ತವಾಂಗ್ ಘರ್ಷಣೆಗಳ ಬಳಿಕ ಈಶಾನ್ಯವನ್ನು ಗುರಿಯಾಗಿಸಿ ಡ್ರೋನ್ಗಳು,ಯುದ್ಧವಿಮಾನಗಳನ್ನು ನಿಯೋಜಿಸಿದ್ದ ಚೀನಾ : ವರದಿ
ಹೊಸದಿಲ್ಲಿ,ಡಿ.19: ಅರುಣಾಚಲ ಪ್ರದೇಶದಲ್ಲಿ ಭಾರತ-ಚೀನಾ(India- China) ಪಡೆಗಳ ನಡುವೆ ಘರ್ಷಣೆಗಳ ಬಳಿಕ ಆಂಗ್ಲ ಸುದ್ದಿವಾಹಿನಿಯೊಂದಕ್ಕೆ ಲಭ್ಯವಾಗಿರುವ ಹೈ-ರೆಸೊಲ್ಯೂಷನ್ (High-resolution)ಉಪಗ್ರಹ ಚಿತ್ರಗಳು ಚೀನಾ ಟಿಬೆಟ್ನ ಪ್ರಮುಖ ವಾಯುನೆಲೆಗಳಲ್ಲಿ ಈಶಾನ್ಯ ಭಾರತವನ್ನು ಗುರಿಯಾಗಿಸಿಕೊಂಡು ಭಾರೀ ಸಂಖ್ಯೆಯಲ್ಲಿ ಡ್ರೋನ್ಗಳು ಮತ್ತು ಯುದ್ಧವಿಮಾನಗಳನ್ನು ನಿಯೋಜಿಸಿತ್ತು ಎನ್ನುವುದನ್ನು ಸೂಚಿಸಿವೆ.
ಚೀನಾದ ಹೆಚ್ಚಿನ ವೈಮಾನಿಕ ಚಟುವಟಿಕೆಗಳಿಂದಾಗಿ ಭಾರತವು ಅರುಣಾಚಲ ಪ್ರದೇಶದಲ್ಲಿ ಯುದ್ಧವಿಮಾನಗಳ ಗಸ್ತು ನಡೆಸುತ್ತಿರುವ ಸಂದರ್ಭದಲ್ಲಿ ಮ್ಯಾಕ್ಸರ್ನ ಈ ಉಪಗ್ರಹ ಚಿತ್ರಗಳು ಬಹಿರಂಗಗೊಂಡಿವೆ. ಕಳೆದ ಕೆಲವು ವಾರಗಳಲ್ಲಿ ಚೀನಿ ವಿಮಾನಗಳಿಂದ ಅರುಣಾಚಲ ಪ್ರದೇಶದಲ್ಲಿ ಭಾರತೀಯ ವಾಯುಪ್ರದೇಶವನ್ನು ಉಲ್ಲಂಘಿಸುವ ಬೆದರಿಕೆಯನ್ನು ಪತ್ತೆ ಹಚ್ಚಿದ ಬಳಿಕ ಭಾರತೀಯ ವಾಯುಪಡೆಯ ಯುದ್ಧ ವಿಮಾನಗಳು ಕನಿಷ್ಠ ಎರಡು ಸಂದರ್ಭಗಳಲ್ಲಿ ಅಲ್ಲಿ ಹಾರಾಟ ನಡೆಸಿದ್ದವು.
ಅರುಣಾಚಲ ಪ್ರದೇಶದ ಗಡಿಯಿಂದ ಕೇವಲ 150 ಕಿ.ಮೀ.ಅಂತರದಲ್ಲಿರುವ ಚೀನಾದ ಬಾಂಗ್ಡಾ ವಾಯುನೆಲೆಯ ಚಿತ್ರವೊಂದು ಅತ್ಯಾಧುನಿಕ ಡಬ್ಲುಝಡ್-7‘ಸೋರಿಂಗ್ ಡ್ರಾಗನ್ ’(WZ-7 Soaring Dragon )ಡ್ರೋನ್ನ ಉಪಸ್ಥಿತಿಯನ್ನು ತೋರಿಸಿದೆ. 2021ರಲ್ಲಿ ಮೊದಲ ಬಾರಿಗೆ ಅಧಿಕೃತವಾಗಿ ಅನಾವರಣಗೊಂಡಿದ್ದ ‘ಸೋರಿಂಗ್ ಡ್ರಾಗನ್ ’10 ಗಂಟೆಗಳವರೆಗೆ ತಡೆರಹಿತ ಹಾರಾಟದ ಸಾಮರ್ಥ್ಯವನ್ನು ಹೊಂದಿದ್ದು,ಅದನ್ನು ಗುಪ್ತಚರ,ಕಣ್ಗಾವಲು ಮತ್ತು ವಿಚಕ್ಷಣಾ ಕಾರ್ಯಾಚರಣೆಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ ಮತ್ತು ದಾಳಿ ಕ್ಷಿಪಣಿಗಳು ನೆಲದ ಮೇಲಿನ ಗುರಿಗಳ ಮೇಲೆ ಎರಗಲು ಸಾಧ್ಯವಾಗಿಸಲು ಡಾಟಾವನ್ನು ರವಾನಿಸುವ ಸಾಮರ್ಥ್ಯವನ್ನು ಹೊಂದಿರಬಹುದು.
ಬಾಂಗ್ಡಾ ವಾಯುನೆಲೆಯ ಡಿ.14ರ ಚಿತ್ರಗಳು ಎರಡು ಫ್ಲಾಂಕರ್ ಮಾದರಿಯ ಯುದ್ಧವಿಮಾನಗಳನ್ನು ಸನ್ನದ್ಧ ಸ್ಥಿತಿಯಲ್ಲಿ ತೋರಿಸಿವೆ. ಇವು ಭಾರತೀಯ ವಾಯುಪಡೆಯು ಕಾರ್ಯಾಚರಿಸುತ್ತಿರುವ ರಶ್ಯಾ ವಿನ್ಯಾಸದ ಎಸ್ಯು-30ಎಂಕೆಐ ಯುದ್ಧವಿಮಾನದ ಮೇಡ್-ಇನ್ ಚೈನಾ ರೂಪಾಂತರಗಳಾಗಿವೆ.