'ಮಾದಕ' ಮಾಯೆಗೆ ಮಕ್ಕಳು ಬಲಿಯಾಗುತ್ತಿದ್ದಾರೆ

ಹೇಗೆ ಡ್ರಗ್ ಮಾಫಿಯಾ ಪ್ರಾಥಮಿಕ, ಪ್ರೌಢ ಶಾಲೆಯ ವಿದ್ಯಾರ್ಥಿಗಳನ್ನೂ ಬಿಡದೆ ಸೆಳೆಯುತ್ತದೆ, ಅವರನ್ನು ಅಸಹಾಯಕತೆಯ ವ್ಯೆಹದೊಳಕ್ಕೆ ಸಿಲುಕಿಸುತ್ತದೆ, ನಂತರ ಅವರನ್ನು ತಮ್ಮ ಕೆಲಸಕ್ಕೆ ಬಳಸಿಕೊಳ್ಳುತ್ತದೆ ಎಂಬುದಕ್ಕೆ ಇದು ಮತ್ತೊಂದು ಉದಾಹರಣೆ. ಇತ್ತೀಚೆಗೆ ವಿದ್ಯಾರ್ಥಿನಿಯರೂ ಹೀಗೆ ಇಂಥ ಜಾಲದೊಳಕ್ಕೆ ಸಿಲುಕುತ್ತಿರುವ ಆಘಾತಕಾರಿ ಸುದ್ದಿಗಳು ಆಗಾಗ ಬರುತ್ತಲೇ ಇವೆ.

ಕೆ.ಜಿ.ಕೆ ಆಕೆ 9ನೇ ತರಗತಿಯ ವಿದ್ಯಾರ್ಥಿನಿ. ಶಾಲೆಯ ಸಮಯದ ಬಳಿಕವೂ ಮನೆಗೆ ಬೇಗ ಬರುತ್ತಿರಲಿಲ್ಲ ಅಥವಾ ಎಷ್ಟೋ ಸಲ ಮನೆಯಿಂದ ಸಂಜೆ ಹೊರಗೆ ಹೊರಟರೆ ರಾತ್ರಿ 11ರ ಮೇಲೆಯೇ ವಾಪಸ್ ಬರುತ್ತಿದ್ದುದು. ಯಾಕೆಂದು ಪೋಷಕರು ಕೇಳಿದರೆ ಏನಾದರೊಂದು ಕಥೆ ಕಟ್ಟಿ ತಪ್ಪಿಸಿಕೊಳ್ಳುತ್ತಿದ್ದಳು.
ಹೀಗೆ ನಡೆಯುತ್ತಿದ್ದುದು ಯಾವಾಗಲೋ ಒಮ್ಮೆ ಅಲ್ಲ. ಸತತ ಮೂರು ವರ್ಷಗಳಿಂದ ಅನೇಕ ಸಲ ಹೀಗೇ ಆಗುತ್ತಿತ್ತು ಎಂದರೆ ನಂಬುವುದೇ ಅಸಾಧ್ಯ. ಆದರೆ ನಂಬಲೇಬೇಕು.
ಕಡೆಗೂ ಅವಳ ಈ ನಡವಳಿಕೆಯ ಹಿಂದಿನ ಸತ್ಯ ಬಯಲಾಗಿದೆ. ತಾನೆಂಥ ಕರಾಳ ಬಲೆಯಲ್ಲಿ ಸಿಲುಕಿಕೊಂಡಿದ್ದೆ ಎಂಬುದನ್ನು ಆಕೆ ಬಹಿರಂಗಪಡಿಸಿದ್ದಾಳೆ. ಕೇಳಿದರೆ ಎಂಥವರೂ ಬೆಚ್ಚಿ ಬೀಳಬಹುದು. ಆ 9ನೇ ತರಗತಿಯ ವಿದ್ಯಾರ್ಥಿನಿ ಡ್ರಗ್ ಮಾಫಿಯಾದ ಸುಳಿಯಲ್ಲಿ ಸಿಲುಕಿಕೊಂಡಿದ್ದಳು.
ಇಂಥದೊಂದು ಆಘಾತಕಾರಿ ಸಂಗತಿ ನಡೆದಿರುವುದು ಕೇರಳದಲ್ಲಿ. ಒಂಭತ್ತನೇ ತರಗತಿಯ ವಿದ್ಯಾರ್ಥಿನಿ, ತಾನು ಹೇಗೆ ಮೊದಲು ಮಾದಕ ದ್ರವ್ಯ ಸೇವಿಸಿದೆ, ಬಳಿಕ ಹೇಗೆ ಡ್ರಗ್ ಮಾಫಿಯಾದಲ್ಲಿ ಸಿಕ್ಕಿಹಾಕಿಕೊಂಡು ಅದರ ಸಾಗಾಟದ ಕೆಲಸ ಮಾಡಬೇಕಾಯಿತು ಎಂಬ ಕರಾಳ ಕಥೆಯನ್ನು ಬಿಚ್ಚಿಟ್ಟಿದ್ದಾಳೆ.
ಇದೆಲ್ಲವೂ ಶುರುವಾದದ್ದು ಆಕೆ 7ನೇ ತರಗತಿಯಲ್ಲಿದ್ದಾಗಲೇ. ಡ್ರಗ್ ಮಾಫಿಯಾ ಜಾಲದ ಸಂಪರ್ಕಕ್ಕೆ ಆಕೆ ಬರುವಂತಾದದ್ದು ಇನ್‌ಸ್ಟಾಗ್ರಾಮ್ ಮೂಲಕ ಎಂಬುದು ಇನ್ನೂ ಆಘಾತಕಾರಿ ಸಂಗತಿ. ಮೊಬೈಲ್, ಸೋಷಿಯಲ್ ಮೀಡಿಯಾಗಳು ವಿದ್ಯಾರ್ಥಿಗಳನ್ನು ಎಲ್ಲಿಂದ ಎಲ್ಲಿಗೋ ಕರೆದುಕೊಂಡು ಹೋಗಿಬಿಡುತ್ತಿವೆ ಎಂಬುದು ನಿಜವಾಗಿಯೂ ತಲ್ಲಣ ಹುಟ್ಟಿಸುತ್ತದೆ.
ಇನ್‌ಸ್ಟಾಗ್ರಾಮ್‌ನಲ್ಲಿ ಆಕೆಯ ಗೆಳೆಯನೊಬ್ಬ ಅವಳನ್ನು ಅಂಥದೊಂದು ಗುಂಪಿಗೆ ಸೇರಿಸಿದ್ದ. ಅವನು ಆಗ 12ನೇ ತರಗತಿ ಮುಗಿಸಿದವನು. ಆ ಡ್ರಗ್ ಮಾಫಿಯಾ ಗುಂಪಿನವರು ಅದನ್ನು ಅವಳಿಗೆ ಶಾಲೆಯ ಹೊರಗೆ ಕೊಡುತ್ತಿದ್ದರಂತೆ. ಅದು ಯಾರ ಗಮನಕ್ಕೂ ಬರುತ್ತಿರಲಿಲ್ಲ ಎಂದು ಆಕೆ ಹೇಳಿದ್ದಾಳೆ. ಎಂಡಿಎಂಎಯಂಥ ನಿಷೇಧಿತ ಮಾದಕವಸ್ತು ಸೇವನೆ ಮಾಡುತ್ತಿದ್ದುದಾಗಿ ಆಕೆ ಹೇಳಿಕೊಂಡಿ ದ್ದಾಳೆ. ಅದನ್ನು ಹೇಗೆ ಬಳಸಬೇಕೆಂಬುದನ್ನು ಆ ಗುಂಪು ಕೊಟ್ಟಿದ್ದ ಒಂದು ಲಿಂಕ್ ಮೂಲಕವೇ ಕಲಿತೆ ಎಂತಲೂ ಆಕೆ ಹೇಳಿದ್ದಾಳೆ.
 
7ನೇ ತರಗತಿ ಮುಗಿಸಿದಾಗಿನಿಂದಲೂ ಆಕೆ ಆ ಗುಂಪಿಗಾಗಿ ಡ್ರಗ್ ಸಾಗಾಟದ ಕೆಲಸ ಮಾಡಿಕೊಂಡು ಬಂದಿದ್ದಾಳೆ. ಶಾಲಾ ಸಮಯದ ಬಳಿಕ ಅದನ್ನು ಮಾಡುತ್ತಿದ್ದುದಾಗಿ ಹೇಳಿದ್ದಾಳೆ. ಆ ಗುಂಪಿನವರು ಶಾಲೆಯ ಸಮೀಪಕ್ಕೆ ಡ್ರಗ್ ತಲುಪಿಸುತ್ತಿದ್ದರು. ಎಲ್ಲಿಗೆ ಅದನ್ನು ತಲುಪಿಸಬೇಕೆಂಬ ಮಾಹಿತಿಯನ್ನು ಕೂಡ ಇನ್‌ಸ್ಟಾಗ್ರಾಮ್ ಚಾಟ್ ಮೂಲಕವೇ ತಿಳಿಸಲಾಗುತ್ತಿತ್ತಂತೆ. ವರ್ಷಗಟ್ಟಲೆ ಇವೆಲ್ಲವೂ ಗುಟ್ಟಾಗಿರುವಂತೆ ಆಕೆ ನಿಭಾಯಿಸಿದ್ದಾಳೆ. ಒಂದು ಗ್ರಾಂ ಡ್ರಗ್ ಸಾಗಿಸಿದರೆ ಸುಮಾರು 700 ರೂ.ಗಳಂತೆ ಸಿಗುತ್ತಿದ್ದ ಹಣವನ್ನೂ ಆಕೆ ಸ್ನೇಹಿತರ ಬಳಿಯೇ ಇರಿಸಿದ್ದಾಳೆ. ಮನೆಗೆ ತೆಗೆದುಕೊಂಡು ಹೋದರೆ ಹಣವೆಲ್ಲಿಂದ ಬಂತು ಎಂದು ಪೋಷಕರು ಕೇಳುವ ಪ್ರಶ್ನೆಗೆ ಏನೆಂದು ಉತ್ತರ ಹೇಳುವುದು ಎಂಬ ಭಯ.

ಕಡೆಗೂ ಮಗಳ ವಿಚಿತ್ರ ನಡವಳಿಕೆ, ಅವಳ ಕೈಮೇಲೆ ಬ್ಲೇಡಿನಿಂದ ಆದ ಮಾರ್ಕ್‌ಗಳು ಗಳಿಂದ ಅನುಮಾನಗೊಂಡ ತಾಯಿ ಅನುಮಾನಗೊಂಡಿದ್ದಾರೆ. ಆನಂತರ, ಮಗಳು ಶಾಲೆಗೆ ಹೋಗುತ್ತಿದ್ದಾಗ ಹಿಂಬಾಲಿಸಿದ್ದಾರೆ. ಅಪರಿಚಿತರೊಂದಿಗೆ ಮಗಳು ಮಾತನಾಡುವುದು ಗೊತ್ತಾಗಿದೆ. ಬಳಿಕವೇ ಮಗಳಿಂದ ಸತ್ಯಸಂಗತಿ ಬಯಲಾಗಿದೆ. ಆಮೇಲೆ ಆಕೆಯ ತಾಯಿ ಮತ್ತು ಸಾಮಾಜಿಕ ಹೋರಾಟಗಾರರು ಮಕ್ಕಳ ಸಹಾಯವಾಣಿ ಮತ್ತು ಕ್ಯಾಲಿಕಟ್ ಪೊಲೀಸರಿಗೆ ದೂರು ಕೊಟ್ಟಿದ್ದಾರೆ. ಈಗಾಗಲೇ ಆಕೆ ನೀಡಿರುವ ಮಾಹಿತಿ ಆಧರಿಸಿ ಆಕೆಯ ಸ್ನೇಹಿತನನ್ನು ಪೊಲೀಸರು ಬಂಧಿಸಿದ್ದಾರೆ. ಬಂಧಿತ ಯುವಕ ಈ ಹಿಂದೆಯೂ ಡ್ರಗ್ ಮಾರಾಟ ಸಂಬಂಧವೇ ಪೊಲೀಸರಿಗೆ ಸಿಕ್ಕಿಬಿದ್ದಿದ್ದ. ವಿದ್ಯಾರ್ಥಿನಿಯ ಮತ್ತೊಬ್ಬ ಸ್ನೇಹಿತನ ಬಗ್ಗೆ ಕೂಡ ಪೊಲೀಸರಿಗೆ ಮಾಹಿತಿ ಸಿಕ್ಕಿದ್ದು, ಆತ ಕೂಡ ಈ ಹಿಂದೆ ಮಾದಕ ವಸ್ತು ಪ್ರಕರಣದಲ್ಲಿ ಭಾಗಿಯಾಗಿದ್ದವನೇ ಎನ್ನಲಾಗಿದೆ. ಇನ್ನೂ ಇಬ್ಬರ ಬಗ್ಗೆಯೂ ಆಕೆ ಪೊಲೀಸರಿಗೆ ಮಾಹಿತಿ ಕೊಟ್ಟಿದ್ದಾಳೆ. ಆಕೆಯ ಹೇಳಿಕೆ ಆಧರಿಸಿ 10 ಮಂದಿಯ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಪ್ರಕರಣ ತನಿಖೆಗೆ ವಿಶೇಷ ತನಿಖಾ ತಂಡ ರಚನೆಯಾಗಿದೆ.

ಕಳೆದ ವರ್ಷವೂ ಕೋಝಿಕ್ಕೋಡ್‌ನ ಅಝಿಯೂರ್ ಎಂಬ ಹಳ್ಳಿಯ 8ನೇ ತರಗತಿ ವಿದ್ಯಾರ್ಥಿನಿಯೊಬ್ಬಳನ್ನು ಇಂಥದೇ ಗ್ಯಾಂಗ್ ಡ್ರಗ್ ಸಾಗಾಟಕ್ಕೆ ಬಲವಂತವಾಗಿ ಹಚ್ಚಿತ್ತು ಎಂದು ವರದಿಯಾಗಿತ್ತು. ಆದರೆ ಪೊಲೀಸರು ಕಡೆಗೆ ಬಂಧಿತ ಯುವಕ ಆಕೆಯನ್ನು ಈ ಜಾಲದೊಳಕ್ಕೆ ಸಿಲುಕಿಸಲು ಆಮಿಷವೊಡ್ಡಿರುವುದಕ್ಕೆ ಯಾವುದೇ ಸಾಕ್ಷವಿಲ್ಲ ಎಂದಿದ್ದರು. ಹೇಗೆ ಡ್ರಗ್ ಮಾಫಿಯಾ ಪ್ರಾಥಮಿಕ, ಪ್ರೌಢ ಶಾಲೆಯ ವಿದ್ಯಾರ್ಥಿಗಳನ್ನೂ ಬಿಡದೆ ಸೆಳೆಯುತ್ತದೆ, ಅವರನ್ನು ಅಸಹಾಯಕತೆಯ ವ್ಯೆಹದೊಳಕ್ಕೆ ಸಿಲುಕಿಸುತ್ತದೆ, ನಂತರ ಅವರನ್ನು ತಮ್ಮ ಕೆಲಸಕ್ಕೆ ಬಳಸಿಕೊಳ್ಳುತ್ತದೆ ಎಂಬುದಕ್ಕೆ ಇದು ಮತ್ತೊಂದು ಉದಾಹರಣೆ. ಇತ್ತೀಚೆಗೆ ವಿದ್ಯಾರ್ಥಿನಿಯರೂ ಹೀಗೆ ಇಂಥ ಜಾಲದೊಳಕ್ಕೆ ಸಿಲುಕುತ್ತಿರುವ ಆಘಾತಕಾರಿ ಸುದ್ದಿಗಳು ಆಗಾಗ ಬರುತ್ತಲೇ ಇವೆ.
ಮಂಗಳೂರಿನ ವೈದ್ಯಕೀಯ ವಿದ್ಯಾರ್ಥಿಗಳಿದ್ದ ದೊಡ್ಡ ಮಟ್ಟದ ಡ್ರಗ್ ಜಾಲ ಈ ವರ್ಷದ ಆರಂಭದಲ್ಲೇ ಬಯಲಾಗಿತ್ತು. ಎಂಥದೋ ಸೆಳೆತ, ಏನೋ ಕುತೂಹಲ ಕಡೆಗೆ ಎಂಥ ಅಪಾಯಕಾರಿ ದೂರಕ್ಕೆ ಕೊಂಡೊಯ್ದುಬಿಡಬಲ್ಲದು ಎಂಬುದರ ಊಹೆ ಕೂಡ ಇಲ್ಲದೆ ಅನೇಕ ಯುವಕರು ಇಂಥ ಜಾಲದಲ್ಲಿ ಸಿಕ್ಕಿಬೀಳುತ್ತಿರುವುದು ನಿಜಕ್ಕೂ ದುರಂತ.