಂಡಳಿಗೆ ಪತ್ರ ಬರೆದು, ತಾಯಿಗೆ ಮಾಸಾಶನ ನೀಡುವ ವಿಷಯದಲ್ಲಿ ಪೊಲೀಸ್ ಮತ್ತು ಕಂದಾಯ ಇಲಾಖೆಗಳಿಂದ ತಮಗೆ ಮಾನಸಿಕ ವೇದನೆ ಹಾಗೂ ಕಿರಿ ಕಿರಿ ಉಂಟಾಗುತಿದ್ದು, ತಾಯಿಯ ಪೋಷಣೆಗೆ ಹಣ ನೀಡುವುದು ಅಸಾಧ್ಯ ಎಂದು ಲಿಖಿತವಾಗಿ ತಿಳಿಸಿದ್ದರು.

ನೊಂದ ಮೊಂತಿನಮ್ಮ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಮೂಲಕ  ಮಂಗಳೂರು ಜಿಲ್ಲಾಧಿಕಾರಿಗಳಿಗೆ ಮೇಲ್ಮನವಿ ಸಲ್ಲಿಸಿದರು. ಹಿರಿಯ ನಾಗರಿಕರ ರಕ್ಷಣಾ ಕಾಯ್ದೆಯ ಕಲಂ 23ರ ಪ್ರಕಾರ ‘ಹಿರಿಯರಿಂದ ಆಸ್ತಿ ಪಡೆದು ಕೊಂಡವರು ಮೂಲಭೂತ ಸೌಕರ್ಯ ಹಾಗೂ ದೈಹಿಕ ಅಗತ್ಯಗಳನ್ನು ಪೂರೈಸಲು ಅಥವಾ ವಿಫಲರಾದಲ್ಲಿ ಅಂತಹ ಆಸ್ತಿ ವರ್ಗಾವಣೆಯನ್ನು ಅಸಿಂಧು ಎಂದು ನ್ಯಾಯ ಮಂಡಳಿ ಘೋಷಿಸುತ್ತದೆ.’ ಎಂಬ ಅಂಶವನ್ನು ಉಲ್ಲೇಖಿಸಿ ಮೇಲನ್ಮವಿ ಸಲ್ಲಿಸಲಾಗಿತ್ತು ಎಂದು ರವೀಂದ್ರನಾಥ ಶಾನ್‌ಭಾಗ್ ತಿಳಿಸಿದರು.

ಕೊನೆಗೂ ವೃದ್ಧೆಗೆ ನ್ಯಾಯ: ಅಂತಿಮವಾಗಿ ಮೇಲ್ಮನವಿ ನ್ಯಾಯಮಂಡಳಿ ಅಧ್ಯಕ್ಷರಾದ, ಮಂಗಳೂರಿನ ಜಿಲ್ಲಾಧಿಕಾರಿ ಡಾ.ಕೆ.ವಿ.ರಾಜೇಂದ್ರ ಅವರು ಮೊಂತಿನಮ್ಮ ಮನವಿಯನ್ನು ಕಾಯ್ದೆಯ ಕಲಂ 23ರಡಿಯಲ್ಲಿ ಅರ್ಹ ಪ್ರಕರಣವೆಂದು ಘೋಷಿಸಿ, ಮೊಂತಿನಮ್ಮ 2009ರ ಮಾ.6ರಂದು ನೀಡಿದ ವಿಭಾಗ ಪತ್ರ ಹಾಗೂ 2014ರ ಡಿ.6ರಂದು ಮಕ್ಕಳಿಗೆ ನೀಡಿರುವ ಹಕ್ಕು ಖುಲಾಸೆ ಪತ್ರಗಳನ್ನು ಅಸಿಂಧು ಗೊಳಿಸಿದ್ದಾರೆ. ಹಾಗೂ ಆಸ್ತಿಯ ಸಂಪೂರ್ಣ ಹಕ್ಕನ್ನು ಮೊಂತಿನಮ್ಮರ ಹೆಸರಿಗೆ ವರ್ಗಾಯಿಸಿದ್ದಾರೆ ಎಂದು ಶಾನ್‌ಭಾಗ್ ತಿಳಿಸಿದರು.

ತನ್ನ ಮಕ್ಕಳ ವಿರುದ್ಧವೇ ನಾಲ್ಕು ವರ್ಷ ಹೋರಾಡಿದ ಬಳಿಕ ಮೊಂತಿನಮ್ಮರಿಗೆ  ತಾವು ಮಾಡಿದ 6.25ಎಕರೆ ಜಾಗ ಹಾಗೂ ಕಟ್ಟಿದ ಮನೆಯ ಒಡೆತನ ಪ್ರಾಪ್ತವಾಗಿದೆ. ಇದೀಗ ಎಲ್ಲಾ ದಾಖಲೆಗಳು ಮೊಂತಿನಮ್ಮರ ಹೆಸರಿಗೆ ಬಂದಿದ್ದು, ತಹಶೀಲ್ದಾರ್ ಅವರ ಹೆಸರಿನಲ್ಲಿ ಹಕ್ಕುಪತ್ರ ನೀಡುವುದು ಮಾತ್ರ ಬಾಕಿ ಇದೆ ಎಂದರು.

ಒಂದು ವೇಳೆ ಮಕ್ಕಳು ತೀರ್ಪಿನ ವಿರುದ್ಧ ಹೈಕೋರ್ಟ್ ಹಾಗೂ ಸುಪ್ರೀಂ ಕೋರ್ಟ್‌ಗೆ ಹೋದರೂ, ಪ್ರತಿಷ್ಠಾನ ಮೊಂತಿನಮ್ಮರ ಜೊತೆಗೆ ನಿಲ್ಲುತ್ತದೆ ಎಂದು ಡಾ.ರವೀಂದ್ರನಾಥ ಶಾನ್‌ಭಾಗ್ ತಿಳಿಸಿದರು.

ಪತ್ರಿಕಾಗೋಷ್ಠಿಯಲ್ಲಿ ಪ್ರಕರಣದ ಕುರಿತಂತೆ ಪ್ರತಿಷ್ಠಾನದ ಪರವಾಗಿ ಶ್ರಮಿಸಿದ ಟ್ರಸ್ಟಿ ಅಶೋಕ್ ಭಟ್ ಹಾಗೂ ಸಂತ್ರಸ್ಥೆ ಮೊಂತಿನಮ್ಮ ಉಪಸ್ಥಿತರಿದ್ದರು.