ದಿಲ್ಲಿಯ ಬಿಬಿಸಿ ಕಚೇರಿಯಿಂದ ಫೋನ್‌, ಲ್ಯಾಪ್‌ಟಾಪ್‌ ಗಳನ್ನು ವಶಕ್ಕೆ ಪಡೆದ ಆದಾಯ ತೆರಿಗೆ ಇಲಾಖೆ

ಹೊಸದಿಲ್ಲಿ, ಫೆ.14: ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳ ತಂಡಗಳು ಮಂಗಳವಾರ ದಿಲ್ಲಿ ಮತ್ತು ಮುಂಬೈಗಳಲ್ಲಿರುವ ಬಿಬಿಸಿ ಕಚೇರಿಗಳ ಮೇಲೆ ದಾಳಿ ನಡೆಸಿವೆ. ಅಧಿಕಾರಿಗಳು ಕೆಲವು ಉದ್ಯೋಗಿಗಳ ಮೊಬೈಲ್ ಫೋನ್ಗಳನ್ನು ವಶಪಡಿಸಿಕೊಂಡಿದ್ದಾರೆ ಮತ್ತು ಕಚೇರಿಗಳಿಗೆ ಬೀಗಮುದ್ರೆ ಹಾಕಲಾಗಿದೆ ಎಂದು ಬೆಳವಣಿಗೆಗಳನ್ನು ಬಲ್ಲ ವ್ಯಕ್ತಿಯೋರ್ವರು ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.

ತೆರಿಗೆ ವಂಚನೆಯ ತನಿಖೆಯ ಭಾಗವಾಗಿ ಆದಾಯ ತೆರಿಗೆ ಇಲಾಖೆಯು ‘ಸಮೀಕ್ಷಾ ಕಾರ್ಯಾಚರಣೆ’ಯನ್ನು ನಡೆಸಿದೆ ಎಂದು ಅಧಿಕಾರಿಗಳು ತಿಳಿಸಿದರು. ಇಲಾಖೆಯ ಸಮೀಕ್ಷೆಯಲ್ಲಿ ಕಂಪನಿಯ ಕಚೇರಿ ಆವರಣಗಳು ಮಾತ್ರ ಒಳಗೊಂಡಿರುತ್ತವೆ ಮತ್ತು ಅದರ ಪ್ರವರ್ತಕರು ಅಥವಾ ನಿರ್ದೇಶಕರ ಮನೆಗಳು ಮತ್ತು ಇತರ ಸ್ಥಳಗಳಲ್ಲಿ ಶೋಧ ಕಾರ್ಯಾಚರಣೆಯನ್ನು ನಡೆಸಲಾಗುವುದಿಲ್ಲ.

ಬೆಳವಣಿಗೆಯನ್ನು ದೃಢಪಡಿಸಿರುವ ಬಿಬಿಸಿ,ಆದಾಯ ತೆರಿಗೆ ಅಧಿಕಾರಿಗಳಿಗೆ ತಾನು ಸಂಪೂರ್ಣ ಸಹಕಾರವನ್ನು ನೀಡುತ್ತಿರುವುದಾಗಿ ತಿಳಿಸಿದೆ. ‘ಸಾಧ್ಯವಾದಷ್ಟು ಶೀಘ್ರ ಈ ಸ್ಥಿತಿಯು ಬಗೆಹರಿಯುತ್ತದೆ ಎಂದು ನಾವು ಆಶಿಸಿದ್ದೇವೆ ’ಎಂದು ಅದು ಟ್ವೀಟಿಸಿದೆ.

2002ರಲ್ಲಿ ಗುಜರಾತಿನಲ್ಲಿ ಸಂಭವಿಸಿದ್ದ ಕೋಮು ದಂಗೆಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರು ಹೊಂದಿದ್ದರೆನ್ನಲಾದ ಪಾತ್ರದ ಕುರಿತು ಪರಿಶೀಲಿಸಿರುವ ಎರಡು ಭಾಗಗಳ ಸಾಕ್ಷಚಿತ್ರವನ್ನು ಬಿಬಿಸಿ ಕಳೆದ ಜನವರಿಯಲ್ಲಿ ಬಿಡುಗಡೆಗೊಳಿಸಿದ ಬಳಿಕ ಈ ಬೆಳವಣಿಗೆಗಳು ನಡೆದಿವೆ. ಸಾಕ್ಷಚಿತ್ರವು ಭಾರತದಲ್ಲಿ ಬಿಡುಗಡೆಗೊಳ್ಳದಿದ್ದರೂ ಅದರ ನಕಲು ಪ್ರತಿಗಳು ಆನ್ಲೈನ್ನಲ್ಲಿ ವ್ಯಾಪಕವಾಗಿ ಹರಿದಾಡಿದ್ದವು.

ಪ್ರತಿಪಕ್ಷಗಳ ಟೀಕೆ

ಸಾಕ್ಷಚಿತ್ರಕ್ಕೆ ಸಂಬಂಧಿಸಿದಂತೆ ಬಿಬಿಸಿಯನ್ನು ಗುರಿಯಾಗಿಸಿಕೊಂಡಿದ್ದಕ್ಕಾಗಿ ಮಂಗಳವಾರ ಪ್ರತಿಪಕ್ಷಗಳು ಸರಕಾರವನ್ನು ಟೀಕಿಸಿವೆ.

ಕಾಂಗ್ರೆಸ್ ‘ಸಮೀಕ್ಷೆ’ಯನ್ನು ‘ಅಘೋಷಿತ ತುರ್ತು ಸ್ಥಿತಿ’ಎಂದು ಬಣ್ಣಿಸಿದೆ. ‘ಇಲ್ಲಿ ನಾವು ಅದಾನಿ-ಹಿಂಡನ್ಬರ್ಗ್ ವಿವಾದದಲ್ಲಿ ಜಂಟಿ ಸಂಸದೀಯ ಸಮಿತಿಯಿಂದ ತನಿಖೆಯನ್ನು ಕೋರುತ್ತಿದ್ದೇವೆ,ಅಲ್ಲಿ ಸರಕಾರವು ಬಿಬಿಸಿಯನ್ನು ಬೇಟೆಯಾಡುತ್ತಿದೆ’ ಎಂದು ಹೇಳಿದ ಕಾಂಗ್ರೆಸ್ ನಾಯಕ ಜೈರಾಮ ರಮೇಶ ಅವರು,‘ವಿನಾಶ ಕಾಲೇ ವಿಪರೀತ ಬುದ್ಧಿ’ಎಂದು ಕುಟುಕಿದರು.

ಸರಕಾರದ ಕ್ರಮಗಳ ಕಾರಣ ಮತ್ತು ಪರಿಣಾಮಗಳು ‘ಸಾಕಷ್ಟು ಸ್ಪಷ್ಟವಾಗಿವೆ ’ ಎಂದು ಹೇಳಿದ ಪಿಡಿಪಿ ಮುಖ್ಯಸ್ಥೆ ಮೆಹಬೂಬ ಮುಫ್ತಿ ಅವರು,ಪ್ರತಿಪಕ್ಷ ನಾಯಕರಾಗಿರಲಿ, ಮಾಧ್ಯಮಗಳು, ಸಾಮಾಜಿಕ ಕಾರ್ಯಕರ್ತರು ಅಥವಾ ಇತರ ಯಾರೇ ಆಗಿರಲಿ. ಭಾರತ ಸರಕಾರವು ಸತ್ಯ ಹೇಳುವವರನ್ನು ಬೇಟೆಯಾಡುತ್ತಿದೆ. ಸತ್ಯಕ್ಕಾಗಿ ಹೋರಾಡುವವರು ಅದಕ್ಕಾಗಿ ಬೆಲೆ ತೆರಬೇಕಿದೆ ಎಂದರು.

ಬಿಬಿಸಿ ಸಾಕ್ಷಚಿತ್ರ

‘ದಿ ಮೋದಿ ಕ್ವೆಶ್ಚನ್’ ಶೀರ್ಷಿಕೆಯ ಸಾಕ್ಷಚಿತ್ರದ ಮೊದಲ ಭಾಗವು ಜ.17ರಂದು ಬಿಡುಗಡೆಗೊಂಡಿತ್ತು. ಬ್ರಿಟಿಷ್ ಸರಕಾರವು ಕಳುಹಿಸಿದ್ದ ತಂಡವು ದಂಗೆಗಳ ಸಂದರ್ಭದಲ್ಲಿ ಗುಜರಾತಿನ ಮುಖ್ಯಮಂತ್ರಿಯಾಗಿದ್ದ ಮೋದಿಯವರು ಮುಸ್ಲಿಮರ ವಿರುದ್ಧ ವ್ಯಾಪಕ ಹಿಂಸಾಚಾರಕ್ಕೆ ಕಾರಣವಾಗಿದ್ದ ‘ನಿರ್ಭೀತಿಯ ವಾತಾವರಣಕ್ಕೆ ನೇರವಾಗಿ ಹೊಣೆಗಾರರಾಗಿದ್ದರು ’ಎಂದು ಬೆಟ್ಟು ಮಾಡಿತ್ತು.

ಬಿಜೆಪಿ ಸರಕಾರವು ಪ್ರಜಾಪ್ರಭುತ್ವವನ್ನು ನಾಶಗೊಳಿಸುತ್ತಿದೆ. ಬಿಜೆಪಿ ಸರಕಾರದ ಅಥವಾ ಅದರ ನಾಯಕರ ದಬ್ಬಾಳಿಕೆಯ ವಿರುದ್ಧ ಮಾತನಾಡುವ ಪ್ರತಿಯೊಂದೂ ಧ್ವನಿಯನ್ನು ಅಡಗಿಸಲು ಅದು ಬಯಸಿದೆಯೇ? ಸಮಯ ಮತ್ತು ಅಧಿಕಾರ ಬದಲಾಗುತ್ತಿರುತ್ತದೆ,ಆದರೆ ಪ್ರಜಾಪ್ರಭುತ್ವವು ಶಾಶ್ವತವಾಗಿರುತ್ತದೆ ಎನ್ನುವುದನ್ನು ಸರಕಾರವು ನೆನಪಿಟ್ಟುಕೊಳ್ಳಬೇಕು.

-ಸಮಾಜವಾದಿ ಪಾರ್ಟಿ