ವಾರಾಹಿ ಸಮಸ್ಯೆ ಪರಿಹಾರಕ್ಕೆ ಉತ್ತರ ಕರ್ನಾಟಕ ಮಾದರಿ ಹೋರಾಟ ಅಗತ್ಯ: ಪ್ರತಾಪಚಂದ್ರ ಶೆಟ್ಟಿ

ಕುಂದಾಪುರ : ವಾರಾಹಿ ನೀರಾವರಿ ಯೋಜನೆ ಆರಂಭವಾಗಿ ೪೩ ವರ್ಷಗಳು ಕಳೆದರೂ ಇನ್ನೂ ಪೂರ್ಣ ಗೊಂಡಿಲ್ಲ. ಈ ವಿಚಾರದಲ್ಲಿ ಜನರ ಮೌನವೇ ಕಾಮಗಾರಿ ವಿಳಂಬಕ್ಕೆ ಕಾರಣವಾಗಿದೆ. ವಾರಾಹಿ ಸಮಸ್ಯೆ ಪರಿಹಾರಕ್ಕೆ ಹಳೆಮೈಸೂರು, ಉತ್ತರ ಕರ್ನಾಟಕದಂತೆ ಹೋರಾಟದ ರೂಪುರೇಷೆ ಸಿದ್ಧವಾಗ ಬೇಕು ಎಂದು ಉಡುಪಿ ಜಿಲ್ಲಾ ರೈತ ಸಂಘದ ಅಧ್ಯಕ್ಷ ಹಾಗೂ ಮಾಜಿ ವಿಧಾನ ಪರಿಷತ್ ಸಭಾಪತಿ ಕೆ.ಪ್ರತಾಪಚಂದ್ರ ಶೆಟ್ಟಿ ಹೇಳಿದ್ದಾರೆ.

ಬಿದ್ಕಲಕಟ್ಟೆ ಶ್ರೀಮಹಾಲಕ್ಷ್ಮೀ ಸಭಾಭವನದಲ್ಲಿ ರವಿವಾರ ನಡೆದ ಉಡುಪಿ ಜಿಲ್ಲಾ ರೈತ ಸಂಘ ಹಾಲಾಡಿ ವಲಯದ ರೈತರ ಸಭೆಯಲ್ಲಿ ಅವರು ಮಾತ ನಾಡುತ್ತಿದ್ದರು. ವಾರಾಹಿ ಸಮಸ್ಯೆಯ ಬಗ್ಗೆ ಸಂಸದರು, ಶಾಸಕರು, ಗುತ್ತಿಗೆ ದಾರರ ಬಳಿ ಕೇಳಲು ಜನರಿಗೆ ಮುಜುಗರವಾದರೆ ಅಧಿಕಾರಿಗಳ ಬಳಿ ದಾಕ್ಷಿಣ್ಯವಿಲ್ಲದೆ ಕೇಳಬೇಕು. ಪ್ರಶ್ನೆ ಮಾಡದಿದ್ದರೆ 43 ವರ್ಷಗಳಲ್ಲ, ಇನ್ನಷ್ಟು ವರ್ಷಗಳಾದರೂ ಕೆಲಸ ಮುಗಿಯುವುದಿಲ್ಲ ಎಂದರು.

ಸಭೆಯನ್ನು ಸಿದ್ದಾಪುರ ವಲಯ ಉಪಾಧ್ಯಕ್ಷ ಸಂಪಿಗೇಡಿ ಸಂಜೀವ ಶೆಟ್ಟಿ ಉದ್ಘಾಟಿಸಿದರು. ಉಡುಪಿ ಜಿಲ್ಲಾ ರೈತ ಸಂಘದ ಉಪಾಧ್ಯಕ್ಷ ರಾಜರಾಮ ತಲ್ಲೂರು ವಿದ್ಯುತ್ ಇಲಾಖೆ ಖಾಸಗೀಕರಣದಿಂದಾಗುವ ಸಮಸ್ಯೆಗಳ ಬಗ್ಗೆ ಮಾಹಿತಿ ನೀಡಿದರು. ಹಾಲಾಡಿ ವಲಯಾಧ್ಯಕ್ಷ ಚಂದ್ರಶೇಖರ ಶೆಟ್ಟಿ ಮರತ್ತೂರು ಮಾತನಾಡಿದರು.

ಇದೇ ಸಂದರ್ಭದಲ್ಲಿ ಕೃಷಿ ಕ್ಷೇತ್ರದಲ್ಲಿ ಸಾಧನೆಗೈದ ಚೈತ್ರಾ ಅಡಪ ಹಾಗೂ ಜಿಲ್ಲಾ ಅತ್ಯುತ್ತಮ ಶಿಕ್ಷಕ ಪ್ರಶಸ್ತಿ ಪುರಸ್ಕ್ರತರಾದ ಸುಜಾತಾ ಶೆಟ್ಟಿ, ನವೀನಚಂದ್ರ ಶೆಟ್ಟಿ, ಉದಯಕುಮಾರ್ ಶೆಟ್ಟಿ, ಆದರ್ಶ ಜಿಲ್ಲಾ ಶಿಕ್ಷಕ ಪ್ರಶಸ್ತಿ ಪುರಸ್ಕೃತರಾದ ಸತೀಶ್ ಶೆಟ್ಟಿಗಾರ್ ಜಪ್ತಿ, ಪ್ರಕಾಶ್ ಶೆಟ್ಟಿ ಮತ್ತು ಜಿಲ್ಲಾ ಸಮೂಹ ಸಂಪನ್ಮೂಲ ವ್ಯಕ್ತಿ ನಾಗರಾಜ ಆಚಾರ್ಯ ಅವರನ್ನು ಸನ್ಮಾನಿಸಲಾಯಿತು.

ಉಡುಪಿ ಜಿಲ್ಲಾ ರೈತ ಸಂಘದ ಕಾರ್ಯದರ್ಶಿ ಸಂತೋಷ್ ಕುಮಾರ್ ಶೆಟ್ಟಿ ಬಲಾಡಿ, ವಕ್ತಾರ ವಿಕಾಸ್ ಹೆಗ್ಡೆ, ಖಜಾಂಚಿ ಭೋಜ ಕುಲಾಲ್, ಹಾಲಾಡಿ ವಲಯಾಧ್ಯಕ್ಷ ಚಂದ್ರಶೇಖರ ಶೆಟ್ಟಿ ಮರತ್ತೂರು, ಕಾವ್ರಾಡಿ ವಲಯಾಧ್ಯಕ್ಷ ಶರಶ್ಚಂದ್ರ ಶೆಟ್ಟಿ, ಕೋಟೇಶ್ವರ ವಲಯ ಅಧ್ಯಕ್ಷ ಕೃಷ್ಣದೇವ ಕಾರಂತ ಕೋಣಿ, ಬೀಜಾಡಿ ವಲಯಾಧ್ಯಕ್ಷ ಕೆದೂರು ಸದಾನಂದ ಶೆಟ್ಟಿ, ಸಿದ್ದಾಪುರ ವಲಯಾಧ್ಯಕ್ಷ ಕೆ.ಸದಾಶಿವ ಶೆಟ್ಟಿ, ತ್ರಾಸಿ ವಲಯಾಧ್ಯಕ್ಷ ಶರತ್ ಕುಮಾರ್ ಶೆಟ್ಟಿ, ಬೈಂದೂರು ವಲಯಾಧ್ಯಕ್ಷ ವಸಂತ ಹೆಗ್ಡೆ ಗೋಳಿಹೊಳೆ, ಮಂದರ್ತಿ ವಲಯಾಧ್ಯಕ್ಷ ಕೃಷ್ಣರಾಜ ಶೆಟ್ಟಿ ಚೋರಾಡಿ, ಹಾರ್ದಳ್ಳಿ-ಮಂಡಳ್ಳಿ ಮಂಡಲ ಸಮಿತಿಯ ಅಧ್ಯಕ್ಷ ಸರ್ವೋತ್ತಮ ಹೆಗ್ಡೆ, ಮೊಳಹಳ್ಳಿ ಮಂಡಲ ಸಮಿತಿಯ ಅಧ್ಯಕ್ಷ ಎಂ.ದಿನೇಶ್ ಹೆಗ್ಡೆ, ಅಮಾಸೆಬೈಲು ಮಂಡಲ ಸಮಿತಿಯ ಕೃಷ್ಣ ಪೂಜಾರಿ, ಬೆಳ್ವೆ ಮಂಡಲ ಸಮಿತಿಯ ಉದಯಕುಮಾರ್ ಪೂಜಾರಿ, ಕುಂದಾಪುರ ಗ್ರಾಮೀಣ ಅಭಿವೃದ್ಧಿ ಬ್ಯಾಂಕ್ ಅಧ್ಯಕ್ಷ ಮಲ್ಯಾಡಿ ಶಿವರಾಮ ಶೆಟ್ಟಿ, ಅಮಾಸೆಬೈಲು ವ್ಯವಸಾಯ ಸೇವಾ ಸಹಕಾರಿ ಸಂಘದ ಅಧ್ಯಕ್ಷ ಮಂಜಯ್ಯ ಶೆಟ್ಟಿ, ಹಾರ್ದಳ್ಳಿ ಮಂಡಳ್ಳಿ ಗ್ರಾಪಂ ಅಧ್ಯಕ್ಷ ಸಿ.ಜಗನ್ನಾಥ ಶೆಟ್ಟಿ, ಮೊಳಹಳ್ಳಿ ಗ್ರಾಪಂ ಅಧ್ಯಕ್ಷೆ ಇಂದಿರಾ ಶೆಟ್ಟಿ, ಮೊಳಹಳ್ಳಿ ವ್ಯವಸಾಯ ಸೇವಾ ಸಹಕಾರಿ ಸಂಘದ ಮಹೇಶ್ ಹೆಗ್ಡೆ, ಬೆಳ್ವೆ ವ್ಯ.ಸೇ.ಸ. ಸಂಘದ ಜಯರಾಮ ಶೆಟ್ಟಿ, ಸಕ್ಕರೆ ಕಾರ್ಖಾನೆ ಮಾಜಿ ಅಧ್ಯಕ್ಷ ಜಯಶೀಲ ಶೆಟ್ಟಿ, ಭಾರತೀಯ ಕಿಸಾನ್ ಸಂಘದ ಅಧ್ಯಕ್ಷ ಸೀತಾರಾಮ ಗಾಣಿಗ ಹಾಲಾಡಿ ಮೊದ ಲಾದವರು ಉಪಸ್ಥಿತರಿದ್ದರು.

ರೈತ ಸಂಘದ ಪ್ರಧಾನ ಕಾರ್ಯದರ್ಶಿ ಬಿ. ಸತೀಶ್ ಕಿಣಿ ಕಾರ್ಯಕ್ರಮ ನಿರೂಪಿಸಿದರು. ಅಶೋಕ್ ಶೆಟ್ಟಿ ಸ್ವಾಗತಿಸಿದರು. ರೈತಸಂಘದ ಮುಖಂಡ ಉಮೇಶ್ ಶೆಟ್ಟಿ ಶಾನ್ಕಟ್ಟು ವಂದಿಸಿದರು.

ವಾರಾಹಿ, ಡೀಮ್ಡ್ ಸಮಸ್ಯೆ ಪರಿಹಾರಕ್ಕೆ ಆಗ್ರಹ

ಡೀಮ್ಡ್ ಸಮಸ್ಯೆ, ವಾರಾಹಿ ನೀರಾವರಿ ಯೋಜನೆ ಸಮಸ್ಯೆಗಳು, ವಿದ್ಯುತ್ ಖಾಸಗೀಕರಣ, ಕಾಡು ಪ್ರಾಣಿಗಳ ಹಾವಳಿ ಬಗ್ಗೆ ಸರಕಾರದ ನಿರ್ಲಕ್ಷ್ಯ, ಅಡಿಕೆ ಆಮದು, ತೆಂಗಿನ ಬೆಲೆ ಕುಸಿತ, ಭತ್ತಕ್ಕೆ ಬೆಂಬಲ ಬೆಲೆ ನೀಡದ ಬಗ್ಗೆ, ದುಬಾರಿಯಾಗುತ್ತಿರುವ ಹೈನುಗಾರಿಕೆ ಕುರಿತು ವಿಸ್ತೃತವಾದ ಚರ್ಚೆ ನಡೆಯಿತು.

ಹಲವು ಕಾರಣಗಳನ್ನು ಮುಂದಿಟ್ಟುಕೊಂಡು ಒಟ್ಟು 9ಲಕ್ಷದ 94 ಸಾವಿರದ 88 ಹೆಕ್ಟೇರ್‌ನಲ್ಲಿ 7 ಲಕ್ಷ 33 ಸಾವಿರದ 326 ಹೆಕ್ಟೇರ್ ಕೈಬಿಡಲಾಗಿದ್ದು 3 ಲಕ್ಷ 30 ಸಾವಿರ 186 ಹೆಕ್ಟೇರ್ ಡೀಮ್ಡ್ ಪಾರೆಸ್ಟ್ ಆಗಿದೆ. ಸರಕಾರದ ಕೆಲ ನಿರ್ಧಾರ ಗೊಂದಲಮಯವಾಗಿದೆ. 9 ಲಕ್ಷದಿಂದ 3 ಲಕ್ಷಕ್ಕೆ ಇಳಿಸಿದ್ದು ಆಶಾದಾಯಕ ವಿಚಾರ. ಬಿಟ್ಟುಹೋದ ಸರ್ವೇ ನಂಬರ್ ಪರಿಶೀಲಿಸಿ ಸಂಬಂಧಪಟ್ಟ ತಹಶಿಲ್ದಾರ್ ಅವರಿಂದ ಮಾಹಿತಿ ಪಡೆಯಲು ರೈತಸಂಘ ಸಹಕಾರ ನೀಡಲಿದೆ ಎಂದು ಪ್ರತಾಪ್‌ ಚಂದ್ರ ಶೆಟ್ಟಿ ತಿಳಿಸಿದರು.

"ವಾರಾಹಿ ಯೋಜನೆ ಅಚ್ಚುಕಟ್ಟು ಪ್ರದೇಶದ ರೈತರ ಗ್ರಾಮ ಸಮಿತಿ ಸಭೆ ನಡೆಸಿ ವಾರಾಹಿ ಕಚೇರಿಗೆ ತೆರಳಿ ಮಾಹಿತಿ ಪಡೆಯಬೇಕು. ಸಂಘರ್ಷ ಹಾಗೂ ಹೋರಾಟ ಅನಿವಾರ್ಯವಾದರೆ ನಿಮ್ಮೊಂದಿಗೆ ರೈತ ಸಂಘವಿದೆ. ಕಾನೂನು ಹೋರಾಟ ಅಗತ್ಯವಾದರೆ ಅದರ ಅರ್ಧ ಖರ್ಚನ್ನು ರೈತಸಂಘ ಭರಿಸಲಿದೆ. ಆದರೆ ರೈತಸಂಘವನ್ನು ಮುಂದೆ ಬಿಟ್ಟು ಜನರು ಮನೆಯಲ್ಲಿ ಕುಳಿತರೆ ನಮ್ಮ ಹೆಣ ಹೋಗುತ್ತದೆ. ವಾರಾಹಿ ವಿಚಾರದಲ್ಲಿ ಪಕ್ಷ ರಹಿತವಾದ ಒಗ್ಗಟ್ಟಿನ ಹೋರಾಟದ ಮೂಲಕವಾಗಿ ಇನ್ನು ಕಾಮಗಾರಿ ಕ್ಷಿಪ್ರವಾಗಿ ನಡೆಯುವಂತೆ ಮಾಡಬೇಕು".

-ಕೆ.ಪ್ರತಾಪಚಂದ್ರ ಶೆಟ್ಟಿ