ಬಿಹಾರ ರಾಮನವಮಿ ಗಲಭೆಗಳ ಕುರಿತು ಸತ್ಯಶೋಧನಾ ವರದಿ ಬಿಡುಗಡೆಗೊಳಿಸಿದ ಎಪಿಸಿಆರ್‌

‌ಪಾಟ್ನಾ: ಈ ವರ್ಷ ನಡೆದ ರಾಮನವಮಿ ಮೆರವಣಿಗೆಗಳ ಸಂದರ್ಭ ಬಿಹಾರದ ಶರೀಫ್‌ ಮತ್ತು ಸಸಾರಾಂ ಪ್ರದೇಶಗಳಲ್ಲಿ ವ್ಯಾಪಕ ಗಲಭೆಗಳು ನಡೆದು ಮುಸ್ಲಿಮರ ಆಸ್ತಿಪಾಸ್ತಿಗಳಿಗೆ ಬೆಂಕಿಹಚ್ಚಲಾಗಿತ್ತು. ಉದ್ರಿಕ್ತರ ಗುಂಪು ಶತಮಾನದ ಇತಿಹಾಸವಿರುವ ಅಝಿಝಿಯಾ ಮದರಸಾ ಕಟ್ಟಡಕ್ಕೂ ಬೆಂಕಿ ಹಚ್ಚಿ 4500 ಪುಸ್ತಕಗಳನ್ನು ನಾಶಗೊಳಿಸಿತ್ತು ಎಂದು ವರದಿಯಾಗಿತ್ತು.

ಈ ಘಟನೆಗಳ ತನಿಖೆ ಹಾಗೂ ಸತ್ಯಶೋಧನೆಗಾಗಿ ಅಸೋಸಿಯೇಶನ್‌ ಫಾರ್‌ ಪ್ರೊಟೆಕ್ಷನ್‌ ಆಫ್ ಸಿವಿಲ್‌ ರೈಟ್ಸ್‌ ಸತ್ಯ ಶೋಧಾ ತಂಡ ಬಾಧಿತ ಸ್ಥಳಗಳಿಗೆ ಭೇಟಿ ನೀಡಿ ಗಲಭೆಯಿಂದ ಬಾಧಿತ ಕುಟುಂಬಗಳ ಸದಸ್ಯರನ್ನು ಭೇಟಿಯಾಗಿತ್ತು. ಈ ಗಲಭೆಗಳ ನಿಯಂತ್ರಣಕ್ಕೆ ರಾಜ್ಯ ಸರ್ಕಾರ ಸಂಪೂರ್ಣವಾಗಿ ವಿಫಲವಾಗಿತ್ತು ಹಾಗೂ ಬಜರಂಗದಳ ಕಾರ್ಯಕರ್ತರು ಪೊಲೀಸರ ಎದುರೇ ಧ್ವಜ ಹಾರಿಸಿದ್ದರೂ ಯಾರೂ ಅವರನ್ನು ತಡೆದಿರಲಿಲ್ಲ ಎಂಬ ಅಂಶವನ್ನು ಸತ್ಯಶೋಧನಾ ತನಿಖೆ ಕಂಡುಕೊಂಡಿದೆ. ಘಟನೆ ನಡೆದು ಐದಾರು ಗಂಟೆಗಳ ನಂತರ ಪೊಲೀಸರು ಸ್ಥಳಕ್ಕೆ ಆಗಮಿಸಿದ್ದರು ಎಂಬ ಅಂಶವೂ ಬಯಲಾಗಿದೆ.

ಗಲಭೆಯ ಸಂತ್ರಸ್ತರಿಗೆ ಹಾಗೂ ತಮ್ಮ ಜೀವನೋಪಾಯ, ಮನೆಗಳನ್ನು ಕಳೆದುಕೊಂಡವರಿಗೆ ಪರಿಹಾರ ನೀಡಬೇಕೆಂದೂ ವರದಿಯಲ್ಲಿ ಶಿಫಾರಸು ಮಾಡಲಾಗಿದೆ.

ಸತ್ಯಶೋಧನಾ ತಂಡದ ಸದಸ್ಯರು ಪತ್ರಿಕಾಗೋಷ್ಠಿ ನಡೆಸಿ ಹಲವು ವಿಚಾರಗಳತ್ತ ಬೆಳಕು ಚೆಲ್ಲಿದರು.

ಹಿರಿಯ ಪತ್ರಕರ್ತ ಪ್ರಶಾಂತ್‌ ಟಂಡನ್‌ ಮಾತನಾಡಿ, ಬಿಹಾರದಲ್ಲಿ ನಡೆದ  ಈ ಹಿಂಸಾಚಾರ ಪೂರ್ವಯೋಜಿತ ಕೃತ್ಯವಾಗಿತ್ತು. 2018ರಲ್ಲಿ ಇದೇ ರೀತಿ ಹಿಂಸಾಚಾರ ನಡೆದಾಗ ತಕ್ಷಣ ನಿಯಂತ್ರಿಸಲಾಗಿತ್ತು ಎಂಬುದನ್ನು ಉಲ್ಲೇಖಿಸಿದರು.

ವಕೀಲ ಮೊಬಶಿರ್‌ ಅನೀಖ್‌ ಅವರು 2018ರ ವರದಿ ಮತ್ತು ಶಿಫಾರಸುಗಳನ್ನು ಉಲ್ಲೇಖಿಸಿದರಲ್ಲದೆ 2023 ರಲ್ಲಿ ಶಾಂತಿ ಸಮಿತಿ ಸೂಚನೆಗಳನ್ನು ಪಾಲಿಸಲು ಕ್ರಮಕೈಗೊಳ್ಳಲಾಗಿರಲಿಲ್ಲ ಎಂದರು. ಸ್ಥಳೀಯ ರಾಜಕಾರಣಿಗಳ ಮೌನ ಹಾಗೂ ಪೊಲೀಸರ ಪಕ್ಷಪಾತದ ಕ್ರಮವನ್ನೂ ಅವರು ಪ್ರಶ್ನಿಸಿದರು.

ಪತ್ರಕರ್ತೆ ಶಾ ಸಿಂಗ್ ಮಾತನಾಡಿ, "ಹಿಂಸಾಚಾರ ಪೂರ್ವಯೋಜಿತವಾಗಿತ್ತು ಹಾಗೂ ರಾಜಕಾರಣಿಗಳು ಸಹಿತ ಇದರ ಹಿಂದಿರುವವರನ್ನು ಜವಾಬ್ದಾರರನ್ನಾಗಿಸಬೇಕು" ಎಂದು ಹೇಳಿದರು.

ಪ್ರೊ. ಅಪೂರ್ವಾನಂದ ಮಾತನಾಡಿ, ಬಿಹಾರದಲ್ಲಿ ರಾಮ ನವಮಿ ಮೆರವಣಿಗೆಗಳನ್ನು ಮುಸ್ಲಿಮರ ವಿರುದ್ಧ ಹಿಂಸೆ ಉದ್ದೇಶಕ್ಕಾಗಿ ಬಳಸಲಾಗುತ್ತದೆ ಎಂದರು.

ಹಿರಿಯ ಪತ್ರಕರ್ತ ಊರ್ಮಿಳೇಶ್‌ ಮತ್ತು ಹಿರಿಯ ವಕೀಲ ಸಂಜಯ್‌ ಹೆಗ್ಡೆ ಕೂಡ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.

ಬಿಹಾರದಲ್ಲಿ ರಾಮನವಮಿ ಸಂದರ್ಭ ನಡೆದ ʻಪೂರ್ವಯೋಜಿತʼ ಹಿಂಸಾಚಾರದ ಬಗ್ಗೆ ಸತ್ಯಶೋಧನಾ ತಂಡದ ಎಲ್ಲಾ ಸದಸ್ಯರು ಕಳವಳ ವ್ಯಕ್ತಪಡಿಸಿ, ಈ ರೀತಿಯ ಹಿಂಸೆಯನ್ನು ಭವಿಷ್ಯದಲ್ಲಿ ತಡೆಯುವ ಮತ್ತು ಜಾತ್ಯತೀತತೆಯನ್ನು ಉತ್ತೇಜಿಸುವ ಕ್ರಮಕೈಗೊಳ್ಳಬೇಕೆಂದು ಆಗ್ರಹಿಸಿದರು.