ಪರಿಷತ್ ಉಪಸಭಾಪತಿಯಾಗಿ ಬಿಜೆಪಿ ಸದಸ್ಯ ಎಂ.ಕೆ ಪ್ರಾಣೇಶ್ ಆಯ್ಕೆ

ಬೆಳಗಾವಿ, (ಸುವರ್ಣ ವಿಧಾನಸೌಧ) ಡಿ.23: ಪರಿಷತ್ತಿನ ಉಪ ಸಭಾಪತಿಯಾಗಿ ಎರಡನೆ ಬಾರಿಗೆ ಬಿಜೆಪಿ ಹಿರಿಯ ಸದಸ್ಯ ಎಂ.ಕೆ.ಪ್ರಾಣೇಶ್ ಅವರು ಚುನಾಯಿತರಾದರು.

ಶುಕ್ರವಾರ ಪರಿಷತ್ ಸಮಾವೇಶಗೊಂಡಾಗ ಸಭಾಪತಿ ಬಸವರಾಜ ಹೊರಟ್ಟಿ ಅವರು, ಉಪ ಸಭಾಪತಿ ಸ್ಥಾನದ ಚುನಾವಣೆ ಪ್ರಸ್ತಾವ ಕೈಗೆತ್ತಿಕೊಂಡರು.ಸಭಾನಾಯಕ, ಸಮಾಜ ಕಲ್ಯಾಣ ಸಚಿವ ಕೋಟ ಶ್ರೀನಿವಾಸ ಪೂಜಾರಿ, ಸದಸ್ಯರಾದ ಎಸ್.ರುದ್ರೇಗೌಡ, ಡಾ.ತಳವಾರ ಸಾಬಣ್ಣ, ಅರುಣ್ ಡಿ.ಎಸ್. ಅವರು, ಸದಸ್ಯ ಎಂ.ಕೆ.ಪ್ರಾಣೇಶ್ ಅವರನ್ನು ಉಪ ಸಭಾಪತಿಯಾಗಿ ಚುನಾಯಿಸಬೇಕು ಎಂದು ಸೂಚಿಸಿದರು.

ಆನಂತರ, ಆಡಳಿತ ಪಕ್ಷದ ಮುಖ್ಯ ಸಚೇತಕ ವೈ.ಎ.ನಾರಾಯಣಸ್ವಾಮಿ, ಸದಸ್ಯರಾದ ಪ್ರತಾಪ್ ಸಿಂಹನಾಯಕ, ಹೇಮಲತಾ ನಾಯಕ, ನವೀನ್ ಕೆ.ಎಸ್.ಅವರು ಉಪ ಸಭಾಪತಿ ಪ್ರಸ್ತಾವನೆಯನ್ನು ಅನುಮೋದಿಸಿದರು

ಇದಾದ ಬಳಿಕ ವಿರೋಧ ಪಕ್ಷದ ನಾಯಕ ಬಿ.ಕೆ.ಹರಿಪ್ರಸಾದ್ ಅವರು ಕಾಂಗ್ರೆಸ್ ಸದಸ್ಯ ಅರವಿಂದ ಕುಮಾರ್ ಅರಳಿ ಅವರನ್ನು ಚುನಾಯಿಸಬೇಕೆಂದು ಸೂಚಿಸಿದರು. ಈ ಪ್ರಸ್ತಾವವನ್ನು ಮಂಜುನಾಥ ಭಂಡಾರಿ ಅನುಮೋದಿಸಿದರು.

ಬಳಿಕ ಸಭಾಧ್ಯಕ್ಷರು, ಎಂ.ಕೆ.ಪ್ರಾಣೇಶ್ ಅವರ ಚುನಾವಣೆ ಪ್ರಸ್ತಾವ ಮತಕ್ಕೆ ಹಾಕಿದಾಗ 39 ಮತಗಳು ಪ್ರಾಣೇಶ್ ಅವರ ಪರವಾಗಿ ದೊರೆತವು. ಅದೇ ರೀತಿ, ಪ್ರಾಣೇಶ ವಿರುದ್ಧವಾಗಿ 26 ಮತಗಳು ಬಂದವು.ಆಗ ಸಭಾಪತಿ ಪ್ರಾಣೇಶ್ ಚುನಾಯಿತರಾಗಿದ್ದಾರೆ ಎಂದು ಪ್ರಕಟಿಸಿದರು.

ಬಳಿಕ, ಸಭಾನಾಯಕರು, ಆಡಳಿತದ ಪಕ್ಷದ ಮುಖ್ಯ ಸಚೇತಕ, ವಿಪಕ್ಷ ನಾಯಕರು, ಜೆಡಿಎಸ್ ನ ಭೋಜೇಗೌಡ ಅವರು ಪ್ರಾಣೇಶ್ ಅವರನ್ನು ಅಭಿನಂದಿಸಿ, ಉಪಸಭಾಪತಿ ಪೀಠಕ್ಕೆ ಸಂಪ್ರದಾಯದಂತೆ ಕರೆ ತಂದರು.

ಉಪ ಸಭಾಪತಿ ಅವರನ್ನು ಅಭಿನಂದಿಸಿ ಮಾತನಾಡಿದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಯಿ, ಪ್ರಜಾಪ್ರಭುತ್ವದಲ್ಲಿ ಹಲವಾರು ಬಾರಿ ಪಕ್ಷಗಳ ನಿಲುವಿನ ಬಗ್ಗೆ ಮಾತನಾಡುತ್ತೇವೆ. ಸಾರ್ವಜನಿಕ ಹಿತಾಸಕ್ತಿ, ನಾಡಿನ ನೆಲ, ಜಲದ ಪ್ರಶ್ನೆ ಇರಬಹುದು.ಅಥವಾ ನಾಡಿನ ಜ್ವಲಂತ ಸಮಸ್ಯೆ ಗಳನ್ನು ಬಗೆಹರಿಸುವ ಸಂದರ್ಭದಲ್ಲಿ ನಾವು ಎಲ್ಲವನ್ನೂ ಮೀರಿ, ಎತ್ತರದಲ್ಲಿ ನಿಂತು, ಪರಿಹಾರವನ್ನು ಕಂಡುಕೊಳ್ಳುವುದು ಅಗತ್ಯ.ಎಲ್ಲರಿಗೂ ಇದು ಅನ್ವಯಿಸುತ್ತದೆ ಎಂದು ತಿಳಿಸಿದರು.

ವಿಪಕ್ಷ ನಾಯಕ ಬಿ.ಕೆ.ಹರಿಪ್ರಸಾದ್ ಮಾತನಾಡಿ, ಸಭಾಪತಿ ಬಸವರಾಜ ಹೊರಟ್ಟಿ ಅವರು ಆಯ್ಕೆಯಾದ ಬಳಿಕ ಪಕ್ಷಕ್ಕೆ ಸ್ವತಃ ರಾಜೀನಾಮೆ ನೀಡಿದ್ದಾರೆ. ಆದರೆ,ಪ್ರಾಣೇಶ್ ಅವರು ನಡೆ ಗೊತ್ತಿಲ್ಲ. ಅವರು, ಉತ್ತಮವಾಗಿ ಕಾರ್ಯ ನಿರ್ವಹಿಸಿ ಉಪಸಭಾಪತಿ ಸ್ಥಾನದ ಘನತೆ ಗೌರವ ಹೆಚ್ಚಿಸಲಿ ಎಂದರು.

ಜೆಡಿಎಸ್ ತಟಸ್ಥ..!:ಸದನದಲ್ಲಿ ಬಿಜೆಪಿ 39, ಕಾಂಗ್ರೆಸ್ 26 ಸದಸ್ಯರು ಚುನಾವಣೆ ಪ್ರಕ್ರಿಯೆಯಲ್ಲಿ ಭಾಗಿದರೆ, ಜೆಡಿಎಸ್ 8 ಹಾಗೂ ಒಬ್ಬರು ಪಕ್ಷೇತರ ಸದಸ್ಯರು ತಟಸ್ಥರಾಗಿದ್ದರು.

ನಿಯಮದಂತೆ ಕೆಲಸ ಮಾಡುವೆ: ‘ತಮ್ಮ ಪಕ್ಷದಲ್ಲಿ ಹಿರಿಯರು ಇದ್ದರೂ ನನ್ನ ಆಯ್ಕೆ ಕುರಿತು ಅಪಸ್ವರ ಎತ್ತಿಲ್ಲ. ಹೀಗಾಗಿ ಎಲ್ಲರಿಗೂ ಧನ್ಯವಾದ ಸಲ್ಲಿಸುತ್ತೇನೆ. ಸದನದಲ್ಲಿ ನಿಯಮಾನುಸಾರ ಕೆಲಸ ಮಾಡುವೆ’

-ಎಂ.ಕೆ.ಪ್ರಾಣೇಶ್, ನೂತನ ಉಪ ಸಭಾಪತಿ