ದೇವದಾಸಿ ನಿಷೇಧ ಮತ್ತು ಪುನರ್ವಸತಿ ಕಾಯ್ದೆ ಅನುಷ್ಠಾನಕ್ಕೆ ಒತ್ತಾಯ

ಬೆಂಗಳೂರು, ನ. 15: ದೇವದಾಸಿ ಸಮರ್ಪಣೆಯನ್ನು ಯಾವುದೇ ರೂಪದಲ್ಲಿ ಮಾಡುವುದಕ್ಕೆ ಉತ್ತೇಜಿಸುವವರಿಗೆ ಕಠಿಣ ಶಿಕ್ಷೆಯೊಂದಿಗೆ ಕರ್ನಾಟಕ ದೇವದಾಸಿ ತಡೆಗಟ್ಟುವಿಕೆ, ನಿಷೇಧ ಮತ್ತು ಪುನರ್ವಸತಿ ಕಾಯ್ದೆಯನ್ನು ಅನುಷ್ಠಾನ ಮಾಡಬೇಕು ಎಂದು ಬಳ್ಳಾರಿ ಮೂಲದ ದೇವದಾಸಿ ಮಹಿಳೆ ಗೌರಮ್ಮ ಆಗ್ರಹಿಸಿದ್ದಾರೆ.

ಮಂಗಳವಾರ ಇಲ್ಲಿನ ಖಾಸಗಿ ಹೋಟೆಲ್‍ನಲ್ಲಿ ಕರ್ನಾಟಕ ರಾಜ್ಯ ಕಾನೂನು ಸೇವೆಗಳ ಪ್ರಾಧಿಕಾರ ಹಾಗೂ ಚಿಲ್ಡ್ರನ್‍ ಆಫ್‍ ಇಂಡಿಯಾ ಫೌಂಡೇಶನ್ ವತಿಯಿಂದ ಆಯೋಜಿಸಿದ್ದ ‘ದೇವದಾಸಿ ಮಹಿಳೆಯರು ಮತ್ತು ಅವರ ಮಕ್ಕಳ ಸಮಸ್ಯೆಗಳಿಗೆ ಪರಿಹಾರ ಕುರಿತು ಮಾಧ್ಯಮದೊಂದಿಗೆ ಸಮಾಲೋಚನೆ’ ಕಾರ್ಯಕ್ರಮದಲ್ಲಿ ದೇವದಾಸಿ ಮಹಿಳೆಯರ ಬೇಡಿಕೆಗಳ ಕುರಿತು ಅವರು ಮಾತನಾಡಿದರು. 

ದಿನ ಬಳಕೆ ವಸ್ತುಗಳ ಬಳಕೆ ಹೆಚ್ಚಳ ಆಗುತ್ತಿದ್ದು, ದೇವದಾಸಿಯರಿಗೆ ನೀಡುವ 1,500 ರೂ.ಹಣದಲ್ಲಿ ಕುಟುಂಬ ನಿರ್ವಹಣೆ ಸಾಧ್ಯವಾಗುತ್ತಿಲ್ಲ. ಹಾಗಾಗಿ ದೇವದಾಸಿ ಮಹಿಳೆಯರಿಗೆ ಸರಕಾರವು ನೀಡುತ್ತಿದ್ದ ಮಾಸಿಕ ಮಾಶಾಸನವನ್ನು 3 ಸಾವಿರಕ್ಕೆ ಏರಿಸಬೇಕು ಎಂದು ಮನವಿ ಮಾಡಿದರು.

ಗ್ರಾಮ ಪಂಚಾಯತಿಗಳಲ್ಲಿ ವಸತಿ ಸೌಲಭ್ಯವನ್ನು ನೀಡಲಾಗುತ್ತಿದ್ದು, ನಿವೇಶನವನ್ನು ನೀಡುತ್ತಿಲ್ಲ. ಪಂಚಾಯತ ಅಧಿಕಾರಿಗಳು ನಿವೇಶನ ಇದ್ದರೆ ಮಾತ್ರ ವಸತಿ ಸೌಲಭ್ಯವನ್ನು ನೀಡಲಾಗುತ್ತದೆ ಎಂದು ಹೇಳುತ್ತಿದ್ದಾರೆ. ಹಾಗಾಗಿ ದೇವದಾಸಿ ಮಹಿಳೆಯರಿಗೆ ವಸತಿ ಸೌಲಭ್ಯದೊರೆಯುತ್ತಿಲ್ಲ. ಹಾಗಾಗಿ ಅವರಿಗೆ ಸರಕಾರ ನಿವೇಶನವನ್ನು ನೀಡಿ, ವಸತಿ ಯೋಜನೆಯನ್ನು ಅನುಷ್ಠಾನ ಮಾಡಬೇಕು ಎಂದು ತಿಳಿಸಿದರು.

ವಿಜಯಪುರ ಜಿಲ್ಲೆಯ ಭಾಗ್ಯಲಕ್ಷ್ಮೀ ಅವರು ಮಾತನಾಡಿ, ದೇವದಾಸಿ ಮಹಿಳೆಯರನ್ನು ಕುರಿತು ವಯೋಮಿತಿಯನ್ನು ತೆಗೆದು ಹಾಕುವ ಮೂಲಕ ಹೊಸ ಸಮೀಕ್ಷೆಯನ್ನು ನಡೆಸಿ, ಅಂತಹ ದೇವದಾಸಿಯರ ಅವಲಂಬಿತ ಮಕ್ಕಳ ಸಂಖ್ಯೆಯನ್ನು ದಾಖಲಿಸಬೇಕು. ದೇವದಾಸಿ ಮಕ್ಕಳಿಗೆ ಶಿಕ್ಷಣ ಮತ್ತು ಉದ್ಯೋಗದಲ್ಲಿ ವಿಶೇಷ ಮೀಸಲಾತಿಯನ್ನು ನೀಡಬೇಕು ಎಂದು ಅವರು ಒತ್ತಾಯಿಸಿದರು.

ಇದನ್ನೂ ಓದಿ... ದೇವದಾಸಿ ಪದ್ಧತಿ: ದೇವರ ಹೆಸರಿನಲ್ಲಿ ಶೋಷಣೆ 

ಸರಕಾರದ ಯೋಜನೆಗಳನ್ನು ಪಡೆಯಲು ಅರ್ಜಿ ನಮೂನೆಗಳಲ್ಲಿ ತಂದೆಯ ಹೆಸರನ್ನು ನಮೂದಿಸಬೇಕು ಎಂದು ದೇವದಾಸಿ ಮಕ್ಕಳನ್ನು ಒತ್ತಾಯಿಸಲಾಗುತ್ತಿದೆ. ಇದರಿಂದ ದೇವದಾಸಿ ಮಕ್ಕಳು ಅವಮಾನಕ್ಕೆ ಒಳಗಾಗುತ್ತಿದ್ದಾರೆ. ಹಾಗಾಗಿ ತಂದೆಯ ಹೆಸರು ಐಚ್ಚಿಕವಾಗಿ ಪರಿಗಣಿಸಲು ಸರಕಾರವು ಸಮರ್ಪಕವಾದ ನೀತಿಯನ್ನು ರೂಪಿಸಬೇಕು ಎಂದು ಮನವಿ ಮಾಡಿದರು.

ರಾಜ್ಯ ಮಕ್ಕಳ ಹಕ್ಕುಗಳ ರಕ್ಷಣಾ ಆಯೋಗದ ಅಧ್ಯಕ್ಷ ಕೆ. ನಾಗಣ್ಣಗೌಡ ಮಾತನಾಡಿ, ದೇವದಾಸಿ ಮಹಿಳೆಯರು ತಮ್ಮ ಮಕ್ಕಳ ಬಗ್ಗೆ ನಿರ್ಲಕ್ಷವನ್ನು ವಹಿಸಬಾರದು. ಸಾಮಾಜಿಕ ಕಳಂಕದ ಹೆಸರಿನಲ್ಲಿ ದೇವದಾಸಿ ಮಕ್ಕಳು ಜೀವನ ಸಾಗಿಸುತ್ತಿದ್ದಾರೆ.ಅವರನ್ನು ಈ ವ್ಯವಸ್ಥೆಯಿಂದ ಹೊರಬರುವಂತೆ ಮಾಡುವ ಜಾವಾಬ್ದಾರಿ ನಮ್ಮೆಲ್ಲರ ಮೇಲೆ ಇದೆಎಂದರು.

ದೇವದಾಸಿಯರ ಮರು ಸರ್ವೇ ಮಾಡುವ ನಿರ್ಣಯವನ್ನುಅಧಿಕಾರಿಗಳು ಸೇರಿ ಎಲ್ಲರೂ ಒಗ್ಗೂಡಿ ತೆಗೆದು ಕೊಳ್ಳಬೇಕು. ಆಗ ಇದಕ್ಕೊಂದು ಕ್ರಿಯಾಯೋಜನೆಯನ್ನು ಮಾಡಬಹುದು. ಶೀಘ್ರದಲ್ಲೇ ಈ ಕುರಿತು ಮಕ್ಕಳೊಂದಿಗೆ ಸಂವಾದವನ್ನು ನಡೆಸುತ್ತೇನೆ ಎಂದು ಅವರು ಭರವಸೆ ನೀಡಿದರು.

ಬೆಂಗಳೂರು ಉತ್ತರ ವಿವಿಯ ಕುಲಪತಿ ನಿರಂಜನ ವಾನಳ್ಳಿ ಮಾತನಾಡಿ, ಮಾಧ್ಯಮಗಳು ಇಂದು ಹಣ ನೀಡುವ ಕಾರ್ಯಕ್ರಮಗಳಿಗೆ ಆಧ್ಯತೆಯನ್ನು ನೀಡುತ್ತಿವೆ. ಹಾಗಾಗಿ ಕೆಲವೊಂದು ವಿಷಯಗಳಲ್ಲಿ ಮಾಧ್ಯಮಗಳು ‘ಟಚ್‍ ಅಂಡ್ ಗೂ’ ನೀತಿಯನ್ನು ಅನುಸರಿಸುತ್ತಿವೆ ಎಂದು ಬೇಸರ ವ್ಯಕ್ತಪಡಿಸಿದರು.

ದೇವದಾಸಿ ಮಕ್ಕಳು ಶಿಕ್ಷಣವನ್ನು ಪಡೆದು, ಸಮಾಜದಲ್ಲಿ ಮುಂದೆ ಬರಬೇಕು. ಈ ನಿಟ್ಟಿನಲ್ಲಿ ಬೆಂಗಳೂರು ಉತ್ತರ ವಿವಿಯಲ್ಲಿ ದೇವದಾಸಿ ಮಕ್ಕಳಿಗೆ ಉಚಿತ ಶಿಕ್ಷಣವನ್ನು ನೀಡುವುದಾಗಿಅವರು ಭರವಸೆ ನೀಡಿದರು.

ಸಂವಾದಕಾರ್ಯಕ್ರಮದಲ್ಲಿ ವಿವಿಧ ಜಿಲ್ಲೆಗಳಿಂದ ಆಗಮಿಸಿದ್ದ ದೇವದಾಸಿಯರು, ಅವರ ಮಕ್ಕಳು ಸೇರಿದಂತೆ ಮತ್ತಿತರಗಣ್ಯರು ಉಪಸ್ಥಿತರಿದ್ದರು.

''ದೇವದಾಸಿ ಮಕ್ಕಳು ಹೆಚ್ಚಿನ ಶಿಕ್ಷಣ ಪಡೆಯುವಲ್ಲಿ ತೊಂದರೆ ಆಗುತ್ತಿದೆ. ಕೆಲ ಜಿಲ್ಲೆಗಳಲ್ಲಿ ದೇವದಾಸಿ ಮಕ್ಕಳು 10ನೇ ತರಗತಿಯವರೆಗೆ ಮಾತ್ರ ಓದುತ್ತಿದ್ದಾರೆ. ನಂತರದ ವೃತ್ತಿಪರ ಶಿಕ್ಷಣಕ್ಕೆ ಹೆಚ್ಚಿನ ಹಣದ ಅವಶ್ಯಕತೆ ಇದ್ದು, ಸರಕಾರ ಯಾವುದೇ ಸೌಲಭ್ಯವನ್ನು ನೀಡುತ್ತಿಲ್ಲ. ಇದಲ್ಲದ ಕಡಿಮೆ ಖರ್ಚಿನಲ್ಲಿ ಓದುವ ಬಿ.ಎ., ಬಿ.ಎಡ್. ಪದವಿಗಳಿಗೆ ಯಾವುದೇ ಬೇಡಿಕೆ ಇಲ್ಲದ ಕಾರಣ ನಿರುದ್ಯೋಗಿಗಳಾಗಿ ಉಳಿದುಕೊಳ್ಳುತ್ತೇವೆ. ಹಾಗಾಗಿ ವೃತ್ತಿಪರ ಶಿಕ್ಷಣವನ್ನು ದೇವದಾಸಿ ಮಕ್ಕಳಿಗೆ ಉಚಿತವಾಗಿ ನೀಡಬೇಕು. ಹಾಗೆಯೇ ದೇವದಾಸಿ ಮಕ್ಕಳಿಗೆ ಕೆಲ ವರ್ಷಗಳವರೆಗೂ ಶಿಕ್ಷಣಕ್ಕೆ ತಕ್ಕಂತ ಕೆಲಸವನ್ನು ನೀಡಬೇಕು'' 

- ಮಲ್ಲಿಕಾ, ಪ್ಯಾರಾ ಮೆಡಿಕಲ್ ವಿದ್ಯಾರ್ಥಿನಿ, ಕೊಪ್ಪಳ ಜಿಲ್ಲೆ