ಖ್ಯಾತ ಸಿನಿಮಾ ಪತ್ರಕರ್ತ ಮಂಗಳೂರು ಮೂಲದ ರೌಫ್ ಅಹ್ಮದ್ ನಿಧನ
ಮುಂಬೈ: ಚಲನಚಿತ್ರ ಪತ್ರಿಕೋದ್ಯಮದಲ್ಲಿ ವಿಶಿಷ್ಟ ಛಾಪು ಮೂಡಿಸಿ ಆ ಕ್ಷೇತ್ರದಲ್ಲಿ ಹಲವು ಹೊಸ ಪ್ರಯೋಗಗಳನ್ನು ಯಶಸ್ವಿಯಾಗಿ ಜಾರಿಗೆ ತಂದ ಮಂಗಳೂರು ಮೂಲದ ಖ್ಯಾತ ಪತ್ರಕರ್ತ, ಲೇಖಕ ರೌಫ್ ಅಹ್ಮದ್ ಮುಂಬೈನಲ್ಲಿ ಇತ್ತೀಚಿಗೆ ನಿಧನರಾಗಿದ್ದಾರೆ. 70ರ ದಶಕದ ಮಧ್ಯಭಾಗದಿಂದ ಅವರು ಸಂಪಾದಕರಾಗಿದ್ದ ನಿಯತಕಾಲಿಕೆಗಳ ಮೂಲಕ ಚಲನಚಿತ್ರ ಪತ್ರಿಕೋದ್ಯಮಕ್ಕೆ ಹೊಸ ದಿಕ್ಕು ತೋರಿಸಿದ ಕೀರ್ತಿ ರೌಫ್ ಅಹ್ಮದ್ ಅವರದ್ದು. ಅವರು ರವಿವಾರ ಬೆಳಿಗ್ಗೆ ಅಲ್ಪಕಾಲದ ಅನಾರೋಗ್ಯದಿಂದ ಅವರ ವರ್ಸೋವಾ ನಿವಾಸದಲ್ಲಿ ನಿಧನರಾದರು. ಮೃತರು ಪತ್ನಿ, ಪುತ್ರ, ಪುತ್ರಿ, ಹಾಗೂ ಅಪಾರ ಬಂಧು ಬಳಗವನ್ನು ಅಗಲಿದ್ದಾರೆ.
ಮಂಗಳೂರಿನ ಬಂದರ್ ನಿವಾಸಿ ನಿವೃತ್ತ ನ್ಯಾಯಾಧೀಶ ಅಬ್ದುಲ್ ರಹೀಮ್ ಅವರ ಸುಪುತ್ರ ರೌಫ್ ಅಹ್ಮದ್ ನಗರದ ಅಲೋಶಿಯಸ್ ಕಾಲೇಜಿನಲ್ಲಿ ಪದವಿ ಪಡೆದ ಬಳಿಕ ಮುಂಬೈಗೆ ತೆರಳಿದ್ದರು. ಅಲ್ಲಿ ಸಮಕಾಲೀನರಾದ ಎಂ ಜೆ ಅಕ್ಬರ್ ಅವರಂತಹವರೊಂದಿಗೆ 1975 ರಲ್ಲಿ ಅಹ್ಮದ್ ಅವರು ಟೈಮ್ಸ್ ಆಫ್ ಇಂಡಿಯಾ ತರಬೇತಿ ಕೋರ್ಸ್ನ ಭಾಗವಾಗಿದ್ದರು. ನಂತರ ಅವರು ಸಿನೆಮಾ ಪತ್ರಿಕೋದ್ಯಮದತ್ತ ಚಿತ್ತ ಹರಿಸಿ ʼಸೂಪರ್ʼ ಎಂಬ ಮ್ಯಾಗಝಿನ್ ಹೊರತಂದಿದ್ದರು. ಮುಂದೆ ʻಮೂವೀʼ ಮ್ಯಾಗಝಿನ್ ಹೊರತಂದ ಅವರು ಟೈಮ್ಸ್ ಆಫ್ ಇಂಡಿಯಾದ ಸಿನಿಮಾ ಮ್ಯಾಗಝಿನ್ ʻಫಿಲ್ಮ್ಫೇರ್ʼ ಇದರ ಸಂಪಾದಕರಾದರು. ಆ ಕಾಲದಲ್ಲಿ ಜನಪ್ರಿಯವಾಗಿದ್ದ ಫಿಲ್ಮ್ ಗಾಸಿಪ್ ಸುದ್ದಿಗಳನ್ನು ಹೆಚ್ಚು ನೆಚ್ಚಿಕೊಳ್ಳದೆ ಹೊಸ ಒಳನೋಟಗಳುಳ್ಳ ಸಿನಿಮಾ ಬರಹಗಳನ್ನು ಓದುಗರಿಗೆ ನೀಡುವ ಮೂಲಕ ರೌಫ್ ಅಹ್ಮದ್ ಸಿನಿಮಾ ಪತ್ರಿಕೋದ್ಯಮಕ್ಕೆ ಹೊಸ ರೂಪ ನೀಡಿದರು.
ಅಹ್ಮದ್ ಅವರು ತಮ್ಮ ಅದ್ಭುತ ಬರಹ ಶೈಲಿ ಹಾಗೂ ಆಕರ್ಷಕ ವಿನ್ಯಾಸದಿಂದ ಗಮನ ಸೆಳೆದಿದ್ದರು. ಅವರ ಮೂಲಕ ಮೊದಲ ಬಾರಿಗೆ ವಿಂಟೇಜ್ ಸಂಗೀತ, ಪರ್ಯಾಯ ಸಿನೆಮಾ ಮತ್ತು ಪೂರ್ಣ-ಪ್ರಮಾಣದ ನೊಸ್ಟಾಲ್ಜಿಯಾ ವಿಭಾಗಗಳು ಮುಖ್ಯವಾಹಿನಿ ಫಿಲ್ಮ್ ಮ್ಯಾಗಜೀನ್ಗಳಲ್ಲಿ ಪ್ರವೇಶ ಪಡೆದವು. ಆ ಮೂಲಕ ಸಿನೆಮಾ ಪತ್ರಿಕೋದ್ಯಮಕ್ಕೆ ಮನರಂಜನೆ ಜೊತೆ ಗಾಂಭೀರ್ಯ ಹಾಗು ಅಧ್ಯಯನಶೀಲತೆಯನ್ನು ತಂದವರು ರೌಫ್ ಅಹ್ಮದ್.
ಫಿಲ್ಮ್ಫೇರ್ ಸಂಪಾದಕರಾಗಿದ್ದ ಆರು ವರ್ಷಗಳ ಕಾಲ ಅಹ್ಮದ್ ಅವರು ಫಿಲ್ಮ್ಫೇರ್ ಪ್ರಶಸ್ತಿ ಪ್ರದಾನ ಸಮಾರಂಭದ ಸ್ವರೂಪವನ್ನೇ ಬದಲಾಯಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಫಿಲ್ಮ್ಫೇರ್ ಪ್ರಶಸ್ತಿ ಪ್ರದಾನ ಸಮಾರಂಭದ ಸ್ಥಳ, ಶೈಲಿ ಹಾಗು ಪ್ರಶಸ್ತಿ ಪ್ರದಾನದ ಸ್ವರೂಪವನ್ನು ಆಸ್ಕರ್ ಪ್ರಶಸ್ತಿ ಸಮಾರಂಭದ ಮಾದರಿಯಲ್ಲಿ ರೂಪುಗೊಂಡಿದ್ದು ಅದೇ ಕಾಲದಲ್ಲಿ. ಬಾಲಿವುಡ್ ನ ಅತಿರಥ ಮಹಾರಥರ ಜೊತೆ ಆತ್ಮೀಯರಾಗಿದ್ದ ಅವರು ಕೆಲಸಮಯ ಅಮಿತಾಭ್ ಬಚ್ಚನ್ ಜೊತೆಗೂ ಕೆಲಸ ಮಾಡಿದ್ದರು.
ಸಿನಿಮಾ ಪತ್ರಿಕೋದ್ಯಮದ ಜೊತೆ ಏಷ್ಯನ್ ಏಜ್ ಪತ್ರಿಕೆಯಲ್ಲಿ ಇತರ ವಿಭಾಗಗಳಲ್ಲೂ ಸೇವೆ ಸಲ್ಲಿಸಿದ್ದರೂ ಸಿನೆಮಾ ಪತ್ರಿಕೋದ್ಯಮ ಅವರಿಗೆ ಅಚ್ಚುಮೆಚ್ಚಿನದ್ದಾಗಿತ್ತು. 2016 ರಲ್ಲಿ ಅವರು ಬಾಲಿವುಡ್ನ ಯಾಹೂ ತಾರೆ ಶಮ್ಮಿ ಕಪೂರ್ ಅವರ ಕುರಿತು "ಶಮ್ಮಿ ಕಪೂರ್-ದಿ ಗೇಮ್ ಚೇಂಜರ್" ಎಂಬ ಕೃತಿಯನ್ನು ರಚಿಸಿ ಹಿಂದಿ ಚಿತ್ರದ ಹೀರೋ ಚಿತ್ರಣವನ್ನೇ ಶಮ್ಮಿ ಕಪೂರ್ ಹೇಗೆ ಬದಲಾಯಿಸಿದ್ದರೆಂಬುದನ್ನು ಅದ್ಭುತವಾಗಿ ವಿವರಿಸಿದ್ದರು.
ಸಿನಿಮಾ ಪತ್ರಿಕೋದ್ಯಮದ ಪಾಲಿಗೆ ಭಾರತದಲ್ಲಿ ಸ್ವತಃ ರೌಫ್ ಅಹ್ಮದ್ ಅವರೇ ಒಂದು ರೀತಿಯಲ್ಲಿ ʻಗೇಮ್-ಚೇಂಜರ್ʼ ಆಗಿದ್ದರು.
