‘ಕೇಂದ್ರದ ಕೈಗೊಂಬೆ’ ಆರೋಪ: ರಾಜ್ಯಪಾಲರೊಂದಿಗೆ ದಕ್ಷಿಣದ ಮೂರು ರಾಜ್ಯ ಸರಕಾರಗಳ ಸಂಘರ್ಷ

ಹೈದರಾಬಾದ್, ನ.8: ಕೇರಳ, ತಮಿಳುನಾಡು ಮತ್ತು ತೆಲಂಗಾಣಗಳಲ್ಲಿ ರಾಜ್ಯಪಾಲರು ಮತ್ತು ಆಡಳಿತ ಪಕ್ಷಗಳ ನಡುವೆ ದೊಡ್ಡ ಹೋರಾಟವೇ ನಡೆಯುತ್ತಿದೆ.

ದಕ್ಷಿಣ ಭಾರತದ ಈ ಮೂರು ರಾಜ್ಯಗಳ ರಾಜ್ಯಪಾಲರು ‘ಕೇಂದ್ರದ ಕೈಗೊಂಬೆ ’ಗಳಂತೆ ವರ್ತಿಸುತ್ತಿದ್ದಾರೆ ಎಂದು ರಾಜ್ಯ ಸರಕಾರಗಳು ಆರೋಪಿಸಿವೆ. ಹಲವಾರು ಪ್ರಮುಖ ಶಾಸನಗಳಿಗೆ ಸಂಬಂಧಿಸಿದಂತೆ ರಾಜ್ಯಪಾಲರು ಮತ್ತು ಸರಕಾರಗಳ ನಡುವೆ ಸಂಘರ್ಷಗಳಿಗೆ ಈ ರಾಜ್ಯಗಳು ಸಾಕ್ಷಿಯಾಗಿವೆ. ಕೇಂದ್ರದಿಂದ ನೇಮಕಗೊಂಡ ರಾಜ್ಯಪಾಲರ ವಿರುದ್ಧದ ಸಿಟ್ಟು ಈಗ ರಾಜ್ಯಗಳಾದ್ಯಂತ ಹರಡಿದ್ದು, ಆಯಾ ರಾಜ್ಯಗಳ ಆಡಳಿತ ಪಕ್ಷಗಳು ರಾಜ್ಯಪಾಲರ ಹುದ್ದೆಯ ಸಾಂವಿಧಾನಿಕ ನಿಬಂಧನೆಗಳನ್ನು ಪ್ರಶ್ನಿಸುತ್ತಿವೆ.

ಹಲವಾರು ವಿಷಯಗಳಲ್ಲಿ ರಾಜ್ಯ ಸರಕಾರಗಳು ಮತ್ತು ರಾಜ್ಯಪಾಲರ ನಡುವೆ ತೀಕ್ಷ್ಣ ದಾಳಿ ಮತ್ತು ಪ್ರತಿದಾಳಿಗಳನ್ನು ಕೇರಳ, ತಮಿಳುನಾಡು ಮತ್ತು ತೆಲಂಗಾಣ ರಾಜ್ಯಗಳು ನೋಡುತ್ತಿವೆ. ರಾಜ್ಯಪಾಲರ ವಿರುದ್ಧ ಹಲವಾರು ಪ್ರತಿಭಟನೆಗಳು ಮತ್ತು ಜಾಥಾಗಳನ್ನೂ ಯೋಜಿಸಲಾಗಿದೆ.

ಮಂಗಳವಾರ ತಮಿಳುನಾಡಿನ ಆಡಳಿತ ಪಕ್ಷ ಡಿಎಂಕೆ ನೆರೆರಾಜ್ಯದ ರಾಜಕೀಯದಲ್ಲಿ ಮೂಗು ತೂರಿಸುತ್ತಿರುವುದಾಗಿ ಆರೋಪಿಸಿ ತೆಲಂಗಾಣ ರಾಜ್ಯಪಾಲರಾದ ತಮಿಳಿಸಲೈ ಸೌಂದರರಾಜನ್ ವಿರುದ್ಧ ತೀವ್ರ ದಾಳಿ ನಡೆಸಿದೆ. ಸೌಂದರರಾಜನ್ ತೆಲಂಗಾಣ ರಾಜ್ಯ ವಿವಿಗಳಲ್ಲಿ ನೇಮಕಾತಿಗಳ ಕುರಿತು ಮುಖ್ಯಮಂತ್ರಿ ಕೆ.ಚಂದ್ರಶೇಖರ ರಾವ್ ನೇತೃತ್ವದ ಟಿಆರ್‌ಎಸ್‌ನಿಂದಲೂ ದಾಳಿಗೆ ಗುರಿಯಾಗಿದ್ದಾರೆ.

ತಮಿಳುನಾಡಿನ ಉನ್ನತ ರಾಜಕೀಯ ಕುಟುಂಬ, ಡಿಎಂಕೆ ತೆಲುಗು ಬೇರುಗಳನ್ನು ಹೊಂದಿವೆ ಎಂದು ಇಂಗಿತ ವ್ಯಕ್ತಪಡಿಸಿದ್ದ ಸೌಂದರರಾಜನ್ ಹೇಳಿಕೆಗೆ ಮಂಗಳವಾರ ಪ್ರತಿಕ್ರಿಯಿಸಿರುವ ಡಿಎಂಕೆಯ ಮುಖವಾಣಿ ಮುರಸೋಳಿ, ತೆಲಂಗಾಣ ರಾಜ್ಯಪಾಲರು ತಮಿಳುನಾಡಿನಲ್ಲಿ ರಾಜಕೀಯ ಮಾಡಬಾರದು. ಇದು ಅವರ ಕೆಲಸವಲ್ಲ. ಅವರು ಬೇಕಿದ್ದರೆ ರಾಜೀನಾಮೆ ನೀಡಿ ತಮಿಳು ನಾಡಿನಲ್ಲಿ ರಾಜಕೀಯ ಮಾಡಲಿ. ತಮಿಳುನಾಡು ರಾಜ್ಯಪಾಲ ಆರ್.ಎನ್.ರವಿ ಅವರು ಈಗಾಗಲೇ ತನ್ನ ಮಿತಿಗಳನ್ನು ಮೀರಿದ್ದಾರೆ ಮತ್ತು ಗೋಂದಲಮಯ ಹೇಳಿಕೆಗಳನ್ನು ನೀಡುತ್ತಿದ್ದಾರೆ ಎಂದು ಹೇಳಿದೆ.

ಸೌಂದರರಾಜನ್ ಅವರು ರಾಜಕೀಯ ಮತ್ತು ಕಾನೂನಾತ್ಮಕ ಮಾನದಂಡಗಳೊಳಗೆ ಕಾರ್ಯ ನಿರ್ವಹಿಸಬೇಕು ಮತ್ತು ರಾಜ್ಯಗಳನ್ನು ಗೌರವಿಸಬೇಕು ಎಂದು ಅದು ಹೇಳಿದೆ.

ಸಂವಿಧಾನದ ವಿರುದ್ಧ ನಡೆದುಕೊಳ್ಳುತ್ತಿರುವುದಕ್ಕಾಗಿ ಹುದ್ದೆಯಿಂದ ಆರ್.ಎನ್.ರವಿ ವಜಾ ಕೋರುವ ಪ್ರಸ್ತಾವವನ್ನು ಬೆಂಬಲಿಸುವಂತೆ ಡಿಎಂಕೆ ಈ ತಿಂಗಳ ಆರಂಭದಲ್ಲಿ ಸಮಾನಮನಸ್ಕ ಸಂಸದರಿಗೆ ಪತ್ರ ಬರೆದಿತ್ತು.

ತಮಿಳುನಾಡಿನಲ್ಲಿ 20ಕ್ಕೂ ಅಧಿಕ ಮಸೂದೆಗಳು ರಾಜ್ಯಪಾಲರ ಅಂಕಿತಕ್ಕಾಗಿ ಕಾಯುತ್ತಿವೆ. ರಾಜ್ಯ ವಿಧಾನಸಭೆಯಲ್ಲಿ ಎರಡು ಬಾರಿ ಅಂಗೀಕಾರಗೊಂಡಿದ್ದರೂ ನೀಟ್ ವಿನಾಯಿತಿ ಮಸೂದೆಯನ್ನು ರಾಷ್ಟ್ರಪತಿಗಳಿಗೆ ಕಳುಹಿಸದ್ದಕ್ಕಾಗಿ ಡಿಎಂಕೆ ನಾಯಕರು ಆರ್.ಎನ್.ರವಿ ವಿರುದ್ಧ ಪ್ರತಿಭಟನೆಗಳನ್ನು ದಾಖಲಿಸಿದ್ದರು.

ಈ ನಡುವೆ ಸೌಂದರರಾಜನ್ ಅವರೂ ತೆಲಂಗಾಣ ರಾಜ್ಯ ಸರಕಾರದೊಂದಿಗೆ ಸಂಘರ್ಷಕ್ಕಿಳಿದಿದ್ದಾರೆ. ಯುಜಿಸಿ ನಿಯಮಗಳಿಗೆ ಅನುಗುಣವಾಗಿ ಎಲ್ಲ 15 ಸರಕಾರಿ ವಿವಿಗಳಿಗೆ ಸಾಮಾನ್ಯ ನೇಮಕಾತಿ ಮಂಡಳಿ ರಚನೆಯ ಕುರಿತು ಚರ್ಚಿಸಲು ಬರುವಂತೆ ಅವರು ರಾಜ್ಯ ಶಿಕ್ಷಣ ಸಚಿವೆ ಸಬಿತಾ ಇಂದ್ರ ರೆಡ್ಡಿ ಅವರಿಗೆ ನಿರ್ದೇಶ ನೀಡಿದ್ದಾರೆ.

ಕಳೆದ ಮೂರು ವರ್ಷಗಳಲ್ಲಿ ಹಲವಾರು ನೆನಪಿನೋಲೆಗಳನ್ನು ಕಳುಹಿಸಿದ್ದರೂ ಖಾಲಿ ಹುದ್ದೆಗಳನ್ನೇಕೆ ಭರ್ತಿ ಮಾಡಿಲ್ಲ ಎಂದು ಅವರು ಪ್ರಶ್ನಿಸಿದ್ದಾರೆ.

ಅತ್ತ ಕೇರಳದಲ್ಲಿಯೂ ರಾಜ್ಯಪಾಲ ಆರಿಫ್ ಮುಹಮ್ಮದ ಖಾನ್ ಮತ್ತು ರಾಜ್ಯ ಸರಕಾರದ ನಡುವಿನ ಸಂಘರ್ಷ ತಾರಕಕ್ಕೇರಿದೆ.