ಅದಾನಿ ಸಂಸ್ಥೆಯ ಬಗ್ಗೆ ಬಿಜೆಪಿಗೆ ಮರೆಮಾಚಲು, ಭಯಪಡಲು ಏನೂ ಇಲ್ಲ: ಅಮಿತ್ ಶಾ

ಅಗರ್ತಲಾ, ಫೆ.14: ಅದಾನಿ-ಹಿಂಡನ್ಬರ್ಗ್ ವಿವಾದ ಕುರಿತು ಕಾಂಗ್ರೆಸ್ ಬಿಜೆಪಿ ನೇತೃತ್ವದ ಸರಕಾರದ ವಿರುದ್ಧ ದಾಳಿ ನಡೆಸುತ್ತಿರುವ ಹಿನ್ನೆಲೆಯಲ್ಲಿ ಕೇಂದ್ರ ಗೃಹಸಚಿವ ಅಮಿತ್ ಶಾ ಅವರು, ಸರ್ವೋಚ್ಚ ನ್ಯಾಯಾಲಯವು ವಿಷಯವನ್ನು ತನ್ನ ಗಮನಕ್ಕೆ ತೆಗೆದುಕೊಂಡಿದೆ, ಹೀಗಿರುವಾಗ ಓರ್ವ ಸಚಿವನಾಗಿ ತಾನು ಈ ವಿಷಯದಲ್ಲಿ ಹೇಳಿಕೆ ನೀಡುವುದು ಸೂಕ್ತವಾಗುವುದಿಲ್ಲ. ಆದರೆ ಈ ವಿಷಯದಲ್ಲಿ ಬಿಜೆಪಿಗೆ ಮುಚ್ಚಿಡಲು ಅಥವಾ ಭಯ ಪಡಲು ಏನೂ ಇಲ್ಲ ಎಂದು ಹೇಳಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್, ಮುಚ್ಚಿಡಲು ಏನೂ ಇಲ್ಲದಿದ್ದರೆ ಜೆಪಿಸಿ ತನಿಖೆಗೆ ಸರಕಾರವು ಹಿಂಜರಿಯುತ್ತಿರುವುದೇಕೆ ಎಂದು ಪ್ರಶ್ನಿಸಿದೆ.

ಸುದ್ದಿಸಂಸ್ಥೆಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ,ಇತ್ತೀಚಿಗೆ ಲೋಕಸಭೆಯಲ್ಲಿ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿಯವರ ಭಾಷಣದ ಕುರಿತು ಪ್ರಶ್ನೆಗೆ ಶಾ, ತಾನು ಏನನ್ನು ಮಾತನಾಡಬೇಕು ಎನ್ನುವುದನ್ನು ನಿರ್ಧರಿಸುವುದು ಅವರಿಗೆ ಅಥವಾ ಅವರ ಭಾಷಣವನ್ನು ಸಿದ್ಧಪಡಿಸುವವರಿಗೆ ಬಿಟ್ಟ ವಿಷಯವಾಗಿದೆ ಎಂದು ಉತ್ತರಿಸಿದರು. ರಾಹುಲ್ ಭಾಷಣ ಹೆಚ್ಚುಕಡಿಮೆ ಸಂಪೂರ್ಣವಾಗಿ ಅದಾನಿ ಗ್ರೂಪ್ಗೆ ಸಂಬಂಧಿಸಿತ್ತು.

ಬಿಜೆಪಿ ಬಂಡವಾಳಶಾಹಿಗಳ ಪರವಾಗಿದೆ ಎಂಬ ರಾಹುಲ್ ಆರೋಪಕ್ಕೆ ಪ್ರತಿಕ್ರಿಯಿಸಿದ ಶಾ,ಪ್ರಶ್ನೆಯೇ ಇಲ್ಲ. ಬಿಜೆಪಿ ವಿರುದ್ಧ ಇಂತಹ ಆರೋಪವನ್ನು ಹೊರಿಸಲು ಈವರೆಗೆ ಯಾರಿಗೂ ಸಾಧ್ಯವಾಗಿಲ್ಲ. ಕಾಂಗ್ರೆಸ್ ಆಡಳಿತದ ಕಾಲದಲ್ಲಿ,ಅದು ಸಿಎಜಿ ಅಥವಾ ಸಿಬಿಐ ಆಗಿರಲಿ,ತನಿಖಾ ಸಂಸ್ಥೆಗಳು ಭ್ರಷ್ಟಾಚಾರವನ್ನು ಗಮನಕ್ಕೆ ತೆಗೆದುಕೊಂಡು ಪ್ರಕರಣಗಳನ್ನು ದಾಖಲಿಸಿದ್ದವು. ಆಗ 12 ಲ.ಕೋ.ರೂ.ಗಳ ಹಗರಣಗಳು ನಡೆದಿದ್ದವು ಎಂದರು.

ಬಿಜೆಪಿಯು ‘ಸಂಸ್ಥೆಗಳನ್ನು ವಶಪಡಿಸಿಕೊಳ್ಳುತ್ತಿದೆ ’ಎಂಬ ಕಾಂಗ್ರೆಸ್ ಮತ್ತು ಇತರ ಪ್ರತಿಪಕ್ಷಗಳ ಆರೋಪಗಳ ಕುರಿತು ಪ್ರಶ್ನೆಗೆ ಶಾ,ನ್ಯಾಯಾಲಯಗಳು ಬಿಜೆಪಿಯ ಪ್ರಭಾವದಡಿ ಇಲ್ಲ ಎನ್ನುವುದನ್ನು ಅವರು ಗಮನಿಸಬೇಕು ಮತ್ತು ನ್ಯಾಯಾಲಯಗಳಿಗೆ ಹೋಗಬೇಕು ಎಂದು ಉತ್ತರಿಸಿದರು. ‘ಕೋರ್ಟ್ ಹಮಾರೆ ಕಬ್ಜೆ ಮೆ ನಹೀ ಹೈ ’ಎಂದರು.

ಹಿಂಡನ್ಬಗ್ ವರದಿ ಮತ್ತು ಬಿಬಿಸಿ ಸಾಕ್ಷಚಿತ್ರದ ಹಿನ್ನೆಲೆಯಲ್ಲಿ ಪಿತೂರಿ ನಡೆದಿದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಶಾ,ಸಾವಿರಾರು ಪಿತೂರಿಗಳು ಸತ್ಯಕ್ಕೆ ಹಾನಿಯನ್ನುಂಟು ಮಾಡಲು ಸಾಧ್ಯವಿಲ್ಲ. ಸತ್ಯವು ಸೂರ್ಯನಂತೆ ಉಜ್ವಲವಾಗಿ ಪ್ರಕಾಶಿಸುತ್ತದೆ. ಅವರು 2002ರಿಂದಲೂ ಪ್ರಧಾನಿ ನರೇಂದ್ರ ಮೋದಿಯವರ ವಿರುದ್ಧ ಇದನ್ನೇ ಮಾಡಿಕೊಂಡು ಬಂದಿದ್ದಾರೆ ಮತ್ತು ಮೋದಿ ಪ್ರತಿ ಬಾರಿಯೂ ಹೆಚ್ಚಿನ ಜನಪ್ರಿಯತೆಯನ್ನು ಗಳಿಸುವ ಮೂಲಕ ಪ್ರಬಲವಾಗಿ ಹೊರಹೊಮ್ಮಿದ್ದಾರೆ ಎಂದು ಹೇಳಿದರು.

ಜೆಪಿಸಿ ತನಿಖೆಗೆ ಏಕೆ ಹಿಂಜರಿಕೆ?: ಕಾಂಗ್ರೆಸ್

ಅದಾನಿ-ಹಿಂಡನ್ಬರ್ಗ್ ವಿಷಯದಲ್ಲಿ ಜೆಪಿಸಿ ತನಿಖೆ ನಡೆಸಲು ಕೇಂದ್ರವು ಹಿಂಜರಿಯುತ್ತಿದೆ ಎಂದು ಮಂಗಳವಾರ ಆರೋಪಿಸಿರುವ ಕಾಂಗ್ರೆಸ್,ಈ ವಿಷಯದಲ್ಲಿ ಸರಕಾರಕ್ಕೆ ಮುಚ್ಚಿಡಲು ಏನೂ ಇಲ್ಲದಿದ್ದರೆ ಜೆಪಿಸಿ ತನಿಖೆಗೆ ಅವಕಾಶ ನೀಡಬೇಕು ಎಂದು ಹೇಳಿದೆ.

ಇಲ್ಲಿಯ ಕಾಂಗ್ರೆಸ್ ಕೇಂದ್ರಕಚೇರಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಪಕ್ಷದ ಪ್ರಧಾನ ಕಾರ್ಯದರ್ಶಿ ಜೈರಾಮ ರಮೇಶ ಅವರು,ಅದಾನಿ ವಿಷಯದಲ್ಲಿ ನಿಷ್ಪಕ್ಷ ತನಿಖೆಯನ್ನು ಕೋರಿ ತಾನು ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಮತ್ತು ಸೆಬಿ ಮುಖ್ಯಸ್ಥೆ ಮಾಧವಿ ಪುರಿ ಬುಚ್ ಅವರಿಗೆ ಪತ್ರಗಳನ್ನು ಬರೆದಿರುವುದಾಗಿ ತಿಳಿಸಿದರು.

ಅಮಿತ್ ಶಾ ಹೇಳಿಕೆಗೆ ಪ್ರತಿಕ್ರಿಯಿಸಿದ ರಮೇಶ,ಅವರಿಗೆ ಮುಚ್ಚಿಡಲು ಏನೂ ಇಲ್ಲದಿದ್ದರೆ ಜೆಪಿಸಿ ತನಿಖೆಗೇಕೆ ಹಿಂಜರಿಯುತ್ತಿದ್ದಾರೆ ಎಂದು ಪ್ರಶ್ನಿಸಿದರು.
‘ಸಂಸತ್ತಿನಲ್ಲಿ ಜೆಪಿಸಿ ತನಿಖೆಗಾಗಿ ಬೇಡಿಕೆಯನ್ನೆತ್ತಲೂ ಅವರು ನಮಗೆ ಅವಕಾಶ ನೀಡುತ್ತಿಲ್ಲ. ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಸೇರಿದಂತೆ ನಮ್ಮ ನಾಯಕರು ಈ ಬೇಡಿಕೆಯನ್ನೆತ್ತಿದಾಗ ಅವರ ಹೇಳಿಕೆಗಳನ್ನು ಅಳಿಸಲಾಗಿದೆ ’ಎಂದ ರಮೇಶ,ಮುಚ್ಚಿಡಲು ಏನೂ ಇಲ್ಲದಿದ್ದರೆ ಸರಕಾರವು ಜೆಪಿಸಿ ತನಿಖೆಗೆ ಅವಕಾಶ ನೀಡಬೇಕು ಎಂದು ಒತ್ತಾಯಿಸಿದರು.

ನ್ಯಾಯಾಲಯದಲ್ಲಿ ಸಲ್ಲಿಕೆಯಾಗಿರುವ ಅರ್ಜಿಯು ಪ್ರಾಥಮಿಕವಾಗಿ ಹಿಂಡನ್ಬರ್ಗ್ ವರದಿಯ ವಿರುದ್ಧವಾಗಿದೆ ಎನ್ನುವುದನ್ನು ಗಮನಿಸುವುದು ಮುಖ್ಯವಾಗಿದೆ ಎಂದ ಅವರು, ಅದಾನಿ ಗ್ರೂಪ್ ಮತ್ತು ಸರಕಾರದೊಂದಿಗೆ ಅದರ ಸಂಬಂಧಗಳ ವಿರುದ್ಧವೂ ತನಿಖೆ ನಡೆಯಬೇಕು ಎಂದು ಹೇಳಿದರು. ಆದರೂ,ಕಾಂಗ್ರೆಸ್ ಖಾಸಗಿ ಹೂಡಿಕೆಗಳ ಪರವಾಗಿದೆ ಮತ್ತು ಅದನ್ನು ಉತ್ತೇಜಿಸುವ ಅಗತ್ಯವಿದೆ ಎಂದು ರಮೇಶ ಸ್ಪಷ್ಟಪಡಿಸಿದರು.

ಕಾಂಗ್ರೆಸ್ ಉದಾರೀಕರಣದ ಪರವಾಗಿದೆ, ಆದರೆ ಇದು ನಿಯಮಗಳು ಮತ್ತು ಸ್ವತಂತ್ರವಾಗಿ ಕಾರ್ಯಾಚರಿಸುವ ಸಂಸ್ಥೆಗಳ ಆಧಾರದಲ್ಲಿ ನಡೆಯಬೇಕು. ನಿಯಮಗಳನ್ನು ನಿಷ್ಪಕ್ಷ ಮತ್ತು ಪಾರದರ್ಶಕ ರೀತಿಯಲ್ಲಿ ಅನ್ವಯಿಸುವಂತಿರಬೇಕು ಎಂದ ರಮೇಶ, ‘ನಮ್ಮ ಹೋರಾಟವು ಕ್ರೋನಿ ಕ್ಯಾಪಿಟಲಿಸಂ ವಿರುದ್ಧವಾಗಿದೆ. ನಮ್ಮನ್ನು ಹತಾಶರನ್ನಾಗಿಸಲು ಸಾಧ್ಯವಿಲ್ಲ,ನಾವು ನಮ್ಮ ಧ್ವನಿಯನ್ನು ಎತ್ತುತ್ತಲೇ ಇರುತ್ತೇವೆ ’ಎಂದರು.

‘ಅವರೇಕೆ ನ್ಯಾಯಾಲಯಗಳಿಗೆ ಹೋಗುತ್ತಿಲ್ಲ? ಪೆಗಾಸಸ್ ವಿಷಯವನ್ನು ಎತ್ತಿದಾಗಲೂ ಪುರಾವೆಗಳೊಂದಿಗೆ ನ್ಯಾಯಾಲಯಕ್ಕೆ ಹೋಗಿ ಎಂದು ನಾನು ಹೇಳಿದ್ದೆ. ಗದ್ದಲವನ್ನು ಸೃಷ್ಟಿಸುವುದು ಮಾತ್ರ ಅವರಿಗೆ ಗೊತ್ತು. ಕೆಲವರು ನ್ಯಾಯಾಲಯದ ಮೆಟ್ಟಿಲುಗಳನ್ನು ಹತ್ತಿದ್ದರು,ನ್ಯಾಯಾಲಯವು ಪೆಗಾಸಸ್ ಅನ್ನು ಗಮನಕ್ಕೆ ತೆಗೆದುಕೊಂಡಿತ್ತು ಮತ್ತು ತನ್ನ ತೀರ್ಪನ್ನು ನೀಡಿತ್ತು. ತನಿಖೆಯನ್ನೂ ನಡೆಸಲಾಗಿತ್ತು. 

-ಅಮಿತ್ ಶಾ

‘ನಾವು ಉದ್ಯಮಶೀಲತೆಯ ಪರವಾಗಿದ್ದೇವೆ ಮತ್ತು ಅದು ಆರ್ಥಿಕ ಅಭಿವೃದ್ಧಿಗೆ ಮುಂದಿನ ದಾರಿಯಾಗಿದೆ ಎಂದು ನಾವು ಯಾವಾಗಲೂ ಹೇಳುತ್ತಿದ್ದೇವೆ. ನಾವು ಕುರುಡು ಖಾಸಗೀಕರಣ ಮತ್ತು ಪಿಎಸ್ಯುಗಳ ಮಾರಾಟದ ವಿರುದ್ಧವಾಗಿದ್ದೇವೆ.

-ಜೈರಾಮ್ ರಮೇಶ್