ಪುತ್ತೂರು ತಾಲೂಕು ಮುಸ್ಲಿಂ ಸಂಯುಕ್ತ ಜಮಾಅತ್ನಿಂದ 'ಮಿಲಾದ್ ಮೆಹಫಿಲ್'
ಪುತ್ತೂರು: ಪೂರ್ವ ಕಾಲದಿಂದ ದೇಶದಲ್ಲಿ ಅನ್ಯೋನ್ಯತೆಯಿಂದಲೇ ಇದ್ದ ಹಿಂದೂ, ಮುಸ್ಲಿಮರ ಮಧ್ಯೆ ರಾಜಕೀಯ ಕಾರಣಕ್ಕಾಗಿ ಬಿತ್ತಲಾದ ಕೋಮು ವಿಷ ಬೀಜವು ಇಂದು ಬೆಳೆದು ಹೆಮ್ಮರವಾಗಿ ಇದರಿಂದಾಗಿ ದೇಶದ ಪ್ರಗತಿ ಕುಂಠಿತ ಗೊಂಡಿದೆ. ಇದನ್ನು ಬೇರು ಸಮೇತ ಕಿತ್ತು ಹಾಕಲು ನೈಜ ದೇಶ ಪ್ರೇಮಿಗಳು ಎಲ್ಲವನ್ನೂ ಮೆರೆತು ಒಂದಾಗ ಬೇಕಾದ ಕಾಲ ಈಗ ಸನ್ನಿಹಿತವಾಗಿದೆ ಎಂದು ಎಸ್ ಬಿ ದಾರಿಮಿ ಹೇಳಿದರು.
ಅವರು ಮಂಗಳವಾರ ಪುತ್ತೂರು ತಾಲೂಕು ಮುಸ್ಲಿಂ ಸಂಯುಕ್ತ ಜಮಾಅತ್ ವತಿಯಿಂದ ಪುತ್ತೂರಿನ ಬದ್ರಿಯಾ ಮಸೀದಿ ಸಭಾಂಗಣದಲ್ಲಿ ನಡೆದ 'ಮಿಲಾದ್ ಮೆಹಫಿಲ್' ಕಾರ್ಯಕ್ರಮದಲ್ಲಿ ಮಾತನಾಡಿದರು. ಹಿಂದು ಮುಸ್ಲಿಮರು ಪರಸ್ಪರರನ್ನು ದಮನಿಸಲು ಹೊರಟರೆ ಅದರಿಂದ ಎಲ್ಲರಿಗೂ ಸಂಕಷ್ಟ ಉಂಟಾಗಿ ಶಾಂತಿ ಮರೀಚಿಕೆಯಾಗುತ್ತದೆ. ನಿಮ್ಮೊಂದಿಗೆ ವೈರತ್ವ ಇಲ್ಲದ ಇತರ ಧರ್ಮೀಯರಿಗೆ ನೀವು ಸಾಧ್ಯವಾದಷ್ಟು ಸಹಾಯ ಸಹಕಾರ ನೀಡಿರಿ ಎಂಬ ಕುರಾನಿನ ಸಂದೇಶ ಪಾಲಿಸಲು ಮುಸ್ಲಿಮರೂ, ಜಗತ್ತಿನ ಸರ್ವರಿಗೂ ಒಳಿತಾಗಲಿ ಎಂಬ ಧರ್ಮೋಪದೇಶವನ್ನು ಹಿಂದುಗಳೂ ಪಾಲನೆ ಮಾಡಲು ಮುಂದೆ ಬಂದರೆ ದೇಶದ ಬಹುತೇಕ ಸಮಸ್ಯೆ ಪರಿಹಾರವಾಗಲಿದೆ ಪ್ರತೀ ದೇವಸ್ಥಾನ, ಮಸೀದಿ, ಇಗರ್ಜಿಗಳು ಎಲ್ಲಾ ಧರ್ಮೀಯರನ್ನು ಕರೆಸಿ ಸೌಹಾರ್ದ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕಾಗಿದೆ ಎಂದರು.
ಕೆ.ಆರ್ ಹುಸೈನ್ ದಾರಿಮಿ, ಸತ್ತಾರ್ ಸಖಾಪಿ ಮಾತನಾಡಿದರು.
ಸಂಪ್ಯ ಹಮೀದ್ ದಾರಿಮಿ ದುವಾ ನೆರವೇರಿಸಿದರು. ಪುತ್ತೂರು ತಾಲೂಕು ಮುಸ್ಲಿಂ ಸಂಯುಕ್ತ ಜಮಾತ್ ಅಧ್ಯಕ್ಷ ಕೆ.ಪಿ. ಮಹಮ್ಮದ್ ಹಾಜಿ ಅಧ್ಯಕ್ಷತೆ ವಹಿಸಿದ್ದರು. ಹಾಜಿ ಅಬ್ದಲ್ ರಹಿಮಾನ್ ಆಝಾದ್ ದರ್ಬೆ,ಇಸಾಕ್ ಖಾನ್ ಪುತ್ತೂರು, ಅಬ್ದುಲ್ ಅಝೀಝ್ ಹಾಜಿ ಮೊಟ್ಟೆತಡ್ಕ, ಅರಿಯಡ್ಕ ಅಬ್ದುಲ್ ರಹಿಮಾನ್ ಹಾಜಿ, ಖಾಸಿಂ ಹಾಜಿ ಮಿತ್ತೂರು, ಅಝೀಝ್ ಹಾಜಿ ದರ್ಬೆ, ಹಸೈನಾರ್ ದರ್ಬೆ, ಹುಸೈನಾರ್ ಹಾಜಿ ಸಿಟಿ ಬಜಾರ್, ಯು ಅಬ್ದುಲ್ಲ ಹಾಜಿ ಸಾಲ್ಮರ, ಉಮರ್ ಹಾಜಿ ಚಾಪಲ್ಲ, ಬಾಲಾಯ ಹಾಜಿ, ಝೈನುದ್ದೀನ್ ಪತ್ರಕರ್ತ, ಅದ್ದು ಹಾಜಿ ಬಪ್ಪಳಿಗೆ, ಹಮೀದ್ ಸೋಂಪಾಡಿ, ಶರೀಫ್ ಸಾಲ್ಮರ, ನೂರುದ್ದೀನ್ ನ್ಯಾಯವಾದಿ, ಆಶ್ರಪ್ ಕಲ್ಲೆಗ, ಪಝಲ್ ಹಾಜಿ ಪಡೀಲ್, ಸಿದ್ದೀಖ್ ಅಡ್ವಕೇಟ್, ಆರ್ ಪಿ ರಝಾಕ್ ಮತ್ತಿತರರು ಉಪಸ್ಥಿತರಿದ್ದರು.
ಪುತ್ತೂರು ತಾಲೂಕು ಮುಸ್ಲಿಂ ಸಂಯುಕ್ತ ಜಮಾಅತ್ ಪ್ರಧಾನ ಕಾರ್ಯದರ್ಶಿ ಎಲ್ ಟಿ ಅಬ್ದುಲ್ ರಝಾಕ್ ಹಾಜಿ ಸ್ವಾಗತಿಸಿದರು. ಕೋಶಾಧಿಕಾರಿ ಶಕೂರ್ ಹಾಜಿ ಕಲ್ಲಗ ವಂದಿಸಿದರು.
