ಇಂದಿನಿಂದ ಕನ್ನಡ ಸೇರಿದಂತೆ ಪ್ರಾದೇಶಿಕ ಭಾಷೆಗಳಲ್ಲಿ ಸುಪ್ರೀಂ ಕೋರ್ಟ್ ತೀರ್ಪಿನ ಪ್ರತಿ ಆನ್‌ಲೈನ್‌ನಲ್ಲಿ ಲಭ್ಯ

ಹೊಸದಿಲ್ಲಿ, ಜ. 25: ಕನ್ನಡ ಸೇರಿದಂತೆ 13 ಪ್ರಾದೇಶಿಕ ಭಾಷೆಗಳಲ್ಲಿ ಸುಪ್ರೀಂ ಕೋರ್ಟ್(Supreme Court) ತೀರ್ಪಿನ ಪ್ರತಿಗಳನ್ನು ಒದಗಿಸುವ ಆನ್‌ಲೈನ್‌ ಸೇವೆಗೆ ಮುಖ್ಯ ನ್ಯಾಯಮೂರ್ತಿ ಡಿ.ವೈ. ಚಂದ್ರಚೂಡ(D.Y. Chandrachud) ಅವರು ಬುಧವಾರ ಚಾಲನೆ ನೀಡಿದ್ದಾರೆ. ಈ ಸೇವೆ ಗುರುವಾರದಿಂದ ಲಭ್ಯವಾಗಲಿದೆ.

ಇಲೆಕ್ಟ್ರಾನಿಕ್ಸ್ ಸುಪ್ರೀಂ ಕೋರ್ಟ್ ರಿಪೋರ್ಟ್ಸ್ (E-SCR)ನ ಭಾಗವಾಗಿ ನ್ಯಾಯಾಲಯವು ಹಿಂದಿ, ಒರಿಸ್ಸಾ, ಮರಾಠಿ ಸೇರಿದಂತೆ 13 ಪ್ರಾದೇಶಿಕ ಭಾಷೆಗಳಲ್ಲಿ ಸುಪ್ರೀಂ ಕೋರ್ಟ್ ತೀರ್ಪಿನ ಪ್ರತಿಗಳನ್ನು ಗುರುವಾರದಿಂದ ಉಚಿತವಾಗಿ ಒದಗಿಸಲು ನಿರ್ಧರಿಸಿದೆ ಎಂದು ಚಂದ್ರಚೂಡ ಅವರು ಬುಧವಾರ ನ್ಯಾಯಾಲಯದ ಕಲಾಪದಲ್ಲಿ ಭಾಗವಹಿಸಿದ ವಕೀಲರಿಗೆ ತಿಳಿಸಿದರು.

‘‘ಇ-ಎಸ್ಸಿಆರ್ ಯೋಜನೆ ಅಡಿಯ ಈಗ ನಮ್ಮಲ್ಲಿ ಸುಮಾರು 34,000 ತೀರ್ಪುಗಳಿವೆ. ಇದರ ಜೊತೆಗೆ ಪ್ರಾದೇಶಿಕ ಭಾಷೆಗಳಲ್ಲಿ 1,268 ತೀರ್ಪುಗಳು ಲಭ್ಯವಿವೆ. ಈ ತೀರ್ಪುಗಳು ಗುರುವಾರದಿಂದ ಆನ್‌ಲೈನ್‌ ನಲ್ಲಿ ಲಭ್ಯವಾಗಲಿವೆ’’ ಎಂದು ಅವರು ಹೇಳಿದರು. ಗಣರಾಜ್ಯೋತ್ಸವದ ದಿನದಂದು ಸುಪ್ರೀಂ ಕೋರ್ಟ್ನ ರಿಜಿಸ್ಟ್ರಿ ಭಾರತದ ವಿವಿಧ ಭಾಷೆಗಳಿಗೆ ಭಾಷಾಂತರಗೊಂಡ 1268 ತೀರ್ಪುಗಳನ್ನು ಬಿಡುಗಡೆ ಮಾಡಲಿದೆ.

ಭಾಷಾಂತರಗೊಂಡ ಸುಪ್ರೀಂ ಕೋರ್ಟ್ ನ ತೀರ್ಪು ಅಸ್ಸಾಮಿ, ಗಾರೊ, ಹಿಂದಿ, ಕನ್ನಡ, ಖಾಸಿ, ಮಲೆಯಾಳಂ, ಮರಾಠಿ, ನೇಪಾಳಿ, ಒರಿಸಾ, ಪಂಜಾಬಿ, ತಮಿಳು, ತೆಲುಗು ಹಾಗೂ ಉರ್ದು ಹೀಗೆ 13 ಭಾಷೆಗಳಲ್ಲಿ ಲಭ್ಯವಾಗಲಿದೆ ಎಂದು ಸುಪ್ರೀಂ ಕೋರ್ಟ್ ತಿಳಿಸಿದೆ.

‘‘ಆರಂಭದಲ್ಲಿ ಈ 1268 ತೀರ್ಪುಗಳಲ್ಲಿ ಹಿಂದಿಯಲ್ಲಿ 1091, ಕನ್ನಡದಲ್ಲಿ 17, ಒರಿಯಾದಲ್ಲಿ 21, ಮರಾಠಿಯಲ್ಲಿ 14, ಅಸ್ಸಾಮಿಯಲ್ಲಿ 4, ಮಲೆಯಾಳಂನಲ್ಲಿ 29, ನೇಪಾಳಿಯಲ್ಲಿ 3, ಪಂಜಾಬಿಯಲ್ಲಿ 4, ತಮಿಳಿನಲ್ಲಿ 52, ತೆಲುಗಿನಲ್ಲಿ 28 ಹಾಗೂ ಉರ್ದುವಿನಲ್ಲಿ 3 ತೀರ್ಪುಗಳು ಇ-ಎಸ್ಸಿಆರ್ ಪೋರ್ಟಲ್ನಲ್ಲಿ ಲಭ್ಯವಾಗಲಿದೆ’’ ಎಂದು ಅವರು ತಿಳಿಸಿದರು ಮುಂದೆ 22 ಪ್ರಾದೇಶಿಕ ಭಾಷೆಗಳಲ್ಲಿ ತೀರ್ಪುಗಳನ್ನು ಒದಗಿಸುವ ಗುರಿಯನ್ನು ಸುಪ್ರೀಂ ಕೋರ್ಟ್ ಹೊಂದಿದೆ.

ಈ ತೀರ್ಪುಗಳು ಸುಪ್ರೀಂ ಕೋರ್ಟ್ ನ  ವೆಬ್ಸೈಟ್, ಮೊಬೈಲ್ ಆ್ಯಪ್ ಹಾಗೂ ನ್ಯಾಷನಲ್ ಜುಡೀಷಿಯಲ್ ಡಾಟಾ ಗ್ರಿಡ್ ನ್ ಜಡ್ಜಮೆಂಟ್ ಪೋರ್ಟಲ್ ನಲ್ಲಿ ತೀರ್ಪುಗಳು ಲಭ್ಯವಿವೆ ಎಂದು ಅವರು ತಿಳಿಸಿದ್ದಾರೆ. ದೇಶಾದ್ಯಂತ ಇರುವ ವಕೀಲರಿಗೆ ಈ ಉಚಿತ ಸೇವೆಯನ್ನು ಪಡೆದುಕೊಳ್ಳಬಹುದು. ಯುವ ವಕೀಲರು ಶುಲ್ಕ ಪಾವತಿಸುವ ಅಗತ್ಯತೆ ಇಲ್ಲ. ನಾವು ಸರ್ಚ್ ಎಂಜಿನ್ ಅನ್ನು ಸುಧಾರಿಸಲು ಪ್ರಯತ್ನಿಸುತ್ತಿದ್ದೇವೆ ಎಂದು ಅವರು ತಿಳಿಸಿದರು. ಸದ್ಯ 2023 ಜನವರಿ 1ರ ವರೆಗಿನ ತೀರ್ಪುಗಳು ಆನ್‌ಲೈನ್‌ ನಲ್ಲಿ ಲಭ್ಯವಿರಲಿದೆ ಎಂದು ಚಂದ್ರಚೂಡ್ ಅವರು ತಿಳಿಸಿದರು.