ಫೆ.13: ಅಲ್ಲಿಪಾದೆ ನವೀಕೃತ ಸಂತ ಅಂತೋನಿ ಚರ್ಚ್ ಉದ್ಘಾಟನೆ

ಬಂಟ್ವಾಳ, ಫೆ.8: ಅಲ್ಲಿಪಾದೆಯಲ್ಲಿ ಸುಮಾರು 5 ಕೋಟಿ ರೂ. ವೆಚ್ಚದಲ್ಲಿ ನವೀಕೃತಗೊಂಡ ಚರ್ಚ್ ಕಟ್ಟಡ ಹಾಗೂ ನೂತನ ಗುರು ನಿವಾಸದ ಉದ್ಘಾಟನೆ ಹಾಗೂ ಆಶೀರ್ವಚನ ಸಂಭ್ರಮ ಕಾರ್ಯಕ್ರಮ ಫೆ.13ರಂದು ನಡೆಯಲಿದೆ ಎಂದು ಬಿ.ಸಿ.ರೋಡಿನಲ್ಲಿ ಕರೆದ ಸುದ್ದಿಗೋಷ್ಠಿಯಲ್ಲಿ ಫಾದರ್ ಫೆಡ್ರಿಕ್ ಮೊಂತೆರೋ ತಿಳಿಸಿದ್ದಾರೆ.

ಮಂಗಳೂರು ಕ್ರೈಸ್ತ ಧರ್ಮ ಪ್ರಾಂತದ ಧರ್ಮಾಧ್ಯಕ್ಷ ಅ.ವಂ. ಡಾ.ಪೀಟರ್ ಪಾವ್ಲ್ ಸಲ್ದಾನ ನವೀಕೃತ ಕಟ್ಟಡವನ್ನು ಉದ್ಘಾಟಿಸಲಿದ್ದು, ಕ್ಯಾಲಿಕೆಟ್ ಧರ್ಮಪ್ರಾಂತದ ವಿಕಾರ್ ಜನರಲ್ ಡಾ.ಜೆನ್ಸನ್ ಪುತನ್ ವೀಟಿಲ್ ಆಶೀರ್ವಚನಗೈಯುವರು. ಧರ್ಮಗುರುಗಳಾದ ವಲೇರಿಯನ್ ಡಿಸೋಜ, ಅನ್ನಿಸ್ ಕಲ್ಲರಕ್ಕಲ್, ಶಾಸಕ ರಾಜೇಶ್ ನಾಯ್ಕ್, ಮಾಜಿ ಸಚಿವ ಬಿ‌.ರಮಾನಾಥ ರೈ ಸಹಿತ ಅನೇಕ ಗಣ್ಯರು ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ಅವರು ತಿಳಿಸಿದರು.

ಧರ್ಮಕ್ಷೇತ್ರದಲ್ಲಿ 200 ಕ್ರೈಸ್ತ ಕುಟುಂಬಗಳಿದ್ದು, ಭಕ್ತ ಜನರ ಏರಿಕೆಯಾದಂತೆ ದೇವಾಲಯದಲ್ಲಿ ಸ್ಥಳಾವಕಾಶದ ಕೊರತೆ  ಹಾಗೂ ಧರ್ಮಗುರುಗಳ ವಾಸದ ಮನೆಯ ಕಟ್ಟಡ ಶಿಥಿಲಗೊಂಡಿದ್ದ ಹಿನ್ನೆಲೆಯಲ್ಲಿ ಸರಕಾರ ಹಾಗೂ ಸಹೃದಯರ ಸಹಕಾರದಿಂದ ಸುಸಜ್ಜಿತ ನವೀಕೃತ ಕಟ್ಟಡದ ನಿರ್ಮಾಣ ಮಾಡಲಾಗಿದೆ ಎಂದವರು ವಿವರಿಸಿದರು.

ಕಟ್ಟಡದ ಉದ್ಘಾಟನೆ ಪ್ರಯುಕ್ತ ಫೆ.12ರಂದು ಸಂಜೆ ಮೊಡಂಕಾಪು ಚರ್ಚ್ ವಠಾರದಿಂದ ಹೊರೆಕಾಣಿಕೆ ಮೆರವಣಿಗೆ ನಡೆಯಲಿದೆ, ಫೆ.14ರಂದು ಧಾರ್ಮಿಕರ ದಿನ, ಸರ್ವಧರ್ಮ ಸಹಮಿಲನ, ಬಳಿಕ ಲ.ದೇವದಾಸ್ ಕಾಪಿಕಾಡ್ ಅವರ "ನಮಸ್ಕಾರ ಮಾಷ್ಟ್ರೆ" ತುಳು ಹಾಸ್ಯಮಯ ನಾಟಕ ಪ್ರದರ್ಶನಗೊಳ್ಳಲಿದೆ.

ಫೆ.15ರಂದು ಸಂತ ಅಂತೋನಿಯವರ ವಾರ್ಷಿಕ ಹಬ್ಬ, ಫೆ.16ರಂದು ದಾನಿಗಳ ಹಾಗೂ  ಕಾರ್ಮಿಕರ ದಿನ, ಫೆ.17ರಂದು ಮಕ್ಕಳು ಹಾಗೂ ಯುವ ಜನರ ದಿನ, ಫೆ.18 ರಂದು ಕ್ರೈಸ್ತ ಕುಟುಂಬಗಳ ದಿನ, ಫೆ.19ರಂದು ಸಾಮೂಹಿಕ ಪ್ರಥಮ ಪರಮ ಪ್ರಸಾದ ದಿನ ಹಾಗೂ  ಕೊಂಕಣಿ ಸಂಗೀತ ರಸಮಂಜರಿ ಕಾರ್ಯಕ್ರಮ ನಡೆಯಲಿದೆ ಎಂದು ಅವರು ತಿಳಿಸಿದರು.

ನವೀಕೃತ ಇಗರ್ಜಿಯಲ್ಲಿರುವ ವೈಶಿಷ್ಟ್ಯತೆಗಳು:

1. ನೆಲಮಟ್ಟದಿಂದ ಮೇಲಿನ ಶಿಲುಬೆಯವರೆಗೆ 85 ಅಡಿ ಎತ್ತರವಿರುವ ಇಗರ್ಜಿ ಕಟ್ಟಡ.

2. 10 ಅಡಿ ಎತ್ತರವಿರುವ ಸಂತ ಅಂತೋನಿಯವರ ಅನನ್ಯ (Unique) ಪ್ರತಿಮೆ.

3. ಭಾರತದಲ್ಲೇ ಸೇವೆ ಸಲ್ಲಿಸಿದ ಹಾಗೂ ಭೇಟಿ ನೀಡಿದ ಸಂತರ ಪ್ರತಿಮೆಗಳು.

4. ವರ್ಣರಂಜಿತ ಗಾಜಿ (Stained glass)ನಲ್ಲಿ ಮೇರಿಮಾತೆಯ ಜಪಸರದ 20 ರಹಸ್ಯಗಳು.

5. ಇಗರ್ಜಿಯ ಒಳಗಡೆ 2 ಪಾರ್ಶ್ವದ ಗ್ಯಾಲರಿಗಳಲ್ಲಿ ಪ್ರಾಚೀನ ಶೈಲಿಯ ಮರದ ಕೆತ್ತನೆ(ಕಡಚಲ್)ಗಳ ಮಧ್ಯದಲ್ಲಿ ಸಂತ ಅಂತೋನಿಯವರ 13 ಪವಾಡಗಳ ದೃಶ್ಯಗಳು. -

6. ಗ್ಯಾಲರಿಗಳ ಎರಡೂ ಪಾರ್ಶ್ವಗಳಲ್ಲಿ ವೃತ್ತಾಕಾರದಲ್ಲಿ ವಿಶಿಷ್ಟ ರೀತಿಯಲ್ಲಿ ಚಿತ್ರಿಸಿದ ಕ್ರಿಸ್ತನ ಶಿಲುಬೆ ಹಾದಿಯ 14 ದೃಶ್ಯಗಳು.

7. ವಿವಿಧ ಸಂಸ್ಕಾರಗಳನ್ನು ಬಿಂಬಿಸುವಂತೆ ಕೆತ್ತಲ್ಪಟ್ಟ ಇಗರ್ಜಿಯ ಮುಂಭಾಗದ ಪ್ರವೇಶ ಬಾಗಿಲು.

8. ವಿಶಿಷ್ಟ ರೀತಿಯಲ್ಲಿ ವಿನ್ಯಾಸಗೊಳಿಸಿದ ಸುಂದರ ದೇವರ ಪೀಠ (ಬಲಿಪೂಜೆ ಪೀಠ),

9. ಇಗರ್ಜಿಯ ಒಳಗಡೆ ಒಂದೇ ಬೃಹತ್‌ ಫ್ಯಾನ್.

10.ಇಗರ್ಜಿಯ ರಸ್ತೆಯ ಇಕ್ಕೆಲಗಳಲ್ಲಿ ಸುಂದರ ಅಲಂಕರಿತ ಗಿಡಗಳು ಮತ್ತು ಸೌರದೀಪಗಳು.

11. ಇಗರ್ಜಿಯ ವಠಾರದಲ್ಲಿ ಹೈಮಾಸ್ಟ್ ದೀಪ ಹಾಗೂ ಸುತ್ತಲೂ ಆವರಣಕ್ಕೆ ಸೌರದೀಪಗಳು.

ಸುದ್ದಿಗೋಷ್ಠಿಯಲ್ಲಿ ಲಾರೆನ್ಸ್ ಡಿಸೋಜ, ಲಿಯೋ ಫರ್ನಾಂಡೀಸ್, ನವೀನ್ ಮೊರಾಸ್, ,ಕಿರಣ್ ನೊರೊನ್ಹಾ, ಪ್ರವೀಣ್ ಪಿಂಟೋ, ಬೆನೆಡಿಕ್ಟ್ ವಾಲ್ಡರ್, ಮೆಲರೊಯಿ ಡಿಸೋಜ, ಮಡ್ತಿನಿ ಸ್ವಿಕೇರ,ಡೆನ್ಜಿಲ್ ನೊರೊನ್ಹ ಉಪಸ್ಥಿತರಿದ್ದರು.