'ನನ್ನ ಸಂಬಳ ಹೆಚ್ಚಾಗಿದೆ' ಎಂದು ದೂರಿದ CEO ಟಿಮ್ ಕುಕ್: ವೇತನವನ್ನು ಅರ್ಧಕ್ಕರ್ಧ ಕಡಿತಗೊಳಿಸಿದ ಆ್ಯಪಲ್ ಸಂಸ್ಥೆ!
ಹೊಸದಿಲ್ಲಿ: ಯಾವುದೇ ಕಂಪೆನಿಯ ಸಿಇಒ(CEO) ತಮಗೆ ದೊರೆಯುತ್ತಿರುವ ವೇತನ ತೀರಾ ಹೆಚ್ಚು ಎಂದು ಹೇಳುವರೇ? ಆದರೆ ಆ್ಯಪಲ್ (Apple) ಕಂಪೆನಿಯ ಸಿಇಒ ಟಿಮ್ ಕುಕ್ (Tim Cook) ಇದಕ್ಕೊಂದು ಅಪವಾದ. ತಮ್ಮ ವೇತನ ಬಹಳ ಹೆಚ್ಚು ಆದುದರಿಂದ ವೇತನ ಕಡಿತಗೊಳಿಸಿ ಎಂದು ಅವರು ಮಾಡಿದ ಮನವಿಯ ಹಿನ್ನೆಲೆಯಲ್ಲಿ ಅವರ ಕಂಪೆನಿ ಅವರ ವೇತನವನ್ನು ಶೇ 50 ರಷ್ಟು ಕಡಿತಗೊಳಿಸಲಿದೆ.
ಇನ್ನು ಮುಂದೆ ಟಿಮ್ ಕುಕ್ ಅವರ ಪರಿಷ್ಕೃತ ವೇತನ 49 ಮಿಲಿಯನ್ ಅಮೆರಿಕನ್ ಡಾಲರ್ ಆಗಲಿದೆ ಎಂದು ಆಪಲ್ ತಿಳಿಸಿದೆ. ಇದರಲ್ಲಿ 3 ಮಿಲಿಯನ್ ಮೂಲ ವೇತನವಾಗಿದ್ದರೆ, 6 ಮಿಲಿಯನ್ ಬೋನಸ್ ಮತ್ತು 40 ಮಿಲಿಯನ್ ಅಮೆರಿಕನ್ ಡಾಲರ್ ಇಕ್ವಿಟಿ ಮೌಲ್ಯವಾಗಿದೆ. ಇದರ ಹೊರತಾಗಿ ಆಪಲ್ನ ಕಾರ್ಯನಿರ್ವಹಣೆಗೆ ನಂಟು ಹೊಂದಿರುವ ಸ್ಟಾಕ್ಗಳು ಇನ್ನು ಹಿಂದಿನ ಶೇ 50 ರಿಂದ ಶೇ 75 ರಷ್ಟು ಟಿಮ್ ಕುಕ್ ಬಳಿ ಇರಲಿವೆ.
ಷೇರುದಾರರ ಸಮತೋಲಿತ ಅಭಿಪ್ರಾಯದ ಆಧಾರದಲ್ಲಿ, ಜೊತೆಗೆ ಆಪಲ್ನ ಅಭೂತಪೂರ್ವ ನಿರ್ವಹಣೆ ಹಾಗೂ ಕುಕ್ ಅವರ ಶಿಫಾರಸಿನನ್ವಯ ಅವರ ವೇತನ ಪರಿಷ್ಕರಿಸಲಾಗಿದೆ ಎಂದು ಸಂಸ್ಥೆ ಹೇಳಿದೆ.
2022 ರಲ್ಲಿ ಕುಕ್ ಅವರ ವೇತನ ಪ್ಯಾಕೇಜ್ 99.4 ಮಿಲಿಯನ್ ಅಮೆರಿಕನ್ ಡಾಲರ್ ಆಗಿದ್ದರೆ 2021 ರಲ್ಲಿ ಇದು 98.7 ಮಿಲಿಯನ್ ಡಾಲರ್ ಆಗಿತ್ತು.
ಆದರೆ 2022 ರಲ್ಲಿ ಷೇರುದಾರರು ಟಿಮ್ ಕುಕ್ ಅವರ ದೊಡ್ಡ ವೇತನ ಪ್ಯಾಕೇಜ್ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದರು. ಟಿಮ್ ಕುಕ್ ಅವರ ವೇತನ ಪ್ಯಾಕೇಜ್ ವಿರುದ್ಧ ಮತ ಚಲಾಯಿಸುವಂತೆಯೂ ಕಳೆದ ವಾರ್ಷಿಕ ಸಭೆಯಲ್ಲಿ ಇನಸ್ಟಿಟ್ಯೂಶನಲ್ ಶೇರ್ಹೋಲ್ಡರ್ ಸರ್ವಿಸಸ್ ತನ್ನ ಸದಸ್ಯರಿಗೆ ಸೂಚಿಸಿತ್ತು. ಆದರೂ ಹೆಚ್ಚಿನ ಷೇರುದಾರರು ಕುಕ್ ಅವರ ವೇತನ ಪ್ಯಾಕೇಜ್ ಪರ ಮತ ಚಲಾಯಿಸಿದ್ದರಿಂದ ಕಳೆದ ವರ್ಷ ಅವರ ವೇತನದಲ್ಲಿ ಬದಲಾವಣೆಯಾಗಿರಲಿಲ್ಲ.
ಇದನ್ನೂ ಓದಿ: ಅಧಿಕಾರಿಗಳ ಪೋಸ್ಟಿಂಗ್ ಮೇಲೆ ಕೇಂದ್ರದ ನಿಯಂತ್ರಣವಾದರೆ ದಿಲ್ಲಿಯಲ್ಲಿ ಚುನಾಯಿತ ಸರ್ಕಾರವೇಕೆ: ಸುಪ್ರೀಂ ಪ್ರಶ್ನೆ
