ಡ್ರೋನ್ ಬಳಸಲು ರಶ್ಯಕ್ಕೆ ಇರಾನ್ ಮಿಲಿಟರಿ ತಜ್ಞರ ತರಬೇತಿ: ಅಮೆರಿಕ ಗುಪ್ತಚರ ಇಲಾಖೆ ವರದಿ

ಟೆಹ್ರಾನ್, ಅ.19: ಇರಾನ್ ನಲ್ಲಿ ನಿರ್ಮಿಸಲಾದ ಡ್ರೋನ್(drone) ಗಳ ಬಳಕೆ ಬಗ್ಗೆ ರಶ್ಯ ಯೋಧರಿಗೆ ತರಬೇತಿ ನೀಡಲು ಇರಾನ್ ನ  ಸೇನಾ ತಜ್ಞರನ್ನು ಕ್ರಿಮಿಯಾಕ್ಕೆ ರವಾನಿಸಲಾಗಿದೆ ಎಂದು ಅಮೆರಿಕದ ಗುಪ್ತಚರ ಅಧಿಕಾರಿಗಳನ್ನು ಉಲ್ಲೇಖಿಸಿ ಸಿಎನ್ಎನ್(CNN) ವರದಿ ಮಾಡಿದೆ. 

ಈ ಡ್ರೋನ್ ಗಳನ್ನು ಬಳಸಿ ರಶ್ಯ ಉಕ್ರೇನ್(Russia Ukraine) ಮೇಲೆ ದಾಳಿ ನಡೆಸಿ ವ್ಯಾಪಕ ಹಾನಿ ಎಸಗಿದೆ. ರಶ್ಯದ ವಶದಲ್ಲಿರುವ ಕ್ರಿಮಿಯಾ ಪ್ರಾಂತದಿಂದ ಉಕ್ರೇನ ನ್ ನಗರಗಳು ಹಾಗೂ ಇಂಧನ ಮೂಲಸೌಕರ್ಯಗಳನ್ನು ಗುರಿಯಾಗಿಸಿ ಡ್ರೋನ್ ಗಳ ಮೂಲಕ ದಾಳಿ ಎಸಗಲಾಗುತ್ತಿದೆ ಎಂದು ವರದಿ ಹೇಳಿದೆ.

ಇರಾನ್ ಮತ್ತು ರಶ್ಯಗಳು ಹೆಚ್ಚು ನಿಕಟವಾಗುತ್ತಿರುವ ಸೂಚನೆ ಇದಾಗಿದ್ದು ಈ ಸಂಬಂಧ ತೀವ್ರ ಆತಂಕಕಾರಿಯಾಗಿದೆ. ಇದನ್ನು ಗಾಢ ಬೆದರಿಕೆ ಎಂದು ಪರಿಗಣಿಸಬೇಕಾಗಿದೆ ಎಂದು ಅಮೆರಿಕದ ವಿದೇಶಾಂಗ ಇಲಾಖೆಯ ಪ್ರಧಾನ ಸಹಾಯಕ ವಕ್ತಾರ ವೇದಾಂತ್ ಪಟೇಲ್(Vedant Patel) ಹೇಳಿದ್ದಾರೆ.

ಆರಂಭದಲ್ಲಿ ರಶ್ಯದ ಯೋಧರಿಗೆ ಇರಾನ್ನಲ್ಲೇ ತರಬೇತಿ ನೀಡಲಾಗಿದೆ. ಆದರೆ ಆಗಸ್ಟ್ನಲ್ಲಿ ಉಕ್ರೇನ್ ಎದುರಿನ ಯುದ್ಧದಲ್ಲಿ ಡ್ರೋನ್ ಬಳಸುವಾಗ ಅವರಿಗೆ ಸಮಸ್ಯೆ ಎದುರಾದ ಬಳಿಕ  ಹಲವು ತಜ್ಞರು ಕ್ರಿಮಿಯಾಕ್ಕೆ ತೆರಳಿ ಅಲ್ಲಿ ಪ್ರಾತ್ಯಕ್ಷಿಕೆ ಸಹಿತ ತರಬೇತಿ ಒದಗಿಸಿದ್ದಾರೆ.

ಇರಾನ್ 2 ವಿಧದ ಡ್ರೋನ್ ಗಳನ್ನು ಒದಗಿಸಿದೆ. ಶಹೆಡ್ಸ್ ಎಂಬ ಡ್ರೋನ್ 1000 ಮೈಲುಗಳ ವ್ಯಾಪ್ತಿಯನ್ನು ಹೊಂದಿದ್ದರೆ, ಮೊಹಜೆರ್-6 ಡ್ರೋನ್ ಕ್ಷಿಪಣಿಗಳನ್ನು ಹೊತ್ತೊಯ್ಯುವ ಜತೆಗೆ ಕಣ್ಗಾವಲಿಗೂ ಬಳಸಬಹುದಾಗಿದೆ ಎಂದು ಅಮೆರಿಕ ಗುಪ್ತಚರ ಇಲಾಖೆಯ ಮೂಲಗಳು ಹೇಳಿವೆ. 

ಈ ಮಧ್ಯೆ, ಈ ವಿಷಯದ ಬಗ್ಗೆ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಸಭೆಯಲ್ಲಿ ಚರ್ಚೆ ನಡೆಸಲು ಅಮೆರಿಕ, ಫ್ರಾನ್ಸ್ ಮತ್ತು ಬ್ರಿಟನ್ ಯೋಜಿಸುತ್ತಿವೆ. ಇರಾನ್ ನಿರ್ಮಿತ ಡ್ರೋನ್ಗಳನ್ನು ರಶ್ಯಕ್ಕೆ ವರ್ಗಾಯಿಸುವುದು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ನಿರ್ಣಯ ಸಂಖ್ಯೆ 2231ರ ಉಲ್ಲಂಘನೆಯಾಗಿದೆ ಎಂದು ಈ ದೇಶಗಳು ಪ್ರತಿಪಾದಿಸಿವೆ.

ರಶ್ಯಕ್ಕೆ ಇನ್ನಷ್ಟು ಮಿಲಿಟರಿ ನೆರವು: ಇರಾನ್  (More military aid to Russia: Iran)

 ರಶ್ಯಕ್ಕೆ ಇನ್ನಷ್ಟು ಡ್ರೋನ್ ಗಳು, ಕ್ಷಿಪಣಿಗಳನ್ನು ಒದಗಿಸುವುದಾಗಿ ಇರಾನ್ ಭರವಸೆ ನೀಡಿದೆ. ಈ ಕುರಿತ ಒಪ್ಪಂದಕ್ಕೆ ಅಕ್ಟೋಬರ್ 6ರಂದು ಸಹಿ ಹಾಕಲಾಗಿದೆ ಎಂದು ಇರಾನ್ನ ಅಧಿಕಾರಿಗಳು ಹಾಗೂ ರಾಜತಾಂತ್ರಿಕರನ್ನು ಉಲ್ಲೇಖಿಸಿ `ರಾಯ್ಟರ್ಸ್' (Reuters)ವರದಿ ಮಾಡಿದೆ.

ಇರಾನ್ ನ ಪ್ರಥಮ ಉಪಾಧ್ಯಕ್ಷ ಮುಹಮ್ಮದ್ ಮೊಖ್ಬೆರ್, ರೆವೊಲ್ಯುಷನರಿ ಗಾರ್ಡ್ಸ್(Muhammad Mokhber, Revolutionary Guards) ಇಬ್ಬರು ಹಿರಿಯ ಅಧಿಕಾರಿಗಳು ಹಾಗೂ ರಾಷ್ಟ್ರೀಯ ಭದ್ರತಾ ಸಮಿತಿಯ ಅಧಿಕಾರಿಯನ್ನೊಳಗೊಂಡ ಇರಾನ್ನ ನಿಯೋಗ ಅಕ್ಟೋಬರ್ 6ರಂದು ಮಾಸ್ಕೋಗೆ ಭೇಟಿ ನೀಡಿ ಈ ಬಗ್ಗೆ ಚರ್ಚೆ ನಡೆಸಿದೆ. ಇರಾನ್ನ ಈ ನಡೆ ಅಮೆರಿಕ ಹಾಗೂ ಇತರ ಪಾಶ್ಚಿಮಾತ್ಯ ಶಕ್ತಿಗಳನ್ನು ಕೆರಳಿಸುವ ನಿರೀಕ್ಷೆಯಿದೆ ಎಂದು ವರದಿ ಹೇಳಿದೆ. 

ಇನ್ನಷ್ಟು ಡ್ರೋನ್ ಗಳು ಹಾಗೂ ಅಧಿಕ ನಿಖರತೆಯ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಒದಗಿಸುವಂತೆ ರಶ್ಯನ್ನರು ಕೋರಿದ್ದಾರೆ ಎಂದು ಇರಾನ್ನ ರಾಜತಾಂತ್ರಿಕ ಮೂಲಗಳು ಹೇಳಿವೆ. ಶಸ್ತ್ರಾಸ್ತ್ರ ಪೂರೈಕೆ ಬಗ್ಗೆ ಉಭಯ ದೇಶಗಳ ಮಧ್ಯೆ ಒಪ್ಪಂದ ನಡೆದಿರುವುದನ್ನು ಪಾಶ್ಚಿಮಾತ್ಯ ದೇಶಗಳ ಮೂಲಗಳೂ ದೃಢಪಡಿಸಿವೆ.

ಪರಮಾಣು ಸ್ಥಾವರದ  50 ಸಿಬ್ಬಂದಿಗಳು ರಶ್ಯ ವಶದಲ್ಲಿ: ಉಕ್ರೇನ್ (50 nuclear plant workers in Russian custody: Ukraine)

ರಶ್ಯ ಆಕ್ರಮಿತ ದಕ್ಷಿಣ ಉಕ್ರೇನ್ನ  ಝಪೋರಿಝಿಯಾ ಪರಮಾಣು ಸ್ಥಾವರದ 50 ಸಿಬಂದಿಗಳು ರಶ್ಯದ ವಶದಲ್ಲಿದ್ದಾರೆ ಎಂದು ಉಕ್ರೇನ್ನ ಪರಮಾಣು ಇಂಧನ ಸಂಸ್ಥೆ ಬುಧವಾರ ಹೇಳಿದೆ. 

ಫೆಬ್ರವರಿಯಲ್ಲಿ ಪರಮಾಣು ಸ್ಥಾವರದ ಪ್ರದೇಶವನ್ನು ವಶಕ್ಕೆ ಪಡೆದಂದಿನಿಂದ ಸ್ಥಾವರದ 150ಕ್ಕೂ ಅಧಿಕ ಸಿಬಂದಿಗಳನ್ನು ರಶ್ಯ ವಶಕ್ಕೆ ಪಡೆದಿದ್ದು ಬಳಿಕ ಇವರಲ್ಲಿ ಕೆಲವರನ್ನು ಬಿಡುಗಡೆಗೊಳಿಸಿದೆ. ಇನ್ನೂ ಸುಮಾರು 50ರಷ್ಟು ಸಿಬಂದಿಗಳು ರಶ್ಯದ ವಶದಲ್ಲಿದ್ದಾರೆ ಎಂದು  ಉಕ್ರೇನ್ನ ʼನ್ಯಾಷನಲ್ ನ್ಯೂಕ್ಲಿಯರ್ ಎನರ್ಜಿ ಜನರೇಟಿಂಗ್ ಕಂಪೆನಿ'ಯ ವಕ್ತಾರರು ಬುಧವಾರ ಹೇಳಿದ್ದಾರೆ.

ಉಕ್ರೇನ್ ಪ್ರತಿದಾಳಿ ಖೆರ್ಸಾನ್ನಿಂದ ರಶ್ಯ ಅಧಿಕಾರಿಗಳ ಪಲಾಯನ

ಯುದ್ಧದ ಆರಂಭದ ದಿನದಿಂದಲೂ ರಶ್ಯ ಸೇನೆಯ ವಶದಲ್ಲಿದ್ದ ದಕ್ಷಿಣದ ಖೆರ್ಸಾನ್ ನಗರದಲ್ಲಿ ಉಕ್ರೇನ್ ಸೇನೆ ಪ್ರತಿದಾಳಿ ಆರಂಭಿಸಿದ್ದು ನಿರ್ಣಾಯಕ ಮುನ್ನಡೆ ಸಾಧಿಸಿದೆ. ರಶ್ಯದ ಅಧಿಕಾರಿಗಳು ನಗರದಿಂದ ಪಲಾಯನ ಮಾಡುತ್ತಿದ್ದಾರೆ ಎಂದು ಉಕ್ರೇನ್ ಅಧ್ಯಕ್ಷರ ಕಚೇರಿ ಹೇಳಿದೆ. 

ಉಕ್ರೇನ್ ಸೇನೆ ಶೀಘ್ರವೇ ಖೆರ್ಸಾನ್ ನಗರವನ್ನು ಮರು ಸ್ವಾಧೀನ ಮಾಡಿಕೊಳ್ಳಲಿದೆ ಎಂದು ಅಧಿಕಾರಿಗಳು ಹೇಳಿದ್ದು  ಮಂಗಳವಾರ ರಾತ್ರಿ ಮಿಕೊಲಾಯಿವ್ ವಲಯದಲ್ಲಿ 13 ಇರಾನ್ ನಿರ್ಮಿತ ಡ್ರೋನ್ಗಳನ್ನು ಹೊಡೆದುರುಳಿಸಲಾಗಿದೆ ಎಂದಿದ್ದಾರೆ. ಖೆರ್ಸಾನ್ ನಗರವನ್ನು ಉಳಿಸಿಕೊಳ್ಳಲು ರಶ್ಯ ಸೇನೆ ಜೀವಪಣಕ್ಕಿಟ್ಟು ಹೋರಾಡಲಿದೆ ಎಂದು ಇಲ್ಲಿ ರಶ್ಯ ನಿಯೋಜಿಸಿದ ಆಡಳಿತಾಧಿಕಾರಿ ಪ್ರತಿಕ್ರಿಯಿಸಿದ್ದಾರೆ.