ಅದಾನಿ ಸಮೂಹ ಸಂಸ್ಥೆಯಲ್ಲಿ LIC ಹೂಡಿಕೆಯ ಹಿಂದೆ ಪ್ರಧಾನಿ 'ಕೈವಾಡ': ಪ್ರಶಾಂತ್‌ ಭೂಷಣ್‌ ಆರೋಪ

ಹೊಸದಿಲ್ಲಿ: ಅದಾನಿ ಸಮೂಹದ (Adani Group) ಏಳು ಲಿಸ್ಟೆಡ್‌ ಕಂಪನಿಗಳ ಪೈಕಿ ನಾಲ್ಕರಲ್ಲಿ ಲೈಫ್‌ ಇನ್ಶೂರೆನ್ಸ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ (LIC)  ಸೆಪ್ಟೆಂಬರ್‌ 2020 ರಿಂದ ಬಹಳಷ್ಟು ಹೂಡಿಕೆ ಮಾಡಿದೆ ಎಂದು ವರದಿಗಳು ಬಹಿರಂಗವಾದ ಬೆನ್ನಲ್ಲೇ ಭಾರೀ ಚರ್ಚೆ ಶುರುವಾಗಿದೆ.

ಈ ಕುರಿತು ಟ್ವೀಟ್‌ ಮಾಡಿರುವ ಖ್ಯಾತ ವಕೀಲ ಪ್ರಶಾಂತ್‌ ಭೂಷಣ್‌ ಅವರು, ಎಲ್‌ಐಸಿ ಅದಾನಿ ಸಮೂಹದ ಮೇಲೆ ಹೂಡಿಕೆ ಮಾಡಿರುವುದರ ಹಿಂದೆ ಪ್ರಧಾನಿ ಮೋದಿ ಇದ್ದಾರೆ ಎಂಬಂತೆ ಟ್ವೀಟ್‌ ಮಾಡಿದ್ದಾರೆ. 

“ಅದಾನಿಯ ಷೇರು ಬೆಲೆ ಮತ್ತು ಮಾರುಕಟ್ಟೆ ವ್ಯಾಪ್ತಿಯನ್ನು ಹೆಚ್ಚಿಸಲು ಎಲ್‌ಐಸಿಯ ನಮ್ಮ ಹಣದ 75000 ಕೋಟಿಗಳನ್ನು ಮೋದಿಜಿ ಬಳಸಿದರು. ಈ ವಿಸ್ತಿರಿಸಿಕೊಂಡಿರುವ ಮಾರುಕಟ್ಟೆ ಆಧಾರದ ಮೇಲೆ, ಅದಾನಿ ಬ್ಯಾಂಕ್‌ಗಳಿಂದ 2 ಲಕ್ಷ ಕೋಟಿಗೂ ಹೆಚ್ಚು ಸಾಲವನ್ನು ಪಡೆದಿದ್ದಾರೆ. ಅದಾನಿ ಗುಳ್ಳೆ ಒಡೆದ ದಿನ, ಎಲ್‌ಐಸಿ ಮಾತ್ರವಲ್ಲದೆ ಅನೇಕ ಬ್ಯಾಂಕ್‌ಗಳು ಸಹ ಪ್ರಪಾತಕ್ಕೆ ಬೀಳುತ್ತವೆ.” ಎಂದು ಪ್ರಶಾಂತ್‌ ಭೂಷಣ್‌ ಟ್ವೀಟ್‌ ಮಾಡಿದ್ದಾರೆ. 

ಅದಾನಿ ಸಮೂಹ ಕಂಪೆನಿಗಳ ರೂ 74,142 ಕೋಟಿ ಮೌಲ್ಯದ ಷೇರುಗಳನ್ನು ಎಲ್‌ಐಸಿ ಹೊಂದಿದೆ ಎಂದು ವರದಿಯಾಗಿದೆ. ಎಲ್‌ಐಸಿ ಗರಿಷ್ಠ ಹೂಡಿಕೆಯನ್ನು ಅದಾನಿ ಟೋಟಲ್‌ ಗ್ಯಾಸ್‌ನಲ್ಲಿ ಮಾಡಿದ್ದು ಈ ಸಂಸ್ಥೆಯಲ್ಲಿ ಎಲ್‌ಐಸಿ ಪಾಲುದಾರಿಕೆ ಸೆಪ್ಟೆಂಬರ್‌ 2020 ರಲ್ಲಿ ಶೇ. 1 ಕ್ಕಿಂತಲೂ ಕಡಿಮೆಯಿದ್ದರೆ ಸೆಪ್ಟೆಂಬರ್‌ 2022 ರಲ್ಲಿ ಅದು ಶೇ 5.77 ಗೆ ಏರಿಕೆಯಾಗಿದೆ ಎಂದು Indian Express ವರದಿ ಮಾಡಿದೆ.

ಅದೇ ರೀತಿ ಅದಾನಿ ಎಂಟರ್‌ಪ್ರೈಸಸ್‌ನಲ್ಲಿ ಎಲ್‌ಐಸಿಯ ಹೂಡಿಕೆ ಶೇ. 1 ರಿಂದ ಶೇ. 4.02 ರಷ್ಟು ಏರಿಕೆಯಾಗಿದ್ದರೆ ಅದಾನಿ ಟ್ರಾನ್ಸ್‌ಮಿಷನ್‌ನಲ್ಲಿ ಶೇ 2.42 ರಿಂದ ಶೇ 3,46 ಗೆ ಏರಿಕೆಯಾಗಿದೆ. ಅದಾನಿ ಗ್ರೀನ್‌ ಎನರ್ಜಿಯಲ್ಲಿ ಎಲ್‌ಐಸಿ ಹೂಡಿಕೆ ಶೇ 1 ರಿಂದ ಶೇ 1.5ಗೆ ಏರಿಕೆಯಾಗಿದೆ.

ರಿಲಯನ್ಸ್‌ ಇಂಡಸ್ಟ್ರೀಸ್‌ ಮತ್ತು ಟಾಟಾ ಗ್ರೂಪ್‌ ನಂತರ ಎಲ್‌ಐಸಿ ಗರಿಷ್ಠ ಹೂಡಿಕೆ ಮಾಡಿದ ಮೂರನೇ ಸಂಸ್ಥೆ ಅದಾನಿ ಸಮೂಹವಾಗಿದೆ.

ಎಲ್‌ಐಸಿ ಸಂಸ್ಥೆಯು ಅದಾನಿ ಸಮೂಹದ ಷೇರುಗಳಲ್ಲಿ ಕಳೆದೆರಡು ವರ್ಷಗಳಲ್ಲಿ ಮಾಡಿದ ಹೂಡಿಕೆ ಮ್ಯೂಚುವಲ್‌ ಫಂಡ್‌ಗಳು ಮಾಡಿದ ಹೂಡಿಕೆಗಳಿಗಿಂತ 4.9 ಪಟ್ಟು ಹೆಚ್ಚಾಗಿದೆ ಎಂದು ವರದಿಯೊಂದು ಹೇಳಿದೆ.

Modi ji got LIC to put 75000 Crs of our money into Adani to prop up their share price & market cap. On this inflated market cap, Adani has borrowed over 2 Lakh crs from banks. The day Adani's bubble bursts, not only will LIC go under but many banks as wellhttps://t.co/7l6HfAYGk9

— Prashant Bhushan (@pbhushan1) December 2, 2022