ಗಾಂಧಿಯನ್ನು ಹೊಗಳಿ, ಆದರೆ ಗೋಡ್ಸೆ ಶ್ಲಾಘನೆ ಸರಿಯಲ್ಲ: ಸುಧೀಂದ್ರ ಕುಲಕರ್ಣಿ

ಮಂಗಳೂರು, ಜ.16: ಇತ್ತೀಚಿನ ದಿನಗಳಲ್ಲಿ ಆರೆಸ್ಸೆಸ್  ಸರ ಸಂಘಚಾಲಕ ಡಾ.ಮೋಹನ್ ಭಾಗವತ್ ಮಹಾತ್ಮ ಗಾಂಧೀಜಿಯನ್ನು ಹೊಗಳಿರುವುದು ಶ್ಲಾಘನೀಯ. ಆದಾಗ್ಯೂ, ಸಂಘ ಪರಿವಾರದೊಳಗಿನ ಅನೇಕ ಜನರು ಮಹಾತ್ಮಾ ಗಾಂಧಿಯವರ ಹಂತಕ ನಾಥೂರಾಂ ಗೋಡ್ಸೆಯನ್ನು ಹೊಗಳುವುದು ಮತ್ತು ಶ್ಲಾಘಿಸುವುದನ್ನು ಮುಂದುವರಿಸುತ್ತಿರುವುದು ಸರಿಯಲ್ಲ ಎಂದು ಖ್ಯಾತ ಅಂಕಣಕಾರ ಮತ್ತು ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ಸಲಹೆಗಾರರಾಗಿದ್ದ ಸುಧೀಂದ್ರ ಕುಲಕರ್ಣಿ ಹೇಳಿದ್ದಾರೆ.

ಮಂಗಳೂರು ಪ್ರೆಸ್ ಕ್ಲಬ್‌ನಲ್ಲಿ ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಡಾ.ಭಾಗವತ್ ಅವರು ತಮ್ಮ ಸಂಘಟನೆಯೊಳಗಿನ ಎಲ್ಲಾ ಹಂತದ ಆರೆಸ್ಸೆಸ್ ಕಾರ್ಯಕರ್ತರಿಗೆ ಗೋಡ್ಸೆಯನ್ನು ಹೊಗಳುವುದನ್ನು ತಡೆಯಲು ಸೂಚಿಸಬೇಕು. ಏಕೆಂದರೆ ಇದು ಸಂಘರ್ಷದ ಸಂದೇಶವನ್ನು ರವಾನಿಸುತ್ತದೆ. ಗಾಂಧೀಜಿಯವರ ವಿಚಾರಗಳು ಮತ್ತು ಆದರ್ಶಗಳನ್ನು ಅನುಸರಿಸುವ ಮೂಲಕ ಮಾತ್ರ ಭಾರತವು ಅಂತರ್-ಧರ್ಮೀಯ ಸಾಮರಸ್ಯ ಮತ್ತು ಸಮಗ್ರ ಪ್ರಗತಿಯನ್ನು ಸಾಧಿಸಬಹುದು ಎಂದು ಅಭಿಪ್ರಾಯಪಟ್ಟರು.

ಮಂಗಳೂರು ಕೋಮು ಸೌಹಾರ್ದದ ಪ್ರಯೋಗಾಲಯವಾಗಲಿ

ಭಾರತದ ಹೆಮ್ಮೆಯ ಸಾಮಾಜಿಕ-ಸಾಂಸ್ಕೃತಿಕ -ಧಾರ್ಮಿಕ ವೈವಿಧ್ಯತೆಯ ಸೂಕ್ಷ್ಮ ರೂಪವಾಗಿದ್ದ ಮಂಗಳೂರನ್ನು ಶಾಂತಿ, ಕೋಮು ಸೌಹಾರ್ದದ ಪ್ರಯೋಗಾಲಯವನ್ನಾಗಿ ಮಾಡಬೇಕಾಗಿದೆ ಎಂದ ಅವರು, ಮಂಗಳೂರಿನಲ್ಲಿರುವ ವೈವಿಧ್ಯ ಭಾರತದ ಶಕ್ತಿಯೇ ಹೊರತು ದೌರ್ಬಲ್ಯವಲ್ಲ. ಅದನ್ನು ಸಂರಕ್ಷಿಸಬೇಕು, ಬಲಪಡಿಸಬೇಕು ಮತ್ತು ಆಚರಿಸಬೇಕು ಹಾಗೂ ಇದಕ್ಕೆ ಧಕ್ಕೆಯಾಗದಂತೆ ಎಚ್ಚರವಹಿಸಬೇಕು ಹಾಗೂ ದುರ್ಬಲಗೊಳಿಸಬಾರದು ಎಂದು ಅಭಿಪ್ರಾಯಪಟ್ಟರು.

ಮಂಗಳೂರು ಕೋಮು ಧ್ರುವೀಕರಣ ಮತ್ತು ಘರ್ಷಣೆಯ ಪ್ರಯೋಗಾಲಯ ಎಂಬ ಕುಖ್ಯಾತಿ ಗಳಿಸಿರುವುದು ವಿಷಾದಕರ ಮತ್ತು ದುರದೃಷ್ಟಕರ. ಮಂಗಳೂರನ್ನು ಮತ್ತೆ ಕೋಮು ಸೌಹಾರ್ದ ಮತ್ತು ಶಾಂತಿ ಪ್ರಯೋಗಾಲಯವಾಗಿ ಖ್ಯಾತಿ ಗಳಿಸಲು ಶ್ರಮಿಸಬೇಕು. ಈ ಪರಿವರ್ತನೆಯನ್ನು ಸಾಧಿಸುವ ಮೂಲಕ ಮಂಗಳೂರು ಮಾದರಿಯಾಗಿ ಹೊರಹೊಮ್ಮಬಹುದು. ಇದಕ್ಕಾಗಿ ಎಲ್ಲ ಧಾರ್ಮಿಕ ಮತ್ತು ಜಾತಿ ಸಂಘಟನೆಗಳ ಪ್ರಭಾವಿ ಮುಖಂಡರು, ಸಾಮಾಜಿಕ-ಸಾಂಸ್ಕೃತಿಕ ಮುಖಂಡರು, ಶಿಕ್ಷಣ ಸಂಸ್ಥೆಗಳ ಮುಖಂಡರು, ಮಹಿಳಾ ಸಂಘಟನೆಗಳ ಮುಖಂಡರು, ಮಾಧ್ಯಮ ಮತ್ತು ಸಾಮಾಜಿಕ ಮಾಧ್ಯಮದ ಪ್ರಮುಖರು, ಸಾಹಿತಿಗಳು ಮತ್ತು ಸಾಮಾನ್ಯ ನಾಗರಿಕರು ಒಗ್ಗಟ್ಟಿನಿಂದ ಶ್ರಮಿಸುವಂತೆ ಮನವಿ ಮಾಡಿದರು.

 ಹಿಂದೂ ಮತ್ತು ಮುಸ್ಲಿಂ ಸಮುದಾಯಗಳ ಮುಖಂಡರು ವಿಶೇಷವಾಗಿ ಪ್ರೀತಿಯ ತಳಹದಿಯಾಗಿ ಸೌಹಾರ್ದವನ್ನು ಉತ್ತೇಜಿಸುವ ಸಂಭಾಷಣೆ ಮತ್ತು ಸಹಕಾರದಲ್ಲಿ ತೊಡಗಿಸಿಕೊಳ್ಳಬೇಕು. ಇದನ್ನು ಪರಸ್ಪರ ಗೌರವ ಮತ್ತು ನಂಬಿಕೆಯ ಆಧಾರದ ಮೇಲೆ ಮಾಡಬೇಕು. ಕೋಮು ದ್ವೇಷ ಮತ್ತು ಹಿಂಸಾಚಾರವನ್ನು ಪ್ರಚೋದಿಸುವ ಅಂಶಗಳನ್ನು ನಿಗ್ರಹಿಸಲು ಎರಡೂ ಸಮುದಾಯಗಳಿಗೆ ಇದು ಅಗತ್ಯವಾಗಿರುತ್ತದೆ ಎಂದವರು ಅಭಿಪ್ರಾಯಿಸಿದರು.

*ಭಾಗವತ್ ಹೆಜ್ಜೆ ಶ್ಲಾಘನೀಯ: ಆರೆಸ್ಸೆಸ್  ಸರ ಸಂಘಚಾಲಕ ಡಾ.ಮೋಹನ್ ಭಾಗವತ್ ಮುಸ್ಲಿಮ್ ಸಮುದಾಯದ ಮುಖಂಡರೊಂದಿಗೆ ಸಂವಾದವನ್ನು ಪ್ರಾರಂಭಿಸಲು ಇತ್ತೀಚೆಗೆ ಕೈಗೊಂಡ ನಿರ್ಧಾರ ಶಾಘನೀಯ. ಈ ಉಪಕ್ರಮಕ್ಕೆ ಸಕಾರಾತ್ಮಕವಾಗಿ ಸ್ಪಂದಿಸುವಂತೆ ಮುಸ್ಲಿಮ್ ಸಮುದಾಯದ ಮುಖಂಡರಿಗೆ ಕುಲಕರ್ಣಿ ಮನವಿ ಮಾಡಿದರು.

ಈ ಉಪಕ್ರಮವನ್ನು ಪ್ರಾಮಾಣಿಕವಾಗಿ, ಶ್ರದ್ಧೆಯಿಂದ, ಸ್ಥಿರವಾಗಿ ಮತ್ತು ರಚನಾತ್ಮಕವಾಗಿ ಅನುಸರಿಸಲು ತಮ್ಮ ಸಂಘಟನೆಯ ಎಲ್ಲಾ ಹಂತಗಳಲ್ಲಿ ಆರೆಸ್ಸೆಸ್  ಕಾರ್ಯನಿರ್ವಾಹಕರಿಗೆ ಸೂಚನೆ ನೀಡುವಂತೆ ಕುಲಕರ್ಣಿ ಅವರು ಡಾ ಭಾಗವತ್ ರನ್ನು ಆಗ್ರಹಿಸಿದರು.

*ಕೋಮು ಆಧಾರದಲ್ಲಿ ಧ್ರುವೀಕರಣ ಖಂಡನೀಯ:

ಯಾವುದೇ ರಾಜಕೀಯ ಪಕ್ಷ ಅಥವಾ ನಾಯಕ ಮತದಾರರನ್ನು ಕೋಮು ಆಧಾರದಲ್ಲಿ ಧ್ರುವೀಕರಿಸುವ ಮೂಲಕ ಚುನಾವಣಾ ಲಾಭ ಪಡೆಯಲು ಪ್ರಯತ್ನಿಸುವುದು ಕಾನೂನುಬಾಹಿರವಾಗಿದ್ದು, ಇದು ಖಂಡನೀಯ. 2023ರಲ್ಲಿ ಕರ್ನಾಟಕದಲ್ಲಿ ವಿಧಾನಸಭೆಗೆ ಚುನಾವಣೆ ನಡೆಯಲಿದೆ. ಎಲ್ಲ ರಾಜಕೀಯ ಪಕ್ಷಗಳ ನಾಯಕರು ಕೋಮು, ಶಾಂತಿ ಮತ್ತು ಸೌಹಾರ್ದಕ್ಕೆ ಧಕ್ಕೆಯಾಗದಂತೆ ನೋಡಿಕೊಳ್ಳುವ ಸಾಂವಿಧಾನಿಕ ಜವಾಬ್ದಾರಿಯನ್ನು ಹೊಂದಿದ್ದಾರೆ ಎಂದರು.

*ರಾಜಧರ್ಮ ಪಾಲಿಸಲಿ: ಮಂಗಳೂರು ಮತ್ತು ಅಕ್ಕಪಕ್ಕದ ಜಿಲ್ಲೆಗಳಲ್ಲಿ ಚುನಾವಣಾ ಪೂರ್ವದಲ್ಲಿ ಕೋಮು ಉದ್ವಿಗ್ನತೆ ಮತ್ತು ಹಿಂಸಾಚಾರವನ್ನು ಪ್ರಚೋದಿಸುವ ಮೂಲಕ ಸಮಾಜ ವಿರೋಧಿಗಳು ಭಯದ ವಾತಾವರಣವನ್ನು ಸೃಷ್ಟಿಸದಂತೆ ರಾಜ್ಯ ಸರಕಾರ ನೋಡಿಕೊಳ್ಳಬೇಕು. ಇಂತಹ ಘಟನೆಗಳು ನಡೆದರೆ ಸರಕಾರ ತಾರತಮ್ಯ ಮಾಡದೆ ಆರೋಪಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು. ರಾಜಧರ್ಮವನ್ನು ಸರಕಾರ ಪಾಲಿಸಬೇಕು ಎಂದು ಅವರು ಆಗ್ರಹಿಸಿದರು.

*ಹಿಂದೂ ವಿರೋಧಿಯಲ್ಲದ ಜಾತ್ಯತೀತತೆ, ಮುಸ್ಲಿಮ್ ವಿರೋಧಿಯಲ್ಲದ ಹಿಂದುತ್ವ

ಹಿಂದೂ ವಿರೋಧಿಯಲ್ಲದ ಜಾತ್ಯತೀತತೆ, ಮುಸ್ಲಿಮ್ ವಿರೋಧಿಯಲ್ಲದ ಹಿಂದುತ್ವ, ಸರ್ವಧರ್ಮೀಯ ಸಮಾನ ರಾಷ್ಟ್ರೀಯತ್ವ ಮೂಲಕ ಮಂಗಳೂರಿನಲ್ಲಿ ಮತ್ತು ಕರ್ನಾಟಕ ಹಾಗೂ ಭಾರತದಾದ್ಯಂತ ಕೋಮು ಉದ್ವಿಗ್ನತೆ ಮತ್ತು ಧ್ರುವೀಕರಣವನ್ನು ತೊಡೆದು ಹಾಕಲು ಸಾಧ್ಯ ಎಂದು ಸುಧೀಂದ್ರ ಕುಲಕರ್ಣಿ ಅಭಿಪ್ರಾಯಿಸಿದರು.

ಸುದ್ದಿಗೋಷ್ಠಿಯಲ್ಲಿ ಎಂ.ಜಿ.ಹೆಗಡೆ ಮತ್ತು ಸುಳ್ಯ ಗಾಂಧಿ ವಿಚಾರ ವೇದಿಕೆಯ ಅಧ್ಯಕ್ಷ ಲಕ್ಷ್ಮೀಶ ಗಬ್ಲಡ್ಕ ಉಪಸ್ಥಿತರಿದ್ದರು.