ಹೊಸ ವರ್ಷಾಚರಣೆ ದಿನ ನಮ್ಮ ಮೆಟ್ರೋ ಸಂಚಾರ ಅವಧಿ ವಿಸ್ತರಣೆ

ಬೆಂಗಳೂರು, ಡಿ.29: ಹೊಸ ವರ್ಷಾಚರಣೆಯಲ್ಲಿ ತೊಡಗುವ ನಾಗರಿಕರ ಸಂಚಾರಕ್ಕೆ ಅನುಕೂಲ ಕಲ್ಪಿಸುವ ದೃಷ್ಟಿಯಿಂದ ಬಿಎಂಆರ್‍ಸಿಎಲ್ ಮೆಟ್ರೋ ಸೇವೆಯನ್ನು ಮಧ್ಯರಾತ್ರಿ 2 ಗಂಟೆವರೆಗೆ ವಿಸ್ತರಣೆ ಮಾಡಿದೆ.

ಡಿ.31ರ ರಾತ್ರಿ ಪ್ರತಿ 15 ನಿಮಿಷಗಳಿಗೊಮ್ಮೆ ಮೆಜೆಸ್ಟಿಕ್‍ನಿಂದ ಬೈಯಪ್ಪನಹಳ್ಳಿ, ಕೆಂಗೇರಿ, ನಾಗಸಂದ್ರ ಮತ್ತು ರೇಷ್ಮೆ ಸಂಸ್ಥೆ ಟರ್ಮಿನಲ್‍ಗಳಿಗೆ ಮೆಟ್ರೋ ರೈಲು ಸಂಚಾರ ಮಾಡಲಿದೆ ಎಂದು ನಮ್ಮ ಮೆಟ್ರೋ ಸಂಸ್ಥೆ ತಿಳಿಸಿದೆ.

ಮೆಟ್ರೋ ಸೇವೆಯನ್ನು ಡಿಸೆಂಬರ್ 31ರ ರಾತ್ರಿ 11.30 ರಿಂದ 2 ಗಂಟೆವರೆಗಿನ ಅವಧಿಯಲ್ಲಿ ಟ್ರಿನಿಟಿ, ಎಂ.ಜಿ.ರಸ್ತೆ ಮತ್ತು ಕಬ್ಬನ್ ಪಾರ್ಕ್ ನಿಲ್ದಾಣಗಳಲ್ಲಿ ಎಂದಿನಂತೆ ನೀಡುವ ಟೋಕನ್‍ಗಳು ಇರುವುದಿಲ್ಲ. ಇದರ ಬದಲು 50 ರೂಪಾಯಿ ಬೆಲೆಯ ಪೇಪರ್ ಟಿಕೆಟ್‍ಗಳನ್ನು ರಾತ್ರಿ 8 ಗಂಟೆಯಿಂದ ವಿತರಣೆ ಮಾಡಲಾಗುತ್ತದೆ. ಸ್ಮಾರ್ಟ್ ಕಾರ್ಡ್ ಮತ್ತು ಕ್ಯೂ ಆರ್ ಟಿಕೆಟಿಂಗ್ ಇರುವ ಪ್ರಯಾಣಿಕರು ವಿಸ್ತರಣೆ ಮಾಡಲಾದ ಅವಧಿಯಲ್ಲಿಯೂ ಇವುಗಳನ್ನು ಬಳಸಬಹುದಾಗಿದೆ. ಉಳಿದ ಮೆಟ್ರೋ ಸ್ಟೇಷನ್‍ಗಳಲ್ಲಿ ವಿಸ್ತರಣೆ ಮಾಡಲಾದ ಅವಧಿಯಲ್ಲಿಯೂ ಟೋಕನ್‍ಗಳು ಲಭ್ಯವಿರುತ್ತವೆ ಎಂದು ಪ್ರಕಟನೆಯಲ್ಲಿ ತಿಳಿಸಲಾಗಿದೆ.