ಐಪಿಎಲ್: ಪಂಜಾಬ್ ಕಿಂಗ್ಸ್ ವಿರುದ್ಧ ಲಕ್ನೊಗೆ ಭರ್ಜರಿ ಜಯ

     ಮೊಹಾಲಿ, ಎ.28: ಮಾರ್ಕಸ್ ಸ್ಟೋನಿಸ್(72 ರನ್, 40 ಎಸೆತ, 6 ಬೌಂಡರಿ, 5 ಸಿಕ್ಸರ್), ಕೈಲ್ ಮೇಯರ್ಸ್(54 ರನ್, 24 ಎಸೆತ,7 ಬೌಂಡರಿ, 4 ಸಿಕ್ಸರ್)ಭರ್ಜರಿ ಅರ್ಧಶತಕ ಹಾಗೂ ಯಶ ಠಾಕೂರ್ ನೇತೃತ್ವದ ಬೌಲರ್‌ಗಳ ಶಿಸ್ತುಬದ್ಧ ದಾಳಿಯ ನೆರವಿನಿಂದ ಲಕ್ನೊ ಸೂಪರ್ ಜೈಂಟ್ಸ್ ತಂಡ ಆತಿಥೇಯ ಪಂಜಾಬ್ ಕಿಂಗ್ಸ್ ವಿರುದ್ಧ ಶುಕ್ರವಾರ ನಡೆದ 38ನೇ ಐಪಿಎಲ್ ಪಂದ್ಯದಲ್ಲಿ 56 ರನ್ ಅಂತರದಿಂದ ಜಯ ದಾಖಲಿಸಿದೆ. 8ನೇ ಪಂದ್ಯದಲ್ಲಿ 5ನೇ ಗೆಲುವು ದಾಖಲಿಸಿ 10 ಅಂಕ ಗಳಿಸಿದ ಕೆ.ಎಲ್. ರಾಹುಲ್ ಬಳಗ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಲಕ್ನೊ ತಂಡ ನಿಗದಿತ 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 257 ರನ್ ಗಳಿಸುವಲ್ಲಿ ಯಶಸ್ವಿಯಾಗಿದೆ.  ಇದು ಐಪಿಎಲ್ ಟೂರ್ನಿಯ ಇತಿಹಾಸದಲ್ಲಿ ತಂಡವೊಂದು ಗಳಿಸಿರುವ ಎರಡನೇ ಗರಿಷ್ಠ ಮೊತ್ತವಾಗಿದೆ. 2013ರಲ್ಲಿ ಆರ್‌ಸಿಬಿ ತಂಡವು ಪುಣೆ ವಾರಿಯರ್ಸ್ ವಿರುದ್ಧ 5 ವಿಕೆಟ್ ನಷ್ಟಕ್ಕೆ 263 ರನ್ ಕಲೆ ಹಾಕಿತ್ತು.

 ಗೆಲ್ಲಲು 258 ರನ್ ಗುರಿ ಪಡೆದ ಪಂಜಾಬ್ ಕಿಂಗ್ಸ್ 20 ಓವರ್‌ಗಳಲ್ಲಿ 201 ರನ್‌ಗೆ ಆಲೌಟ್ ಆಯಿತು. ಪಂಜಾಬ್ ಪರ ಅಥರ್ವ ಟೈಡ್(66 ರನ್, 36 ಎಸೆತ)ಸರ್ವಾಧಿಕ ಸ್ಕೋರ್ ಗಳಿಸಿದರು. ಸಿಕಂದರ್ ರಝಾ(36ರನ್), ಜಿತೇಶ್ ಶರ್ಮಾ(24 ರನ್), ಲಿವಿಂಗ್‌ಸ್ಟೋನ್(23 ರನ್) ಹಾಗೂ ಸ್ಯಾಮ್ ಕರನ್(21 ರನ್)ಎರಡಂಕೆಯ ಸ್ಕೋರ್ ಗಳಿಸಿದರು.

ಲಕ್ನೊ ಪರ ಯಶ್ ಠಾಕೂರ್(4-37) ಯಶಸ್ವಿ ಬೌಲರ್ ಎನಿಸಿಕೊಂಡರು. ನವೀನ್‌ವುಲ್ ಹಕ್(3-30) ಹಾಗೂ ರವಿ ಬಿಷ್ಣೋಯ್(2-41)ಐದು ವಿಕೆಟ್ ಹಂಚಿಕೊಂಡರು.