ಮಂಗಳೂರು: ಒಟಿಪಿ ಪಡೆದು ಹಣ ವರ್ಗಾವಣೆ; ದೂರು ದಾಖಲು

ಮಂಗಳೂರು, ಎ.17: ತಾನು ಬ್ಯಾಂಕ್‌ನವ ಎನ್ನುತ್ತಾ ಕರೆ ಮಾಡಿದ ಅಪರಿಚಿತನೊಬ್ಬ ತಮ್ಮಿಂದ ಒಟಿಪಿ ಪಡೆದು ಹಣವನ್ನು  ವರ್ಗಾಯಿಸಿಕೊಂಡು ವಂಚಿಸಿರುವುದಾಗಿ ವ್ಯಕ್ತಿಯೊಬ್ಬ ನಗರದ ಸೆನ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ಹಳೆಯಂಗಡಿಯ ಬ್ಯಾಂಕ್‌ನಲ್ಲಿ ಖಾತೆ ಹೊಂದಿರುವ ವ್ಯಕ್ತಿಗೆ ಎ.13ರಂದು 8895427884 ಸಂಖ್ಯೆಯಿಂದ ಅಪರಿಚಿತನೊಬ್ಬ ಕರೆ ಮಾಡಿ ‘ನಿಮ್ಮ ಬ್ಯಾಂಕ್ ಖಾತೆ ರದ್ದಾಗಿದೆ. ಕೆವೈಸಿ ಅಪ್‌ಡೇಟ್ ಮಾಡಬೇಕಾಗಿದೆ. ವಿವರಕ್ಕೆ 09046400347ಗೆ ಕರೆ ಮಾಡಿ’ ಎಂದು ಸಂದೇಶ ಕಳುಹಿಸಿದ್ದ. ಅದಕ್ಕೆ ಕರೆ ಮಾಡಿದಾಗ ಅಪರಿಚಿತ ವ್ಯಕ್ತಿಯು ದೂರುದಾರರ ದೊಡ್ಡಪ್ಪನ ಬ್ಯಾಂಕ್ ಖಾತೆಯ ವಿವರ ಕೇಳಿದ. ಬಳಿಕ ಅವರ ಬ್ಯಾಂಕ್ ಖಾತೆಯ ನಾಮಿನಿಯ ಹೆಸರು ಕೇಳಿದ. ಆಗ ದೂರುದಾರ ವ್ಯಕ್ತಿಯು ತನ್ನ ದೊಡ್ಡಮ್ಮನ ಹೆಸರು ತಿಳಿಸಿದ್ದು, ಬಳಿಕ ದೂರುದಾರರ ದೊಡ್ಡಮ್ಮನ ಬ್ಯಾಂಕ್ ಖಾತೆಯ ವಿವರಗಳನ್ನು ಕೂಡ ಪಡೆದುಕೊಂಡ. ಹಾಗೇ ಅಪರಿಚಿತನು ದೂರುದಾರ ವ್ಯಕ್ತಿಯ ದೊಡ್ಡಮ್ಮನಿಗೆ ಕರೆ ಮಾಡಿ ಒಟಿಪಿ ನೀಡುವಂತೆ ಕೇಳಿದ. ಒಟಿಪಿ ಪಡೆದ ನಂತರ ಹಂತ ಹಂತವಾಗಿ 1,61,353 ರೂ. ವರ್ಗಾಯಿಸಿಕೊಂಡು ವಂಚಿಸಿದ್ದಾನೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.