ಸಿಎಟಿಯಲ್ಲಿ ಶೇ 99.78 ಅಂಕ ಗಳಿಸಿದ ಅಹ್ಮದಾಬಾದ್ನ ಎಸಿ ಮೆಕ್ಯಾನಿಕ್ ಪುತ್ರ ರಾಝಿನ್ ಮನ್ಸೂರಿ
ಅಹ್ಮದಾಬಾದ್ : ಅಹ್ಮದಾಬಾದ್ ನಗರದ ಎಸಿ ಮೆಕ್ಯಾನಿಕ್ ಒಬ್ಬರ ಪುತ್ರ 22 ವರ್ಷದ ರಾಝಿನ್ ಮನ್ಸೂರಿ ಕಾಮನ್ ಅಡ್ಮಿಶನ್ ಟೆಸ್ಟ್ (CAT) ನಲ್ಲಿ ತಮ್ಮ ಎರಡನೇ ಪ್ರಯತ್ನದಲ್ಲಿ 99.78 ಶೇಕಡಾ ಅಂಕಗಳನ್ನು ಗಳಿಸಿ ಐಐಎಂ-ಅಹ್ಮದಾಬಾದ್ ಅಥವಾ ಐಐಎಂ-ಬೆಂಗಳೂರು ಇಲ್ಲಿಗೆ ಪ್ರವೇಶಾವಕಾಶ ಸಾಧ್ಯತೆಯನ್ನು ಉಜ್ವಲವಾಗಿಸಿದ್ದಾರೆ. ತಮ್ಮ ಮೊದಲ ಪ್ರಯತ್ನದಲ್ಲಿ ಶೇ 96.2 ಅಂಕಗಳನ್ನು ಗಳಿಸಿದ್ದ ರಾಝಿನ್ಗೆ ಐಐಎಂ ಉದಯಪುರ್ಗೆ ಪ್ರವೇಶ ದೊರೆಯುವ ಅರ್ಹತೆ ಲಭಿಸಿತ್ತು. ಆದರೆ ಅಷ್ಟಕ್ಕೇ ಸಂತೃಪ್ತರಾಗದ ಅವರು ಎರಡನೇ ಬಾರಿ ಪ್ರಯತ್ನಿಸಿ ತಮ್ಮ ನಿರ್ವಹಣೆಯನ್ನು ಇನ್ನಷ್ಟು ಉತ್ತಮಗೊಳಿಸಿದ್ದಾರೆ.
ಈ ವರ್ಷದ ಮೇ ತಿಂಗಳಿನಲ್ಲಿ ಅಹ್ಮದಾಬಾದ್ ವಿವಿಯಿಂದ ಮಾಹಿತಿ ತಂತ್ರಜ್ಞಾನದಲ್ಲಿ ಇಂಜಿನಿಯರಿಂಗ್ ಶಿಕ್ಷಣ ಪಡೆದ ರಾಝಿನ್ ಅವರು ಇರ್ಫಾನ್ ಮನ್ಸೂರಿ ಹಾಗೂ ಸಬೀಹಾ ದಂಪತಿಯ ಪುತ್ರ. ರಾಝಿನ್ಗೆ ರೇಹನ್ ಎಂಬ ಒಬ್ಬ ಕಿರಿಯ ಸೋದರನಿದ್ದು, ಕುಟುಂಬ ಜುಹಾಪುರದಲ್ಲಿ ಪುಟ್ಟ ಮನೆಯೊಂದರಲ್ಲಿ ವಾಸವಾಗಿದೆ.
ಮನೆಯ ಆರ್ಥಿಕತೆ ಅಷ್ಟೊಂದು ಉತ್ತಮವಾಗಿಲ್ಲದ ಕಾರಣ ರಾಝಿನ್ ಶಿಕ್ಷಣಕ್ಕಾಗಿ ಹೆಚ್ಚಾಗಿ ವಿದ್ಯಾರ್ಥಿವೇತನವನ್ನೇ ಅವಲಂಬಿಸಿದ್ದರು. ಹೈಸ್ಕೂಲ್ ಶಿಕ್ಷಣವನ್ನು ಸಿಎನ್ ವಿದ್ಯಾಲಯದಲ್ಲಿ ಪೂರ್ಣಗೊಳಿಸಿದ್ದರು. ಇಂಜಿನಿಯರಿಂಗ್ ಮುಗಿಯುತ್ತಿದ್ದಂತೆ ವಾರ್ಷಿಕ ರೂ. 6 ಲಕ್ಷ ವೇತನದ ಉದ್ಯೋಗವನ್ನು ಅವರಿಗೆ ಆಫರ್ ಮಾಡಲಾಯಿತಾದರೂ ಅವರ ಕನಸು ಐಐಎಂ ಗೆ ಪ್ರವೇಶ ಪಡೆಯುವುದಾಗಿತ್ತು.
ಸಿಎಟಿ ಗೆ ಮೊದಲ ಬಾರಿ 2021 ಗೆ ಹಾಜರಾದಾಗ ಯಾವುದೇ ಕೋಚಿಂಗ್ ಪಡೆಯದೇ ಇದ್ದ ಅವರು ಎರಡನೇ ಪ್ರಯತ್ನಕ್ಕಾಗಿ ಕೇವಲ ಅರ್ಧ ಶುಲ್ಕ ಮಾತ್ರ ಅವರಿಗೆ ವಿಧಿಸಿದ ಕೋಚಿಂಗ್ ಕೇಂದ್ರಕ್ಕೆ ಸೇರಿದ್ದರು. ರಾಝಿನ್ ಚೆನ್ನಾಗಿ ನಿರ್ವಹಿಸುತ್ತಾನೆಂಬ ನಂಬಿಕೆಯಿಂದ ಆತನಿಗೆ ರಿಯಾಯಿತಿ ಶುಲ್ಕದಲ್ಲಿ ಕೋಚಿಂಗ್ ಒದಗಿಸಲಾಯಿತು ಎಂದು ಕೋಚಿಂಗ್ ಸಂಸ್ಥೆಯ ಮುಖ್ಯಸ್ಥ ಸತೀಶ್ ಕುಮಾರ್ ಹೇಳುತ್ತಾರೆ.
ತಮ್ಮ ಶಿಕ್ಷಣ ಮುಗಿದ ನಂತರ ಬಹಳಷ್ಟು ಬಡ ವಿದ್ಯಾರ್ಥಿಗಳ ಶಿಕ್ಷಣಕ್ಕಾಗಿ ಸಹಾಯ ಮಾಡುವ ಉದ್ದೇಶ ರಾಝಿನ್ಗಿದೆ ಎಂದು timesofindia ವರದಿ ಮಾಡಿದೆ.
