ವುಹಾನ್ ಮಾರುಕಟ್ಟೆಯಿಂದ ಸಂಗ್ರಹಿಸಿದ ಕೋವಿಡ್ ಮೂಲದ ಕುರಿತ ವಿಶ್ಲೇಷಣೆ ಪ್ರಕಟ

ಬೀಜಿಂಗ್, ಎ.8: ಕೋವಿಡ್-19 ಸಾಂಕ್ರಾಮಿಕದ ಮೂಲದ ಕುರಿತ ವಿವಾದದ ಕೇಂದ್ರವಾಗಿದ್ದ ಚೀನಾದ ವುಹಾನ್ ಮಾರುಕಟ್ಟೆಯಿಂದ ಸಂಗ್ರಹಿಸಲಾದ ಅಂಕಿಅಂಶ ಮಾಹಿತಿಯನ್ನು ಚೀನಾದ ಸಂಶೋಧಕರು ಪ್ರಕಟಿಸಿದ್ದಾರೆ.

‌2020ರ ಜನವರಿಯಲ್ಲಿ ವುಹಾನ್ ಮಾರುಕಟ್ಟೆಯಲ್ಲಿ ಕಾಡುಪ್ರಾಣಿಗಳಿಂದ ಸಂಗ್ರಹಿಸಿದ(ಸಾರ್ಸ್ ಸಿಒವಿ-2 ಸೋಂಕಿತ ಪ್ರಾಣಿಗಳು) ಗಂಟಲುದ್ರವದ ಮಾದರಿಯಲ್ಲಿ ವಂಶವಾಹಿ ವಸ್ತುವನ್ನು ಸಂಶೋಧಕರು ಪತ್ತೆಹಚ್ಚಿದ್ದಾರೆ. ಆದರೆ ಸಾರ್ಸ್ ಸಿಒವಿ-2 ಸೋಂಕು ಪ್ರಾಣಿಯಿಂದ ಮಾನವನಿಗೆ ಹರಡಿದೆ ಎಂಬುದಕ್ಕೆ ಈ ಸಂಶೋಧನೆ  ಖಚಿತವಾದ ಪುರಾವೆಗಳನ್ನು ಒದಗಿಸುವುದಿಲ್ಲ ಎಂದು ಚೀನೀಸ್ ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್ ಆ್ಯಂಡ್ ಪ್ರಿವೆನ್ಷನ್(ಸಿಡಿಸಿ)ಯ ಸಂಶೋಧಕರು `ನೇಚರ್' ಮ್ಯಾಗಝಿನ್ ನಲ್ಲಿ ಪ್ರಕಟಿಸಿದ ವರದಿಯಲ್ಲಿ ಹೇಳಿದ್ದಾರೆ.

ಕೋವಿಡ್ ಸೋಂಕು ಪ್ರಾಕೃತಿಕವಾಗಿ ಸೃಷ್ಟಿಯಾಗಿದೆಯೇ ಅಥವಾ ವುಹಾನ್ ಪ್ರಯೋಗಾಲಯದಿಂದ ಸೋರಿಕೆಯಾಗಿದೆಯೇ ಎಂಬ ಕುರಿತು ವ್ಯಾಪಕ ಚರ್ಚೆ ನಡೆದಿದೆ. ಮಾನವರು ಸೋಂಕನ್ನು ವುಹಾನ್ ಮಾರುಕಟ್ಟೆಗೆ ಪರಿಚಯಿಸಿರಬಹುದು ಎಂಬ ಹೇಳಿಕೆಯನ್ನು ಈ ಅಧ್ಯಯನ ತಳ್ಳಿಹಾಕಿಲ್ಲ. ಮಾರುಕಟ್ಟೆಯಲ್ಲಿ ರಕೂನ್ ನಾಯಿ ಹಾಗೂ ಇತರ ಪ್ರಾಣಿಗಳು ಸೋಂಕಿಗೆ ಒಳಗಾಗಿರಬಹುದು ಎಂಬುದನ್ನು ಸಂಶೋಧನೆ ದೃಢಪಡಿಸಿದರೂ, ಪ್ರಾಣಿಗಳು ಸೋಂಕಿಗೆ ಒಳಗಾಗಿವೆ ಎಂಬುದನ್ನು ಸ್ಯಾಂಪಲ್ನಿಂದ ದೃಢಪಡಿಸಲು ಆಗಲಿಲ್ಲ. ಒಂದುವೇಳೆ ಪ್ರಾಣಿಗಳು ಸೋಂಕಿಗೆ ಒಳಗಾಗಿದ್ದರೂ, ಮನುಷ್ಯರಿಂದ ಪ್ರಾಣಿಗಳಿಗೆ ಸೋಂಕು ಹರಡಿರುವುದನ್ನು ನಮ್ಮ ಅಧ್ಯಯನ ತಳ್ಳಿಹಾಕಿಲ್ಲ ಎಂದು ಅಧ್ಯಯನ ತಂಡದ ಮುಖ್ಯಸ್ಥ ಜಾರ್ಜ್ ಗವೊ ಹೇಳಿದ್ದಾರೆ.

ಕೋವಿಡ್ ಸೋಂಕಿನ ಕೆಲವು ಆರಂಭಿಕ ಪ್ರಕರಣಗಳು ವುಹಾನ್ ಸಮುದ್ರಖಾದ್ಯ ಮಾರುಕಟ್ಟೆಯ ಜತೆ ಸಂಪರ್ಕಿಸಿರುವ ಕಾರಣ ಈ ಮಾರುಕಟ್ಟೆಯನ್ನು ಕೋವಿಡ್-19ರ ಮೂಲದ ಜತೆ ಗುರುತಿಸಲಾಗುತ್ತಿದೆ. ಮಾರುಕಟ್ಟೆಯಲ್ಲಿ ಮಾರಾಟವಾಗುವ ಪ್ರಾಣಿಗಳಲ್ಲಿ ಉಸಿರಾಟಕ್ಕೆ ಸಂಬಂಧಿಸಿದ ಸೋಂಕುಗಳು ದೃಢಪಟ್ಟಿವೆ ಎಂದು ವರದಿ ಹೇಳಿದೆ.