ಸಿರಿಯಾ, ಟರ್ಕಿಯಲ್ಲಿ ಮತ್ತೆ ಪ್ರಬಲ ಭೂಕಂಪ: 2300 ಕ್ಕೂ ಅಧಿಕ ಮಂದಿ ಸಾವು
![ಸಿರಿಯಾ, ಟರ್ಕಿಯಲ್ಲಿ ಮತ್ತೆ ಪ್ರಬಲ ಭೂಕಂಪ: 2300 ಕ್ಕೂ ಅಧಿಕ ಮಂದಿ ಸಾವು ಸಿರಿಯಾ, ಟರ್ಕಿಯಲ್ಲಿ ಮತ್ತೆ ಪ್ರಬಲ ಭೂಕಂಪ: 2300 ಕ್ಕೂ ಅಧಿಕ ಮಂದಿ ಸಾವು](https://www.varthabharati.in/sites/default/files/images/articles/2023/02/6/366327-1675700409.jpg)
ಇಸ್ತಾಂಬುಲ್: ನೂರು ವರ್ಷಗಳಲ್ಲೇ ಅತ್ಯಂತ ಭೀಕರ ಭೂಕಂಪವು ಸೋಮವಾರ ಟರ್ಕಿ(Turkey) ಮತ್ತು ಸಿರಿಯಾ(Syria)ವನ್ನು ಅಪ್ಪಳಿಸಿದ್ದು, ಕಳೆದ 24 ಗಂಟೆಗಳ ಅವಧಿಯಲ್ಲಿ ಪ್ರಬಲ ಮೂರು ಭೂಕಂಪ ಸಂಭವಿಸಿದೆ. 50 ಕ್ಕೂ ಅಧಿಕ ಲಘು ಕಂಪನಗಳು ವರದಿಯಾಗಿವೆ. ಭೀಕರ ದುರ್ಘಟನೆಯಲ್ಲಿ 2,300 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದು, ನೂರಾರು ಕಟ್ಟಡಗಳು ನೆಲಸಮಗೊಂಡಿದೆ. ಭೂಕಂಪನದ ತೀವ್ರತೆಗೆ ಗ್ರೀನ್ ಲ್ಯಾಂಡ್ ಪ್ರದೇಶದಲ್ಲೂ ಕಂಪನದ ಅನುಭವವಾಗಿದೆ ಎಂದು ವರದಿಯಾಗಿದೆ.
ಕುಸಿದಿರುವ ಕಟ್ಟಡ ಅವಶೇಷಗಳಡಿಯಲ್ಲಿ ಇನ್ನೂ ನೂರಾರು ಜನರು ಸಿಲುಕಿಕೊಂಡಿದ್ದಾರೆ ಎಂದು ಅಂದಾಜಿಸಲಾಗಿದ್ದು, ರಕ್ಷಣಾ ಪಡೆ ಕಾರ್ಯಾಚರಣೆಯಲ್ಲಿ ತೊಡಗಿವೆ. ಸಾವಿನ ಪ್ರಮಾಣ ಇನ್ನಷ್ಟು ಏರುವ ಸಾಧ್ಯತೆ ಇದೆ ಎಂದು ಸಿರಿಯಾದ ರಾಷ್ಟ್ರೀಯ ಭೂಕಂಪ ಕೇಂದ್ರದ ಮೂಲಗಳು ಹೇಳಿದೆ.
ಟರ್ಕಿಯಲ್ಲಿ 1,498 ಜನರು ಸಾವನ್ನಪ್ಪಿದ್ದಾರೆ ಎಂದು ಟರ್ಕಿ ಅಧಿಕೃತ ಮೂಲಗಳು ಹೇಳಿವೆ.
ಆರಂಭಿಕ ಭೂಕಂಪದ ನಂತರ ರೆಕ್ಟರ್ 7.5 ಮತ್ತು 6 ತೀವ್ರತೆಯ ಕಂಪನಗಳು ಸೇರಿದಂತೆ 50 ಕ್ಕೂ ಹೆಚ್ಚು ನಂತರದ ಕಂಪನಗಳು ಸಂಭವಿಸಿದ್ದು, ಇದು ರಕ್ಷಣಾ ಕಾರ್ಯವನ್ನು ವಿಳಂಬಗೊಳಿಸಲು ಕಾರಣವಾಗಿದೆ.
ಮೊದಲ ಭೂಕಂಪವು ಸುಮಾರು 2 ಮಿಲಿಯನ್ ಜನರು ನೆಲೆಸಿರುವ ಟರ್ಕಿಯ ನಗರವಾದ ಗಾಜಿಯಾಂಟೆಪ್ ಬಳಿ ಸುಮಾರು 17.9 ಕಿಲೋಮೀಟರ್ (11 ಮೈಲಿ) ಆಳದಲ್ಲಿ ಮುಂಜಾನೆ 04:17 ಕ್ಕೆ ಅಪ್ಪಳಿಸಿತು ಎಂದು ಅಮೇರಿಕಾ ಮೂಲದ ಭೂವೈಜ್ಞಾನಿಕ ಸಮೀಕ್ಷೆ ತಿಳಿಸಿದೆ.
ಗ್ರೀನ್ಲ್ಯಾಂಡ್ನವರೆಗೂ ಭೂಕಂಪನದ ಅನುಭವವಾಗಿದೆ ಎಂದು ಡ್ಯಾನಿಶ್ ಭೂವೈಜ್ಞಾನಿಕ ಸಂಸ್ಥೆ ತಿಳಿಸಿದೆ.
ವಾಷಿಂಗ್ಟನ್, ಯುರೋಪಿಯನ್ ಒಕ್ಕೂಟ ಮತ್ತು ರಷ್ಯನ್, ಮಧ್ಯಪ್ರಾಚ್ಯದ ದೇಶಗಳು ಸೇರಿದಂತೆ ಹಲವು ರಾಷ್ಟ್ರಗಳು ಉಭಯ ಸಂತ್ರಸ್ತ ದೇಶಗಳ ಸಹಾಯಕ್ಕೆ ಧಾವಿಸಿದೆ.
ಬ್ರಿಟನ್ ಉಪಕರಣಗಳು, 76 ಹುಡುಕಾಟ ಮತ್ತು ಪಾರುಗಾಣಿಕಾ ತಜ್ಞರನ್ನು ಮತ್ತು ತುರ್ತು ವೈದ್ಯಕೀಯ ತಂಡವನ್ನು ಟರ್ಕಿಗೆ ಕಳುಹಿಸಿದೆ.