ಕಲೆ, ಸಾಹಿತ್ಯ, ಸಂಸ್ಕೃತಿ ಸಮಾಜದ ಸಾಮೂಹಿಕ ಸಂಪತ್ತು: ಪ್ರಧಾನಿ ನರೇಂದ್ರ ಮೋದಿ

ಹೊಸದಿಲ್ಲಿ, ಡಿ.25: ಕಲೆ,ಸಾಹಿತ್ಯ ಮತ್ತು ಸಂಸ್ಕೃತಿಯನ್ನೊಳಗೊಂಡ ತನ್ನ ಸಾಮೂಹಿಕ ಸಂಪತ್ತನ್ನು ಮುಂದುವರಿಸಿಕೊಂಡು ಹೋಗುವುದು ಸಮಾಜದ ಹೊಣೆಗಾರಿಕೆಯಾಗಿದೆ ಎಂದು ಪ್ರಧಾನಿ ನರೇಂದ್ರ ಮೋದಿಯವರು ರವಿವಾರ ಈ ವರ್ಷದ ತನ್ನ ಅಂತಿಮ ‘ಮನ್ ಕಿ ಬಾತ್’ಮಾಸಿಕ ರೇಡಿಯೊ ಕಾರ್ಯಕ್ರಮದಲ್ಲಿ ಹೇಳಿದರು.  ಇದು ‘ಮನ್ ಕಿ ಬಾತ್ ’ 96ನೇ ಆವೃತ್ತಿಯಾಗಿದೆ.

ಕೇಂದ್ರ ಸರಕಾರದ ‘ವೋಕಲ್ ಫಾರ್ ಲೋಕಲ್’ ಅಭಿಯಾನಕ್ಕೆ ಕೊಡುಗೆಗಳನ್ನು ಸಲ್ಲಿಸಿರುವ ಭಾರತೀಯರ ವಿವಿಧ ಸ್ಟಾರ್ಟ್ಪ್ಗಳ ಕುರಿತೂ ಮೋದಿ ಮಾತನಾಡಿದರು. 

ದುಬೈನ ಕಲರಿ ಕ್ಲಬ್ ಇತ್ತೀಚಿಗೆ ಸೃಷ್ಟಿಸಿರುವ ದಾಖಲೆಯನ್ನು ತನ್ನ ಭಾಷಣದಲ್ಲಿ ಉಲ್ಲೇಖಿಸಿದ ಮೋದಿ, ದುಬೈನ ಕಲರಿ ಕ್ಲಬ್ನ ದಾಖಲೆಗೆ ಗಿನ್ನಿಸ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್ ಇತ್ತೀಚಿಗೆ ಮಾನ್ಯತೆಯನ್ನು ನೀಡಿದೆ. ಈ ದಾಖಲೆಯು ಭಾರತದ ಪ್ರಾಚೀನ ಸಮರ ಕಲೆ ‘ಕಳರಿಪಟ್ಟು’ಗೆ ಸಂಬಂಧಿಸಿದೆ. ಒಂದು ಸ್ಥಳದಲ್ಲಿ ಅತ್ಯಂತ ಹೆಚ್ಚಿನ ಸಂಖ್ಯೆಯ ಜನರು ಕಳರಿಪಟ್ಟು ಪ್ರದರ್ಶಿಸಿ ಹೊಸ ದಾಖಲೆಯನ್ನು ನಿರ್ಮಿಸಿದ್ದಾರೆ ಎಂದು ಹೇಳಿದರು. ದುಬೈ ಕ್ಲಬ್ಗೂ ಭಾರತಕ್ಕೂ ಇರುವ ಸಂಬಂಧವನ್ನು ಅವರು ವಿವರಿಸಿದರು.

ಸ್ಥಳೀಯ ಯುವಜನರನ್ನು ಸ್ಥಳೀಯ ಕಲೆಗಳಾದ ಕೋಲ್ಕಲಿ, ಪರಿಚಕಲಿ, ಕಿಲಿಪ್ಪಾಟ್ ಮತ್ತು ಸಾಂಪ್ರದಾಯಿಕ ಹಾಡುಗಳಲ್ಲಿ ತರಬೇತುಗೊಳಿಸುತ್ತಿರುವ ಲಕ್ಷದ್ವೀಪದ ಕಲ್ಪೆನಿ ದ್ವೀಪದ ಕುಮ್ಮೆಲ್ ಬ್ರದರ್ಸ್ ಚಾಲೆಂಜರ್ಸ್ ಕ್ಲಬ್ನ್ನೂ ಅವರು ತನ್ನ ಭಾಷಣದಲ್ಲಿ ಉಲ್ಲೇಖಿಸಿದರು. ‘ನಮ್ಮ ಕಲೆ ಮತ್ತು ಸಂಸ್ಕೃತಿಯ ಬಗ್ಗೆ ದೇಶವಾಸಿಗಳ ಉತ್ಸಾಹವು ನಮ್ಮ ಪರಂಪರೆಯ ಬಗ್ಗೆ ಹೆಮ್ಮೆಯ ಭಾವನೆಯನ್ನು ಅಭಿವ್ಯಕ್ತಿಸುತ್ತದೆ ’ಎಂದರು.

ಬಿದಿರಿನಿಂದ ತಯಾರಾಗುತ್ತಿರುವ ಉತ್ಪನ್ನಗಳ ಕುರಿತು ಮಾತನಾಡಿದ ಮೋದಿ,ಬಿದಿರಿನಿಂದ ಅನೇಕ ಸುಂದರ ಮತ್ತು ಉಪಯುಕ್ತ ವಸ್ತುಗಳನ್ನು ತಯಾರಿಸಲಾಗುತ್ತಿದೆ. ವಿಶೇಷವಾಗಿ ಬುಡಕಟ್ಟು ಪ್ರದೇಶಗಳಲ್ಲಿ ಬಿದಿರಿನ ಉತ್ಪನ್ನಗಳನ್ನು ತಯಾರಿಸುವ ಕುಶಲಕರ್ಮಿಗಳು,ನುರಿತ ಕಲಾವಿದರು ಇದ್ದಾರೆ. ಬಿದಿರಿಗೆ ಸಂಬಂಧಿಸಿದ ಬ್ರಿಟಿಷರ ಕಾಲದ ಕಾನೂನುಗಳನ್ನು ದೇಶವು ಬದಲಿಸಿದ ಬಳಿಕ ಅದಕ್ಕಾಗಿ ಬೃಹತ್ ಮಾರುಕಟ್ಟೆಯೇ ಸೃಷ್ಟಿಯಾಗಿದೆ. ಬಿದಿರು ಕೈಗಾರಿಕೆ ಬುಡಕಟ್ಟು ಮಹಿಳೆಯರಿಗೆ ಉದ್ಯೋಗಗಳನ್ನು ನೀಡುತ್ತಿದೆ ಮತ್ತು ಅವರ ಪ್ರತಿಭೆಯೂ ಗುರುತಿಸಲ್ಪಡುತ್ತಿದೆ ಎಂದರು.

ದೇಶಿಯ ಮತ್ತು ಸ್ಥಳೀಯ ಉತ್ಪನ್ನಗಳನ್ನು ಬಳಸುವಂತೆ ಮತ್ತು ಅವುಗಳನ್ನು ಉಡುಗೊರೆಯ ರೂಪದಲ್ಲಿ ನೀಡುವಂತೆ ಜನತೆಯನ್ನು ಉತ್ತೇಜಿಸಿದ ಮೋದಿ,‘ಇದರಿಂದ ನಮ್ಮ ಅನನ್ಯತೆ ಬಲಿಷ್ಠಗೊಳ್ಳುತ್ತದೆ,ಸ್ಥಳೀಯ ಆರ್ಥಿಕತೆ ಸದೃಢಗೊಳ್ಳುತ್ತದೆ ಮತ್ತು ದೊಡ್ಡ ಪ್ರಮಾಣದಲ್ಲಿ ಜನರ ಭವಿಷ್ಯ ಕೂಡ ಉಜ್ವಲವಾಗುತ್ತದೆ’ ಎಂದರು.

ಕೋವಿಡ್ ಬಗ್ಗೆ ಎಚ್ಚರಿಕೆಯಿರಲಿ:
ಅನೇಕ ದೇಶಗಳಲ್ಲಿ ಸಾಂಕ್ರಾಮಿಕವು ಹರಡುತ್ತಿರುವುದರಿಂದ ಕೋವಿಡ್ ವಿರುದ್ಧ ಜಾಗ್ರತರಾಗಿರುವಂತೆ ಮತ್ತು ಮುನ್ನೆಚ್ಚರಿಕೆಗಳನ್ನು ವಹಿಸುವಂತೆ ಮೋದಿ ದೇಶದ ಜನತೆಗೆ ಕಿವಿಮಾತು ಹೇಳಿದರು. ಕ್ರಿಸ್ಮಸ್, ಹೊಸ ವರ್ಷಾಚರಣೆಗಾಗಿ ಅಥವಾ ರಜೆದಿನಗಳನ್ನು ಕಳೆಯಲು ಜನರು ಹೋಗುತ್ತಾರೆ ಎಂದು ಹೇಳಿದ ಮೋದಿ,ವೈರಸ್ನಿಂದಾಗಿ ಮೋಜಿನಿಂದ ವಂಚಿತಗೊಳ್ಳದಂತೆ ಮಾಸ್ಕ್ಗಳನ್ನು ಧರಿಸುವ ಮತ್ತು ಕೈಗಳನ್ನು ಸ್ವಚ್ಛವಾಗಿ ತೊಳೆದುಕೊಳ್ಳುವಂತಹ ಕೋವಿಡ್ ಶಿಷ್ಟಾಚಾರಗಳನ್ನು ಪಾಲಿಸುವಂತೆ ಆಗ್ರಹಿಸಿದರು.

ಸ್ಫೂರ್ತಿದಾಯಕ ವರ್ಷ:
ಇನ್ನು ಕೆಲವೇ ದಿನಗಳಲ್ಲಿ ಅಂತ್ಯಗೊಳ್ಳಲಿರುವ 2022 ಅನೇಕ ರೀತಿಗಳಲ್ಲಿ ಭಾರತಕ್ಕೆ ಸ್ಫೂರ್ತಿದಾಯಕವಾಗಿತ್ತು. 220 ಕೋ.ಗೂ.ಅಧಿಕ ಕೋವಿಡ್ ಲಸಿಕೆ ಡೋಸ್ಗಳನ್ನು ನೀಡುವ ಮೂಲಕ ಅಗಾಧ ಸಾಧನೆಯನ್ನು ಮಾಡಿರುವ ಭಾರತವು ವಿಶ್ವದಲ್ಲಿ ವಿಶೇಷ ಸ್ಥಾನವನ್ನು ಸೃಷ್ಟಿಸಿಕೊಂಡಿದೆ ಮತ್ತು ಐದನೇ ಅತ್ಯಂತ ದೊಡ್ಡ ಜಾಗತಿಕ ಆರ್ಥಿಕತೆಯಾಗಿ ಹೊರಹೊಮ್ಮಿದೆ ಎಂದು ಹೇಳಿದ ಮೋದಿ,ರಫ್ತು ಕ್ಷೇತ್ರದಲ್ಲಿಯೂ ಭಾರತವು ಗಣನೀಯ ಸಾಧನೆಯನ್ನು ಮಾಡಿದೆ. 400 ಶತಕೋಟಿ ಡಾ.ಮೌಲ್ಯದ ಸರಕುಗಳನ್ನು ರಫ್ತು ಮಾಡಲಾಗಿದೆ. ಬಾಹ್ಯಾಕಾಶ,ರಕ್ಷಣೆ ಮತ್ತು ಡ್ರೋನ್ ಕ್ಷೇತ್ರಗಳಲ್ಲಿಯೂ ಭಾರತವು ಅದ್ಭುತ ಸಾಧನೆಗಳನ್ನು ಮಾಡಿದೆ ಎಂದರು. 
ಕ್ರೀಡಾಕ್ಷೇತ್ರದಲ್ಲಿ ಭಾರತದ ಸಾಧನೆಗಳನ್ನೂ ಅವರು ಪ್ರಮುಖವಾಗಿ ಬಿಂಬಿಸಿದರು.

ಶಿವಮೊಗ್ಗದ ದಂಪತಿಯ ಪ್ರಶಂಸೆ:
ಅಡಿಕೆ ನಾರು ಅಥವಾ ಹಾಳೆಯಿಂದ ವಿವಿಧ ಉತ್ಪನ್ನಗಳನ್ನು ತಯಾರಿಸಿ ವಿದೇಶಗಳಿಗೆ ರಫ್ತು ಮಾಡುತ್ತಿರುವ ಶಿವಮೊಗ್ಗದ ಸುರೇಶ-ಮೈಥಿಲಿ ದಂಪತಿಯನ್ನು ಪ್ರಧಾನಿ ಮೋದಿ ಪ್ರಶಂಸಿಸಿದರು. ಸುರೇಶ-ಮೈಥಿಲಿ ದಂಪತಿ ಅಡಿಕೆಯ ನಾರು ಅಥವಾ ಹಾಳೆಯಿಂದ ಟ್ರೇ,ತಟ್ಟೆ ಮತ್ತು ಕೈಚೀಲಗಳಿಂದ ಹಿಡಿದು ಹಲವಾರು ಅಲಂಕಾರಿಕ ವಸ್ತುಗಳನ್ನು ತಯಾರಿಸುತ್ತಿದ್ದಾರೆ. ಇದೇ ಅಡಿಕೆ ಹಾಳೆಯಿಂದ ಅವರು ತಯಾರಿಸುವ ಚಪ್ಪಲಿಗಳಿಗೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಅವರ ಉತ್ಪನ್ನಗಳು ಲಂಡನ್ ಮತ್ತು ಯುರೋಪ್ನ ಇತರ ಮಾರುಕಟ್ಟೆಗಳಲ್ಲಿ ಮಾರಾಟವಾಗುತ್ತಿವೆ ಎಂದು ಮೋದಿ ಹೇಳಿದರು.

ಗದಗ ನಿವಾಸಿಯ ಬಗ್ಗೆ ಮೆಚ್ಚುಗೆ:
ಕರ್ನಾಟಕದ ಗದಗ ಜಿಲ್ಲೆಯ ನಿವಾಸಿ ಕ್ವೇಮಶ್ರೀ ಅವರು ಕರ್ನಾಟಕದ ಕಲಾವಿದರಿಗಾಗಿ ಹಲವಾರು ಕಾರ್ಯಕ್ರಮಗಳನ್ನು ಆಯೋಜಿಸಲು ‘ಕಲಾ ಚೇತನ ’ಎಂಬ ವೇದಿಕೆಯನ್ನು ಸೃಷ್ಟಿಸಿದ್ದಾರೆ. ಅವರು ಕಳೆದ 25 ವರ್ಷಗಳಿಂದಲೂ ಕರ್ನಾಟಕದ ಕಲಾ ಸಂಸ್ಕೃತಿಯನ್ನು ಪುನರುಜ್ಜೀವನಗೊಳಿಸುವ ಅಭಿಯಾನದಲ್ಲಿ ತೊಡಗಿಕೊಂಡಿದ್ದಾರೆ. ಅವರು ಮೊದಲು ಹೋಟೆಲ್ ಮ್ಯಾನೇಜ್ಮೆಂಟ್ ವೃತ್ತಿಯಲ್ಲಿದ್ದರು,ಆದರೆ ತನ್ನ ಸಂಸ್ಕೃತಿ ಮತ್ತು ಸಂಪ್ರದಾಯದೊಂದಿಗೆ ಅವರ ಅಭಿಮಾನ ಎಷ್ಟೊಂದು ಆಳವಾಗಿತ್ತೆಂದರೆ ಅವರು ಈ ಅಭಿಯಾನವನ್ನೇ ತನ್ನ ಧ್ಯೇಯವನ್ನಾಗಿಸಿಕೊಂಡಿದ್ದಾರೆ  ಎಂದು ಮೋದಿ ಹೇಳಿದರು.