ಉಡುಪಿ: ಮಾ.1, 2ರ ಸಂಜೆ ಪಶ್ಚಿಮ ಆಕಾಶದಲ್ಲಿ ಗ್ರಹಗಳೆರಡರ ಮೋಡಿ

ಉಡುಪಿ, ಫೆ.28: ಈಗ ಕೆಲವು ದಿನಗಳಿಂದ ಸಂಜೆಯ ವೇಳೆ ಪಶ್ಚಿಮ ಆಕಾಶದಲ್ಲಿ ಗುರು-ಶುಕ್ರರ ಜೋಡಿ ಬಲು ಸುಂದರವಾಗಿ ಕಾಣುತ್ತಿದೆ. ಇವುಗಳಿಗೆ ಕಲಶವಿಟ್ಟಂತೆ ಮಾ.1ರ ಬುಧವಾರ ಸಂಜೆ ಗುರು ಗ್ರಹ, ಶುಕ್ರ ಗ್ರಹದ ಅರ್ಧ ಡಿಗ್ರಿ ಸಮೀಪ ಕಾಣಿಸಲಿದೆ.

ಬರೇ ಕಣ್ಣಿಗೆ ಕಾಣುವ ಅತಿ ಸುಂದರ ಗ್ರಹಗಳಾದ ಗುರು ಹಾಗೂ ಶುಕ್ರರ ಜೋಡಾಟ ಈಗ ಆಕಾಶದಲ್ಲಿ ನಡೆಯುತ್ತಿದೆ. ಗುರು ಗ್ರಹ ಹಾಗೂ ಶುಕ್ರ ಗ್ರಹಗಳು ಬರೇ ಕಣ್ಣಿಗೂ ಕಾಣಲು ಅತಿ ಸುಂದರ. ಇವು ಈಗ ಕೆಲ ದಿನಗಳಿಂದ ಪಶ್ಚಿಮ ಆಕಾಶದಲ್ಲಿ ಸಂಜೆಯಾಗುತ್ತಿದ್ದಂತೆ ಸೂರ್ಯಾಸ್ತಕ್ಕೆ ಹಿಡಿದ ಅವಳಿ ದೀವಟಿಕೆಯೋ ಎನ್ನುವಂತೆ ಅಕ್ಕಪಕ್ಕದಲ್ಲಿ ಹೊಳೆಯುತ್ತಿರುತ್ತವೆ. ಇದೊಂದು ಆಕಾಶದಲ್ಲಿ ಕಾಣಸಿಗುವ ಅಪರೂಪದ ವಿದ್ಯಾಮಾನ.

ಅವುಗಳಲ್ಲೂ ನಾನೇ ಚೆಂದವೆಂದು ಹೊಳೆಯುತ್ತಿರುವ ಶುಕ್ರ ಗ್ರಹ ಈಗ ಭೂಮಿಯಿಂದ ಸುಮಾರು 20.5 ಕೋಟಿ ಕಿಮೀ ದೂರದಲ್ಲಿದ್ದರೆ, ಗುರು ಗ್ರಹವೀಗ ಭೂಮಿಯಿಂದ 86 ಕೋಟಿ ಕಿಮೀನಷ್ಟು ದೂರದಲ್ಲಿದೆ. ಗುರು ಗ್ರಹದ ಗಾತ್ರ  ಶುಕ್ರನಿಗಿಂತ ಸುಮಾರು 1400ರಷ್ಟು ದೊಡ್ಡದು. ಆದರೂ ಶುಕ್ರ ಫಳಫಳ ಹೊಳೆಯುತ್ತಿದೆ.

ಶುಕ್ರ ಗ್ರಹ ಹೊಳೆಯಲು ಆ ಗ್ರಹದ ವಾತಾವರಣವೇ ಕಾರಣ. ಸ್ವಯಂ ಪ್ರಭೆ ಇಲ್ಲದ ಈ ಗ್ರಹದ ವಾತಾವರಣದಲ್ಲಿರುವ ಕಾರ್ಬನ್‌ನ ಅಕ್ಸೈಡುಗಳು ಹಾಗೂ ಸಲ್ಫರ್ ಡೈಆಕ್ಸೈಡ್‌ನ ತೆಳು ಕವಚ ಸುಮಾರು ಶೇ.80 ಅಂಶ ಸೂರ್ಯನ ಬೆಳಕನ್ನು ಪ್ರತಿಫಲಿಸುವುದೇ ಇದಕ್ಕೆ ಕಾರಣ.

ಶುಕ್ರ ಗ್ರಹ ಆಗಸ್ಟ್‌ವರೆಗೂ ಸಂಜೆ ಆಕಾಶದಲ್ಲಿ ಬೇರೆ ಬೇರೆ ಎತ್ತರದಲ್ಲಿ ಹೊಳೆಯಲಿದೆ. ಆದರೆ ಗುರು ಗ್ರಹ ಕೆಲವೇ ದಿನಗಳಲ್ಲಿ ಮರೆಯಾಗಲಿದೆ. ಸಂಜೆಯ ಸೂರ್ಯಾಸ್ತ  ಹಾಗೂ ಸೂರ್ಯೋದಯ ಕೆಂಬಣ್ಣದ ಬಣ್ಣ ಈಗ ಅತಿ ಸುಂದರ ಎನ್ನುತ್ತಾರೆ ಉಡುಪಿಯ ಭೌತ ವಿಜ್ಞಾನಿ ಹಾಗೂ ನಿವೃತ್ತ ಪ್ರಾಧ್ಯಾಪಕ ಡಾ.ಎ.ಪಿ.ಭಟ್. 

ಆಕಾಶಕಾಯ ಹಾಗೂ ಭೌತಶಾಸ್ತ್ರದ ಆಸಕ್ತರು ಈ ಅಪರೂಪದ ವಿದ್ಯಾಮಾನವನ್ನು ನೋಡಿ ಆನಂದಿಸುವಂತೆ ಡಾ.ಎ.ಪಿ. ಭಟ್ ಸಲಹೆ ನೀಡಿದ್ದಾರೆ.