ಅದಾನಿ ಸ್ವಾಧೀನದ ಬಳಿಕ NDTV ಅಧ್ಯಕ್ಷೆ ಸುಪರ್ಣಾ ಸಿಂಗ್ ಸೇರಿದಂತೆ ಇಬ್ಬರು ರಾಜೀನಾಮೆ
ಹೊಸದಿಲ್ಲಿ: ಎನ್ಡಿಟಿವಿಯನ್ನು ಅದಾನಿ ಗ್ರೂಪ್ ಸ್ವಾಧೀನಪಡಿಸಿಕೊಂಡ ಒಂದು ತಿಂಗಳ ನಂತರ, ಚಾನೆಲ್ನ ಸಮೂಹದ ಅಧ್ಯಕ್ಷೆ ಸುಪರ್ಣಾ ಸಿಂಗ್, ಮುಖ್ಯ ಕಾರ್ಯತಂತ್ರ ಅಧಿಕಾರಿ ಅರಿಜಿತ್ ಚಟರ್ಜಿ, ಮುಖ್ಯ ತಂತ್ರಜ್ಞಾನ ಮತ್ತು ಉತ್ಪನ್ನ ಅಧಿಕಾರಿ ಕವಲ್ಜಿತ್ ಸಿಂಗ್ ಬೇಡಿ ಎನ್ಡಿಟಿವಿಗೆ ರಾಜೀನಾಮೆ ನೀಡಿದ್ದಾರೆ ಎಂದು ತಿಳಿದು ಬಂದಿದೆ.
"ಅವರು ತಂಡದ ಶಕ್ತಿಯ ಆಧಾರ ಸ್ತಂಭವಾಗಿದ್ದರು ಮತ್ತು ಕಂಪನಿಯನ್ನು ಲಾಭದ ಕಡೆಗೆ ಮರಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಅವರ ಮುಂದಿನ ಪ್ರಯತ್ನಗಳಿಗೆ ನಾವು ಶುಭ ಹಾರೈಸುತ್ತೇವೆ. ಜವಾಬ್ದಾರಿಗಳನ್ನು ಸುಗಮವಾಗಿ ವರ್ಗಾಯಿಸುವ ಸಲುವಾಗಿ ಅವರು ಮುಂದಿನ ಕೆಲವು ವಾರಗಳವರೆಗೆ ಇಲ್ಲಿರುತ್ತಾರೆ. ಅವರಿಗೆ ನೇರವಾಗೊ ವರದಿ ಮಾಡುತ್ತಿದ್ದವರು ಮತ್ತು ಎಲ್ಲಾ ವಿಭಾಗದ ಮುಖ್ಯಸ್ಥರು ತಕ್ಷಣದಿಂದಲೇ ನನಗೆ ವರದಿ ಮಾಡಲು ಪ್ರಾರಂಭಿಸಿ” ಎಂದು ನೆಟ್ವರ್ಕ್ನ ಹೊಸ ನಿರ್ದೇಶಕ ಸಂಜಯ್ ಪುಗಾಲಿಯಾ ಚಾನೆಲ್ನ ಸಿಬ್ಬಂದಿಗೆ ಇಮೇಲ್ನಲ್ಲಿ ಬರೆದಿದ್ದಾರೆ ಎಂದು newslaundry ವರದಿ ಮಾಡಿದೆ.
"ಟೌನ್ ಹಾಲ್ ಸಮಯದಲ್ಲಿ ನಾನು ಹಂಚಿಕೊಂಡ ಆಲೋಚನೆಗಳಿಗೆ ಅನುಗುಣವಾಗಿ, ಅದಾನಿ ಗ್ರೂಪ್ NDTV ಅನ್ನು ಹೊಸ-ಯುಗದ, ಜಾಗತಿಕ ಡಿಜಿಟಲ್ ಮಾಧ್ಯಮ ಸಂಸ್ಥೆಯಾಗಿ ಪರಿವರ್ತಿಸಲು ಬದ್ಧವಾಗಿದೆ. NDTV ಯಲ್ಲಿ ನಾನು ನಿಮ್ಮಲ್ಲಿ ಅನೇಕರೊಂದಿಗೆ ಸಂವಹನ ನಡೆಸುತ್ತಿರುವಾಗ, ನಮ್ಮ ಆಕಾಂಕ್ಷೆಗಳನ್ನು ಶೀಘ್ರದಲ್ಲೇ ನನಸಾಗಿಸುವ ಮೌಲ್ಯ ವ್ಯವಸ್ಥೆ, ಮನಸ್ಥಿತಿ, ಸಾಮರ್ಥ್ಯ ಮತ್ತು ವಿಶ್ವಾಸಾರ್ಹತೆ ನಮ್ಮಲ್ಲಿದೆ ಎಂದು ನನಗೆ ಮನವರಿಕೆಯಾಗಿದೆ. ನಾವು ಒಟ್ಟಾಗಿ ಕೆಲಸ ಮಾಡುತ್ತೇವೆ" ಎಂದು ಅದರಲ್ಲಿ ಉಲ್ಲೇಖಿಸಲಾಗಿದೆ.
ಕಳೆದ ತಿಂಗಳು, ನೆಟ್ವರ್ಕ್ನ ಸಂಸ್ಥಾಪಕರಾದ ಪ್ರಣಯ್ ರಾಯ್ ಮತ್ತು ಅವರ ಪತ್ನಿ ರಾಧಿಕಾ ರಾಯ್ ಅವರು ತಮ್ಮ ಉಳಿದ 32.26 ಶೇಕಡಾ ಷೇರುಗಳಲ್ಲಿ 27.26 ಪ್ರತಿಶತವನ್ನು ಅದಾನಿ ಸಮೂಹಕ್ಕೆ ಮಾರಾಟ ಮಾಡಿದ್ದರು. ಅದಾನಿ ಗ್ರೂಪ್ ಮೊದಲು NDTV ಯಲ್ಲಿ ಬಹುಪಾಲು ಷೇರುದಾರರಾಗಿ ಹೊರಹೊಮ್ಮಿತು. ಅದಾನಿ ಎಂಟರ್ಪ್ರೈಸಸ್ನ ಮಾಧ್ಯಮ ವಿಭಾಗವು ಪರೋಕ್ಷ ಒಪ್ಪಂದದ ಮೂಲಕ ಸುಮಾರು 30 ಪ್ರತಿಶತ NDTV ಷೇರುಗಳನ್ನು ಸ್ವಾಧೀನಪಡಿಸಿಕೊಂಡಿದೆ,
ರಾಯ್ ದಂಪತಿ ನವೆಂಬರ್ 29 ರಂದು NDTV ಪ್ರವರ್ತಕ RRPR ಮಂಡಳಿಯ ನಿರ್ದೇಶಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಬಳಿಕ, ಅದಾನಿ ಗ್ರೂಪ್ನ ಮುಖ್ಯ ತಂತ್ರಜ್ಞಾನ ಅಧಿಕಾರಿ ಸುದೀಪ್ತ ಭಟ್ಟಾಚಾರ್ಯ; ಹಿರಿಯ ಪತ್ರಕರ್ತ ಮತ್ತು ಅದಾನಿ ಎಎಂಜಿ ಮೀಡಿಯಾ ನೆಟ್ವರ್ಕ್ನ ಸಿಇಒ ಸಂಜಯ್ ಪುಗಾಲಿಯಾ, ಪತ್ರಕರ್ತ ಸೆಂಥಿಲ್ ಸಿನ್ನಯ್ಯ ಚೆಂಗಲ್ವರಾಯನ್ ಅವರು ಮಂಡಳಿಯ ನಿರ್ದೇಶಕರಾಗಿ ಅಧಿಕಾರ ವಹಿಸಿಕೊಂಡರು.
ಕಳೆದ ವಾರ, ಅದಾನಿ ಸ್ವಾಧೀನದ ನಂತರ ಮೊದಲ ಎನ್ಡಿಟಿವಿ ಟೌನ್ ಹಾಲ್ ಸಭೆಯಲ್ಲಿ, ನೆಟ್ವರ್ಕ್ನ ಹೊಸ ನಾಯಕತ್ವವು ಸಂಪಾದಕೀಯ ಸ್ವಾತಂತ್ರ್ಯ, ಸಂಬಳ, ವಿಸ್ತರಣೆ ಮತ್ತು ಬಿಜೆಪಿ ವಕ್ತಾರರು ಕಾರ್ಯಕ್ರಮಗಳಲ್ಲಿ ಭಾಗವಹಿಸುವ ಕುರಿತು ಸಿಬ್ಬಂದಿಗಳಿಂದ ಪ್ರಶ್ನೆಗಳನ್ನು ಎದುರಿಸಿದ್ದರು.
ಬಹಳಷ್ಟು ಜನರು ಎನ್ಡಿಟಿವಿಯಲ್ಲಿ ಉಳಿಯಲು ಆಯ್ಕೆ ಮಾಡಿಕೊಂಡಿರುವುದು ಹಣದ ಕಾರಣದಿಂದಲ್ಲ, ಆದರೆ ಚಾನೆಲ್ನಲ್ಲಿ ಅಭ್ಯಾಸ ಮಾಡುವ ಪತ್ರಿಕೋದ್ಯಮದಿಂದಾಗಿ ಎಂದು ಉದ್ಯೋಗಿಯೊಬ್ಬರು ಹೇಳಿದ್ದರು. ಪುಗಾಲಿಯಾ ಇದು ಬದಲಾಗಬಹುದು ಎಂಬ ಸಾಧ್ಯತೆಯನ್ನು ನಿರಾಕರಿಸಿದರು.
ಕಳೆದ ವರ್ಷ ಆಗಸ್ಟ್ನಲ್ಲಿ ಅದಾನಿ ಸಮೂಹವು NDTV ಪಾಲನ್ನು ಸ್ವಾಧೀನಪಡಿಸಿಕೊಳ್ಳುವ ಘೋಷಣೆಯ ನಂತರ ಕಂಪನಿಯ ಷೇರುಗಳ ಬೆಲೆಗಳು ಗಗನಕ್ಕೇರಲು ಪ್ರಾರಂಭಿಸಿದವು, ಕಂಪನಿಯ ಹಲವಾರು ಉನ್ನತ ಅಧಿಕಾರಿಗಳು ಅಚ್ಚುಕಟ್ಟಾದ ಲಾಭವನ್ನು ಗಳಿಸಲು ಅನುವು ಮಾಡಿಕೊಟ್ಟಿತು. ಸೆಪ್ಟೆಂಬರ್ 1 ರಂದು, ಸುಪರ್ಣಾ ಸಿಂಗ್ ಅವರು ತಮ್ಮ ಎಲ್ಲಾ 53,726 ಷೇರುಗಳನ್ನು ಸುಮಾರು 2.6 ಕೋಟಿ ರೂ.ಗೆ ಮಾರಾಟ ಮಾಡಿದರು. ಕಂಪನಿಯ ಷೇರುಗಳು ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ನಲ್ಲಿ ರೂ 490.60 ಮತ್ತು ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ನಲ್ಲಿ ರೂ 495.05 ನಲ್ಲಿ ವಹಿವಾಟು ನಡೆಸುತ್ತಿದ್ದವು.
