ಖ್ಯಾತ ಇತಿಹಾಸಗಾರ ರಣಜಿತ್ ಗುಹಾ ಇನ್ನಿಲ್ಲ
ಕೊಲ್ಕತ್ತಾ: ಖ್ಯಾತ ಇತಿಹಾಸ ತಜ್ಞ ರಣಜಿತ್ ಗುಹಾ ಗುಹಾ ಶನಿವಾರ ತಮ್ಮ ಆಸ್ಟ್ರಿಯಾ ನಿವಾಸದಲ್ಲಿ ಕೊನೆಯುಸಿರೆಳೆದರು. ಮುಂದಿನ ತಿಂಗಳು ಅವರು ತಮ್ಮ 100ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳಬೇಕಿತ್ತು. ಸಾಮ್ರಾಜ್ಯಶಾಹಿ ಆಡಳಿತದ ಬಳಿಕ ದಕ್ಷಿಣ ಏಷ್ಯಾದ ಇತಿಹಾಸದ ಮೇಲೆ ದಟ್ಟ ಪ್ರಭಾವ ಬೀರಿದ ಕಾರಣಕ್ಕಾಗಿ ಭಾರತ ಹಾಗೂ ವಿಶ್ವಾದ್ಯಂತ ಅವರು ಗೌರವಿಸಲ್ಪಟ್ಟಿದ್ದರು.
ಗುಹಾ ಅವರ ಪ್ರಭಾವ ಕೇವಲ ಇತಿಹಾಸ ಕಾರ್ಯಕ್ಷೇತ್ರಕ್ಕೆ ಸೀಮಿತವಾಗಿರದೇ, ಸಮಾಜ ವಿಜ್ಞಾನದ ವೈವಿಧ್ಯಮಯ ಶಾಖೆಗಳಿಗೆ ಪಸರಿಸಿತ್ತು. ದುರ್ಬಲರ ಜನಜೀವನವನ್ನು ಬಿಂಬಿಸುವ ತಮ್ಮ ದೃಷ್ಟಿಕೋನಕ್ಕಾಗಿ ಅಪಾರ ಮನ್ನಣೆ ಗಳಿಸಿದ್ದರು.
ಸಬಾಲ್ಟರ್ನ್ ಸ್ಟಡೀಸ್ ಸ್ಕೂಲ್ನ ಸಂಸ್ಥಾಪಕರಲ್ಲೊಬ್ಬರಾಗಿದ್ದ ಗುಹಾ ಅವರಿಗೆ ಮುನ್ನ ಜಾತಿ, ವರ್ಗ ಮತ್ತು ಲಿಂಗ ಆಧರಿತ ಅಧೀನತೆಯ ಕಾರಣದಿಂದ ಈ ವರ್ಗದ ಧ್ವನಿ ಮುಖ್ಯವಾಹಿನಿಯ ಇತಿಹಾಸ ಲೇಖಕರಿಂದ ಕಡೆಗಣಿಸಲ್ಪಟ್ಟಿತ್ತು ಎಂದು ಸಹೋದ್ಯೋಗಿಗಳು ನೆನಪಿಸಿಕೊಳ್ಳುತ್ತಾರೆ.
2018ರಲ್ಲಿ ಸಂದರ್ಶನಕ್ಕಾಗಿ ಗುಹಾ ಅವರನ್ನು ವಿಯೆನ್ನಾದಲ್ಲಿ ಭೇಟಿ ಮಾಡಿದ್ದ ರಾಜಕೀಯ ವಿಜ್ಞಾನ ತಜ್ಞ ಹಾಗೂ ಸಬಾಲ್ಟನ ಸ್ಟಡೀಸ್ ಗ್ರೂಪ್ನ ಸದಸ್ಯ ಪಾರ್ಥ ಚಟರ್ಜಿ ಹೇಳುವ ಪ್ರಕಾರ, "ತಮ್ಮ ಜೀವನದ ಕೊನೆಯಲ್ಲಿ ಅವರು ಶಿಕ್ಷಣ ಕ್ಷೇತ್ರದಿಂದ ದೂರವಾಗಿ ಸಂದರ್ಶನವನ್ನು ಇಷ್ಟಪಡುತ್ತಿರಲಿಲ್ಲ. ಆಗ ಸಂದರ್ಶನಕ್ಕೆ ಒಪ್ಪಿಕೊಂಡದ್ದೇ ಅಚ್ಚರಿಯಾಗಿತ್ತು. ಅವರ ಧ್ವನಿ ಕ್ಷೀಣಿಸಿ, ಇತ್ತೀಚಿನ ಘಟನಾವಳಿಗಳನ್ನು ಮರೆತರೂ, 50 ರಿಂದ 70 ವರ್ಷ ಹಳೆಯ ಘಟನೆಗಳನ್ನು ನೆನಪಿಸಿಕೊಳ್ಳುತ್ತಿದ್ದುದು ಅಚ್ಚರಿ ಮೂಡಿಸಿತ್ತು"
ಪೂರ್ವ ಬಂಗಾಳದ ಬೇಕರ್ಗಂಜ್ನಲ್ಲಿ 1923ರ ಮೇ 23ರಂದು ಜನಿಸಿದ ಅವರು, ಸಸೆಕ್ಸ್ ವಿವಿಯಲ್ಲಿ 1959ರಲ್ಲಿ ಇತಿಹಾಸ ಅಧ್ಯಯನ ಮಾಡಿದ್ದರು. ಗುಹಾ ಅವರ ಕೃತಿಗಳು ವಿಶ್ವಾದ್ಯಂತ ಮನ್ನಣೆ ಗಳಿಸಿದ್ದವು ಹಾಗೂ ಎಲ್ಲೆಡೆ ಇತಿಹಾಸದಲ್ಲಿ ದಮನಿತ ವರ್ಗಗಳ ಬಗೆಗಿನ ಚರ್ಚೆಗೆ ಇವರ ದೃಷ್ಟಿಕೋನವನ್ನು ಅನ್ವಯಿಸಲಾಗುತ್ತಿತ್ತು.