ಅಕ್ರಮ ಗಣಿಗಾರಿಕೆಗೆ ಯಾರ ಆಶೀರ್ವಾದ?

ಕೆಳಗಿನ ► ಪ್ಲೇ ಬಟನ್ ಕ್ಲಿಕ್ ಮಾಡಿ ಸಂಪಾದಕೀಯದ ಆಡಿಯೋ ಆಲಿಸಿ

ಅಕ್ರಮ ಗಣಿಗಾರಿಕೆಯಿಂದ ಪ್ರತೀ ವರ್ಷ ರಾಜ್ಯದ ಬೊಕ್ಕಸಕ್ಕೆ 18 ಸಾವಿರ ಕೋಟಿ ರೂ.ಗಳಿಂದ 20 ಸಾವಿರ ಕೋಟಿ ರೂ. ನಷ್ಟವಾಗುತ್ತಿದೆ ಎಂದು ವಿಧಾನ ಮಂಡಲದ ಸಾರ್ವಜನಿಕ ಲೆಕ್ಕಪತ್ರಗಳ ಸಮಿತಿ(ಪಿ.ಎ.ಸಿ.) ಪತ್ತೆ ಹಚ್ಚಿದೆ. ಇದನ್ನು ತಡೆಗಟ್ಟಲು ಪರಿಣಾಮಕಾರಿ ಕ್ರಮಗಳನ್ನು ಕೈಗೊಳ್ಳಬೇಕೆಂದು ಅದು ರಾಜ್ಯ ಸರಕಾರಕ್ಕೆ ಶಿಫಾರಸು ಮಾಡಿದೆ. ಈ ವರದಿಯನ್ನು ಸದರಿ ಲೆಕ್ಕಪತ್ರ ಸಮಿತಿಯ ಅಧ್ಯಕ್ಷ ಕೃಷ್ಣ ಭೈರೇಗೌಡರು ಇತ್ತೀಚೆಗೆ ವಿಧಾನ ಸಭೆಯಲ್ಲಿ ಮಂಡಿಸಿದರು. ರಾಜ್ಯದಲ್ಲಿ ಕಲ್ಲು, ಗ್ರಾನೈಟ್, ಸಿಲಿಕಾ, ಮರಳು, ಸುಣ್ಣದ ಕಲ್ಲು ಸೇರಿದಂತೆ ಎಲ್ಲೆಲ್ಲಿ ಉಪ ಖನಿಜಗಳ ಗಣಿ ಪ್ರದೇಶವಿದೆ ಎಂಬ ಬಗ್ಗೆ ಸರಕಾರದ ಬಳಿ ಸಮಗ್ರ ಪಟ್ಟಿ ಇಲ್ಲ ಎಂಬುದನ್ನು ಲೆಕ್ಕಪತ್ರ ಸಮಿತಿ ದಾಖಲಿಸಿದೆ. ಲಂಗು ಲಗಾಮಿಲ್ಲದೆ ನಡೆಯುತ್ತಿರುವ ಕಲ್ಲು ಗಣಿಗಾರಿಕೆ, ಮರಳು ಗಣಿಗಾರಿಕೆ ಬಗ್ಗೆ ಹಾಗೂ ರಾಜ್ಯದ ಖಜಾನೆಗೆ ಬರಬೇಕಾದ ರಾಜಧನ ಬಾರದಿರುವ ಕುರಿತು ಮಹಾಲೇಖಪಾಲರು ಈ ಹಿಂದೆಯೂ ಗುರುತಿಸಿ ವರದಿ ಸಲ್ಲಿಸಿದ್ದರು.

ಚಿಕ್ಕಬಳ್ಳಾಪುರ ಜಿಲ್ಲೆಯಲ್ಲಿ ಕಟ್ಟಡ, ಕಲ್ಲು ಮತ್ತು ಗ್ರಾನೈಟ್ ಗಣಿಗಾರಿಕೆ ಬಗ್ಗೆ ಮಹಾಲೇಖಪಾಲರು ಪ್ರಾಯೋಗಿಕ ಅಧ್ಯಯನ ನಡೆಸಿ ಉಪಗ್ರಹ ಚಿತ್ರಗಳು ಹಾಗೂ ಭೌಗೋಳಿಕ ಮಾಹಿತಿಯನ್ನು ಆಧರಿಸಿ ವರದಿ ನೀಡಿರುವ ಪ್ರಕಾರ ಈಗಿರುವ 292 ಗಣಿ ಗುತ್ತಿಗೆಗಳ ಹೊರಗೆ ನಡೆಯುವ ಅಕ್ರಮ ಗಣಿಗಾರಿಕೆಯಿಂದ ಸರಕಾರದ ಬೊಕ್ಕಸಕ್ಕೆ 2,324 ಕೋಟಿ ರೂ. ನಷ್ಟವಾಗುತ್ತದೆ ಎಂದು ದಾಖಲಿಸಿದ್ದಾರೆ.

ಮಹಾಲೇಖಪಾಲರ ಚಿಕ್ಕಬಳ್ಳಾಪುರದ ಪ್ರಾಯೋಗಿಕ ಅಧ್ಯಯನ ವನ್ನು ಆಧರಿಸಿ ಇಡೀ ರಾಜ್ಯದಲ್ಲಿ ನಡೆಯುತ್ತಿರುವ ಅಕ್ರಮ ಗಣಿಗಾರಿಕೆಯ ಮೇಲೆ ಬೆಳಕು ಚೆಲ್ಲಿದ ವಿಧಾನ ಮಂಡಲದ ಸಾರ್ವಜನಿಕ ಲೆಕ್ಕಪತ್ರ ಸಮಿತಿಯು ಈಗ ರಾಜ್ಯ ಸರಕಾರ ತೆರಿಗೆಯೇತರ ರಾಜಸ್ವದ ರೂಪದಲ್ಲಿ ವಾರ್ಷಿಕ 6,300 ಕೋಟಿ ರೂ. ಪಡೆಯುತ್ತಿದೆ. ಇದು ಗುತ್ತಿಗೆಯಾಧಾರಿತ ಗಣಿಗಾರಿಕೆಯ ಮೂಲದಿಂದ ಬರುವ ಆದಾಯ. ಆದರೆ ಗುತ್ತಿಗೆಯಾಚೆ ನಡೆಯುವ ಅಕ್ರಮ ಗಣಿಗಾರಿಕೆಯಿಂದ ಉಂಟಾಗುವ ನಷ್ಟ ಇದರ ಮೂರು ಪಟ್ಟು ಜಾಸ್ತಿ ಎಂದು ತಿಳಿಸಿದೆ

ಉಪಗ್ರಹ ಚಿತ್ರಗಳು ಸೇರಿದಂತೆ ಆಧುನಿಕ ತಂತ್ರಜ್ಞಾನವನ್ನು ಬಳಸಿ ಅಕ್ರಮ ಗಣಿಗಾರಿಕೆ ನಡೆಯುವುದನ್ನು ಪತ್ತೆ ಹಚ್ಚಿದರೆ ರಾಜ್ಯದ ಬೊಕ್ಕಸಕ್ಕೆ ಆಗುತ್ತಿರುವ ನಷ್ಟವನ್ನು ತಡೆಯಬಹುದು. ಆದರೆ ಸರಕಾರಕ್ಕೆ ಬೊಕ್ಕಸಕ್ಕೆ ಬರುವ ಆದಾಯ ಸೋರಿ ಹೋಗದಂತೆ ತಡೆಯುವ ಇಚ್ಛಾಶಕ್ತಿ ಇರಬೇಕು. ಅಲ್ಲದೆ ಸರಕಾರದ ಪ್ರಭಾವಿ ಸ್ಥಾನದಲ್ಲಿ ಇರುವವರು ಮತ್ತು ಅವರ ಅತ್ಯಂತ ಆಪ್ತರು ಅಕ್ರಮ ಗಣಿಗಾರಿಕೆಯ ಲೂಟಿಯಲ್ಲಿ ತೊಡಗಿದ್ದರೆ ಸರಕಾರ ಗೊತ್ತಿದ್ದೂ ಗೊತ್ತಿಲ್ಲದಂತೆ ವರ್ತಿಸುವ ಜಾಣ ಕುರುಡುತನ ಪ್ರದರ್ಶಿಸಬೇಕಾಗುತ್ತ್ತದೆ.

ಅಕ್ರಮ ಗಣಿಗಾರಿಕೆಯಲ್ಲಿ ಕರ್ನಾಟಕ ದೇಶದಲ್ಲೇ ಹೆಸರು ಮಾಡಿದೆ.ಬಳ್ಳಾರಿಯ ಗಣಿ ಲೂಟಿಕೋರರು ಗಣಿ ಧಣಿಗಳಾಗಿ ಹಿಂದಿನ ಬಿಜೆಪಿ ಸರಕಾರದಲ್ಲಿ ಮಂತ್ರಿಗಳಾಗಿ ಮೆರೆದಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿಯಾಗಿದೆ. ಅಕ್ರಮ ಗಣಿಗಾರಿಕೆಯನ್ನು ತಡೆಗಟ್ಟುವಲ್ಲಿ ಸರಕಾರದ ವೈಫಲ್ಯದ ಮೇಲೆ ವಿಧಾನ ಮಂಡಲದ ಸಾರ್ವಜನಿಕ ಲೆಕ್ಕಪತ್ರ ಸಮಿತಿ ಬೆಳಕು ಚೆಲ್ಲಿದೆ. ಇದಕ್ಕೆ ಬಹುಮುಖ್ಯ ಕಾರಣ ಅಕ್ರಮ ಗಣಿಗಾರಿಕೆಯ ದಕ್ಷಿಣೆ ರಾಜಕೀಯ ಪಕ್ಷಗಳ ತಿಜೋರಿಗೆ ಹರಿದುಬರುತ್ತಿರುವುದಾಗಿದೆ ಅಂದರೆ ಅತಿಶಯೋಕ್ತಿಯಲ್ಲ.

ಕಬ್ಬಿಣದ ಅದಿರಿನ ಅಕ್ರಮ ಗಣಿಗಾರಿಕೆಯ ಬಗ್ಗೆ 2006-2010 ರ ಕಾಲಾವಧಿಯಲ್ಲಿ ತನಿಖೆಯನ್ನು ನಡೆಸಿದ ಅಂದಿನ ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ್ ಹೆಗ್ಡೆ ಅವರು 2011ರಲ್ಲಿ ಸುಮಾರು 25,000 ಪುಟಗಳ ವರದಿಯನ್ನು ಸರಕಾರಕ್ಕೆ ಸಲ್ಲಿಸಿದ್ದರು. ಸದರಿ ವರದಿಯ ಹಿನ್ನೆಲೆಯಲ್ಲಿ ಸಿಬಿಐ ತನಿಖೆ ನಡೆದು ಅಂದಿನ ಬಿಜೆಪಿ ಸರಕಾರದ ಮಂತ್ರಿಯಾಗಿದ್ದ ಜನಾರ್ದನ ರೆಡ್ಡಿ ಸೇರಿದಂತೆ ಬಳ್ಳಾರಿಯ ಕೆಲವು ರಾಜಕಾರಣಿಗಳು ಮತ್ತು ಉದ್ಯಮಿಗಳು ಜೈಲು ಸೇರಿದ್ದರು. ಬಿಜೆಪಿ ನಾಯಕ ಬಿ.ಎಸ್. ಯಡಿಯೂರಪ್ಪ ಅವರು ಮುಖ್ಯಮಂತ್ರಿ ಸ್ಥಾನವನ್ನು ತ್ಯಜಿಸಬೇಕಾಯಿತು.

2006-2010ರ ಅವಧಿಯಲ್ಲಿ ರಾಜ್ಯ ಸರಕಾರದ ಬೊಕ್ಕಸಕ್ಕೆ ಒಟ್ಟು 16,000 ಕೋಟಿ ರೂ. ನಷ್ಟವಾಗಿದೆ ಎಂದು ಲೋಕಾಯುಕ್ತರು ತಿಳಿಸಿದ್ದರು.ಅಷ್ಟೇ ಅಲ್ಲ, ನಷ್ಟದ ಐದು ಪಟ್ಟು ದಂಡ ವಸೂಲಿಗೆ ಶಿಫಾರಸು ಮಾಡಿದ್ದರು. ಲೋಕಾಯುಕ್ತರ ವರದಿಯ ಪರಿಶೀಲನೆಗಾಗಿ ನೇಮಕ ಮಾಡಲಾಗಿದ್ದ ಸಂಪುಟ ಉಪಸಮಿತಿಯು ಅಕ್ರಮ ಗಣಿಗಾರಿಕೆಯಿಂದ 1.43 ಲಕ್ಷ ಕೋಟಿ ರೂ. ನಷ್ಟವಾಗಿದೆ ಎಂದು ಅಂದಾಜು ಮಾಡಿತ್ತು.

ಅಕ್ರಮ ಗಣಿಗಾರಿಕೆ ಮತ್ತು ಕಾನೂನು ಉಲ್ಲಂಘನೆಯನ್ನು ತಡೆಯಲು ಸರಕಾರ ವಿಫಲವಾಯಿತೆಂದು ಲೋಕಾಯುಕ್ತರು ಸ್ಪಷ್ಟವಾಗಿ ಹೇಳಿದ್ದರು. ಆನಂತರ ಕೂಡ ಪರಿಸ್ಥಿತಿ ಸುಧಾರಿಸಿದಂತೆ ಕಾಣುವುದಿಲ್ಲ. ಉಪ ಖನಿಜ ಗಣಿಗಾರಿಕೆಯಿಂದ ರಾಜ್ಯದ ಬೊಕ್ಕಸಕ್ಕೆ ಭಾರೀ ಪ್ರಮಾಣದಲ್ಲಿ ನಷ್ಟ ಉಂಟಾಗಿರುವುದು ಈಗ ಬೆಳಕಿಗೆ ಬಂದಿದೆ. ಸರಕಾರದ ಪ್ರಭಾವಿ ಸ್ಥಾನದಲ್ಲಿ ಇರುವವರು ಮತ್ತು ಅವರ ಹಿಂಬಾಲಕರು ಕಲ್ಲು ಮತ್ತು ಮರಳು ಗಣಿಗಾರಿಕೆಯಲ್ಲಿ ತೊಡಗಿರುವುದರಿಂದ ಇದನ್ನು ತಡೆಯಲು ಸಾದ್ಯವಾಗುತ್ತಿಲ್ಲ. ಅಕ್ರಮ ಗಣಿಗಾರಿಕೆಯ ಹಣ ಅಧಿಕಾರದಲ್ಲಿರುವವರ ತಿಜೋರಿಗೆ ಮಾತ್ರವಲ್ಲ, ಎಲ್ಲಾ ರಾಜಕೀಯ ಪಕ್ಷಗಳ ತಿಜೋರಿಗೂ ನೇರವಾಗಿ ಹೋಗುತ್ತಿದೆ ಎಂಬ ಆರೋಪವಿರುವಾಗ ಈ ಅಕ್ರಮ ಗಣಿಗಾರಿಕೆಯನ್ನು ಅಷ್ಟು ಸುಲಭವಾಗಿ ನಿಲ್ಲಿಸಲಾದೀತೇ?

ಈಗಿನ ಸರಕಾರದ ಕಾಲಾವಧಿ ಕೇವಲ ಒಂದೆರಡು ತಿಂಗಳು. ಮುಂದೆ ಬರುವ ಸರಕಾರವಾದರೂ ಅಕ್ರಮ ಗಣಿಗಾರಿಕೆಯನ್ನು ತಡೆಯಲು ಕಠಿಣ ಕ್ರಮ ಕೈಗೊಳ್ಳಲಿ ಎಂಬುದು ರಾಜ್ಯದ ಜನತೆಯ ಆಶಯವಾಗಿದೆ.