ವಿಮಾನ ಸಿಬ್ಬಂದಿ ಜತೆ ಅಸಭ್ಯ ವರ್ತನೆ: ಸ್ವಿಡೀಷ್ ಪ್ರಜೆ ಬಂಧನ

ಮುಂಬೈ: ಬ್ಯಾಂಕಾಕ್‌ನಿಂದ ಬರುತ್ತಿದ್ದ ಇಂಡಿಗೊ ವಿಮಾನದ ಮಹಿಳಾ ಸಿಬ್ಬಂದಿಗೆ ನಾಲ್ಕು ಗಂಟೆ ಕಾಲ ’ಕಿರುಕುಳ’ ನೀಡಿದ್ದಾನೆ ಎನ್ನಲಾದ 63 ವರ್ಷದ ಸ್ವೀಡನ್ ಪ್ರಜೆಯೊಬ್ಬನನ್ನು ಪೊಲೀಸರು ಬಂಧಿಸಿದ್ದಾರೆ. ಕ್ಲಾಸ್ ಎರಿಕ್ ಹೆರಾಲ್ಡ್ ಜೋನ್ಸ್ ವೆಸ್ಟ್‌ಬರ್ಗ್ ಎಂಬ ಪ್ರಯಾಣಿಕ ವಿಮಾನಯಾನದ ವೇಳೆ ಪಾನಮತ್ತನಾಗಿ ಈ ಕೃತ್ಯ ಎಸಗಿದ್ದಾನೆ ಎಂದು ಹೇಳಲಾಗಿದೆ. ಮತ್ತೊಬ್ಬ ಪ್ರಯಾಣಿಕನ ಮೇಲೆ ಈತ ಹಲ್ಲೆ ಮಾಡಿದ್ದಾಗಿಯೂ ಆರೋಪಿಸಲಾಗಿದೆ.

ಮೂವರು ವಿಮಾನ ಸಿಬ್ಬಂದಿಯ ಹೇಳಿಕೆ ಆಧರಿಸಿ ಪೊಲೀಸರು ಆರೋಪಪಟ್ಟಿ ಸಲ್ಲಿಸಿದ್ದಾರೆ. 20 ಸಾವಿರ ವೈಯಕ್ತಿಕ ಬಾಂಡ್ ಆಧಾರದಲ್ಲಿ ವೆಸ್ಟ್‌ಬರ್ಗ್‌ನನ್ನು ನ್ಯಾಯಾಲಯ ಶುಕ್ರವಾರ ಜಾಮೀನಿನಲ್ಲಿ ಬಿಡುಗಡೆ ಮಾಡಿದೆ. ಇದೀಗ ವೆಸ್ಟ್‌ಬರ್ಗ್ ವಿಚಾರಣೆಗೆ ಹಾಜರಾಗಬೇಕಿದೆ. ವೆಸ್ಟ್‌ಬರ್ಗ್, ಕಳೆದ ಮೂರು ತಿಂಗಳಲ್ಲಿ ವಿಮಾನದಲ್ಲಿ ಅಸಭ್ಯ ವರ್ತನೆಗಾಗಿ ಭಾರತದಲ್ಲಿ ಬಂಧಿತನಾದ ಎಂಟನೇ ಪ್ರಯಾಣಿಕ.

ಬ್ಯಾಂಕಾಕ್‌ನಿಂದ ಹೊರಟಿದ್ದ ವಿಮಾನ (6ಇ-1052) ನಾಲ್ಕು ಗಂಟೆ ಪ್ರಯಾಣದ ಬಳಿಕ ಸಂಜೆ 6.30ಕ್ಕೆ ಮುಂಬೈ ತಲುಪಿದೆ. ವಿಮಾನ ನಿಲ್ದಾಣದಿಂದ ವೆಸ್ಟ್‌ಬರ್ಗ್‌ನನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, 20 ಸಾವಿರ ರೂಪಾಯಿ ವೈಯಕ್ತಿಕ ಬಾಂಡ್ ಆಧಾರದಲ್ಲಿ ಅಂಧೇರಿ ಮೆಟ್ರೋಪಾಲಿಟನ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯ ಆತನಿಗೆ ಜಾಮೀನು ನೀಡಿದೆ.

ವಿಮಾನದಲ್ಲಿ ಪ್ರಯಾಣಿಕರಿಗೆ ಊಟ ನೀಡುವ ವೇಳೆ ಈತ ಅಸಭ್ಯವಾಗಿ ವರ್ತಿಸಲು ಆರಂಭಿಸಿದ ಎನ್ನಲಾಗಿದೆ. ವಿಮಾನ ಮುಂಬೈ ನಿಲ್ದಾಣದಲ್ಲಿ ಇಳಿಯುವವರೆಗೂ ಈತನ ಚೇಷ್ಟೆ ಮುಂದುವರಿದಿತ್ತು. ಒಂದು ಹಂತದಲ್ಲಿ 24 ವರ್ಷದ ವಿಮಾನ ಸಿಬ್ಬಂದಿ ಕ್ಯಾಪ್ಟನ್‌ಗೆ ದೂರು ನೀಡಿ, ಕ್ಯಾಪ್ಟನ್ ವೆಸ್ಟ್‌ಬರ್ಗ್ ವಿರುದ್ಧ ಕೆಂಪು ಎಚ್ಚರಿಕೆ ಕಾರ್ಡ್ ನೀಡಲಾಯಿತು.

"ಊಟ ನೀಡುವ ವೇಳೆ ಚಿಕನ್ ಊಟವನ್ನು ನೀಡಿ ಪಿಓಎಸ್ ಮೆಷಿನ್ ಮೂಲಕ ಹಣ ಪಡೆಯಲು ಎಟಿಎಂ ಕಾರ್ಡ್ ಕೇಳಿದೆ. ಕಾರ್ಡ್ ಸ್ವೈಪ್ ಮಾಡುವ ನೆಪದಲ್ಲಿ ಆತ ನನ್ನ ಕೈ ಹಿಡಿದುಕೊಂಡ. ನಾನು ಕೈ ಹಿಂದಕ್ಕೆ ಎಳೆದುಕೊಂಡು ಪಿನ್ ನಮೂದಿಸಲು ಹೇಳಿದೆ. ಈ ಬಾರಿ ಆತ ಎಲ್ಲೆ ಮೀರಿದ.. ಇತರ ಪ್ರಯಾಣಿಕರ ಎದುರೇ ಎದ್ದು ಅಸಭ್ಯವಾಗಿ ವರ್ತಿಸಿ ಕಿರುಕುಳ ನೀಡಿದ. ಈತನ ಅಸಭ್ಯ ವರ್ತನೆ ಬಗ್ಗೆ ಕೂಗಿಕೊಂಡಾಗ ತನ್ನ ಆಸನಕ್ಕೆ ಮರಳಿದ" ಎಂದು ಕಿರುಕುಳಕ್ಕೆ ಒಳಗಾದ ಸಿಬ್ಬಂದಿ ದೂರಿದ್ದಾರೆ.