ಸುಡಾನ್ ಬಿಕ್ಕಟ್ಟು ಉಲ್ಬಣ: 200 ಮಂದಿ ಮೃತ್ಯು, 1800 ಜನರಿಗೆ ಗಾಯ

ಖಾರ್ಟೌಮ್: ಮೂರು ದಿನಗಳಿಂದ ಸೇನಾ ಪಡೆಗಳು ಹಾಗೂ ಅರೆ ಸೇನಾ ಪಡೆಗಳ ನಡುವೆ ನಡೆಯುತ್ತಿರುವ ಕಾಳಗದಲ್ಲಿ ಸುಮಾರು 200 ಮಂದಿ ಸಾವಿಗೀಡಾಗಿದ್ದು, 1,800 ಮಂದಿ ಗಾಯಾಳುಗಳಾಗಿದ್ದಾರೆ. ಈ ಕಾಳಗದಲ್ಲಿ ಆಸ್ಪತ್ರೆಗಳು ಹಾನಿಗೀಡಾಗಿದ್ದು, ವೈದ್ಯಕೀಯ ಸಾಮಗ್ರಿ ಹಾಗೂ ಆಹಾರ ಪೂರೈಕೆಯಲ್ಲಿ ವ್ಯತ್ಯಯವುಂಟಾಗಿದೆ ಎಂದು ವರದಿಯಾಗಿದೆ. 

2021ರಲ್ಲಿ ಕ್ಷಿಪ್ರ ಕ್ರಾಂತಿಯ ಮೂಲಕ ಅಧಿಕಾರವನ್ನು ವಶಪಡಿಸಿಕೊಂಡಿದ್ದ ಎರಡು ಸೇನಾ ಪಡೆಗಳ ಮುಖ್ಯಸ್ಥರ ನಡುವೆ ಅಧಿಕಾರಕ್ಕಾಗಿ ನಡೆಯುತ್ತಿದ್ದ ಹಗ್ಗಜಗ್ಗಾಟವು ಮಾರಣಾಂತಿಕ ಹಿಂಸಾಚಾರವಾಗಿ ಸ್ಫೋಟಗೊಂಡಿದ್ದು, ಸುಡಾನ್ ಸೇನಾ ಮುಖ್ಯಸ್ಥ ಮುಹಮ್ಮದ್ ಫತಾ ಅಲ್-ಬುರ್ಹಾನ್ ಹಾಗೂ ಶಕ್ತಿಶಾಲಿ ಅರೆ ಸೇನಾ ಪಡೆಯಾದ ಕ್ಷಿಪ್ರ ನೆರವು ಪಡೆಯ ಮುಖ್ಯಸ್ಥರಾದ ಅವರ ಸಹಾಯಕ ಸೇನಾಧಿಕಾರಿ ಮುಹಮ್ಮದ್ ಹಮ್ದನ್ ಡಾಂಗ್ಲೊ ನಡುವೆ ಹಣಾಹಣಿ ನಡೆಯುತ್ತಿದೆ.

ತೀವ್ರ ಅಸ್ಥಿರತೆ ಎದುರಿಸುತ್ತಿರುವ ಸುಡಾನ್ ದೇಶದ ರಾಜಧಾನಿಯಲ್ಲಿ ನಡೆಯುತ್ತಿರುವ ಕಾಳಗವು ಅಭೂತಪೂರ್ವವಾಗಿದ್ದು, ಕದನ ವಿರಾಮ ಘೋಷಿಸುವಂತೆ ಪ್ರಾದೇಶಿಕ ಹಾಗೂ ಜಾಗತಿಕ ರಾಯಭಾರ ಮಾತುಕತೆಗಳು ನಡೆಯುತ್ತಿದ್ದರೂ ಕಾಳಗವು ಮತ್ತಷ್ಟು ಸುದೀರ್ಘ ಕಾಲ ಮುಂದುವರಿಯುವ ಸಾಧ್ಯತೆ ಇದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ದೇಶಾದ್ಯಂತ ಕಾಳಗ ಹಬ್ಬಿದ್ದು, ಇದರಿಂದ ಪ್ರಾದೇಶಿಕ ಪ್ರಕ್ಷುಬ್ಧತೆ ಉಂಟಾಗುವ ಸಾಧ್ಯತೆ ಇದೆ ಎಂಬ ಕಳವಳ ವ್ಯಕ್ತವಾಗಿದೆ.

ಪವಿತ್ರ ರಂಝಾನ್ ಮಾಸದ ಕೊನೆಯ ದಿನಗಳನ್ನು ಯುದ್ಧ ಟ್ಯಾಂಕ್‌ಗಳು ರಸ್ತೆಗಳಲ್ಲಿ ಸಾಗುತ್ತಿರುವುದು, ಕಟ್ಟಡಗಳು ನಡುಗುತ್ತಿರುವುದು, ಗಾಳಿಯಲ್ಲಿ ಹಾರುತ್ತಿರುವ ಮದ್ದುಗುಂಡುಗಳ ಸ್ಫೋಟದಿಂದ ಸೃಷ್ಟಿಯಾದ ಬೆಂಕಿಯಿಂದ ಹೊಗೆಯೇಳುತ್ತಿರುವ ದೃಶ್ಯಗಳನ್ನು ರಾಜಧಾನಿಯ ನಿವಾಸಿಗಳು ಭಯಭೀತರಾಗಿ ತಮ್ಮ ಮನೆಯ ಕಿಟಕಿಗಳಿಂದ ಇಣುಕಿ ನೋಡುತ್ತಾ ಕಳೆಯುತ್ತಿದ್ದಾರೆ.

ಈ ಕಾಳಗದಲ್ಲಿ ವಾಯು ದಾಳಿ, ಶಸ್ತ್ರಾಸ್ತ್ರಗಳು ಹಾಗೂ ಭಾರಿ ಗುಂಡಿನ ದಾಳಿ ನಡೆಯುತ್ತಿದೆ.