ಚೀನಿ ಹೊಸ ವರ್ಷಾಚರಣೆ ಸಂಭ್ರಮದ ವೇಳೆ ಗುಂಡಿನ ದಾಳಿ: ಕನಿಷ್ಠ 10 ಮಂದಿ ಮೃತ್ಯು

ಕ್ಯಾಲಿಫೋರ್ನಿಯಾ: ಚೀನಿಯರ ಚಂದ್ರಮಾನದ ಹೊಸ ವರ್ಷ ಆಚರಣೆ ಸಂದರ್ಭದಲ್ಲಿ ಇಲ್ಲಿನ ಬಾಲ್‍ರೂಂ ಡ್ಯಾನ್ಸ್ ಸ್ಟುಡಿಯೊದಲ್ಲಿ ಆಗಂತುಕನೊಬ್ಬ ನಡೆಸಿದ ಗುಂಡಿನ ದಾಳಿಯಲ್ಲಿ ಕನಿಷ್ಠ 10 ಮಂದಿ ಮೃತಪಟ್ಟಿದ್ದಾರೆ.

ಇನ್ನೊಂದು ಕ್ಲಬ್ ಮೇಲೂ ಇಂಥದ್ದೇ ದಾಳಿ ನಡೆಸಲು ದಾಳಿಕೋರ ಮುಂದಾಗಿದ್ದು, ಈ ಪ್ರಯತ್ನ ವಿಫಲವಾಗಿದೆ. ಆರೋಪಿಗಾಗಿ ಪೊಲೀಸರು ಕಾರ್ಯಾಚರಣೆ ನಡೆಸಿ ಒಂದು ಬಿಳಿಯ ವ್ಯಾನ್ ವಶಕ್ಕೆ ಪಡೆದಿದ್ದು, ಶಂಕಿತ ಅರೋಪಿ ಇದರಲ್ಲಿದ್ದಾನೆಯೇ ಎನ್ನುವುದು ಇನ್ನೂ ದೃಢಪಟ್ಟಿಲ್ಲ.

ಈ ಘಟನೆ ಅಮೆರಿಕದಲ್ಲಿರುವ ಏಷ್ಯನ್ ಸಮುದಾಯಗಳಲ್ಲಿ ಭೀತಿಯ ಅಲೆ ಹುಟ್ಟಿಸಿದೆ ಹಾಗೂ ದೇಶಾದ್ಯಂತ ಚಾಂದ್ರಮಾನ ಹೊಸ ವರ್ಷಾಚರಣೆಯ ಮೇಲೆ ಕರಿ ನೆರಳು ಆವರಿಸಿದೆ. ಇಂಥ ಆಚರಣೆಗಳಿಗೆ ಸೂಕ್ತ ಭದ್ರತೆ ಒದಗಿಸುವ ಸಲುವಾಗಿ ಹೆಚ್ಚುವರಿ ಅಧಿಕಾರಿಗಳನ್ನು ಕಳುಹಿಸಲಾಗಿದೆ.

ಮಾಂಟೆರಿ ಪಾರ್ಕ್ ಸ್ಟಾರ್ ಬಾಲ್‍ರೂಂ ಡ್ಯಾನ್ಸ್ ಸ್ಟುಡಿಯೊದಲ್ಲಿ ನಡೆದ ಈ ದಾಳಿಯಲ್ಲಿ ಐದು ಮಂದಿ ಮಹಿಳೆಯರು ಮತ್ತು ಐವರು ಪುರುಷರು ಮೃತಪಟ್ಟಿದ್ದಾರೆ. ಇತರ 10 ಮಂದಿ ಗಾಯಗೊಂಡಿದ್ದಾರೆ. 20 ರಿಂದ 30 ನಿಮಿಷ ಬಳಿಕ ಅಲಂಬ್ರಾದ ಲಾಯ್ ಲಾಯ್ ಬಾಲ್‍ರೂಂಗೆ ಕೂಡಾ ಒಬ್ಬ ಬಂದೂರುಧಾರಿ ಪ್ರವೇಶಿಸಿದ್ದಾನೆ ಎಂದು ಲಾಸ್‍ಎಂಜಲೀಸ್ ಕೌಂಟಿ ಶೆರೀಫ್ ರಾಬರ್ಟ್ ಲೂನಾ ಹೇಳಿದ್ದಾರೆ.

ಈ ಎರಡೂ ಆಚರಣೆಗಳು ಒಂದಕ್ಕೊಂದು ಸಂಬಂಧ ಹೊಂದಿದ್ದವು ಎನ್ನಲಾಗಿದ್ದು, ದಾಳಿಯ ಉದ್ದೇಶದ ಬಗ್ಗೆ ತಿಳಿದು ಬಂದಿಲ್ಲ. ಎರಡೂ ಘಟನೆಗಳಲ್ಲಿ ಶಂಕಿತ ದಾಳಿಕೋರ ಏಷ್ಯನ್ ವ್ಯಕ್ತಿ ಎಂದು ಹೇಳಲಾಗಿದೆ. ಆದರೆ ಅಲಂಬ್ರಾ ಘಟನೆಯಲ್ಲಿ ಬಂದೂಕುಧಾರಿಯ ಕೈಯಿಂದ ಜನ ಬಂದೂಕು ಕಸಿದುಕೊಂಡರು ಎಂದು ತಿಳಿದುಬಂದಿದೆ.