ಇಸ್ರೇಲ್: ಸರಕಾರ ರಚನೆಗೆ ಮಾಜಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಸಿದ್ಧತೆ

 ಜೆರುಸಲೇಂ, ನ.13: ಇಸ್ರೇಲ್‌ನ ಹಿರಿಯ ರಾಜಕಾರಣಿ, ಮಾಜಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಹೊಸ ಸರಕಾರ ರಚನೆಗೆ ಭಾನುವಾರ ಜನಾದೇಶ ಪಡೆದಿದ್ದು , ದೇಶದ ಇತಿಹಾಸದಲ್ಲೇ ಅತ್ಯಂತ ಬಲಪಂಥೀಯ ರಚನೆಯಾಗುವ ನಿರೀಕ್ಷೆಯಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.ಬೆಂಜಮಿನ್ ನೆತನ್ಯಾಹುಗೆ ಸರಕಾರ ರಚನೆಗೆ ಸೂಚಿಸಲಾಗಿದೆ ಎಂದು ಇಸ್ರೇಲ್ ಅಧ್ಯಕ್ಷ ಇಸಾಕ್ ಹೆರ್ಝಾಗ್ ಘೋಷಿಸಿದ್ದಾರೆ.

ನಾಲ್ಕು ವರ್ಷಗಳಲ್ಲಿ 5 ಚುನಾವಣೆಯನ್ನು ಕಂಡ ಇಸ್ರೇಲ್‌ನ ರಾಜಕೀಯ ಬಿಕ್ಕಟ್ಟಿನ ಬಳಿಕ ನವೆಂಬರ್ 1ರಂದು ನಡೆದ ಮತದಾನವು ಬೆಂಜಮಿನ್ ನೆತನ್ಯಾಹು ಮತ್ತವರ ತೀವ್ರ ಬಲಪಂಥೀಯ ಮಿತ್ರಪಕ್ಷಗಳಿಗೆ 120 ಸದಸ್ಯ ಬಲದ ಸಂಸತ್ತಿನಲ್ಲಿ ಸ್ಪಷ್ಟ ಬಹುಮತ ದೊರಕಿಸಿಕೊಟ್ಟಿದೆ.ಚುನಾವಣೆಗೂ ಮುನ್ನ ಮೈತ್ರಿಕೂಟ ಮಾಡಿಕೊಂಡಿರುವ ನೆತನ್ಯಾಹುಗೆ ಸಂಸತ್ತಿನಲ್ಲಿ ಬಹುಮತ ಸಾಬೀತಿಗೆ 28 ದಿನಗಳ ಅವಕಾಶವಿದೆ. ಆದರೆ, ಇದರ ಮಧ್ಯೆ ಅವರ ವಿರುದ್ಧ ನ್ಯಾಯಾಲಯದಲ್ಲಿ ದಾಖಲಾಗಿರುವ ಭ್ರಷ್ಟಾಚಾರ ಪ್ರಕರಣದ ವಿಚಾರಣೆಯೂ ಮುಂದುವರಿಯುತ್ತದೆ.

 ನೆತನ್ಯಾಹು ವಿರುದ್ಧ ಜೆರುಸಲೇಂ ಜಿಲ್ಲಾ ನ್ಯಾಯಾಲಯದಲ್ಲಿ ನಡೆಯುತ್ತಿರುವ ಕಾನೂನು ಪ್ರಕ್ರಿಯೆಯ ಬಗ್ಗೆ ನನಗೆ ತಿಳಿದಿದೆ ಮತ್ತು ಇದು ಕ್ಷುಲ್ಲಕ ವಿಷಯವಲ್ಲ ಎಂದೂ ತಿಳಿದಿದೆ. ಆದರೆ ನ್ಯಾಯಾಲಯದಲ್ಲಿ ತನ್ನ ವಿರುದ್ಧದ ಆರೋಪದ ವಿರುದ್ಧ ಹೋರಾಡುತ್ತಿರುವ ಸಂದರ್ಭ ಅವರು ಪ್ರಧಾನಿಯಾಗಿ ಮುಂದುವರಿಯಬಹುದು ಎಂಬುದಕ್ಕೆ ಪೂರ್ವ ನಿದರ್ಶನಗಳಿವೆ ’ ಎಂದು ಅಧ್ಯಕ್ಷ ಇಸಾಕ್ ಹೆರ್ಝಾಗ್ ಹೇಳಿದ್ದಾರೆ. ಹೊಸ ಸರಕಾರವು ವ್ಯಾಪಕವಾದ ನ್ಯಾಯಾಂಗ ಸುಧಾರಣೆಗಳನ್ನು ಅಂಗೀಕರಿಸುವ ನಿರೀಕ್ಷೆಯಿದೆ. ನೆತನ್ಯಾಹು ಸರಕಾರ ಸುಪ್ರೀಂಕೋರ್ಟ್‌ನ ನ್ಯಾಯಾಧೀಶರನ್ನು ನೇಮಿಸುವ ಪ್ರಕ್ರಿಯೆಯ ಸಂಪೂರ್ಣ ನಿಯಂತ್ರಣ ಪಡೆಯಬಹುದು ಎಂದು ಮಾಧ್ಯಮಗಳು ವರದಿ ಮಾಡಿವೆ. ಪ್ರಸ್ತುತ ಸಂಸದರು, ಹಾಲಿ ನ್ಯಾಯಾಧೀಶರು ಮತ್ತು ನ್ಯಾಯವಾದಿಗಳನ್ನು ಒಳಗೊಂಡಿರುವ ಸಮಿತಿ ಈ ಕಾರ್ಯವನ್ನು ಮಾಡುತ್ತಿದೆ.