ರಶ್ಯ ನಿರ್ಮಿತ ಕ್ಷಿಪಣಿಯಿಂದ ಮಲೇಶ್ಯಾದ ವಿಮಾನ ಪತನ: ನೆದರ್ಲ್ಯಾಂಡ್ ನ್ಯಾಯಾಲಯ

ಆಮ್ಸ್ಟರ್ಡಾಂ, ನ.17: ಪೂರ್ವ ಉಕ್ರೇನ್ನಲ್ಲಿ 2014ರಲ್ಲಿ ಮಲೇಶ್ಯಾದ ಪ್ರಯಾಣಿಕರ ವಿಮಾನವನ್ನು ರಶ್ಯದಲ್ಲಿ ನಿರ್ಮಿಸಲಾದ ಕ್ಷಿಪಣಿ ಹೊಡೆದುರುಳಿಸಿದೆ. ಆಗ ಈ ಪ್ರಾಂತವು ರಶ್ಯ ಪರ ಪ್ರತ್ಯೇಕತಾವಾದಿಗಳ ನಿಯಂತ್ರಣದಲ್ಲಿತ್ತು ಎಂದು ನೆದರ್ಲ್ಯಾಂಡ್ ನ ನ್ಯಾಯಾಲಯ ಗುರುವಾರ ತೀರ್ಪು ನೀಡಿದೆ. 2014ರ ಜುಲೈ 17ರಂದು ಸಂಭವಿಸಿದ್ದ ಈ ದುರಂತದಲ್ಲಿ ವಿಮಾನದಲ್ಲಿದ್ದ ಪ್ರಯಾಣಿಕರು ಹಾಗೂ ಸಿಬಂದಿವರ್ಗದ ಸಹಿತ 298 ಮಂದಿ ಮೃತಪಟ್ಟಿದ್ದರು.

ಈ ದುರಂತಕ್ಕೆ ಸಂಬಂಧಿಸಿದಂತೆ 4 ಪ್ರಮುಖ ಶಂಕಿತರ ವಿಚಾರಣೆ ಸಂದರ್ಭ ನ್ಯಾಯಾಲಯ ಈ ತೀರ್ಪು ನೀಡಿದೆ. ಆದರೆ ಈ ನಾಲ್ವರು ಶಂಕಿತರೂ ತಲೆಮರೆಸಿಕೊಂಡಿದ್ದು ರಶ್ಯದಲ್ಲಿ ನೆಲೆಸಿರುವ ಸಾಧ್ಯತೆಯಿದೆ ಎಂದು ಅಧಿಕಾರಿಗಳನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿವೆ. ಇಬ್ಬರು ರಶ್ಯನ್ನರು ಹಾಗೂ ಓರ್ವ ಉಕ್ರೇನ್ ಪ್ರಜೆಯ ಅಪರಾಧ ಸಾಬೀತಾಗಿದೆ. ಮತ್ತೋರ್ವ ರಶ್ಯನ್ ಪ್ರಜೆಯನ್ನು ಸಾಕ್ಷ್ಯಾಧಾರದ ಕೊರತೆಯಿಂದಾಗಿ ಖುಲಾಸೆಗೊಳಿಸಲಾಗಿದೆ ಎಂದು ನ್ಯಾಯಾಲಯ ತೀರ್ಪು ನೀಡಿದೆ.