ಬೇಬಿ ಮಿಸ್ಸಿಂಗ್ ಮಿಸ್ಟರಿ
ಶುಕ್ರವಾರ ಬಂತೆಂದರೆ ಸಾಕು, ನಾ ಮುಂದು ತಾಮುಂದು ಅಂತ ತಮ್ಮ ಸಿನೆಮಾಗಳನ್ನು ಬಿಡುಗಡೆ ಮಾಡುತ್ತಿದ್ದ ಸ್ಯಾಂಡಲ್ವುಡ್ ಮಂದಿ ಈ ವಾರ ಯಾಕೋ ಸ್ವಲ್ಪಡಲ್ಲಾಗಿದ್ದಾರೆ. ವರ್ಷದ ಆರಂಭದಿಂದಲೂ ಅಷ್ಟೇ. ಹೇಳಿಕೊಳ್ಳುವಂತಹ ಸಿನೆಮಾಗಳು ಬಿಡುಗಡೆಯಾಗಲೇ ಇಲ್ಲ. ಅದರಲ್ಲೂ ಯಾವ ಸ್ಟಾರ್ ಸಿನೆಮಾ ಕೂಡ ಬಿಡುಗಡೆ ಆಗಲಿಲ್ಲ. ವರ್ಷಾಂತ್ಯದಲ್ಲಿ ತಮ್ಮ ಸಿನೆಮಾ ಬಿಡುಗಡೆಗೆ ಸಿಕ್ಕಾಪಟ್ಟೆ ತರಾತುರಿ ವಹಿಸಿದ್ದ ನಿರ್ಮಾಪಕರು ವರ್ಷಾರಂಭದಲ್ಲಿ ಆ ಕಡೆ ಅಷ್ಟು ಗಮನ ಕೊಟ್ಟಿಲ್ಲ. ಮುಂದಿನವಾರ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಬಹುನಿರೀಕ್ಷಿತ ಸಿನೆಮಾ ‘ಕ್ರಾಂತಿ’ ಬಿಡುಗಡೆ ಆಗುತ್ತಿದೆ. ಹಾಗಾಗಿ ಈ ವಾರ ಕೂಡ ಎರಡೇ ಎರಡು ಸಿನೆಮಾಗಳು ಬಿಡುಗಡೆ ಆಗಿವೆ. ಅದರಲ್ಲಿ ಒಂದು ಬೇಬಿ ಮಿಸ್ಸಿಂಗ್. ಮತ್ತೊಂದು ಹಾರರ್ ಸಿನೆಮಾ ಹುಷಾರ್.
ಬೇಬಿ ಮಿಸ್ಸಿಂಗ್ ಸಿನೆಮಾ ಟೈಟಲೇ ಹೇಳೋ ಹಾಗೆ ಇದೊಂದು ಮಿಸ್ಸಿಂಗ್ ಕಹಾನಿ. ಇತ್ತೀಚಿನ ದಿನಗಳಲ್ಲಿ ಮಕ್ಕಳು ಕಾಣೆಯಾಗುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಅಂತಹ ಒಂದು ಎಳೆಯನ್ನೇ ಇಟ್ಟುಕೊಂಡು ಸಿನೆಮಾ ಮಾಡಿದ್ದಾರೆ ನಿರ್ದೇಶಕರು. ಕ್ರೈಮ್ ಥ್ರಿಲ್ಲರ್ ಜಾನರ್ನ ಈ ಕಥೆಯನ್ನು ನಿರ್ದೇಶನ ಮಾಡಿರುವುದು ಯಶಸ್ವಿಕಾಂತ್. ಜೊತೆಗೆ ಅವರೇ ನಾಯಕನಾಗಿ ಕೂಡ ನಟಿಸಿದ್ದಾರೆ. ನಾಯಕಿಯಾಗಿ ರಕ್ಷಾ ಗೌಡ ನಟಿಸಿದ್ದು, ಥ್ರಿಲ್ಲರ್ ಕಥೆಗಳನ್ನು ಇಷ್ಟಪಡುವ ಪ್ರೇಕ್ಷಕರಿಗೆ ಈ ಸಿನೆಮಾ ಖುಷಿ ಕೊಟ್ಟಿದೆ.
ಚಿತ್ರದಲ್ಲಿ ದೊಡ್ಡ ತಾರಾಗಣವೇ ಇದೆ. ನೊಂದ ತಾಯಿಯ ಪಾತ್ರದಲ್ಲಿ ಸ್ಪರ್ಶ ರೇಖಾ ನಿಜಕ್ಕೂ ಗಮನ ಸೆಳೆಯುತ್ತಾರೆ. ಮಗಳನ್ನು ಕಳೆದುಕೊಂಡ ತಾಯಿಯ ಹುಡುಕಾಟವನ್ನು ಚಿತ್ರದಲ್ಲಿ ಮನಮುಟ್ಟುವಂತೆ ಅಭಿನಯಿಸಿದ್ದಾರೆ ರೇಖಾ. ಇನ್ನು ಮಗಳ ಪಾತ್ರದಲ್ಲಿ ಬೇಬಿ ಐಸಿರಿ ಜೈನ್ ಅಭಿನಯಿಸಿದ್ದಾರೆ. ಜೊತೆಗೆ ಅವಿನಾಶ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ಧಾರೆ. ಪೊಲೀಸ್ ಅಧಿಕಾರಿಯಾಗಿ ಗಮನ ಸೆಳೆಯುತ್ತಾರೆ ಅವಿನಾಶ್. ಬೇಬಿ ಮಿಸ್ಸಿಂಗ್ ಕೇಸನ್ನು ಬೆನ್ನತ್ತಿ ಹೋಗುವ ಪೊಲೀಸ್ ಅಧಿಕಾರಿಯಾಗಿ ಖಡಕ್ಕಾಗಿ ಅಭಿನಯಿಸಿದ್ದಾರೆ. ಈ ಸಿನೆಮಾದಲ್ಲಿ ಶಶಿಕುಮಾರ್ ಕೂಡ ಅಭಿನಯಿಸಿದ್ದು, ಅವರ ಪಾತ್ರಕ್ಕೆ ನೆಗೆಟಿವ್ ಶೇಡ್ ಇದೆ. ಚಾಲೆಂಜಿಂಗ್ ಅನಿಸುವ ಪಾತ್ರದಲ್ಲಿ ಶಶಿಕುಮಾರ್ ಅಭಿನಯಿಸಿದ್ದು, ಪಾತ್ರ ಪ್ರೇಕ್ಷಕರಿಗೆ ಹೊಸ ಅನುಭವ ಕೊಡುತ್ತದೆ. ಇನ್ನುಳಿದಂತೆ ಅಶೋಕ್ ಕಶ್ಯಪ್, ಕಡ್ಡಿಪುಡಿ ಚಂದ್ರು ಕೂಡ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡು ಗಮನ ಸೆಳೆಯುತ್ತಾರೆ.
ಕಿರುತೆರೆಯಿಂದ, ಹಿರಿತೆರೆಗೆ ಬಂದಿರೋ ನಾಯಕಿ ರಕ್ಷಾ ಕೂಡ ತಮ್ಮ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಶ್ರೀಶಾಸ್ತ ಚಿತ್ರಕ್ಕೆ ಸಂಗೀತ ನೀಡಿದ್ದು, ಹಾಡುಗಳು ಪ್ರೇಕ್ಷಕರನ್ನು ಅಷ್ಟು ಕಾಡುವುದಿಲ್ಲ. ಸಂಗೀತವೂ ಅಷ್ಟೇನು ಮೋಡಿ ಮಾಡುವುದಿಲ್ಲ. ಥ್ರಿಲ್ಲರ್ ಕಥೆಯಾದ್ದರಿಂದ ಹಿನ್ನೆಲೆ ಸಂಗೀತಕ್ಕೆ ಇನ್ನಷ್ಟು ಗಮನ ಕೊಟ್ಟಿದ್ದರೆ, ಪ್ರೇಕ್ಷಕರನ್ನು ಥಿಯೇಟರಿನಲ್ಲಿ ಹಿಡಿದು ಕೂರಿಸಬಹುದಿತ್ತು. ಬಹು ತಾರಾಗಣದ ಈ ಸಿನೆಮಾದಲ್ಲಿ ಒಂದು ಮೆಸೇಜ್ ಇದೆ ಅನ್ನುವುದೇ ಚಿತ್ರರಸಿಕರಿಗೆ ಖುಷಿ ಕೊಡುವ ವಿಷಯ.
