ಉಡುಪಿ: ತಂದೆಯ ಸ್ನೇಹಿತನೆಂದು ನಂಬಿಸಿ ಪೇಟಿಯಂ ಮೂಲಕ 2 ಲಕ್ಷ ರೂ. ವಂಚನೆ

ಉಡುಪಿ: ತಂದೆಯ ಸ್ನೇಹಿತನೆಂದು ಕರೆ ಮಾಡಿ ಯುವಕನೋರ್ವ ನಿಂದ ಪೇಟಿಯಂ ಮೂಲಕ ಹಣ 2 ಲಕ್ಷ ರೂ.ಗಳಿಗೂ ಅಧಿಕ ಹಣವನ್ನು ಹಂತಹಂತವಾಗಿ ವರ್ಗಾಯಿಸಿಕೊಂಡು ವಂಚಿಸಿದ ಘಟನೆಯ ಬಗ್ಗೆ ದೂರು ದಾಖಲಾಗಿದೆ.

ದೂರಿನ ಸಾರಾಂಶ: ಮಣಿಪಾಲ ಹಾಸ್ಟೆಲ್ ವಾಸಿಯಾದ ಚಿತ್ರಾಂಗ್ ಜುನಿವಾಲ್ ಎನ್ನುವರಿಗೆ 2022ರ ಡಿ.25ರಂದು ಅಪರಿಚಿತ ವ್ಯಕ್ತಿ ಮೊಬೈಲ್ ನಲ್ಲಿ ಕರೆ ಮಾಡಿ, ‘ನಾನು ನಿಮ್ಮ ಅಂಕಲ್, ನಿನ್ನ ತಂದೆ ನನಗೆ ನಂಬರ್ ಕೊಟ್ಟಿರುವುದಾಗಿ ಹೇಳಿ, ನಿಮ್ಮ ಖಾತೆಗೆ ತಪ್ಪಾಗಿ 25,000ರೂ. ಹಣ ಡೆಪಾಸಿಟ್ ಆಗಿದೆ. ಅದನ್ನು ಕೂಡಲೇ ಪೇಟಿಎಂ ಮೂಲಕ ಹಿಂದಿರುಗಿಸು’ ಎಂದು ತಿಳಿಸಿದ್ದು, ಚಿತ್ರಾಂಗ್ ಜುನಿವಾಲ್ ಆತ ತಂದೆಯ ಸ್ನೇಹಿತರೆಂದು ತಿಳಿದು, ಆತನು ಸೂಚಿಸಿದ ನಂಬರಿಗೆ ಪೇಟಿಯಂ ಮೂಲಕ 24,500 ರೂ.  ಹಣ ವರ್ಗಾವಣೆ ಮಾಡಿದ್ದನು. ಆದರೆ ಆ ಹಣ ಖಾತೆಗೆ ಜಮೆ ಆಗಿಲ್ಲ ಎಂದು ಅಪರಿಚಿತ ವ್ಯಕ್ತಿ ಚಿತ್ರಾಂಗ್ ಜುನಿವಾಲ್‌ಗೆ ಪದೇ ಪದೇ ಕರೆ ಮಾಡಿ, ಡಿ.25ರಿಂದ ಡಿ.27ರ ಮಧ್ಯಾವದಿಯ ಎರಡು ದಿನದಲ್ಲಿ ಒಟ್ಟು 2 ಲಕ್ಷ 13 ಸಾವಿರದ 999 ರೂ. ಹಣವನ್ನು ವರ್ಗಾವಣೆ ಮಾಡಿಸಿಕೊಂಡು ವಂಚಿಸಿದ್ದಾನೆ.

ಈ ಬಗ್ಗೆ ಉಡುಪಿ ಸೆನ್ ಅಪರಾಧ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.