ಅದಾನಿ ಗುಂಪಿನ ಶೇರುಗಳ ಬಗ್ಗೆ ತನಿಖೆ: ಎಮ್ಎಸ್ಸಿಐ ಘೋಷಣೆ
ಮುಂಬೈ, ಫೆ. 9: ಅದಾನಿ(Adani) ಗುಂಪಿನ ಕೆಲವು ಕಂಪೆನಿಗಳಲ್ಲಿ ಅಂತರ್ರಾಷ್ಟ್ರೀಯ ಹೂಡಿಕೆದಾರರಿಗೆ ಲಭ್ಯವಿರುವ ಶೇರುಗಳ (ಫ್ರೀ ಫ್ಲೋಟ್ ಡೆಸಿಗ್ನೇಶನ್) ಬಗ್ಗೆ ಪರಿಶೀಲನೆ ನಡೆಸುತ್ತಿರುವುದಾಗಿ ಹಣಕಾಸು ಸೂಚ್ಯಂಕ ಪೂರೈಕೆದಾರ ಎಮ್ಎಸ್ಸಿಐ(MSCI) ಗುರುವಾರ ತಿಳಿಸಿದೆ. ಇದು ಅದಾನಿ ಗುಂಪಿನ ಇನ್ನೊಂದು ಸುತ್ತಿನ ಕಳವಳಕ್ಕೆ ಕಾರಣವಾಗಿದೆ.
ಅದಾನಿ ಗುಂಪಿನ ಕಂಪೆನಿಗಳು ಶೇರು ಮಾರುಕಟ್ಟೆಯಲ್ಲಿ ಹಸ್ತಕ್ಷೇಪ ನಡೆಸಿ ಕೃತಕವಾಗಿ ಬೆಲೆ ಹೆಚ್ಚಿಸಿಕೊಂಡಿವೆ ಮತ್ತು ತಪ್ಪು ಲೆಕ್ಕಪತ್ರಗಳನ್ನು ಕೊಡುತ್ತಿವೆ ಎಂಬುದಾಗಿ ಕಳೆದ ತಿಂಗಳು ಹಿಂಡನ್ಬರ್ಗ್ ರಿಸರ್ಚ್ ತನ್ನ ವರದಿಯಲ್ಲಿ ಹೇಳಿದ ಬಳಿಕ ಗುಂಪಿನ ಶೇರುಗಳು 110 ಬಿಲಿಯ ಡಾಲರ್ (ಸುಮಾರು 9 ಲಕ್ಷ ಕೋಟಿ ರೂಪಾಯಿ) ಮಾರುಕಟ್ಟೆ ಮೌಲ್ಯವನ್ನು ಕಳೆದುಕೊಂಡಿವೆ.
ಅಂತರ್ರಾಷ್ಟ್ರೀಯ ಹೂಡಿಕೆದಾರರ ಖರೀದಿಗೆ ಲಭ್ಯವಿರುವ ಶೇರುಗಳ ಸಂಖ್ಯೆಯಲ್ಲಿ ಬದಲಾವಣೆಯಾದರೆ ಎಮ್ಎಸ್ಸಿಐ ಸೂಚ್ಯಂಕಗಳ ಸಂಖ್ಯೆಗಳಲ್ಲೂ ಬದಲಾವಣೆಯಾಗುತ್ತದೆ. ಹೆಚ್ಚಿನ ಜಾಗತಿಕ ಹೂಡಿಕೆಗಳು ಇಂಥ ಸೂಚ್ಯಂಕಗಳೊಂದಿಗೆ ಬೆಸೆದುಕೊಂಡಿರುವುದರಿಂದ ಅದರ ಆಧಾರದಲ್ಲಿ ಹೂಡಿಕೆದಾರರು ತಮ್ಮ ನಿರ್ಧಾರಗಳನ್ನು ಬದಲಿಸುತ್ತಾರೆ.
‘‘ಕೆಲವು ಹೂಡಿಕೆದಾರರು ಎಮ್ಎಸ್ಸಿಐ ಸೂಚ್ಯಂಕವನ್ನು ನಿರ್ದಿಷ್ಟ ಶೇರಿನ ಅವಲೋಕನಕ್ಕೆ ಬಳಸುತ್ತಾರೆ. ಎಮ್ಎಸ್ಸಿಐ ತನಿಖೆಯ ಫಲಿತಾಂಶವನ್ನು ಹೊಂದಿಕೊಂಡು ಅದಾನಿ ಗುಂಪಿನ ಆಯ್ದ ಕಂಪೆನಿಯ ಶೇರುಗಳು ಇನ್ನಷ್ಟು ಒತ್ತಡಕ್ಕೆ ಒಳಗಾಗಬಹುದು’’ ಎಂದು ಕ್ವಾಂಟಮ್ ಸೆಕ್ಯುರಿಟೀಸ್ನ ನಿರ್ದೇಶಕ ನೀರಜ್ ದೀವಾನ್ ಹೇಳಿದರು.
ಮತ್ತೆ ಕುಸಿದ ಅದಾನಿ ಶೇರುಗಳು
ಅದಾನಿ ಗುಂಪಿನ ಕೆಲವು ಕಂಪೆನಿಗಳ ಶೇರುಗಳು ಈ ವಾರ ಚೇತರಿಸಿಕೊಂಡಿದ್ದವು. ಆದರೆ ಗುರುವಾರ ಎಮ್ಎಸ್ಸಿಐ ಘೋಷಣೆಯ ಬಳಿಕ ಮತ್ತೆ ಕುಸಿದವು. ಅದಾನಿ ಎಂಟರ್ಪ್ರೈಸಸ್ ಶೇರುಗಳು 11 ಶೇಕಡದಷ್ಟು ಕುಸಿಯಿತು. ಆರಂಭಿಕ ವ್ಯವಹಾರದಲ್ಲಿ ಅದು 20 ಶೇಕಡದಷ್ಟು ಇಳಿದಿತ್ತು.
ಅದಾನಿ ಟ್ರಾನ್ಸ್ಮಿಶನ್, ಅದಾನಿ ಟೋಟಲ್ ಗ್ಯಾಸ್ ಮತ್ತು ಅದಾನಿ ಪವರ್ ಶೇರುಗಳು ತಲಾ 5 ಶೇ. ಇಳಿಯಿತು. ಅದೇ ವೇಳೆ, ಅದಾನಿ ಪೋರ್ಟ್ಸ್ ಆ್ಯಂಡ್ ಸ್ಪೆಶಲ್ ಎಕನಾಮಿಕ್ ರೆನ್ ಶೇರುಗಳು 3% ಮೌಲ್ಯವನ್ನು ಕಳೆದುಕೊಂಡವು.
ನಮ್ಮ ವರದಿಯ ದೃಢೀಕರಣ: ಹಿಂಡನ್ಬರ್ಗ್ ಸ್ಥಾಪಕ
ಎಮ್ಎಸ್ಸಿಐ ನಿರ್ಧಾರಕ್ಕೆ ಪ್ರತಿಕ್ರಿಯೆ ನೀಡಿರುವ ಹಿಂಡನ್ಬರ್ಗ್ ರಿಸರ್ಚ್ ಸ್ಥಾಪಕ ನತಾನ್ ಆ್ಯಂಡರ್ಸನ್, ‘‘ಇದು ನಮ್ಮ ವರದಿಯನ್ನು ದೃಢೀಕರಿಸುತ್ತದೆ ಎಂಬುದಾಗಿ ನಾವು ಭಾವಿಸುತ್ತೇವೆ’’ ಎಂದು ಹೇಳಿದ್ದಾರೆ.
