ಕಾನೂನಿನ ದೈನಂದಿನ ದುರುಪಯೋಗವನ್ನು ಸುಪ್ರೀಂ ಕೋರ್ಟ್ ನಿಲ್ಲಿಸಬೇಕು: ಪಿ.ಚಿದಂಬರಂ

ಹೊಸದಿಲ್ಲಿ,ಫೆ.5: ವಿಚಾರಣಾ ಪೂರ್ವ ಜೈಲುವಾಸವನ್ನು ಸಹಿಸಿಕೊಳ್ಳುವ ಕ್ರಿಮಿನಲ್ ನ್ಯಾಯವ್ಯವಸ್ಥೆಯು ಸಂವಿಧಾನದ ಅವಹೇಳನವಾಗಿದೆ ಎಂದು ರವಿವಾರ ಹೇಳಿರುವ ಹಿರಿಯ ಕಾಂಗ್ರೆಸ್ ನಾಯಕ ಪಿ.ಚಿದಂಬರಂ(P. Chidambaram) ಅವರು,ಕಾನೂನಿನ ದೈನಂದಿನ ದುರುಪಯೋಗಕ್ಕೆ ಅಂತ್ಯ ಹಾಡುವಂತೆ ಸರ್ವೋಚ್ಚ ನ್ಯಾಯಾಲಯ(Supreme Court)ವನ್ನು ಆಗ್ರಹಿಸಿದ್ದಾರೆ.

ದಿಲ್ಲಿಯ ನ್ಯಾಯಾಲಯವು 2019ರ ಜಾಮಿಯಾ ನಗರ ಹಿಂಸಾಚಾರ ಪ್ರಕರಣದಲ್ಲಿ ವಿದ್ಯಾರ್ಥಿ ಕಾರ್ಯಕರ್ತರಾದ ಶಾರ್ಜೀಲ್ ಇಮಾಮ್(Sharjeel Imam) ಮತ್ತು ಆಸಿಫ್ ಇಕ್ಬಾಲ್ ತನ್ಹಾ(Asif Iqbal Tanha) ಸೇರಿದಂತೆ 11 ಜನರನ್ನು ದೋಷಮುಕ್ತಗೊಳಿಸಿದ ಹಿನ್ನೆಲೆಯಲ್ಲಿ ಚಿದಂಬರಂ ಅವರ ಈ ಹೇಳಿಕೆ ಹೊರಬಿದ್ದಿದೆ. ಸಿಎಎ ವಿರೋಧಿ ಪ್ರತಿಭಟನೆಗಳಲ್ಲಿ ಭಾಗವಹಿಸಿದ್ದ ಇಮಾಮ್ ಸೇರಿದಂತೆ 11 ಜನರನ್ನು ಶನಿವಾರ ದೋಷಮುಕ್ತಗೊಳಿಸಿದ್ದ ಇಲ್ಲಿಯ ಹೆಚ್ಚುವರಿ ಸೆಷನ್ಸ್ ನ್ಯಾಯಾಲಯವು,ಪೊಲೀಸರು ಅವರನ್ನು ಬಲಿಪಶುಗಳನ್ನಾಗಿ ಮಾಡಿದ್ದರು ಮತ್ತು ಭಿನ್ನಾಭಿಪ್ರಾಯವನ್ನು ಉತ್ತೇಜಿಸಬೇಕೇ ಹೊರತು ಅದನ್ನು ಉಸಿರುಗಟ್ಟಿಸಬಾರದು ಎಂದು ಹೇಳಿತ್ತು.ಈ ಬೆಳವಣಿಗೆಗೆ ಪ್ರತಿಕ್ರಿಯಿಸಿರುವ ಚಿದಂಬರಂ,ಆರೋಪಿಗಳ ವಿರುದ್ಧ ಮೇಲ್ನೋಟದ ಸಾಕ್ಷವಾದರೂ ಇತ್ತೇ ಎಂದು ಪ್ರಶ್ನಿಸಿದ್ದಾರೆ.

ನ್ಯಾಯಾಲಯದ ನಿರ್ಧಾರ ಸ್ಪಷ್ಟವಾಗಿ ಇಲ್ಲ ಎನ್ನುವುದಾಗಿದೆ. ಕೆಲವು ಆರೋಪಿಗಳನ್ನು ಮೂರು ವರ್ಷಗಳಿಂದಲೂ ಜೈಲಿನಲ್ಲಿ ಇರಿಸಲಾಗಿತ್ತು. ಕೆಲವರಿಗೆ ಹಲವಾರು ತಿಂಗಳುಗಳ ಬಳಿಕ ಜಾಮೀನು ಸಿಕ್ಕಿತ್ತು. ಇದು ವಿಚಾರಣಾ ಪೂರ್ವ ಬಂಧನವಾಗಿದೆ ಎಂದು ಸರಣಿ ಟ್ವೀಟ್ ಗಳಲ್ಲಿ ಹೇಳಿರುವ ಚಿದಂಬರಂ,ನಾಗರಿಕರನ್ನು ವಿಚಾರಣೆಗೆ ಪೂರ್ವ ಜೈಲಿನಲ್ಲಿರಿಸಲು ಅಸಮರ್ಥ ಪೊಲೀಸರು ಮತ್ತು ಅತ್ಯುತ್ಸಾಹಿ ಪ್ರಾಸಿಕ್ಯೂಟರ್ಗಳು ಹೊಣೆಗಾರರಾಗಿದ್ದಾರೆ. ಅವರ ವಿರುದ್ಧ ಯಾವ ಕ್ರಮವನ್ನು ತೆಗೆದುಕೊಳ್ಳಲಾಗುತ್ತದೆ? ಆರೋಪಿಗಳು ಜೈಲಿನಲ್ಲಿ ಕಳೆದಿರುವ ತಿಂಗಳುಗಳು ಅಥವಾ ವರ್ಷಗಳನ್ನು ಯಾರು ಮರಳಿಸುತ್ತಾರೆ ಎಂದು ಪ್ರಶ್ನಿಸಿದ್ದಾರೆ.

ವಿಚಾರಣಾ ಪೂರ್ವ ಜೈಲುವಾಸವನ್ನು ಸಹಿಸಿಕೊಳ್ಳುವ ಕ್ರಿಮಿನಲ್ ನ್ಯಾಯವ್ಯವಸ್ಥೆಯು ಸಂವಿಧಾನಕ್ಕೆ,ವಿಶೇಷವಾಗಿ ವಿಧಿ 19 ಮತ್ತು 21ಕ್ಕೆ ಅವಹೇಳನವಾಗಿದೆ. ಕಾನೂನಿನ ದೈನಂದಿನ ದುರುಪಯೋಗಕ್ಕೆ ಸರ್ವೋಚ್ಚ ನ್ಯಾಯಾಲಯವು ಎಷ್ಟು ಬೇಗ ಅಂತ್ಯ ಹಾಡುತ್ತದೋ ಅಷ್ಟು ಒಳ್ಳೆಯದು ಎಂದು ಹೇಳಿರುವ ಅವರು,ಕಾನೂನಿನ ದುರುಪಯೋಗವನ್ನು ನಿರುತ್ತೇಜಿಸುವ ಮತ್ತು ಸ್ವಾತಂತ್ರವನ್ನು ಎತ್ತಿ ಹಿಡಿಯುವ ವಿಚಾರಣಾ ನ್ಯಾಯಾಲಯಗಳನ್ನು ಮೆಚ್ಚಿಕೊಳ್ಳಿ ಎಂದಿದ್ದಾರೆ.

ಆರೋಪಿಗಳು ಪ್ರತಿಭಟನೆಯ ಸ್ಥಳದಲ್ಲಿ ಕೇವಲ ಉಪಸ್ಥಿತರಿದ್ದರು ಮತ್ತು ಅವರ ವಿರುದ್ಧ ಯಾವುದೇ ದೋಷಾರೋಪಣೆಯ ಸಾಕ್ಷಗಳಿಲ್ಲ ಎನ್ನುವುದನ್ನು ಶನಿವಾರ ಗಮನಿಸಿದ್ದ ಹೆಚ್ಚುವರಿ ಸೆಷನ್ಸ್ ನ್ಯಾಯಾಲಯವು,ಭಿನ್ನಾಭಿಪ್ರಾಯವು ನ್ಯಾಯಯುತ ನಿರ್ಬಂಧಗಳಿಗೊಳಪಟ್ಟು ವಾಕ್ ಮತ್ತು ಅಭಿವ್ಯಕ್ತಿ ಸ್ವಾತಂತ್ರದ ಮೂಲಭೂತ ಹಕ್ಕಿನ ವಿಸ್ತರಣೆಯಾಗಿದೆ ಎಂದು ಹೇಳಿತ್ತು.

2019 ಡಿಸೆಂಬರ್ ನಲ್ಲಿ ಇಲ್ಲಿಯ ಜಾಮಿಯಾ ನಗರದಲ್ಲಿ ಸಿಎಎ ವಿರೋಧಿ ಪ್ರತಿಭಟನಾಕಾರರು ಮತ್ತು ಪೊಲೀಸರ ನಡುವೆ ಘರ್ಷಣೆಗಳ ಬಳಿಕ ಭುಗಿಲೆದ್ದಿದ್ದ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಎಫ್ಐಆರ್ ದಾಖಲಾಗಿತ್ತು.

2019,ಡಿ.13ರಂದು ಜಾಮಿಯಾ ಮಿಲ್ಲಿಯಾ ಇಸ್ಲಾಮಿಯಾ ವಿವಿಯಲ್ಲಿ ಪ್ರಚೋದನಾತ್ಮಕ ಭಾಷಣವನ್ನು ಮಾಡುವ ಮೂಲಕ ದಂಗೆಗಳಿಗೆ ಕುಮ್ಮಕ್ಕು ನೀಡಿದ್ದ ಆರೋಪವನ್ನು ಇಮಾಮ್ ವಿರುದ್ಧ ಹೊರಿಸಲಾಗಿತ್ತು. ಇಮಾಮ್ 2020ರ ಈಶಾನ್ಯ ದಿಲ್ಲಿ ಗಲಭೆಗಳಿಗೆ ಸಂಬಂಧಿಸಿದ ಒಳಸಂಚು ಪ್ರಕರಣದಲ್ಲಿ ಆರೋಪಿಯಾಗಿರುವುದರಿಂದ ಅವರ ಜೈಲುವಾಸ ಮುಂದುವರಿಯಲಿದೆ.