ಈ ತಾಯಿ, ಮಕ್ಕಳ ಸಾವಿಗೆ ಯಾರು ಹೊಣೆ?

ಕೆಳಗಿನ ► ಪ್ಲೇ ಬಟನ್ ಕ್ಲಿಕ್ ಮಾಡಿ ಸಂಪಾದಕೀಯದ ಆಡಿಯೋ ಆಲಿಸಿ 

ಜನತೆಯ ಹಣದಿಂದ ನಡೆಯುವ ಸರಕಾರಿ ಆಸ್ಪತ್ರೆಗಳಿರುವುದು ಬಡವರಿಗಾಗಿ. ಆದರೆ ಇದೇ ಸರಕಾರಿ ಆಸ್ಪತ್ರೆಗಳಿಂದ ಜಾಗತಿಕ ಮಟ್ಟದಲ್ಲಿ ಕರ್ನಾಟಕಕ್ಕೆ ಕೆಟ್ಟ ಹೆಸರು ಬರುತ್ತಿರುವುದು ಎಲ್ಲರೂ ಕಳವಳಪಡಬೇಕಾದ ಸಂಗತಿ. ತುಮಕೂರಿನ ಸರಕಾರಿ ಆಸ್ಪತ್ರೆಯಲ್ಲಿ ಗರ್ಭಿಣಿಯೊಬ್ಬರಿಗೆ ಸೂಕ್ತ ಆರೈಕೆ ನೀಡದೆ ತಾಯಿ ಕಾರ್ಡ್, ಆಧಾರ್ ಕಾರ್ಡ್ ಇಲ್ಲವೆಂದು ನೆಪ ಹೇಳಿ ಚಿಕಿತ್ಸೆ ನೀಡಲು ನಿರಾಕರಿಸಿದ ಪರಿಣಾಮವಾಗಿ ಅವಳಿ ಹಸುಗೂಸುಗಳ ಜೊತೆಗೆ ತಾಯಿಯೂ ದುರಂತ ಸಾವನ್ನಪ್ಪಿರುವುದು ಕೇವಲ ಆಕಸ್ಮಿಕವಲ್ಲ. ಆ ಆಸ್ಪತ್ರೆಯ ವೈದ್ಯರು ಮತ್ತು ಶುಶ್ರೂಷಕಿಯರು ಮಾಡಿದ ಕಗ್ಗೊಲೆಯೆಂದರೆ ಅತಿಶಯೋಕ್ತಿಯಲ್ಲ.

ಎಲ್ಲರೂ ಸಕಾಲಕ್ಕೆ ಆರೋಗ್ಯ ಸೌಕರ್ಯ ಪಡೆಯುವಂತಾಗಲೆಂದು ‘ಆರೋಗ್ಯ ಕರ್ನಾಟಕ’ ಯೋಜನೆಯನ್ನು ಜಾರಿಗೆ ತರಲಾಗಿತ್ತು. ಒಕ್ಕೂಟ ಸರಕಾರ ಆಯುಷ್ಮಾನ್ ಯೋಜನೆಯನ್ನು ಜಾರಿಗೆ ತಂದಿದೆ. ಜನಸಾಮಾನ್ಯರು ಖಾಸಗಿ ಆಸ್ಪತ್ರೆಗಳಿಗೆ ಹೋದರೆ ಅಲ್ಲಿನ ವೈದ್ಯಕೀಯ ಶುಲ್ಕ ಭರಿಸಲು ಸಾಧ್ಯವಾಗುವುದಿಲ್ಲ ಎಂದು ಸರಕಾರ ಆಯುಷ್ಮಾನ್ ಕಾರ್ಡ್ ರೂಪಿಸಿದೆ. ಆದರೆ ಈ ಕಾರ್ಡ್ ಮಾಡಿಸಿಲ್ಲ ಎಂದ ಮಾತ್ರಕ್ಕೆ ಚಿಕಿತ್ಸೆಯನ್ನು ನಿರಾಕರಿಸಬಾರದು. ಮನುಷ್ಯತ್ವ, ಅಂತಃಕರಣ ಇರುವವರಾರೂ ಪಶುವಿನಂತೆ ವರ್ತಿಸುವುದಿಲ್ಲ. ಆದರೆ ತುಮಕೂರಿನ ಸರಕಾರಿ ಆಸ್ಪತ್ರೆಯ ವೈದ್ಯರು ಮತ್ತು ದಾದಿಯರು ನಡೆದುಕೊಂಡ ರೀತಿ ಅತ್ಯಂತ ಅಮಾನವೀಯವಾದುದು. ಈ ತಾಯಿ ಮಕ್ಕಳ ಸಾವಿಗೆ ಯಾರು ಹೊಣೆ? ಬರೀ ವೈದ್ಯರನ್ನು, ಶುಶ್ರೂಷಕಿಯರನ್ನು ಅಮಾನತಿನಲ್ಲಿಟ್ಟರೆ ಸಾಲದು. ಆರೋಗ್ಯ ಇಲಾಖೆಯ ಮುಖ್ಯಸ್ಥರು ಮತ್ತು ಆರೋಗ್ಯ ಮಂತ್ರಿಗಳು ಇದರ ಹೊಣೆ ಹೊರಬೇಕು.ಮುಂದೆ ಇಂತಹ ಘಟನೆ ನಡೆಯದಂತೆ ನೋಡಿಕೊಳ್ಳಬೇಕು.

ಇದು ಬರೀ ಕರ್ತವ್ಯ ಪಾಲನೆಯ ಪ್ರಶ್ನೆಯಲ್ಲ. ಮನುಷ್ಯತ್ವದ ಪ್ರಶ್ನೆ. ತುಂಬು ಗರ್ಭಿಣಿ ನೋವಿನಿಂದ ನರಳುತ್ತ ಆಸ್ಪತ್ರೆಗೆ ಬಂದರೆ ತಕ್ಷಣ ಸ್ಪಂದಿಸಿ ಚಿಕಿತ್ಸೆ ನೀಡಬೇಕಾದದ್ದು ವೈದ್ಯಕೀಯ ಸಿಬ್ಬಂದಿಯ ಮಾನವೀಯ ಕರ್ತವ್ಯ. ಅಂದು ಕರ್ತವ್ಯದಲ್ಲಿದ್ದ ಮಹಿಳಾ ವೈದ್ಯರು ಮತ್ತು ಶುಶ್ರೂಷಕಿಯರು ಕೂಡ ಇಂಥ ಯಾತನೆ ಅನುಭವಿಸಿರುತ್ತಾರೆ. ಇಲ್ಲವೇ ಮುಂದೆ ಅನುಭವಿಸಬಹುದು. ಬಡ ಗರ್ಭಿಣಿಯನ್ನು ಅಕ್ಕಪಕ್ಕದ ಮನೆಯವರು ತಂದು ಆಸ್ಪತ್ರೆಗೆ ಸೇರಿಸಿ ಪರಿಪರಿಯಾಗಿ ಕೇಳಿಕೊಂಡರೂ ತುಮಕೂರಿನ ಸರಕಾರಿ ಆಸ್ಪತ್ರೆಯ ಮಹಿಳಾ ವೈದ್ಯರು ಮತ್ತು ದಾದಿಯರ ಹೃದಯ ಕರಗಲಿಲ್ಲ ಎಂದರೆ ಏನು ಅರ್ಥ? ಇದು ನಾವು ಕಟ್ಟಿಕೊಂಡ ಲಾಭಕೋರ, ಭ್ರಷ್ಟ ವ್ಯವಸ್ಥೆ ಎಷ್ಟು ಕ್ರೌರ್ಯದಿಂದ ಕೂಡಿದೆ ಎಂಬುದಕ್ಕೆ ಮತ್ತೊಂದು ಉದಾಹರಣೆಯಾಗಿದೆ.

ಸರಕಾರಿ ಆಸ್ಪತ್ರೆಗಳಲ್ಲಿ ವೈದ್ಯಕೀಯ ಸಿಬ್ಬಂದಿಯ ಕೊರತೆ ಇದ್ದರೆ ನೇಮಕ ಮಾಡಿಕೊಳ್ಳಬಹುದು. ವೈದ್ಯಕೀಯ ಉಪಕರಣಗಳ ಕೊರತೆಯಿದ್ದರೆ ಒದಗಿಸಿ ಸರಿಪಡಿಸಬಹುದು. ಔಷಧಗಳ ಕೊರತೆಯಾದರೆ ಪೂರೈಸಬಹುದು. ಆದರೆ ಎಲ್ಲ ಅನುಕೂಲಗಳಿದ್ದೂ ಇಂತಹ ದುರಂತಗಳು ಸಂಭವಿಸುತ್ತಿವೆಯೆಂದರೆ ಅದಕ್ಕೆ ಕಾರಣ ಮನುಷ್ಯತ್ವದ, ಅಂತಃಕರಣದ ಅಭಾವ. ಮನುಷ್ಯತ್ವವನ್ನು ಎಲ್ಲಿಂದ ತರುವುದು?

ತುಮಕೂರು ಸರಕಾರಿ ಆಸ್ಪತ್ರೆಯಲ್ಲಿ ನಡೆದ ಘಟನೆ ಇದೇ ಮೊದಲನೆಯದಲ್ಲ. ಹಿಂದೆಯೂ ಇಂತಹ ಅನೇಕ ಅಮಾನವೀಯ ಘಟನೆಗಳು ಸಂಭವಿಸಿವೆ. ರಸ್ತೆ ಅಪಘಾತದಲ್ಲಿ ಸಾವಿಗೀಡಾದ ಹರೀಶ್‌ಪ್ರಕರಣದಲ್ಲಿ ನ್ಯಾಯಾಲಯ ಛೀಮಾರಿ ಹಾಕಿದ ನಂತರವೂ ಇವರಿಗೆ ಬುದ್ಧಿ ಬರಲಿಲ್ಲ. ಸಾವು, ಬದುಕಿನ ನಡುವೆ ನರಕ ಯಾತನೆಯನ್ನು ಅನುಭವಿಸುತ್ತಿರುವ ಅಸಹಾಯಕ ರೋಗಿ ಬಂದರೆ ಆಧಾರ್ ಕಾರ್ಡ್ ಕೇಳದೆ, ಚಿಕಿತ್ಸೆ ನೀಡಬೇಕಾದುದು ವೈದ್ಯಕೀಯ ಸಿಬ್ಬಂದಿಯ ಮಾನವೀಯ ಕರ್ತವ್ಯ. ಇದನ್ನು ಹೇಳಲು ಮಂತ್ರಿಗಳು ಇಲ್ಲವೇ ನ್ಯಾಯಾಲಯ ಬರಬೇಕು. ತಮ್ಮ ಸಂಬಂಧಿಕರು ಇದೇ ಸ್ಥಿತಿಯಲ್ಲಿ ಆಸ್ಪತ್ರೆಗೆ ಬಂದರೆ ಸರಕಾರಿ ಆಸ್ಪತ್ರೆಯ ವೈದ್ಯರು ಇಷ್ಟು ಅಮಾನವೀಯವಾಗಿ ನಡೆದುಕೊಳ್ಳುವರೇ?

ಕರ್ನಾಟಕದಲ್ಲಿ ಆರೋಗ್ಯಸೇವೆ ಚೆನ್ನಾಗಿದೆ ಎಂದು ದೂರದ ಕಾಶ್ಮೀರ, ಪಶ್ಚಿಮ ಬಂಗಾಳ, ಬಿಹಾರ, ಉತ್ತರ ಪ್ರದೇಶಗಳಿಂದ ಮಾತ್ರವಲ್ಲ, ಬೇರೆ ದೇಶಗಳಿಂದಲೂ ರೋಗಿಗಳು ಇಲ್ಲಿಗೆ ಬಂದು ಚಿಕಿತ್ಸೆ ಪಡೆಯುತ್ತಾರೆ. ಆದರೆ ದೀಪದ ಕೆಳಗೆ ಕತ್ತಲು ಎಂಬಂತೆ ತುಮಕೂರಿನಂತಹ ಘಟನೆಗಳೂ ಸಂಭವಿಸುತ್ತವೆ. ಕೋವಿಡ್ ಎಂಬ ಪಿಡುಗು ಒಮ್ಮೆಲೆ ಬಂದೆರಗಿದಾಗ ಸರಕಾರಿ ಮತ್ತು ಖಾಸಗಿ ಆಸ್ಪತ್ರೆಗಳಲ್ಲಿ ಹಾಸಿಗೆ ಮತ್ತು ಆಮ್ಲಜನಕ ಸಿಗದೆ ಅನೇಕರು ಕೊನೆಯುಸಿರೆಳೆದರು. ಕೋವಿಡ್ ನಂತರವೂ ಸರಕಾರಿ ಆಸ್ಪತ್ರೆಗಳ ಪರಿಸ್ಥಿತಿ ಸುಧಾರಿಸಿದಂತೆ ಕಾಣುವುದಿಲ್ಲ.

ಸರಕಾರಿ ಆಸ್ಪತ್ರೆಗಳಿಗೆ ತುರ್ತು ಸ್ಥಿತಿಯಲ್ಲಿ ಬರುವ ರೋಗಿಗಳಿಗೆ ಮೊದಲು ದಾಖಲಿಸಿಕೊಂಡು ಚಿಕಿತ್ಸೆ ನೀಡಬೇಕು. ನಂತರ ಆಧಾರ್ ಕಾರ್ಡ್ ಇತ್ಯಾದಿಗಳನ್ನು ಕೇಳಬೇಕು. ಸರಕಾರದ ಜಯದೇವ ಹೃದಯರೋಗ ಆಸ್ಪತ್ರೆಯಲ್ಲಿ ಈಗಾಗಲೇ ಮೊದಲು ಯಾವುದೇ ಶುಲ್ಕವನ್ನು ಕಟ್ಟಿಸಿಕೊಳ್ಳದೆ ತಕ್ಷಣ ಚಿಕಿತ್ಸೆ ನೀಡುವ ವ್ಯವಸ್ಥೆಯನ್ನು ಅದರ ನಿರ್ದೇಶಕ ಡಾ. ಸಿ.ಎನ್.ಮಂಜುನಾಥ್ ಮಾಡಿದ್ದಾರೆ. ಇದೇ ರೀತಿ ರಾಜ್ಯದ ಎಲ್ಲಾ ಸರಕಾರಿ ಆಸ್ಪತ್ರೆಗಳಲ್ಲಿ ಯಾವುದೇ ದಾಖಲೆ ಇಲ್ಲವೇ ಶುಲ್ಕ ಕೇಳದೆ ಚಿಕಿತ್ಸೆ ನೀಡುವ ಸೌಕರ್ಯವನ್ನು ಸರಕಾರ ಕಲ್ಪಿಸಬೇಕಾಗಿದೆ.

ಇದಕ್ಕೂ ಮೊದಲು ರಾಜ್ಯದ ಆರೋಗ್ಯ ಇಲಾಖೆಗೆ ಕಾಯಕಲ್ಪ ನೀಡಬೇಕಾಗಿದೆ. ಭ್ರಷ್ಟಾಚಾರದ ವ್ಯಾಧಿಯೂ ಅದಕ್ಕೆ ಅಂಟಿಕೊಂಡಿದ್ದು ಅದನ್ನು ನಿವಾರಿಸಬೇಕಾಗಿದೆ. ಇನ್ನು ಮುಂದೆ ಗರ್ಭಿಣಿಯರಿಗೆ, ವೃದ್ಧರಿಗೆ ಮಾತ್ರವಲ್ಲ ಎಲ್ಲರಿಗೂ ಸಕಾಲದಲ್ಲಿ ಸೇವೆಯನ್ನು ಒದಗಿಸುವಂತೆ ಸರಕಾರಿ ಆಸ್ಪತ್ರೆಗಳನ್ನು ಸಜ್ಜುಗೊಳಿಸಬೇಕಾಗಿದೆ. ತುಮಕೂರಿನ ಸರಕಾರಿ ಆಸ್ಪತ್ರೆಯ ಪಾತಕಿ ಸಿಬ್ಬಂದಿಯ ಮೇಲೆ ಕೊಲೆ ಆರೋಪ ದಾಖಲಿಸಿ ವಜಾ ಮಾಡುವುದು ಅಗತ್ಯವಾಗಿದೆ. ವೈದ್ಯಕೀಯ ಸೇವೆ ಜಾತಿ, ಮತ, ರಾಷ್ಟ್ರೀಯತೆ, ಮೇಲು, ಕೀಳು ಭೇದವಿಲ್ಲದೆ ಎಲ್ಲರಿಗೂ ಸಿಗುವಂತೆ ನೋಡಿಕೊಳ್ಳಬೇಕಾದುದು ಸರಕಾರದ ಕರ್ತವ್ಯವಾಗಿದೆ.