ಇಂದು ಪ್ರಜಾಪ್ರಭುತ್ವ ಜಾಗವನ್ನು 'ದ್ವೇಷವಾದ' ಅತಿಕ್ರಮಿಸಿದೆ: ಬರಗೂರು ರಾಮಚಂದ್ರಪ್ಪ

ಬೆಂಗಳೂರು, ಜ.26: ಪ್ರಜಾಪ್ರಭುತ್ವ ಸರಕಾರವನ್ನು ಸ್ವೀಕರಿಸುವ ಈ ದಿನದಂದು ನಾವು ಸರಿಯಾಗಿ ಯೋಚನೆ ಮಾಡಿದರೆ, ಪ್ರಜಾಪ್ರಭುತ್ವದ ಜಾಗವನ್ನು ದ್ವೇಷವಾದವು ಅತಿಕ್ರಮಿಸಿದೆ ಎಂದು ಸಾಹಿತಿ ಬರಗೂರು ರಾಮಚಂದ್ರಪ್ಪ ತಿಳಿಸಿದ್ದಾರೆ.

ಗುರುವಾರ ನಗರದ ಚಿತ್ರಕಲಾ ಪರಿಷತ್ತಿನಲ್ಲಿ ಸೌಹಾರ್ದ ಭಾರತವು ಆಯೋಜಿಸಿದ್ದ ಗಣರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ದೇಶದಲ್ಲಿ ಇಂದು ದ್ವೇಷ ಭಾಷಣಕ್ಕೆ ಮಾತ್ರವಲ್ಲ, ಧರ್ಮ-ಧರ್ಮಗಳ ನಡುವೆ ಕಂದಕ ಸೃಷ್ಟಿ ಮಾಡುವ ಶಕ್ತಿಗಳು ಮುನ್ನೆಲೆ ಬಂದಿವೆ. ಈ ಸಂದರ್ಭದಲ್ಲಿ ನಿಜವಾದ ಗಣರಾಜ್ಯವು ದ್ವೇಷವಾದಿ ಭಾರತವನ್ನು ಹಿಮ್ಮೆಟ್ಟಿಸುವ ಮೂಲಕ ನಿಜವಾದ ಪ್ರಜಾಪ್ರಭುತ್ವವನ್ನು ಸ್ಥಾಪಿಸಬೇಕು. ಸೌಹಾರ್ದ ಇದಕ್ಕೆ ಬುನಾದಿ ಆಗಬೇಕು ಎಂದು ಅವರು ಹೇಳಿದರು.

ಅಂಬೇಡ್ಕರ್ ಹಿಂದು ಧರ್ಮವನ್ನು ನಂಬಿದವರಲ್ಲ. ಹಿಂದು ಧರ್ಮದಿಂದ ಆಚೆಗೆ ಬಂದವರು. ಒಂದು ಧರ್ಮವನ್ನು ನಂಬಿಯೂ ಜಾತ್ಯಾತೀತವಾಗಿ ಬದುಕುವುದು ಹೇಗೆ ಎಂದು ಗಾಂಧಿ ಮತ್ತು ವಿವೇಕನಂದರು ತಿಳಿಸಿಕೊಟ್ಟಿದ್ದಾರೆ. ಇವರಿಬ್ಬರೂ ಹಿಂದು ಧರ್ಮಕ್ಕೆ ನಿಷ್ಟರಾಗಿದ್ದರು. ಆದರೆ ಅವರು ಹಿಂದು ಧಾರ್ಮಿಕ ಮೂಲಭೂತವಾದಿಗಳಾಗಿರಲಿಲ್ಲ. ಹಿಂದು ಧರ್ಮದ ಒಳವಿರ್ಮಶಕರಂತೆ ಅವರು ಕೆಲಸ ಮಾಡಿದ್ದಾರೆ ಎಂದು ಅವರು ಹೇಳಿದರು. 

ಗಾಂಧಿ ಶ್ರೀರಾಮರ ಭಕ್ತರು, ಆದರೆ ಶ್ರೀರಾಮಟಿನ್ನು ಎಂದು ಸ್ವಾತಂತ್ರ್ಯ ಹೋರಾಟದಲ್ಲಿ ತರಲಿಲ್ಲ. ಶ್ರೀರಾಮಟಿನ್ನು ಅವರು ಅಧಿಕಾರಕ್ಕೆ ಬಳಸಿದವರಲ್ಲ. ಅವರು ಚರಕ, ಖಾದಿ ಮತ್ತು ಉಪ್ಪನ್ನು ಸ್ವತಂತ್ರ ಹೋರಾಟಗಳಲ್ಲಿ ಬಳಸಿಕೊಂಡರು ಎಂದು ಅವರು ತಿಳಿಸಿದರು. 

ಜಾತ್ಯಾತೀತ ಎಂದು ಹೇಳಲು ಕೆಲವರು ಹಿಂಜರಿಯುತ್ತಿದ್ದಾರೆ. ಸಂವಿಧಾನದಲ್ಲಿ ಜಾತ್ಯಾತೀತ ಪದವನ್ನು ಬಳಸಿರುವುದು ತಪ್ಪು ಎಂದು ಹೇಳುತ್ತಿದ್ದಾರೆ. ಅಂತವರು ಜಾತ್ಯಾತೀತ ಭಾರತ ಎನ್ನುವ ಬದಲಿಗೆ ದ್ವೇಷಾತೀತ ಭಾರತ ಎಂದಾದರೂ ಹೇಳಲಿ ಎಂದು ಅವರು ಹೇಳಿದರು. 

1980ರ ದಶಕದಲ್ಲಿ ನಾವು ಸಮಾನತೆಯ ಬಗ್ಗೆ ಮಾತನಾಡುತ್ತಿದ್ದೆವು. ಆದರೆ 1990ರ ನಂತರ ಸಮಾನತೆಯನ್ನು ಸರಿಸಿ, ಸೌಹಾರ್ದತೆಯ ಬಗ್ಗೆ ಮಾತನಾಡಲು ಪ್ರಾರಂಭಿಸುತ್ತಿದ್ದೇವೆ. ಅದರ ಅರ್ಥ ಈ ದೇಶದ ಆಡಳಿತಗಾರರು ಆಧ್ಯತೆಗಳ ಪಲ್ಲಟ ಮಾಡಿದ್ದಾರೆ. ಸಮಾನತೆಯನ್ನು ಹಿಂದಕ್ಕೆ ಸರಿಸಿ ಸಹಿಷ್ಣತೆ ಬೇಕು ಎಂದು ಈಗ ಹೇಳುತ್ತಿದ್ದೇವೆ ಎಂದು ಅವರು ಬೇಸರ ವ್ಯಕ್ತಪಡಿಸಿದರು.

ದೇಶದ ಸೌಹಾರ್ದತೆಯು ಸಂಕಷ್ಟದಲ್ಲಿರುವ ಕಾರಣ ನಾವು ಸಂಭ್ರಮವನ್ನು ಬಯಸುತ್ತಿದ್ದೇವೆ. ಸಂವಿಧಾನವು ಎಷ್ಟೇ ಒಳ್ಳೆಯದಾಗಿದ್ದರೂ, ಅದನ್ನು ಅನುಸರಿಸುತ್ತಿರುವ ಜನ ಕೆಟ್ಟವರಾಗಿದ್ದರೆ, ಸಂವಿಧಾನವು ತನ್ನಷ್ಟಕ್ಕೆ ತಾನೇ ಕೆಟ್ಟದ್ದಾಗುತ್ತದೆ ಎಂದು ಅಂಬೇಡ್ಕರ್ ತಿಳಿಸಿದ್ದಾರೆ. ಈ ಮಾತು ಇಂದಿನ ಭಾರತಕ್ಕೆ ಬಹಳ ಮುಖ್ಯವಾಗಿದೆ. ಸಂವಿಧಾನದ ಹೆಸರಿನಲ್ಲಿಯೇ ಸಂವಿಧಾನಕ್ಕೆ ಅಪಚಾರ ಮಾಡುವ ಜನ ನಮ್ಮ ದೇಶದಲ್ಲಿ ಇದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು. 

ಧರ್ಮವನ್ನು ಉಲ್ಲೇಖ ಮಾಡುವ ಮುಖಾಂತರವಾಗಿ ಒಂದು ಧರ್ಮದ ಜನ ಇನ್ನೊಂದು ಧರ್ಮದ ಜೊತೆಯಲ್ಲಿ ಕಿತ್ತಾಡುವ ರೀತಿ ದ್ವೇಷ ಸಾಧಿಸುತ್ತಿದ್ದಾರೆ. ಈ ಮೂಲಕ ದೇಶ ತನಗೆ ತಾನೇ ನಾಶವಾಗುವಂತಹ ಸ್ಥಿತಿಗೆ ತಲುಪಿಸಲು ಧಾರ್ಮಿಕ ಮೂಲಭೂತವಾದಿ ಶಕ್ತಿಗಳು ಜಾಗೃತವಾಗುವ ಕಾಲಘಟ್ಟದಲ್ಲಿ ನಾವು ಇದ್ದೇವೆ ಎಂದು ಅವರು ತಿಳಿಸಿದರು.

ಸರ್ವೋಚ್ಚ ನ್ಯಾಯಾಲಯದ ಮಾಜಿ ನ್ಯಾಯಮೂರ್ತಿ ಗೋಪಾಲ ಗೌಡ ಮಾತನಾಡಿ, ಸಂಸದೀಯ ಪ್ರಜಾಪ್ರಭುತ್ವವನ್ನು ಉಳಿಸಬೇಕಾದರೆ ನಾವು ಮುಂಬರುವ ಚುನಾವಣೆಯಲ್ಲಿ ಒಳ್ಳೆಯ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಬೇಕು ಎಂದು ಕಿವಿಮಾತು ಹೇಳಿದರು.

ಕಾರ್ಯಕ್ರಮದಲ್ಲಿ ನಿವೃತ್ತ ಐಎಎಸ್ ಅಧಿಕಾರಿ ಶಶಿಕಾಂತ್ ಸೆಂಥಿಲ್, ಮಾನವ ಹಕ್ಕುಗಳ ಹೋರಾಟಗಾರ್ತಿ ಶಬ್ನಮ್ ಹಾಶ್ಮಿ, ಇತಿಹಾಸ ತಜ್ಞೆ ಮೃದುಲಾ ಮುಖರ್ಜಿ, ಪತ್ರಕರ್ತೆ ಸಬಾ ನಖ್ವಿ, ಚಿತ್ರಕಲಾ ಪರಿಷತ್ ಅಧ್ಯಕ್ಷ ಡಾ.ಬಿ.ಎಲ್.ಶಂಕರ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮೆಹ್ರೋಝ್ ಖಾನ್ ಮತ್ತಿತರರು ಉಪಸ್ಥಿತರಿದ್ದರು.