ಗಾಯ, ಹಿಂಸಾಚಾರದಿಂದ ಪ್ರತಿನಿತ್ಯ ವಿಶ್ವದಾದ್ಯಂತ 12,000 ಜನರ ಸಾವು: ವಿಶ್ವ ಆರೋಗ್ಯ ಸಂಸ್ಥೆ

ಅಡಿಲೇಡ್,  ನ.30: ಗಾಯ ಹಾಗೂ ಹಿಂಸಾಚಾರ ಪ್ರತಿನಿತ್ಯ ಪ್ರಪಂಚದಾದ್ಯಂತ 12,000 ಜನರ ಸಾವಿಗೆ ಕಾರಣವಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಇತ್ತೀಚಿನ ವರದಿ ಹೇಳಿದೆ.

5ರಿಂದ 29  ವರ್ಷದವರಲ್ಲಿ ಸಾವಿಗೆ ಕಾರಣವಾಗುವ ಪ್ರಮುಖ 5 ಅಂಶಗಳಲ್ಲಿ 3 ಗಾಯಕ್ಕೆ ಸಂಬಂಧಿಸಿವೆ. ರಸ್ತೆ ಅಪಘಾತದಿಂದ ಆಗುವ ಗಾಯ, ನರಹತ್ಯೆ ಮತ್ತು ಆತ್ಮಹತ್ಯೆ ಈ ಮೂರು ಅಂಶಗಳಾಗಿವೆ. ಇನ್ನುಳಿದಂತೆ ನೀರಲ್ಲಿ ಮುಳುಗುವುದು, ಮೇಲಿನಿಂದ ಕೆಳಗೆ ಬೀಳುವುದು, ಸುಟ್ಟ ಗಾಯ, ವಿಷಸೇವನೆ ಕೂಡಾ ಗಾಯದಿಂದ ಆಗುವ ಸಾವಿನ ವಿಭಾಗಕ್ಕೆ ಸೇರುತ್ತದೆ  ಎಂದು ` ಗಾಯಗಳು ಮತ್ತು ಹಿಂಸಾಚಾರವನ್ನು ತಡೆಗಟ್ಟುವುದು: ಒಂದು ಅವಲೋಕನ' ಎಂಬ ವರದಿಯಲ್ಲಿ ವಿಶ್ವ ಆರೋಗ್ಯ ಸಂಸ್ಥೆ ಉಲ್ಲೇಖಿಸಿದೆ. ವಿಶ್ವದಾದ್ಯಂತ ವಾರ್ಷಿಕ 4.4 ಮಿಲಿಯನ್ ಸಾವಿನ ಪ್ರಕರಣಗಳು ಗಾಯಕ್ಕೆ ಸಂಬಂಧಿಸಿದೆ. ದಿನನಿತ್ಯ ಗಾಯದಿಂದ ಸಂಭವಿಸುವ ಸಾವಿನ ಪ್ರತೀ 3 ಪ್ರಕರಣದಲ್ಲಿ 1 ರಸ್ತೆ ಅಪಘಾತಕ್ಕೆ ಸಂಬಂಧಿಸಿದ್ದರೆ, ಪ್ರತೀ 6ರಲ್ಲಿ 1 ಆತ್ಮಹತ್ಯೆ, ಪ್ರತೀ 9ರಲ್ಲಿ 1 ನರಹತ್ಯೆ ಹಾಗೂ ಪ್ರತೀ 61ರಲ್ಲಿ 1 ಯುದ್ಧ ಮತ್ತು ಸಂಘರ್ಷದಿಂದಾಗುವ ಪ್ರಕರಣಗಳಾಗಿವೆ.

ಗಾಯದಿಂದ ಸಮಸ್ಯೆಗೆ ಒಳಗಾಗುವವರಲ್ಲಿ ಬಡತನದಲ್ಲಿ ವಾಸಿಸುವವರ ಪ್ರಮಾಣ ಹೆಚ್ಚಿದೆ. ಈ ಆರೋಗ್ಯ ಅಸಮಾನತೆಯನ್ನು ಪರಿಹರಿಸುವಲ್ಲಿ ಮತ್ತು ಗಾಯ ಹಾಗೂ ಹಿಂಸಾಚಾರ ತಡೆಗಟ್ಟುವಲ್ಲಿ ಆರೋಗ್ಯ ಕ್ಷೇತ್ರ ಪ್ರಮುಖ ಪಾತ್ರವನ್ನು ಹೊಂದಿದೆ. ಅಂಕಿಅಂಶ ಸಂಗ್ರಹಣೆ, ಕಾರ್ಯನೀತಿಯನ್ನು ರೂಪಿಸುವುದು, ಸೇವೆ ಒದಗಿಸುವುದು, ತಡೆಗಟ್ಟುವಿಕೆ ಮತ್ತು ಆರೈಕೆಗಾಗಿ ಕಾರ್ಯಕ್ರಮ ರೂಪಿಸುವುದು ಹಾಗೂ ಹಿಂದುಳಿದ ಸಮುದಾಯಗಳಿಗೆ ಹೆಚ್ಚಿನ ಗಮನವನ್ನು ನೀಡಬೇಕಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಟೆಡ್ರೋಸ್ ಅಧನಾಮ್ ಘೆಬ್ರಯೇಸಸ್ ಸಲಹೆ ನೀಡಿದ್ದಾರೆ.

ಸ್ಪೇನ್‍ನಲ್ಲಿ ನಗರಗಳ ವ್ಯಾಪ್ತಿಯಲ್ಲಿ ವಾಹನದ ವೇಗವನ್ನು ಗಂಟೆಗೆ 30 ಕಿ.ಮೀಗೆ ಸೀಮಿತಗೊಳಿಸಲಾಗಿದೆ. ವಿಯೆಟ್ನಾಮ್‍ನಲ್ಲಿ ನೀರಿನಲ್ಲಿ ಮುಳುಗುವುದನ್ನು ತಡೆಯುವ ಉದ್ದೇಶದಿಂದ ಈಜು ತರಬೇತಿ ಒದಗಿಸಿರುವುದು ಧನಾತ್ಮಕ ಬದಲಾವಣೆಗೆ ಕಾರಣವಾಗಿದೆ. ಆದರೆ ಬಹುತೇಕ ದೇಶಗಳಲ್ಲಿ ರಾಜಕೀಯ ಇಚ್ಛಾಶಕ್ತಿಯ ಕೊರತೆ ಹಾಗೂ ಸೂಕ್ತ ಅನುದಾನ ಒದಗಿಸದಿರುವುದು ಬಹುದೊಡ್ಡ ಸಮಸ್ಯೆಯಾಗಿದೆ. ಪ್ರತೀ ವರ್ಷ ಲಕ್ಷಾಂತರ ಕುಟುಂಬಗಳ ಈ ಅನಗತ್ಯ ಸಂಕಟವನ್ನು ತಪ್ಪಿಸಲು ತ್ವರಿತ ಕ್ರಮದ ಅಗತ್ಯವಿದೆ. ಏನು ಮಾಡಬೇಕೆಂಬುದು ನಮಗೆ ತಿಳಿದಿದೆ. ಅದನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸುವುದು ಈಗಿನ ಅಗತ್ಯವಾಗಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಸಾಮಾಜಿಕ ನಿರ್ಣಾಯಕ ವಿಭಾಗದ ನಿರ್ದೇಶಕ ಡಾ. ಎಟೀನ್ ಕ್ರಗ್ ಹೇಳಿದ್ದಾರೆ.

ಆಸ್ಟ್ರೇಲಿಯಾದ ಅಡಿಲೇಡ್‍ನಲ್ಲಿ ವಿಶ್ವ ಆರೋಗ್ಯ ಸಂಸ್ಥೆಯ ನೇತೃತ್ವದಲ್ಲಿ  ನಡೆಯುತ್ತಿರುವ `ಗಾಯ ತಡೆಗಟ್ಟುವಿಕೆ ಮತ್ತು ಹೆಚ್ಚುವರಿ ಸುರಕ್ಷತೆ' ವಿಷಯದ 14ನೇ ಜಾಗತಿಕ ಸಮಾವೇಶದಲ್ಲಿ ಈ ವರದಿಯನ್ನು ಮಂಡಿಸಲಾಗಿದೆ.