ಮಹಿಳಾ ಸೇನಾಧಿಕಾರಿಗಳ ಭಡ್ತಿಯಲ್ಲಿ ತಾರತಮ್ಯ ನಿವಾರಿಸಲು ಆದೇಶ

ಹೊಸದಿಲ್ಲಿ,ಎ.8: ಭಡ್ತಿಯಲ್ಲಿ ತಾವು ತಾರತಮ್ಯವನ್ನು ಎದುರಿಸುತ್ತಿರುವುದಾಗಿ ಆರೋಪಿಸಿ ಭಾರತೀಯ ಸೇನೆಯ ಮಹಿಳಾ ಅಧಿಕಾರಿಗಳು ಸಲ್ಲಿಸಿದ ಅರ್ಜಿಯ ಆಲಿಕೆಯನ್ನು ನಡೆಸಿದ ಸುಪ್ರೀಂಕೋರ್ಟ್, ‘ನಿಮ್ಮ ಮನೆಯನ್ನು ಚೊಕ್ಕಟವಾಗಿ ಇಟ್ಟುಕೊಳ್ಳಿ’ ಎಂದು ರಕ್ಷಣಾ ಸಚಿವಾಲಯಕ್ಕೆ ಖಾರವಾಗಿ ಹೇಳಿದೆ.

ಭಡ್ತಿಗಳಿಗಾಗಿನ ಸೇನಾ ಆಯ್ಕೆ ಮಂಡಳಿಗಳು ತಮ್ಮ ನೂತನ ವಾರ್ಷಿಕ ಗೌಪ್ಯ ವರದಿಗಳನ್ನು ಅಥವಾ ನಿರ್ವಹಣೆ ವೌಲ್ಯಮಾಪನದ ವರದಿಗಳನ್ನು ಪರಿಶೀಲಿಸಲು ನಿರಾಕರಿಸುತ್ತಿವೆಯೆಂದು ಆರೋಪಿಸಿ ಮಹಿಳಾ ಸೇನಾಧಿಕಾರಿಗಳು ಸಲ್ಲಿಸಿದ ಅರ್ಜಿಯ ವಿಚಾರಣೆಯನ್ನು ಭಾರತದ ಮುಖ್ಯನ್ಯಾಯಮೂರ್ತಿ ಡಿ.ವೈ.ಚಂದ್ರಚೂಡ ಹಾಗೂ ನ್ಯಾಯಮೂರ್ತಿ ಜೆ.ಬಿ.ಪರ್ದಿವಾಲಾ ಅವರನ್ನೊಳಗೊಂಡ ನ್ಯಾಯಪೀಠ ನಡೆಸುತ್ತಿದೆ.

ಸಾಮಾನ್ಯವಾಗಿ ಜೂನಿಯರ್ ದರ್ಜೆಯ ಅಧಿಕಾರಿಗಳು ನೇತೃತ್ವ ವಹಿಸುವಂತಹ ತುಕಡಿಗಳ ಮುಂದಾಳತ್ವವನ್ನು ಮಹಿಳಾ ಅಧಿಕಾರಿಗಳಿಗೆ ವಹಿಸಲಾಗುತ್ತಿದೆ ಎಂದು ಅರ್ಜಿದಾರರು ಆರೋಪಿಸಿದ್ದಾರೆಂದು ‘ ದಿ ಟ್ರಿಬ್ಯೂನ್’ ವರದಿ ಮಾಡಿದೆ. ಈ ಆರೋಪಗಳಿಗೆ ಉತ್ತರಿಸುವಂತೆಯೂ ಸುಪ್ರೀಂಕೋರ್ಟ್ ರಕ್ಷಣಾ ಸಚಿವಾಲಯಕ್ಕೆ ನ್ಯಾಯಪೀಠ ಸೂಚಿಸಿದೆ.

‘‘ ಒಂದು ವೇಳೆ ಇದನ್ನು ಸರಿಪಡಿಸದೆ ಇದ್ದಲ್ಲಿ ನಾವು ನಿಮ್ಮನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಳ್ಳಲಿದ್ದೇವೆ. ನಮ್ಮ ಆದೇಶವನ್ನು ಮೀರುವ ಪ್ರಯತ್ನ ನಡೆಯುತ್ತಿದೆಯೆಂಬುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ನಾವು ಇದನ್ನು ಗಂಭೀರವಾಗಿ ಪರಿಗಣಿಸಲಿದ್ದೇವೆ ’’ಎಂದು ಕೇಂದ್ರ ಸರಕಾರದ ಪರವಾದಿ ವಾದಿಸಿದ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಕೆ.ಎಂ.ನಾಗರಾಜ್ ಅವರಿಗೆ ಹೇಳಿತು.

ಅರ್ಜಿದಾರರು ವ್ಯಕ್ತಪಡಿಸಿದ ಆತಂಕಗಳಿಗೆ ಅಧಿಕಾರಿಗಳು ಸ್ಪಂದಿಸದೆ ಇದ್ದಲ್ಲಿ ನ್ಯಾಯಾಂಗ ನಿಂದನೆಯ ನೋಟಿಸನ್ನು ನ್ಯಾಯಾಲಯ ಜಾರಿಗೊಳಿಸಬಹುದಾಗಿದೆ ಎಂದು ಹೇಳಿದ ಸಿಜೆಐ ಚಂದ್ರಚೂಡ ಅವರು, ‘‘ನಿಮ್ಮ ಮನೆಯನ್ನು ಚೊಕ್ಕವಾಗಿಡಲು ಈಗ ನಾವು ನಿಮಗೆ ಕೊನೆಯ ಅವಕಾಶವನ್ನು ನೀಡುತ್ತಿದ್ದೇವೆ. ಇಲ್ಲದೆ ಇದ್ದಲ್ಲಿ ನಾವು ನಿಮ್ಮನ್ನು ತರಾಟೆಗೆ ತೆಗೆದುಕೊಳ್ಳಲಿದ್ದೇವೆ ’’ಎಂದು ತೀಕ್ಷ್ಣವಾಗಿ ಹೇಳಿದರು.

ಈ ಬಗ್ಗೆ ಸರಕಾರದ ನಿಲುವನ್ನು ವಿವರಿಸಿ ತಾನು ಅಫಿಡವಿಟ್ ಒಂದನ್ನು ಸಲ್ಲಿಸುವುದಾಗಿ ನಾಗರಾಜ್ ತಿಳಿಸಿದರು. ಪ್ರಕರಣದ ವಿಚಾರಣೆಯನ್ನು ಎರಡು ವಾರಗಳ ಬಳಿಕ ಮತ್ತೆ ನಡೆಸಲಾಗುವುದು ಎಂದು ನ್ಯಾಯಾಲಯ ತಿಳಿಸಿತು.

ಸುಪ್ರೀಂಕೋರ್ಟ್ ನಿರ್ದೇಶನ ಕಡೆಗಣಿಸಿದ್ದ ರಕ್ಷಣಾ ಇಲಾಖೆ

ಭಾರತೀಯ ಸೇನೆಯಲ್ಲಿ ಮಹಿಳಾ ಅಧಿಕಾರಿಗನ್ನು ಖಾಯಂ ನಿಯೋಜನೆ ಮಾಡುವಂತೆ ಸುಪ್ರೀಂಕೋರ್ಟ್ 2020ರಲ್ಲಿ ನೀಡಿದ ತೀರ್ಪಿನಲ್ಲಿ ರಕ್ಷಣಾ ಸಚಿವಾಲಯಕ್ಕೆ ತಿಳಿಸಿತ್ತು. ಅಲ್ಪಾವಧಿಯ ಸೇವಾ ನಿಯೋಜನೆ (ಶಾರ್ಟ್ ಸರ್ವಿಸ್ ಕಮಿಶನ್)ಗೊಂಡವರು ಹತ್ತು ವರ್ಷಗಳ ಸೇವಾವಧಿಯ ಅಂತ್ಯದಲ್ಲಿ ಖಾಯಂ ನಿಯೋಜನೆ (ಪರ್ಮಾನೆಂಟ್ ಕಮಿಶನ್)ಗಾಗಿ ಅರ್ಜಿ ಸಲ್ಲಿಸಬಹುದಾಗಿದೆ. ಒಂದು ವೇಳೆ ಅವರು ಆಯ್ಕೆಯಾಗದೆ ಇದ್ದಲ್ಲಿ, ಅವರು ನಾಲ್ಕು ವರ್ಷಗಳ ಸೇವಾ ವಿಸ್ತರಣೆಯನ್ನು ಆಯ್ಕೆ ಮಾಡಿಕೊಳ್ಳಬಹುದಾಗಿದೆ.

ಮಹಿಳಾ ಸೇನಾಧಿಕಾರಿಗಳ ಸೇವಾ ದಕ್ಷತೆಯ ಪರಿಶೀಲನೆಗಾಗಿ ಸೇನೆಯು 2020ರಲ್ಲಿ ವಿಶೇಷ ಆಯ್ಕೆ ಮಂಡಳಿಯೊಂದನ್ನು ರಚಿಸಿತ್ತು. 2020ರ ನವೆಂಬರ್ನಲ್ಲಿ ಅದರ ಫಲಿತಾಂಶವನ್ನು ಘೋಷಿಸಲಾಗಿತ್ತು.

ವಿವಿಧ ಕಾರಣಗಳಿಗಾಗಿ ತಮಗೆ ಖಾಯಂ ನಿಯೋಜನೆಯನ್ನು ನಿರಾಕರಿಸಿದ್ದಕ್ಕಾಗಿ 72 ಮಂದಿ ಮಹಿಳಾ ಸೇನಾಧಿಕಾರಿಗಳು ಸುಪ್ರೀಂಕೋರ್ಟ್ ಮೆಟ್ಟಲೇರಿದ್ದರು. ಸೇವಾದಕ್ಷತೆಯ ಮೌಲ್ಯಮಾಪನದಲ್ಲಿ ಶೇ.60ರಷ್ಟು ಅಂಕಗಳನ್ನು ಗಳಿಸಿದ, ಸೇನೆಯ ವೈದ್ಯಕೀಯ ಅರ್ಹತೆಯ ಮಾನದಂಡಗಳಿಗೆ ಅನುಗುಣವಾಗಿ ಅರ್ಹತೆ ಪಡೆದಿರುವ ಹಾಗ ವಿಜಿಲೆನ್ಸ್ ಹಾಗೂ ಶಿಸ್ತೀಯ ಅನುಮೋದನೆ ಪಡೆದಿರುವ ಮಹಿಳಾ ಶಾರ್ಟ್ ಸರ್ವಿಸ್ ಕಮಿಶನ್ ಅಧಿಕಾರಿಗಳನ್ನು ಖಾಯಂ ನಿಯೋಜನೆಗೊಳಿಸಬೇಕೆಂದು ನ್ಯಾಯಾಲಯ ತಿಳಿಸಿತ್ತು.