'ಚಾಲೆಂಜ್ ವೋಟ್, ಟೆಂಡರ್ ವೋಟ್': ಸಾಮಾಜಿಕ ತಾಣದಲ್ಲಿ ಹರಿದಾಡುತ್ತಿರುವ ಸಂದೇಶದಲ್ಲಿ ಸುಳ್ಳು ಮಾಹಿತಿ !

ಹೊಸದಿಲ್ಲಿ: ಮತದಾನ ಪ್ರಕ್ರಿಯೆಯ ಬಗ್ಗೆ ನಕಲಿ ಮಾಹಿತಿಯಿರುವ ಸಂದೇಶವೊಂದು ವಾಟ್ಸ್ ಆ್ಯಪ್‌ ನಲ್ಲಿ ಹರಿದಾಡುತ್ತಿದೆ. ಭಾರತದ ಮತದಾನ ಪ್ರಕ್ರಿಯೆಯ ಬಗ್ಗೆ, ಅದರಲ್ಲೂ ವಿಶೇಷವಾಗಿ "ಚಾಲೆಂಜ್ ವೋಟ್" ಮತ್ತು "ಟೆಂಡರ್ ವೋಟ್" ಪರಿಕಲ್ಪನೆಗಳ ಬಗ್ಗೆ ಸುಳ್ಳು ಹೇಳಿಕೆಗಳನ್ನು ಈ ಸಂದೇಶವು ಹರಡುತ್ತಿದೆ. 

ಒಂದು ವೇಳೆ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರಿಲ್ಲದಿದ್ದರೆ, ಮತದಾರರು ತಮ್ಮ ಆಧಾರ್ ಕಾರ್ಡ್ ಅಥವಾ ಮತದಾರರ ಗುರುತಿನ ಚೀಟಿಯನ್ನು ತೋರಿಸಿ “ಚಾಲೆಂಜ್‌ ವೋಟ್‌” ಗಾಗಿ ಮನವಿ ಮಾಡಲು ಈ ವೈರಲ್‌ ಸಂದೇಶದಲ್ಲಿ ಸಲಹೆ ನೀಡಲಾಗಿದೆ. ಆದರೆ, ವಾಸ್ತವದಲಿ, ಮತದಾರರ ಪಟ್ಟಿಯಲ್ಲಿ ಹೆಸರಿಲ್ಲದ ಯಾವುದೇ ವ್ಯಕ್ತಿಗೆ ಮತದಾನ ಮಾಡುವ ಅವಕಾಶವಿರುವುದಿಲ್ಲ. 

ವಾಸ್ತವದಲ್ಲಿ “ಚಾಲೆಂಜ್‌ ವೋಟ್” ಎಂದರೆ, ಮತದಾನ ಗಟ್ಟೆಯಲ್ಲಿರುವ ಏಜೆಂಟರುಗಳಿಗಿರುವ ಅವಕಾಶವಾಗಿದೆ. ಒಂದು ವೇಳೆ ಗುರುತಿನ ಚೀಟಿಯೊಂದಿಗೆ  ಮತದಾರನ ಚಹರೆ ಹೋಲಿಕೆಯಾಗದಿದ್ದರೆ, ಬೂತ್‌ ಏಜೆಂಟರುಗಳು ತಕರಾರು ಎತ್ತಬಹುದು, ಅದನ್ನು ಅಧಿಕಾರಿಗಳು ಪರಿಶೀಲನೆ ನಡೆಸಬೇಕಾಗುತ್ತದೆ. ಈ ಪ್ರಕ್ರಿಯೆಯನ್ನು ʼಚಾಲೆಂಜ್‌ ವೋಟ್‌ʼ ಎನ್ನಲಾಗುತ್ತದೆ. ಹಾಗಾಗಿ, ವೈರಲ್‌ ಸಂದೇಶದಲ್ಲಿರುವ ಚಾಲೆಂಜ್‌ ವೋಟ್‌ ಪರಿಕಲ್ಪನೆಯೇ ತಪ್ಪಾಗಿದೆ.  ಅಲ್ಲದೆ, ಸಂದೇಶದಲ್ಲಿ ವಿವರಿಸಿದಂತೆ ಚುನಾವಣಾ ನಿಯಮಗಳು 1961 ರ ಸೆಕ್ಷನ್ 49A ಅಡಿಯಲ್ಲಿ "ಚಾಲೆಂಜ್‌ ವೋಟ್‌" ಪರಿಕಲ್ಪನೆಯು ಬರುವುದಿಲ್ಲ. 

ತಮ್ಮ ಮತವನ್ನು ಬೇರೊಬ್ಬರು ಚಲಾಯಿಸಿದ್ದಾರೆ ಎಂದು ಯಾವುದಾದರೂ ಮತದಾರ ಕಂಡುಕೊಂಡರೆ, ಆ ಮತದಾರ "ಟೆಂಡರ್ ವೋಟ್" ಗೆ ವಿನಂತಿಸಬಹುದು ಎಂದು ಸಂದೇಶದಲ್ಲಿ ಹೇಳಿರುವುದು ಸತ್ಯವಾಗಿದೆ. ಆದಾಗ್ಯೂ, ಯಾವುದೇ ಮತಗಟ್ಟೆಯಲ್ಲಿ 14% ಕ್ಕಿಂತ ಹೆಚ್ಚು ಟೆಂಡರ್ ಮತಗಳನ್ನು ದಾಖಲಿಸಿದರೆ ಮರುಚುನಾವಣೆ ನಡೆಸಲಾಗುತ್ತದೆ ಎಂಬ ಪ್ರತಿಪಾದನೆಯು ಸುಳ್ಳು. ಟೆಂಡರ್ ಮಾಡಿದ ಮತಗಳು ಚುನಾವಣೆಯ ಫಲಿತಾಂಶದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿರುವಾಗ ಮಾತ್ರ ಅದನ್ನು ಪರಿಗಣಿಸಲಾಗುತ್ತದೆ. ಉದಾಹರಣೆಗೆ, ಟೆಂಡರ್‌ ಮಾಡಿದ ಮತಗಳು ಗೆಲುವಿನ ಅಂತರಕ್ಕಿಂತ ಹೆಚ್ಚಿದ್ದರೆ ಮಾತ್ರ ಅವುಗಳನ್ನು ಪರಿಗಣಿಸಲಾಗುತ್ತದೆ. ಅಲ್ಲದೆ, ಚುನಾವಣಾ ಆಯೋಗದ ಕೈಪಿಡಿಯು ಮರುಮತದಾನ ನಡೆಸಲು ಯಾವುದೇ ನಿರ್ದಿಷ್ಟ ಶೇಕಡಾವಾರು ಪ್ರಮಾಣವನ್ನು ಉಲ್ಲೇಖಿಸಿಲ್ಲವಾದ್ದರಿಂದ ಈ ಪ್ರತಿಪಾದನೆಯು ಸುಳ್ಳು. 

ಈ ಹಿಂದೆ, ಮತದಾರರ ಪಟ್ಟಿಯಲ್ಲಿ ಹೆಸರು ಇಲ್ಲದವರು ಮತ ಚಲಾಯಿಸಲು ಸಾಧ್ಯವಿಲ್ಲ ಎಂದು ಭಾರತೀಯ ಚುನಾವಣಾ ಆಯೋಗದ (ಇಸಿಐ) ವಕ್ತಾರೆ ಶೆಫಾಲಿ ಶರಣ್ ಖಚಿತಪಡಿಸಿದ್ದರು. ಆದ್ದರಿಂದ, ಮತದಾರರ ಪಟ್ಟಿಯಲ್ಲಿಲ್ಲದ ಮತದಾರರು ತಮ್ಮ ಆಧಾರ್ ಕಾರ್ಡ್ ಅಥವಾ ಮತದಾರರ ಗುರುತಿನ ಚೀಟಿಯನ್ನು ಬಳಸಿಕೊಂಡು "ಚಾಲೆಂಜ್‌ ವೋಟ್" ಕೇಳಬಹುದು ಎಂಬ ಹೇಳಿಕೆಯು ತಪ್ಪು ದಾರಿಗೆಳೆಯುವ ಹಾಗೂ ಸುಳ್ಳು ಪ್ರತಿಪಾದನೆಯಾಗಿದೆ.
 
ಮತದಾನ ಪ್ರಕ್ರಿಯೆಯ ಬಗ್ಗೆ ತಪ್ಪು ಮಾಹಿತಿ ಮತ್ತು ಸುಳ್ಳು ಮಾಹಿತಿಗಳನ್ನು ಹರಡುವುದು ಮತದಾರರ ವಿಶ್ವಾಸದ ಮೇಲೆ ಪರಿಣಾಮ ಬೀರಬಹುದು, ಅಲ್ಲದೆ, ಜನರು ತಮ್ಮ ಮತದಾನದ ಹಕ್ಕನ್ನು ಚಲಾಯಿಸದಂತೆ ನಿರುತ್ಸಾಹಗೊಳಿಸಬಹುದು. ಆದ್ದರಿಂದ, ಇತರರೊಂದಿಗೆ ಹಂಚಿಕೊಳ್ಳುವ ಮೊದಲು ಮಾಹಿತಿಯನ್ನು ಪರಿಶೀಲಿಸುವುದು ಅತ್ಯಗತ್ಯವಾಗಿದೆ. ಮತದಾರರು ತಮ್ಮ ಸ್ಥಳೀಯ ಚುನಾವಣಾ ಅಧಿಕಾರಿಗಳನ್ನು ಅಥವಾ ಭಾರತೀಯ ಚುನಾವಣಾ ಆಯೋಗವನ್ನು ಸಂಪರ್ಕಿಸಿ ಮತದಾನ ಪ್ರಕ್ರಿಯೆಯ ಬಗ್ಗೆ ಯಾವುದೇ ಅನುಮಾನಗಳಿದ್ದರೆ ಪರಿಹರಿಸಿಕೊಳ್ಳಬಹುದಾಗಿದೆ.