ಪಯ್ಯೋಲಿ ಎಕ್ಸ್ಪ್ರೆಸ್ ಕೈಗೆ ಐಒಎ ಸಾರಥ್ಯ
ಸುದೀರ್ಘ ಕಾಲದಿಂದ ವಿವಾದದಲ್ಲಿ ಮುಳುಗಿದ್ದ ಭಾರತೀಯ ಒಲಿಂಪಿಕ್ ಅಸೋಸಿಯೇಷನ್ಗೆ ಚಿಕಿತ್ಸೆ ನೀಡಲು ಹೊಸ ಸಾರಥಿಯ ಆಗಮನವಾಗಿದೆ. ಪಯ್ಯೋಳಿ ಎಕ್ಸ್ಪ್ರೆಸ್ ಖ್ಯಾತಿಯ ಕೇರಳದ ಓಟದ ರಾಣಿ ಪಿ.ಟಿ. ಉಷಾ ಅವರು ಐಒಎ ಮುಖ್ಯಸ್ಥರಾಗಿ ನೇಮಕಗೊಂಡಿದ್ದಾರೆ. 95 ವರ್ಷಗಳ ಸುದೀರ್ಘ ಇತಿಹಾಸವಿರುವ ಐಒಎ ಚುಕ್ಕಾಣಿಯನ್ನು ಮೊದಲ ಬಾರಿ ಮಹಿಳೆಯೊಬ್ಬರು ವಹಿಸಿಕೊಂಡಿದ್ದಾರೆ.
1927ರಲ್ಲಿ ಸ್ಥಾಪನೆಗೊಂಡ ಭಾರತೀಯ ಒಲಿಂಪಿಕ್ಸ್ ಅಸೋಸಿಯೇಶನ್ಗೆ ಪಿ.ಟಿ.ಉಷಾ ಅವರು 16ನೇ ಅಧ್ಯಕ್ಷರಾಗಿದ್ದಾರೆ. 38 ರಾಷ್ಟ್ರೀಯ ಕ್ರೀಡಾ ಒಕ್ಕೂಟಗಳು ಐಒಎ ಅಧೀನಕ್ಕೊಳಪಟ್ಟಿವೆ. ಇಂತಹ ಬಲಿಷ್ಠ ಸಂಘಟನೆ ಕೆಲವು ವರ್ಷಗಳಿಂದ ಒಂದಲ್ಲ ಒಂದು ವಿವಾದದಲ್ಲಿ ಸುದ್ದಿಯಾಗುತ್ತಿದೆ. ಕಾಮನ್ವೆಲ್ತ್ ಕ್ರೀಡಾಕೂಟ ಸಂಘಟಿಸುವಲ್ಲಿ ಹಿಂದೆ ದೊಡ್ಡ ಹಗರಣವೇ ನಡೆದಿತ್ತು. ಆಗ ಅಧ್ಯಕ್ಷರಾಗಿದ್ದ ರಾಜ್ಯಸಭಾ ಸದಸ್ಯ ಹಾಗೂ ಕಾಂಗ್ರೆಸ್ ಧುರೀಣ ಸುರೇಶ್ ಕಲ್ಮಾಡಿ ಭ್ರಷ್ಟಾಚಾರದ ಆರೋಪದಲ್ಲಿ 2011, ಎಪ್ರಿಲ್ 26ರಂದು ಬಂಧನಕ್ಕೊಳಗಾಗಿ 10 ತಿಂಗಳ ಜೈಲುವಾಸ ಅನುಭವಿಸಿದ್ದರು. ಸುರೇಶ್ ಕಲ್ಮಾಡಿ ಜೈಲು ಸೇರಿದಾಗ ಬಿಜೆಪಿ ಧುರೀಣ ವಿಜಯ್ ಕುಮಾರ್ ಮಲ್ಹೋತ್ರಾ 5 ಡಿಸೆಂಬರ್ 2012 ರವರೆಗೆ ಐಒಎನ ಹಂಗಾಮಿ ಅಧ್ಯಕ್ಷರಾಗಿದ್ದರು.
ಡಿಸೆಂಬರ್ 4, 2012ರಂದು, ಅಂತರ್ರಾಷ್ಟ್ರೀಯ ಒಲಿಂಪಿಕ್ ಸಮಿತಿಯು ಭ್ರಷ್ಟಾಚಾರ, ಸರಕಾರದ ಹಸ್ತಕ್ಷೇಪ ಮತ್ತು ಐಒಸಿಯ ಮಾರ್ಗಸೂಚಿಗಳನ್ನು ಅನುಸರಿಸದ ಆಧಾರದ ಮೇಲೆ ಐಒಎ ಅನ್ನು ಅಮಾನತುಗೊಳಿಸಿತು. ಐಒಎ ತಂಡದ ಹಲವಾರು ಸದಸ್ಯರ ಮೇಲೆ ಭ್ರಷ್ಟಾಚಾರದ ಆರೋಪ ಹೊರಿಸಲಾಗಿತ್ತು. ನಿಯಮ ಉಲ್ಲಂಘಿಸಿದ್ದಕ್ಕಾಗಿ ಔಪಚಾರಿಕವಾಗಿ ನಿಷೇಧಿಸಲ್ಪಟ್ಟಿತು, ಬಳಿಕ ದಿಲ್ಲಿ ಹೈಕೋರ್ಟಿನ ನಿರ್ದೇಶನದಿಂದಾಗಿ ಐಒಎ ಭಾರತೀಯ ಕ್ರೀಡಾ ಸಂಹಿತೆಯ ಅಡಿಯಲ್ಲಿ ಚುನಾವಣೆಗಳನ್ನು ನಡೆಸಿತು. 15 ಮೇ 2013ರಂದು ಸರಕಾರ ಮತ್ತು ಕ್ರೀಡಾ ಸಂಸ್ಥೆಗಳ ಭಾರತೀಯ ಪ್ರತಿನಿಧಿಗಳು ಐಒಎ ಅಧಿಕಾರಿಗಳೊಂದಿಗೆ ಒಪ್ಪಂದಕ್ಕೆ ಬಂದಿದ್ದರಿಂದ ಭಾರತೀಯ ಒಲಿಂಪಿಕ್ ಸಂಸ್ಥೆ (ಐಒಎ)ಯ ಮೇಲಿನ ನಿಷೇಧವನ್ನು ತೆಗೆದುಹಾಕಲು ಅಂತರ್ರಾಷ್ಟ್ರೀಯ ಒಲಿಂಪಿಕ್ ಸಮಿತಿ (ಐಒಸಿ) ನಿರ್ಧರಿಸಿತು. 2014ರ ಚಳಿಗಾಲದ ಒಲಿಂಪಿಕ್ಸ್ನಲ್ಲಿ ಭಾರತದ ಅತ್ಲೀಟ್ಗಳಿಗೆ ಮೂವರು ಸ್ಪರ್ಧಿಗಳಲ್ಲಿ ರಾಷ್ಟ್ರಧ್ವಜದ ಅಡಿಯಲ್ಲಿ ಆಡಲು ಸಾಧ್ಯವಾಗಲಿಲ್ಲ. 2014 ಫೆಬ್ರವರಿ 9ರಂದು ಐಒಎ ಮುಖ್ಯಸ್ಥರನ್ನು ಆಯ್ಕೆ ಮಾಡಲು ಚುನಾವಣೆ ನಡೆಯಿತು. ಆದರೆ ಹುದ್ದೆಯ ಮೇಲೆ ಕಣ್ಣಿಟ್ಟಿದ್ದ ಅಭಯ್ ಸಿಂಗ್ ಚೌತಾಲಾ ಮತ್ತು ಲಲಿತ್ ಭಾನೋಟ್ ವಿರುದ್ಧ ನ್ಯಾಯಾಲಯದಲ್ಲಿ ಆರೋಪಗಳಿರುವ ಕಾರಣದಿಂದಾಗಿ ಸ್ಪರ್ಧಿಸಲು ಅನರ್ಹರಾದರು. ಆನಂತರ ವಿಶ್ವ ಸ್ಕ್ವಾಷ್ ಫೆಡರೇಶನ್ನ ಅಧ್ಯಕ್ಷರಾದ ನಾರಾಯಣ ರಾಮಚಂದ್ರನ್ಗೆ ಅಧ್ಯಕ್ಷ ಹುದ್ದೆ ಒಲಿಯಿತು. ಅವರು ಫೆ.9ರಿಂದ 2017 ಡಿ.14ರ ತನಕ ಅಧ್ಯಕ್ಷ ಹುದ್ದೆಯಲ್ಲಿದ್ದರು. ಬಳಿಕ ನರೇಂದ್ರ ಬಾತ್ರಾ ಅಧ್ಯಕ್ಷರಾದರು. ಅವರು 25 ಮೇ 2022ರ ತನಕ ಅಧ್ಯಕ್ಷ ಹುದ್ದೆಯನ್ನಲಂಕರಿಸಿದ್ದರು. ಆ ಬಳಿಕ ಏಳು ತಿಂಗಳಲ್ಲಿ ಮೂವರು ಅಧ್ಯಕ್ಷರನ್ನು ಕಾಣುವಂತಾಗಿದೆ. ಅನಿಲ್ ಖನ್ನಾ ಮತ್ತು ಅದಿಲ್ಲೆ ಸುಮರಿವಲ್ಲ ಹಂಗಾಮಿ ಅಧ್ಯಕ್ಷರಾಗಿದ್ದರು.
2012ರಲ್ಲಿ ಸರಕಾರದ ಹಸ್ತಕ್ಷೇಪ ಮತ್ತು ಭ್ರಷ್ಟಾಚಾರಕ್ಕಾಗಿ ಐಒಎ ಅನ್ನು ಐಒಸಿ ನಿಷೇಧಿಸಿತು. ಫೆಬ್ರವರಿ 11, 2014ರಂದು, ಅಂತರ್ರಾಷ್ಟ್ರೀಯ ಒಲಿಂಪಿಕ್ ಸಮಿತಿಯು ಭಾರತೀಯ ಒಲಿಂಪಿಕ್ ಅಸೋಸಿಯೇಷನ್ನ ಮೇಲಿನ ನಿಷೇಧವನ್ನು ಹಿಂದೆಗೆದುಕೊಂಡಿತು. ಇದರ ಪರಿಣಾಮವಾಗಿ 14 ತಿಂಗಳ ನಿಷೇಧ ಕೊನೆಗೊಂಡಿತು.
ಭಾರತದ ಕ್ರೀಡಾ ಸಂಘಟನೆಗಳು ಸ್ವಜನಪಕ್ಷಪಾತ ಮತ್ತು ಭ್ರಷ್ಟಾಚಾರದಿಂದ ಹಾಳಾಗುತ್ತದೆ. ಕ್ರೀಡಾ ಸಂಸ್ಥೆಗಳಲ್ಲಿ ರಾಜಕಾರಣಿಗಳ ಹಸ್ತಕ್ಷೇಪವು ಕ್ರೀಡಾಪಟುಗಳ ಸಮಸ್ಯೆಗಳಿಗೆ ಹಿನ್ನಡೆಗೆ ಕಾರಣವಾಗಿದೆ.
ಇದೀಗ ಐಒಎ ಅಧ್ಯಕ್ಷರಾಗಿರುವ ಮೊದಲ ಒಲಿಂಪಿಯನ್ ಮತ್ತು ಮೊದಲ ಅಂತರ್ರಾಷ್ಟ್ರೀಯ ಪದಕ ವಿಜೇತೆ ಉಷಾ ನಿವೃತ್ತಿಯ ನಂತರ, ಭಾರತದ ಕ್ರೀಡಾಪಟುಗಳಿಗೆ ತರಬೇತುದಾರರಾಗಿ ಮತ್ತು ಮಾರ್ಗದರ್ಶಕರಾಗಿ ತಮ್ಮನ್ನು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದವರು. ಅವರ ಮಾರ್ಗದರ್ಶನದಲ್ಲಿ ಕೇರಳದ ಟಿಂಟು ಲೂಕಾ ಮತ್ತು ಜಿಸ್ನಾ ಮ್ಯಾಥ್ಯೂಸ್ ಅವರಂತಹ ಕ್ರೀಡಾಪಟುಗಳು ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ. ಒಲಿಂಪಿಕ್ ಹಂತಕ್ಕೂ ಬಂದಿದ್ದಾರೆ.
ರಾಜ್ಯಸಭಾ ಸದಸ್ಯರಾಗಿರುವ ಉಷಾ ಭಾರತದ ಕ್ರೀಡಾಪಟುಗಳಿಗೆ ಸಂಬಂಧಿಸಿದ ಹಲವಾರು ಸಮಸ್ಯೆಗಳ ಬಗ್ಗೆಯೂ ಧ್ವನಿಯೆತ್ತಿದ್ದಾರೆ.
58ರ ಹರೆಯದ ಪಿ.ಟಿ. ಉಷಾ 1979ರ ರಾಷ್ಟ್ರೀಯ ಕ್ರೀಡಾಕೂಟ ಮತ್ತು 1980ರ ರಾಷ್ಟ್ರೀಯ ಅಂತರ್ರಾಜ್ಯ ಕೂಟಗಳಲ್ಲಿ ಅನೇಕ ಪದಕಗಳನ್ನು ಗೆದ್ದರು ಮತ್ತು ದಾಖಲೆಗಳನ್ನು ಸ್ಥಾಪಿಸಿದರು. ಇದರಿಂದಾಗಿ 1980ರ ಮಾಸ್ಕೋ ಒಲಿಂಪಿಕ್ಸ್ಗೆ ಅವಕಾಶ ಸಿಕ್ಕಿತು. ಪಿ.ಟಿ. ಉಷಾ 1980 ಮತ್ತು 1990ರ ದಶಕದಲ್ಲಿ ಉತ್ತಮ ಪ್ರದರ್ಶನವನ್ನು ನೀಡಿದ್ದರು. 1985ರಲ್ಲಿ ಜಕಾರ್ತದಲ್ಲಿ ನಡೆದ ಏಶ್ಯನ್ ಚಾಂಪಿಯನ್ಶಿಪ್ನಲ್ಲಿ ಐದು ಚಿನ್ನ ಸೇರಿದಂತೆ ಆರು ಪದಕಗಳನ್ನು ಗೆದ್ದರು, ಒಂದೇ ಏಶ್ಯನ್ ಚಾಂಪಿಯನ್ಶಿಪ್ನಲ್ಲಿ ಹೆಚ್ಚು ಪದಕಗಳನ್ನು ಗಳಿಸಿದ ದಾಖಲೆಯನ್ನು ಬರೆದರು. ಅವರು 1986ರ ಸಿಯೋಲ್ ಏಶ್ಯನ್ ಕ್ರೀಡಾಕೂಟದಲ್ಲಿ ನಾಲ್ಕು ಪದಕಗಳನ್ನು ಗೆದ್ದರು. ಬಳಿಕ ಗಾಯದ ಸಮಸ್ಯೆಯಿಂದಾಗಿ ಸ್ಪರ್ಧೆಯಿಂದ ದೂರ ಉಳಿದರು. ಏಶ್ಯನ್ ಟ್ರ್ಯಾಕ್ ಮತ್ತು ಫೀಲ್ಡ್ ಸ್ಪರ್ಧೆಗಳಲ್ಲಿ 23 ಪದಕಗಳನ್ನು ಜಯಿಸಿದ್ದರು. ಇದರಲ್ಲಿ ಚಿನ್ನ 14 ಚಿನ್ನವಾಗಿತ್ತು.
ಉಷಾ ಕ್ರೀಡಾಪಟುಗಳ ಪರ ಸದಾ ಧ್ವನಿ ಎತ್ತುವವರು. ಹೀಗಾಗಿ ಕ್ರೀಡಾಪ್ರೇಮಿಗಳು ಉಷಾ ಅವರಿಂದ ಅಪಾರ ನಿರೀಕ್ಷೆಯನ್ನು ಹೊಂದಿದ್ದಾರೆ.
