ಅಂತಿಮ ಅನುಮೋದನೆಗೂ ಮುನ್ನ ಅರಣ್ಯೇತರ ಪ್ರದೇಶದಲ್ಲಿ ಗಣಿಗಾರಿಕೆಗೆ ಅನುಮತಿ ನೀಡಿದ ಪರಿಸರ ಸಚಿವಾಲಯ

ಹೊಸ ದಿಲ್ಲಿ: ಅಂತಿಮ ಅನುಮೋದನೆ ದೊರೆಯುವ ಮುನ್ನವೇ ಅರಣ್ಯ ಪ್ರದೇಶಕ್ಕೆ ಹೊಂದಿಕೊಂಡಂತಿರುವ ಅರಣ್ಯೇತರ ಪ್ರದೇಶಗಳಲ್ಲಿ ಗಣಿಗಾರಿಕೆಗೆ ಅನುಮತಿ ನೀಡಲು ರಾಜ್ಯ ಸರ್ಕಾರಗಳಿಗೆ ಕೇಂದ್ರ ಪರಿಸರ ಸಚಿವಾಲಯದ ಅರಣ್ಯ ಸಲಹಾ ಸಮಿತಿ ಅವಕಾಶ ನೀಡಿದೆ ಎಂದು ವರದಿಯಾಗಿದೆ.

ಈ ನಿರ್ಣಯಕ್ಕೆ ಅನೇಕ ಕಾನೂನು ತಜ್ಞರು ಹಾಗೂ ಪರಿಸರವಾದಿಗಳು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ ಎಂದು Hindustan Times ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಈ ಕುರಿತು ಫೆಬ್ರವರಿ 3ರಂದು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಪತ್ರ ಬರೆದಿರುವ ಕೇಂದ್ರ ಪರಿಸರ ಸಚಿವಾಲಯವು, "ಅರಣ್ಯ ಪ್ರದೇಶ ಮತ್ತು ಅರಣ್ಯೇತರ ಪ್ರದೇಶಗಳಲ್ಲಿನ ಉದ್ದೇಶಪೂರ್ವಕ ಉಲ್ಲಂಘನೆಗಳನ್ನು ವಿಸ್ತೃತವಾಗಿ ಅಧ್ಯಯನ ಮಾಡಿರುವ ಅರಣ್ಯ ಸಲಹಾ ಸಮಿತಿಯು, ಅರಣ್ಯೇತರ ಪ್ರದೇಶದಲ್ಲಿ ಪ್ರತ್ಯೇಕ ಗಣಿಗಾರಿಕೆ ಯೋಜನೆಯನ್ನು ಖಾತ್ರಿಗೊಳಿಸದಿದ್ದರೆ, ಅಂತಹ ಅರಣ್ಯೇತರ ಪ್ರದೇಶ(ಭಾಗ)ವು ಈಗಾಗಲೇ ಅನುಮೋದನೆ ಪಡೆದಿರುವ ಪರಿಸ್ಥಿತಿಯನ್ನು ಸೃಷ್ಟಿಸಲಿದ್ದು, ಸುಪ್ರೀಂಕೋರ್ಟ್ ಆದೇಶವು ಒಳಗೊಂಡಿರುವ ನಿರ್ದೇಶನಗಳಿಗೆ ಅನುಗುಣವಾಗುವುದಿಲ್ಲ" ಎಂದು ಹೇಳಿದೆ.

"ಮೊದಲ ಹಂತದ ಅನುಮೋದನೆ ಪಡೆದ ನಂತರ ಪರಿಹಾರ ದಂಡ ಭರಿಸಿ ಮತ್ತು ಪರಿಸರ ಇಲಾಖೆಯ ಅನುಮೋದನೆ ಪಡೆದ ನಂತರ ರಾಜ್ಯ/ಕೇಂದ್ರಾಡಳಿತ ಪ್ರದೇಶ ಅಥವಾ ಸಂಬಂಧಿಸಿದ ಪ್ರಾಧಿಕಾರವು ಪ್ರತ್ಯೇಕ ಗಣಿಗಾರಿಕೆ ಯೋಜನೆಯನ್ನು ಸಿದ್ಧಪಡಿಸಬೇಕು ಅಥವಾ ಅರಣ್ಯೇತರ ಪ್ರದೇಶಗಳಲ್ಲಿ ಗಣಿಗಾರಿಕೆಗೆ ಅವಕಾಶ ನೀಡುವ ಮೊದಲು ಅಂತಹ ಅರಣ್ಯೇತರ ಪ್ರದೇಶದ ಗಣಿಗಾರಿಕೆ ಗುತ್ತಿಗೆಯನ್ನು ಅರಣ್ಯೇತರ ಪ್ರದೇಶದ ಪೂರ್ಣ ಅಥವಾ ಭಾಗಶಃ ಭಾಗಕ್ಕೆ ನೀಡಬೇಕು" ಎಂದು ಪತ್ರದಲ್ಲಿ ತಿಳಿಸಲಾಗಿದೆ ಎಂದು Hindustan Times ವರದಿ ಮಾಡಿದೆ.

ಇದಕ್ಕೂ ಮುನ್ನ 2021ರಲ್ಲಿ ಅರಣ್ಯ ಸಲಹಾ ಸಮಿತಿಯು ಕೆಲವು ನಿರ್ದಿಷ್ಟ ಷರತ್ತುಗಳನ್ನು ವಿಧಿಸಿ ಅರಣ್ಯೇತರ ಪ್ರದೇಶಗಳಲ್ಲಿ ಗಣಿಗಾರಿಕೆಗೆ ಅನುಮತಿ ನೀಡಿತ್ತು.

ಈ ನಡೆಯನ್ನು ಟೀಕಿಸಿರುವ ಪರಿಸರವಾದಿ ಹಾಗೂ ನೀತಿ ನಿರೂಪಣೆ ಸಂಶೋಧನಾ ಕೇಂದ್ರದಲ್ಲಿ ಕಾನೂನು ಸಂಶೋಧಕರಾಗಿರುವ ಕಾಂಚಿ ಕೊಹ್ಲಿ, "ಮೌಲ್ಯಮಾಪನ ಆಧಾರಿತ ಅನುಮೋದನೆ ನೀಡಬೇಕು ಎಂಬ ಶಾಸನಬದ್ಧ ನಿಯಂತ್ರಣವನ್ನು ಈ ನಿರ್ಣಯ ಕಡೆಗಣಿಸಿರುವ ಈ ನಿರ್ಣಯದ ಉದ್ದೇಶವನ್ನು ಅರ್ಥ ಮಾಡಿಕೊಳ್ಳಬಹುದು. ಯಾವುದೇ ಗಣಿಗಾರಿಕೆ ಅಥವಾ ಮೂಲಸೌಕರ್ಯ ಯೋಜನೆಗಳ ಬಾಳಿಕೆ ಅರಣ್ಯ ಮತ್ತು ಅರಣ್ಯೇತರ ಪ್ರದೇಶಗಳನ್ನು ಅವಲಂಬಿಸಿರುತ್ತದೆ. ಒಂದು ವೇಳೆ, ಮೌಲ್ಯಮಾಪನ ಫಲಿತಾಂಶಗಳು ವಿಳಂಬವಾದರೆ ಅಥವಾ ಅನುಮೋದನೆ ದೊರೆಯದಿದ್ದರೆ, ಅರಣ್ಯ ಪ್ರದೇಶದ ಅತಿಕ್ರಮಣ ಮತ್ತು ಅಪಾಯದ ಕುರಿತ ಮೌಲ್ಯಮಾಪನಕ್ಕೂ ಮುನ್ನವೇ ಅರಣ್ಯೇತರ ಪ್ರದೇಶದಲ್ಲಿ ಗಣಿಗಾರಿಕೆಗೆ ಅವಕಾಶ ನೀಡಿದರೆ ಯೋಜನೆಗಳ ಅನುಷ್ಠಾನದ ಮೇಲೆ ದುಷ್ಪರಿಣಾಮ ಉಂಟಾಗಲಿದೆ. ಹೀಗಾಗಿ ಪ್ರಬಲ ಪರಿಸರ ತರ್ಕವನ್ನಾಧರಿಸದ ಪ್ರಕ್ರಿಯೆಯು ವ್ಯವಹಾರಕ್ಕೂ ಪೂರಕವಾಗಿರುವುದಿಲ್ಲ" ಎಂದು ಹೇಳಿದ್ದಾರೆ.