ಬ್ರಾಹ್ಮಣ ಮತಗಳನ್ನು ಸೆಳೆಯಲು ಪ್ರಮುಖ ಘೋಷಣೆ ಮಾಡಿದ ಮಧ್ಯಪ್ರದೇಶ ಸರಕಾರ: ವರದಿ

ಭೋಪಾಲ್: ಮಧ್ಯಪ್ರದೇಶದ ಶಿವರಾಜ್ ಸಿಂಗ್ ಚೌಹಾಣ್ ( Shivraj Singh Chouhan)ನೇತೃತ್ವದ ಸರಕಾರ, ವಿಧಾನಸಭಾ ಚುನಾವಣೆಗೆ  ಕೆಲವು ತಿಂಗಳುಗಳಿರುವಾಗ ಬ್ರಾಹ್ಮಣರನ್ನು ಓಲೈಸಲು ಸಮುದಾಯಕ್ಕಾಗಿ ಕಲ್ಯಾಣ ಮಂಡಳಿಯನ್ನು ಸ್ಥಾಪಿಸಲು ಮುಂದಾಗಿದೆ ಎಂದು ndtv.com ವರದಿ ಮಾಡಿದೆ.

ಇದಲ್ಲದೆ, ಇಂದೋರ್‌ನ ಜನಪಾವ್‌ನಲ್ಲಿ ಭಗವಾನ್ ಪರಶುರಾಮ ಲೋಕ ಧಾರ್ಮಿಕ ಕಾರಿಡಾರ್ ಅನ್ನು ಅಭಿವೃದ್ಧಿಪಡಿಸುವುದಾಗಿ ಸರಕಾರ ಘೋಷಿಸಿದೆ. ಏತನ್ಮಧ್ಯೆ, ದೇವಾಲಯಗಳಿಗೆ ತಮ್ಮ ಸ್ವಂತ ಭೂಮಿಯ ಮೇಲೆ ಹೆಚ್ಚಿನ ಅಧಿಕಾರವನ್ನು ನೀಡಲಾಗಿದೆ.

"ದೇವಾಲಯಗಳ ಚಟುವಟಿಕೆಗಳ ಮೇಲೆ ಸರಕಾರವು ಯಾವುದೇ ನಿಯಂತ್ರಣವನ್ನು ಹೊಂದಿರುವುದಿಲ್ಲ ಹಾಗೂ  ದೇವಾಲಯದ ಭೂಮಿಯ ಹರಾಜನ್ನು ಜಿಲ್ಲಾಧಿಕಾರಿಗಳ ಬದಲಿಗೆ ಅರ್ಚಕರಿಂದ ಮಾಡಲು  ನಾವು ನಿರ್ಧರಿಸಿದ್ದೇವೆ. ಬ್ರಾಹ್ಮಣರು ಯಾವಾಗಲೂ ಧರ್ಮ ಹಾಗೂ ಸಂಸ್ಕೃತಿಯನ್ನು ರಕ್ಷಿಸಿದ್ದಾರೆ. ಆದ್ದರಿಂದ ಅವರ ಕಲ್ಯಾಣಕ್ಕಾಗಿ ನಾವು 'ಬ್ರಾಹ್ಮಣ ಕಲ್ಯಾಣ ಮಂಡಳಿ' ಸ್ಥಾಪಿಸುತ್ತೇವೆ" ಎಂದು ಚೌಹಾಣ್ ಹೇಳಿದರು.

ಮಧ್ಯಪ್ರದೇಶವು ಎರಡು ಜ್ಯೋತಿರ್ಲಿಂಗಗಳನ್ನು ಒಳಗೊಂಡಂತೆ 21,104 ದೇವಾಲಯಗಳನ್ನು ಹೊಂದಿದೆ. ಈ ಪೈಕಿ 1,320 ದೇವಸ್ಥಾನಗಳು 10 ಎಕರೆಗೂ ಹೆಚ್ಚು ಕೃಷಿ ಭೂಮಿ ಹೊಂದಿವೆ. ಕೃಷಿ ಭೂಮಿ ಇಲ್ಲದ ದೇವಸ್ಥಾನಗಳ  ಅರ್ಚಕರಿಗೆ ಮಾಸಿಕ  5,000 ರೂ. ಗೌರವಧನ ನೀಡಲಾಗುತ್ತದೆ.

ರಾಜ್ಯ ಸರಕಾರದ  ಈ ಕ್ರಮವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ, ವಿಶೇಷವಾಗಿ ಬ್ರಾಹ್ಮಣರು ರಾಜ್ಯದ ಮತದಾರರಲ್ಲಿ ಕೇವಲ 5 ರಿಂದ 6 ಪ್ರತಿಶತದಷ್ಟು ಮಾತ್ರ ಇದ್ದಾರೆ.

ಮಧ್ಯಪ್ರದೇಶದ  ಸತ್ನಾ ಮತ್ತು ರೇವಾ ಜಿಲ್ಲೆಗಳ ಕೆಲವು ವಿಧಾನಸಭಾ ಕ್ಷೇತ್ರಗಳಲ್ಲಿ ಬ್ರಾಹ್ಮಣರ ಜನಸಂಖ್ಯೆಯು ಶೇಕಡಾ 40 ದಾಟಿದೆ.

2018 ರಲ್ಲಿ ವಿಂಧ್ಯ ಪ್ರದೇಶವು ಕಾಂಗ್ರೆಸ್ ಪೂರ್ಣ ಬಹುಮತದೊಂದಿಗೆ ಅಧಿಕಾರಕ್ಕೆ ಮರಳದಂತೆ ತಡೆದಿತ್ತು. ಈ ಪ್ರದೇಶವು ಈಗ ಚುನಾವಣೆಗೆ ಒಳಪಡುವ ರಾಜ್ಯದ ಅತ್ಯಂತ ಕುತೂಹಲಕಾರಿ ಯುದ್ಧಭೂಮಿಯಾಗಿ ಹೊರಹೊಮ್ಮುತ್ತಿದೆ.

2018 ರಲ್ಲಿ, ಬಿಜೆಪಿ ವಿಂಧ್ಯಾ  ಪ್ರದೇಶದಲ್ಲಿ 30 ರಲ್ಲಿ 24 ಸ್ಥಾನಗಳನ್ನು ಗೆದ್ದಿದೆ. ಕಾಂಗ್ರೆಸ್ ಸ್ಥಾನಗಳ ಸಂಖ್ಯೆ 11 ರಿಂದ 6 ಕ್ಕೆ ಇಳಿದಿತ್ತು.

ಆದರೆ ಇತ್ತೀಚಿನ  ದಿನಗಳಲ್ಲಿ ಅರವಿಂದ  ಕೇಜ್ರಿವಾಲ್ ಅವರ ಆಮ್ ಆದ್ಮಿಪಕ್ಷ  ಹಾಗೂ ಶಾಸಕ ನಾರಾಯಣ ತ್ರಿಪಾಠಿ ಅವರ ಹೊಸ ಪಕ್ಷಗಳು ವಿಂದ್ಯಾ ಪ್ರದೇಶದಲ್ಲಿ ನೆಲೆ ಕಂಡುಕೊಂಡಿರುವುದು  ಬಿಜೆಪಿಯ  ಕಳವಳಕ್ಕೆ ಕಾರಣವಾಗಿದೆ ಎಂದು ಮೂಲಗಳು ಸೂಚಿಸಿವೆ.